Qobe langa kufuze senze iinqunto. Ezinye kubulula ukuzenza njengokuthi sizokudlani nokuthi sizokulala nini. Ezinye zibudisi zingathinta ipilwethu, ithabo lethu, abantu esibathandako nendlela esilotjha ngayo uJehova. Sifuna iinqunto zethu zizuzise thina nemindenethu. Ngaphezu kwakho koke, sifuna iinqunto zethu zithabise uJehova. (Rom. 12:1, 2) Igadango eliqakathekileko kufumana imininingwana efaneleko. Kubayini kuqakathekile lokho? Cabanga ngomuntu ogulako otjhinga kudorhodera. Kghani udorhodera angenza isiqunto ngaphambi kobana ahlolisise umuntu ogulako nokuthi ambuze imibuzo efaneleko? Awa, angeze enze njalo. Udorhodera owazi umsebenzakhe uzokwenza isiqunto esihle nange afumana imininingwana efaneleko malungana nokugula okuphethe umuntu loyo. Nawe ngendlela efanako uzokufuna imininingwana efaneleko nawenza isiqunto. w25.01 14 ¶1-3

Khuyini esikwaziko ngesirhawu sakaJehova? UJehova utjengise njani ukuthi “akafisi namunye bona atjhabalale”? (2 Pit. 3:9) Cabanga ngomusakhe kilabo abenza isono esikhulu. IKosi uDavida yenza izono ezimbi khulu ezihlanganisa ukufeba nokubulala. UDavida watjhuguluka begodu uJehova waba nesirhawu wamlibalela. (2 Sam. 12:1-12) IKosi uManase beyikhohlakele khulu pheze ukuphila kwayo koke. Ngitjho nebujamenobo, uJehova waba nesirhawu, wayilibalela ngombana yatjhuguluka. (2 Kron. 33:9-16) Iimbonelwezi zitjengisa ukuthi uJehova uba nesirhawu nakutlhogekako. Uzokuvusa abantwabo ngombana bayazi ukuthi benze isono esimbi khulu begodu batjhuguluka. w24.05 4 ¶12

Ngemva kobana atjhaphulule abantu bakhe eGibhide, uJehova wakhetha abaphristi bona basebenze ethaberinakeli. AmaLevi bekenza umsebenzi etendeni elicwengileko. Kghani labo ebebasebenza ethaberinakeli namkha ebebakampe hlanu kwalo, bebatjhidelene khulu noJehova ukudlula abanye? Awa! UJehova akakhethululi. Boke ebebasekampeni bebanamathuba alinganako wokuthabela ubungani obutjhideleko noJehova. Ngokwesibonelo, uJehova waqinisekisa ukuthi isitjhaba soke siyakghona ukubona isika yelifu elikarisako nesika yomlilo ephezu kwethaberinakeli. (Eks. 40:38) Nalithoma ukukhamba, ngitjho nalabo ebebakampe kude nethaberinakeli bebakghona ukulibona, babuthelele izinto zabo, batlhatlhamule amatende wemindenabo begodu bakhambisane nesitjhaba soke. (Num. 9:15-23) Kuyafana nanamhlanjesi, uJehova angasitjheja bekasivikele ngendlela enethando, kunganandaba ukuthi sihlala kuphi. w24.06 4 ¶10-12