Indaba kaSolomoni isenza sitjheje lokho okungenzeka kinanyana ngubani olotjha uJehova. Angawela esonweni esikhulu, ngemva kwesikhathi azizwe ngasuthi lokho kwenzeke khonokho. Namkha angathi lokhu, “sekwazenzakalela.” Kodwana nakacabangisisa kuhle ngokwenzekileko, angabona ukuthi kungenzeka kunamagadango angakahlakaniphi awathetheko, amenze wagcine sele enze isono. Amagadango lawo angahlanganisa ukuba nabangani abakhohlakeleko, ukuzithabisa okungakahlwengeki namkha ukuba seendaweni ezisolekako, kungaba kukuba kizo bunqopha namkha nge-inthanethi. Kungenzeka besele alisile ukuthandaza, ukufunda iBhayibheli, ukuya esifundweni namkha ukutjhumayela. Njengesokana ekucocwe ngalo emtlolweni wezAga, isono salo asikenzeki khonokho. Khuyini esikufundako? Akukafuzi sibalekele ukwenza isono kwaphela kodwana namagadango angasenza sigcine sonile. Ngilelo iphuzu uSolomoni akhuluma ngalo ngemva kokuhlathulula okwenzeke esokaneni nemfazini okhohlakeleko.—Mat. 5:29, 30. w24.07 16 ¶10-11

Liyini igugweli? Msebenzi osindisa ukuphila wokutjhumayela umlayezo womBuso. (2 Kor. 4:1) Ziyini izitja zobumba? Zijamelele iinsebenzi zakaZimu ezitjhumayela iindaba ezimnandi kabanye. Ngesikhathi sakaPowula, abathengi nabathengisi bebasebenzisa imijeka ukufudusa izinto eziqakathekileko ezinjengokudla, iwayini nemali. Ngendlela efanako, nathi uJehova usinikele umsebenzi oqakathekileko womlayezo weendaba ezimnandi. UJehova angasisiza ngokusinikela amandla esiwatlhogako wokuragela phambili sitjhumayela. Ngasikhathi, singasaba abantu namkha sisabe ukungalalelwa. Singasihlula njani isitjhijilweso? Cabanga ngomthandazo wabapostoli lokha nabatjelwa ukuthi bangasatjhumayela. Kunokuthi basabe, babawa uJehova ukuthi abasize baragele phambili bakhuluma ngesibindi. UJehova waphendula umthandazwabo khonokho. (IzE. 4:18, 29, 31) Nangabe ngezinye iinkhathi ukusaba kuyakubamba, bawa uJehova akusize uthande abantu khulu kangangokuthi ungasabi ukubatjela iindaba ezimnandi. w24.04 16 ¶8-9

Ithando esinalo ngoJehova lisenza sicwengise igama lakhe. Okutjho bona sifuna ukutjela abantu ukuthi izinto ezimbi uSathana azikhuluma ngoJehova zimamala. (Gen. 3:1-5; Job. 2:4; Jwa. 8:44) Nasitjhumayelako sinesifiso sokutjela woke umuntu olalelako ukuthi ungubani uZimu nokuthi unjani. Sifuna woke umuntu azi ukuthi ubuntu bakhe obuphuma phambili lithando, indlela alawula ngayo ilungile begodu ifanele nokuthi umBuswakhe ingasi kade uzokuqeda koke ukutlhaga, ulethe ukuthula nethabo ebantwini. (Rhu. 37:10, 11, 29; 1 Jwa. 4:8) Nasitjela abantu ngezintwezi, sicwengisa igama lakaJehova. Kuyasithabisa ngombana senza lokho ekufuze sikwenze njengaboFakazi bakaJehova. w24.05 18 ¶12