Muhihiye ophavela omusuwela oratteene Yehova

1. Ninkhala sai nuupuwelaka osuwela wa Yehova, miruku ni itthu sipattunxe awe?

YEHOVA MULUKU ahu, onnisuwela itthu sootheene ni ookhalana miruku sinceene. Nave itthu sootheene sipanke awe ti sootikiniha vanceene. Nuupuwelaka itthu iya sootheene, ninnoona wiira na atthu acikhaani ohoolo wa Mpattuxa ahu. Nyuwo pooti wuupuwelaka ntoko murummwa Paulo, yoowo aalempe wiira: “Tthiri, mareeliho, ni ankhili, ni osuwela wa Muluku, ti sootepa waatta. Khuuvo oniwerya osuwelexa ophukela wawe, nave khuuvo oniwerya osuwela iphiro sawe!” — Arom. 11:​33, 34.

2. Etthu xeeni enooniherya wiira vanniweryaneya omusuwela Yehova?

² Nnaamwi nihirowaka owerya osuwela itthu sootheene voohimya sa Yehova, masi nnoowerya osuwela itthu sikina. Mwene Davidi, aahimuleela mwanawe aihaniwa Salomooni, wiira: “Mmusuwele Muluku a paapa anyu ni mmurumeeleke ni murima anyu wootheene . . . Vakhala wiira munomphavela, owo onimweemererya wiira mumphwanye”. (1 Wah. 28:9) Nuuvira iyaakha sinceene, murummwa Yohani aahiwuupuxerya makristau ohimyaka wiira nookhalana “ankhili wiira nimusuweleke Muluku eekeekhai.” (1 Yoh. 5:20) Nave, Yesu aahimmye wiira “ale Mwaana oniphavela awe waasuweliha”, anoowerya waasuwela ankhili a Yehova. — Math. 11:27.

3. Makoho xeeni ninrowa ahu othokorerya mwaha ola?

³ Atthu ootheene yiivaherenrye wa Yehova, annisuwela itthu sinceene voohimya sa Muluku. Masi hata vari siiso, omusuwela Muluku khonimala. (Yoh 17:3) Mwa ntakiheryo, khula okathi nnoopirisariki wiixutta itthu sinceene sinimuhakalaliha Yehova ni sinlipiha omwaamini wahu. Mwaha ola, nnoothokorerya makoho mararu, yaawo anrowa onikhaliherya omusuwela saana Yehova moohicikha vakhala wiira nipacenrye khalai omurumeela. Makoho ene taala: Onitaphulela exeeni omusuwela Yehova? Xeeni ninreerela ahu ohihiya omusuwela saana Yehova? Ni ninrowa owerya sai opaka eyo?

ONITAPHULELA EXEENI OMUSUWELA YEHOVA?

4. Omusuwela Yehova onitaphulela exeeni?

⁴ Wiira niixutte etthu enitaphulela aya omusuwela Yehova, ninrowa othokorerya etthu Yehova aaleihenrye awe ayuda yaarowa otthika weepotthani. Owo aahimmye so: “Miyo kinimwaavaha murima woophavela okisuwela, wiira miyo ka Yehova.” (Yer. 24:7) Veekeekhai, ale yaatthinke oBabiloonia yaanisuwela itthu sinceene voohimya sa Yehova. Masi nuumala otthika oBabiloonia, awo yaahaana ophavela omusuwela oratteene Yehova. Ereferensia emosa, ennitthokiherya mwaha ola, yiiraka: “Osuwela voohimya sa Muluku ni omusuwela Muluku itthu soovirikana. Naarowa olikanyiha ni ovirikana okhanle osoma moolumo anilavula sa ophenta ni omphenta mutthu.” Nave nihaana osuwela itthu sikina, ohiya paahi osuwela wiira Yehova ookhalana nsina ni wiira owo Muluku. Nave-tho, nihaana osuwela mikhalelo sawe.

5. Ntakiheryo na mwene Yosiya, ninniixuttiha exeeni sa omusuwela Yehova?

⁵ Vaavo nimmusuwela ahu Yehova, ninniixutta itthu sinimusivela ni itthu sihinimusivela ni ninnipaka itthu nittharaka malakiheryo awe. Nrowe nithokorerye ntakiheryo na mwene Yosiya. Biibiliya onihimya wiira: “Eyaakha ya neethanu neeraru ya olamulelo awe, nlelo ori ene mmiravo, aahipacerya omphavela Muluku a muhavinre awe, Davidi.” (2 Wah. 34:3) Masi Yosiya aahiixutta itthu sikina, orumeelaka Nuulumo na Muluku. Nave aaheettela itthu aixuttale awe. Omurumeelaka profeta Yeremiya, Yehova aahihimya wiira Yosiya “aanaakiherya exariya ni ororomeleya” ni aahiwaakiherya ale yaahaaxiwa ni yaahaawa. Nuumala-vo, Yehova aahihimya-tho wiira: “Okisuwela khahiyo ti siiso?” — Yer. 22:​15, 16.

6. Moovarihana ni Esaalimu 9:​10, omusuwela Yehova onnikhaliherya sai?

⁶ Musome Esaalimu 9:10. Akhala wiira nnootepa omusuwela Yehova, ninrowa otepaka omuroromela. Eyo ti etthu yiiraneyale ni murummwa Paulo. Okathi aatthukweliwe awe ni ohalaka vakhaani wiiviwa, Paulo aalempe so: “Nkinuuliwa muru. Tthiri, kinnimusuwela Muluku kinimukupali aka”. (2 Tim. 1:12) Okhala wiira Paulo aahiixutta itthu sinceene voohimya sa Yehova ni aahiweha moota Yehova aamukhaliherya awe, owo aahiwerya omuroromela ni murima wootheene. Paulo aanikupali wiira Yehova khaarowa omuliyala ni khaarowa oliyala itthu sooreera aavanre awe. Nave muhoolo, Muluku onrowa omuhihimuxa.

XEENI NINREERELA AHU OHIHIYA OMUSUWELA YEHOVA?

7. Nuumala omurumeela Yehova mwa iyaakha sinceene, etthu xeeni ekhanle oowiiraneya?

⁷ Okathi naapacenrye ahu wiixutta voohimya sa Yehova, naahiimananiha wiira nimusuwele. Masi nuuvira iyaakha sinceene nimurumeelaka, pooti ohiimananiha wiira nimusuwele oratteene. Mwaha wa xeeni? Mwaha woowi okathi nimmusoma ahu Biibiliya owaani aahiiso omithukumanoni, ikwaha sinceene nnuupuwela moota itthu nniixutta ahu sinrowa aya onikhaliherya aahiiso waakhaliherya atthu akina. Eyo etthu yooloka okhala wiira Biibiliya onintumererya wiira nihaana opaka eyo. (2 Tim. 3:​16, 17) Masi, sookhala itthu sikina sa efaita ninreerela ahu wuupuwelela, voohimya sa Mwaneene Biibiliya. (Esal. 25:​8-10) Tivonto, nihitepeke owehexexa moota itthu ninsoma ahu mbiibiliyani sinnikhaliherya aya aahiiso moota sinaakhaliherya aya atthu akina, nnaliyala wiikoha so: Etthu ela enisoma aka, enikiixuttiha exeeni voohimya sa Yehova Muluku?a

8. Okathi nimmusuwela ahu oratteene Yehova, exeeni enrowa wiiraneya? (Esaalimu 73:​24-28)

⁸ Akhala wiira nnoomusuwela oratteene Yehova, ompatthani ahu ni yena onrowa otepaka olipa. Mwa ntakiheryo, ompatthani anyu ni Yehova onikhala sai, okathi munimusoma anyu Biibiliya khula nihiku, oweha eprokaraama ya Broadcasting ya khula mweeri, omurowela asempeleeya aahiiso konkereesu? Okathi owo, ompatthani ahu ni Tiithi ihu a wiirimu onikhala woolipa. Mwaha wa xeeni? Mwaha woowi ninniixutta itthu sikina voohimya sa yena. Nto eyo enniniiriha onvuwiha ni omuxukhurela. Ninkhala ntoko Nasaalimu, yoowo uupuwelenle moota Yehova aamukhapelela awe, nto olepa so: “Muluku tonlipiha murima aka, ni tonlipana aka mahiku ootheene.” (Musome Esaalimu 73:​24-28.) Vaavo ninrowa ahu omusuwelaka oratteene Yehova, ninrowa otepaka omuxukhurela ni ompaka okhala mpatthani ahu muulupale.

9. Omuupuwela Yehova, onrowa onikhaliherya opaka exeeni? Nvahe nlikanyiho.

⁹ Biibiliya onihimya wiira “mmuupuweleke” Yehova. (Mir. 3:​5, 6) Eyo enitaphulela wiira nihaana wuupuwelela itthu nniixutta ahu voohimya sa Yehova ni woona moota onoonela awe itthu ninvara ahu. Niira siiso, nnoowerya opaka soothanla sooloka. Nkahaya muupuwele nlikanyiho nla: Anna ni arokora anceene annipweha efootu ya ole othelanne aya opuro aniwerya aya oweha ikwaha sinceene. Eyo ennaakhaliherya ikwaha sinceene omuupuwela ole athelanne aya ni wuupuwela wiira annimphenta vanceene. Nave ennaakhaliherya opaka soothanla sinimusivela ni osyaka opaka etthu yaarowa omuriipiha murima. Mwa enamuna emosa-ru, akhala wiira ikwaha sinceene ninnimuupuwela Yehova, eyo enoonikhaliherya opaka soothanla sinrowa omusivela. — Esal. 19:​13, 14.

10. Osuwela mikhalelo sa Yehova, onniiriha opaka exeeni?

¹⁰ Yehova onipanke iilattanihaka mmansawe, tivonto, ninniwerya wooniherya mikhalelo orina awe. (Maph. 1:26) Nave, vakhala wiira nnootepa osuwela mikhalelo sa Yehova, nnooweryaka omutakiha oratteene. Yesu aahaapwapwela alipa-oowiixuttiha Nlamulo ni afarisi, okhala wiira khiyaatakiha mikhalelo sa Yehova. Nnaamwi yaawehexexa itthu saamukhaani sa Nlamulo, awo yaanithanya “myaha suulupale sa Nlamulo, ntoko exariya, omoriwa ikharari ni ororomeleya.” (Math. 23:23) Hiyo khanimphavela waatakiha alipa-oowiixuttiha Nlamulo ni afarisi. Masi nimphavela woona moota malamulo ni malakiheryo ninsoma ahu mbiibiliyani, anniixuttiha aya voohimya sa Yehova. Niira siiso, nnoowerya otakiha mikhalelo sa Yehova. — 1 Yoh. 4:​8, 11.

NINROWA OMUSUWELA SAI ORATTEENE YEHOVA?

11. Ti pani opacenrye owiixuttihani voohimya sa Yehova?

¹¹ Ti pani opacenrye owiixuttihani voohimya sa Yehova? Pooti wiira mwiixuttihiwe ni anamuyari anyu. Awo aawiixuttihani myaha sa mbiibiliyani sinooniherya mikhalelo sa Muluku ni moota ori awe. Aahiiso pooti wiira Namoona a Yehova mukina towiixuttihaleni Biibiliya. Orumeelaka eliivuru Okumi Woohimala!, ole oosomihani Biibiliya, ohookhaliheryani osuwela soowiiraneya sinceene sa mbiibiliyani ni itthu Muluku opattunxe awe.b (Neh. 8:8; Mit. 14:17) Vano, ninrowa oweha etthu enrowa onikhaliherya ohihiya wiixutta voohimya sa Yehova.

12-13. Okathi nimmusoma ahu Biibiliya, exeeni nniixutta ahu voohimya sa Yehova? Nvahe ntakiheryo. (Yeremiya 39:​15-18) (Nwehe ya vakaapani.)

¹² Etthu yoopacerya enrowa onikhaliherya wiixutta itthu sikina voohimya sa Yehova, ori omusoma ni ophavela omwiiwexexa Biibiliya. Ikwaha sikina, Biibiliya onnilavula mooluluwanya mikhalelo sa Muluku. (Okhu. 34:​6, 7) Masi ikwaha sikina, Biibiliya onnaalavula atthu ni soothanla yaapanke aya. Okathi munisoma anyu soowiiraneya sa atthu awo, muupuweleleke etthu muniixutta anyu voohimya sa Yehova.

¹³ Nrowe niwehe ntakiheryo nimosa. Okathi munimusoma anyu Yeremiya 38:​6-13, nyuwo munniixutta sa Ebedi-Meleki a wEthiyopia, yoowo aamukhalihenrye profeta Yeremiya. Ti vookhweya oweha moota mukhanle anyu oomutakiha Ebedi-Meleki, yoowo aamukhalihenrye Yeremiya okathi vaaxankiha aya wooniherya olipa murima ni ophenta. Niireke yoowiiraneya ela, ennooniherya etthu nniixutta ahu voohimya sa Yehova? (Mmusome Yeremiya 39:​15-18.) Mwa ntakiheryo, iversiikulu xeeni sinooniherya wiira Yehova onnivaha efaita itthu arumeyi awe anipaka aya? Sinooniherya sai wiira Yehova Muluku a xariya? Nave sinooniherya sai wiira Yehova onnaakhapelela atthu ootheene ohiwehaka opuro onikhuma aya? Etthu xeeni ekina yoowiiraneya ela eniwiixuttihaayani voohimya sa Yehova? Khula okathi munimusoma anyu Biibiliya, nweheke mikhalelo sa Yehova muniixutta anyu. Nuumala-vo, mmuxukhureleke ni mmuleeleke wiira munimphenta vanceene mwaha wa mikhalelo sawe.

14. Wiira nittottele mureerelo itthu Yehova opattunxe awe, nihaana opaka exeeni?

¹⁴ Etthu yanenli enrowa onikhaliherya wiixutta voohimya sa Yehova, ori wuupuwelela itthu sipattunxe awe. (Esal. 145:​9, 10) Ohiya oweha paahi itthu Yehova opattunxe awe, nihaana opaka etthu ekina. Atthu akina, anniviriha okathi munceene, yiixuttaka itthu Muluku opattunxe awe. Masi khaniphavela woona mikhalelo sa Muluku sinooneya ni soopattuxiwa iyo, nnakhala ophavela osuwela akhala wiira ole opattunxe ookhala. Murummwa Paulo aalempe wiira “mikhalelo sa Muluku nihinwerya ahu woona, ninnisuwela naasomaka moota olumwenku opattuxiwe aya. Hiyo nnoowerya wiixutta moota Muluku ori awe, nitokosaka itthu opanke awe.” (Arom. 1:20) Biibiliya mukina, onitthokiherya eversiikulu ela ohimyaka wiira: “Mutthu yoole onuupuwela saana, onoowerya oweha mikhalelo sa Muluku.” Tivonto, nuumala osoma, nihaana wuupuwelela itthu sootikiniha Yehova opanke awe ni oweha itthu sinniixuttiha aya voohimya sa yena.

15. Patrick aapanke exeeni wiira omusuwele oratteene Yehova ni munrowa omutakiha sai? (Nwehe efootu.)

¹⁵ Atthu anceene anikhala ipooma suulupale, sihaattale aya miri ni axinama. Akhala wiira munikhala ipooma iyo, etthu xeeni mukhanle anyu oopaka wiira mwiixutte voohimya sa Yehova murumeelaka itthu sipattunxe awe? Nwehe ntakiheryo na Patrick, yoowo onikhala oBrazzaville, ekapitaali ya oRepública do Congo. Owo onihimya so: “Khula nihiku, kinniimananiha oweha itthu Yehova opattunxe awe. Ikwaha sinceene, kinnaaweha axikokho aahiiso axipalame acikhaani yaavyaka eyoolya aahiiso opuro wookhala. Nihiku nimosa, kaahaaweha axipalame apakaka epuru aya. Miyo kanaaweha attottaka malaxi ni itthu sikina yoona aya oreerela wiira apake epuru para axaana aya.” Ohiya paahi oweha soopattuxiwa iye, Patrick aanirumeela okathi ole wiira uupuwelele mikhalelo sa mpattuxa. Owo onihimya so: “Miyo kihiixutta wiira Yehova onnikhapelela itthu sootheene opattunxe awe, hata iye saamukhaani nnoona ahu wiira khasirina efaita. Eyo yookikhaliherya okupali wiira khula okathi, Yehova onookikhapelelaka ni onookivahaka itthu kinipirisari aka.”

16. Exeeni yaamukhalihenrye Maria, maama awe Yesu omusuwela oratteene Yehova, nto ninrowa omutakiha sai? (Nwehe eteseenyu.)

¹⁶ Etthu yaneeraru enrowa onikhaliherya omusuwela oratteene Yehova, ori wuupuwelela inamuna sootheene onikhalihenrye awe. Eyo ti etthu apanke awe Maria, maama awe Yesu. Owo aanimusuwela oratteene Yehova ni Muluku aahimureerela murima. (Luka 1:30) Masi, Yehova aahinvekela Maria wiira opake etthu yaarina efaita yuulupale ni yooxankiha, eyo piiyo, okhala maama a Mwaana a Muluku. Orumeelaka nlaikha Gabriyeli ni mmusi awe Maria aihaniwa Elizabeti, Yehova aahimukhaliherya Maria woona wiira aanimuroromela ni aarowa omukhaliherya. Muhoolo mwaya, Maria aahuupuwelela moota itthu iye siiraneya saamukhaliherya aya wiixutta voohimya sa Yehova. Owo aahoona wiira Muluku toowerya, onnaathokorerya mooreerela murima atthu ootheene ni onnaavaha efaita ale ahinooneliwa vatthu. (Luka 1:​46-55) Ntoko siisaale Maria aaxukhurenle awe mwaha wookhaliheriwa ni Muluku, nave hiyo ninnimuxukhurela Yehova mwaha woonikhaliheryaka “okathi wooreerela”. (Ahep. 4:16) Okathi Yehova onookhaliheryaaweni, mwiikoheke so: Etthu ela enikiixuttiha exeeni voohimya sa Yehova? Nave mikhalelo xeeni sa Yehova kiniixutta aka ni yoowiiraneya ela?

WIIXUTTA VOOHIMYA SA YEHOVA KHONIMALA

17-18. Xeeni ohimyaka wiira khaninrowa ohiya wiixutta voohimya sa Yehova?

¹⁷ Elapo esya, hiyo nnimwiixutta itthu sinceene voohimya sa Yehova. Okathi owo, Yehova onoonivaha iroolu sinrowa onooniheryaka etthu oniphavela awe wiira nipakeke. (Wis. 20:12) Nave-tho, nnimwiixutta itthu sinceene voohimya sa Yehova, okhala wiira nnoowehaka itthu sootheene opattunxe awe. (Yes. 11:​6-9) Nave ninrowa wiixutta itthu sikina voohimya sa Yehova. Mwa ntakiheryo, ninrowa waawehaka amusi ni apatthani ahu ahihimuxiwaka ni atthu ootheene akhaliheriwaka ni Yehova wiira ahikhalane etampi.

¹⁸ Khaninrowa ohiya wiixutta voohimya sa Yehova. Nave Yehova Muluku, onikhala moohimala ni “osuwela wawe khorina mukano.” (Esal. 90:2; 147:5) Hiyo khaninkhala-khala niiwexexaka oratteene “miteko Muluku eekeekhai ovanre awe, okhuma woopaceryani mpakha wookiseryani.” (Mus. 3:11) Tivonto, moohicikha iyaakha sivinre nimurumeelaka, nihihiye wiixutta voohimya sa Tiithi ihu oophenta.