Moota eliivuru ya Yesaya ennimaaliha aya

1-2. Yehova onnikhaliherya sai, okathi ninriipiwa ahu murima ni oxanka?

NKAHAYA mmuupuwele mmiravo, yoowo oriipiwe murima ni oninla vanceene. Woonasa wene, emusi awe enoothaama erowaka nipuro nikina, nto onniriipiwa murima mwaha woowi onrowa waahiya apatthani awe. Nave pooti wiira ooriipiwa murima mwaha wa etthu yoohiloka opanke awe. Okathi eyo eniiraneya aya, etthu xeeni maama oophenta onipaka awe? Maama oophenta, onnimukhupaarela, onwiriyana ni omooniherya wiira onnimphenta.

² Mbiibiliyani, Yehova onniilikanyiha ni maama oophenta, yoowo onimukhapelela mwanawe ni onimmaaliha. Biibiliya onihimya wiira: “Ntoko siisaale maama onimmaaliha awe mwanawe, siiso, miyo nkinihiya woomaalihani”. (Yes. 66:13) Yehova, onniniphenta vanceene waavikana anamuyari ahu. (Yes. 49:15) Yehova, onnimurumeela Biibiliya wiira onimaalihe, ni onivahe ikuru nimpirisari ahu okathi ninriipiwa ahu murima ni oxanka. — Arom. 15:4.

3. Mwaha ola, ninrowa othokorerya exeeni?

³ Eliivuru ya Yesaya, yookhalana moolumo manceene oomaaliha anikhuma wa Yehova. (Yes. 40:1) Yehova, yoowo ori Tiithi ahu oophenta, aahiruma olempwa eliivuru ya Yesaya, wiira aamaalihe atthu awe yaakhala oYuda, okathi saaphwanya aya mixankiho sinceene. Nave hiyo, ninkhala mahiku “ooxankiha ni oowoopiha.” Tivonto, ninnipirisari omaalihiwa. (2 Tim. 3:1) Mwaha ola, ninrowa othokorerya iversiikulu vakhaani sa eliivuru ya Yesaya, seiyo sinrowa onilipiha ni onimaaliha okathi 1) sinniphwanya aya itthu sootutuxerya mookumini mwahu, 2) nniivaha ahu nthowa mwaha wa itampi sa khalai ni 3) okathi ninriipiwa ahu murima mwaha wa okhweliwa mutthu namphenta ahu.

OKATHI SINNIPHWANYA AYA ITTHU SOOTUTUXERYA

4. Ninkhala sai okathi itthu siniturukeya aya mootutuxerya mookumi mwahu?

⁴ Okumi ahu pooti oturukeya mootutuxerya. (Mus. 9:11; 1 Akor. 7:31) Hiyo pooti owereiwa, othoiwa musurukhu, elapo enikhala ahu okhumelela ekhotto aahiiso ovahiwa yoothanleliwa esya. Okathi itthu iyo siniiraneya aya, hiyo pooti woova ni oxanka. Nto nnaikoha so: Etthu xeeni kikhanle aka oopaka? Munna oniihaniwa Joseph, yoowo aarumeela oBeteeli iyaakha soowiiraka 17, nuumala-vo, ovahiwa yoothanleliwa esya ya okhala pioneero, onihimya so: “Kaahixanka vanceene nuumala waaakhela yoothanleliwa esya, okhala wiira kaahirumeela oBeteeli mwa iyaakha sinceene. Nkaasuwela etthu yoopaka nnakhala etthu yaarowa okiiraneela muhoolo.” Orumeelaka eliivuru ya Yesaya, Yehova onnimaaliha sai okathi sinniphwanya aya itthu mootutuxerya?

5. Moovarihana ni Yesaya 42:​16, etthu xeeni Yehova onnileiherya awe? (Nwehe efootu.)

⁵ Mmusome Yesaya 42:16. Mwa nthoonyeryo, Yehova onileiherya wiira onimwaahoola alipa-oohoona, ephiro ahinisuwela aya ni epiphi eri ohoolo waya, onootatuxa ekhale waarya. Moolumo oowi “alipa-oohoona”, “epiphi” ni “etthaya yoothetemana” annooniherya oratteene moota ninkhala ahu, okathi makhalelo ahu aniturukeya aya mootutuxerya. Okathi eniiraneya eyo, pooti olikana ni mutthu ori eriyari ya etakhwa, yoowo ohinisuwela opuro okhanle awe oorowa. Masi Yehova onnileiherya wiira hata siniphwanyaka mixankiho, owo onoonivahaka malakiheryo ni khonikhala-khala oninyanyalaka. Yehova onoonivarela ntata okathi nneetta ahu mweepiphini, onoomwaleela ni onoolokiherya ephiro ninvira ahu. Yehova onipaka sai eyo? Owo onnipaka eyo onivahaka miruku sinikhuma mbiibiliyani ni orumeelaka mutthenkeso awe. (Esal. 119:105; Yes. 30:21) Nave Yehova onnaarumeela anna ni arokora ni atthu akina wiira anikhaliherye. Hata nihisuwelaka etthu enrowa oniiraneela, nikupaliki wiira Yehova onoonikhaliheryaka khula okathi, mwaha woowi onniniphenta ni onnisuwela mixankiho sahu. — Yes. 41:10; 1 Ped. 5:​6, 7.

6. Akhala wiira makhalelo ahu anniturukeya mootutuxerya, etthu xeeni ninreerela ahu okupali?

⁶ Joseph, yoowo nimulavunle ahu ittima sivinre, onnitthokiherya moota Yehova oonihenrye awe wiira onnimphenta yena ni mwaarawe, nuumala awo okhuma oBeteeli. Joseph onihimya so: “Hiyo naahoona moota Yehova aanikhaliherya awe ni oniphenta okathi ole naakhenle ahu yoothanleliwa esya. Owo aanaarumeela anna ni arokora wiira anikhaliheryeke. Yehova aahinikhaliherya onivahaka itthu naapirisari ahu, onimaaliha nave mpakha olelo-va, khonihiya opaka eyo.” Akhala wiira makhalelo anyu anniturukeya mootutuxerya, mukupaliki wiira Yehova onimoovahani ikuru ni malakiheryo munipirisari anyu, hata marukunuxo awo akhalaka ootepa oxankiha. (Yes. 54:10; 58:11) Joseph onnincererya oriki: “Aakhala moolumo a nsipo, yaawo anikisivela vanceene, ani: ‘Kimmuroromela yoowo paahi, tthiri pwiya aka ori ni mi.’a Nto, hata itthu sihiiraneyaka ntoko naalipelela ahu, hiyo ninnisuwela wiira Yehova onrowa onikhaliheryaka.”

OKATHI NNIIVAHA AHU NTHOWA MWAHA WA ITAMPI SA KHALAI

7. Muupuwelo xeeni anikhalana aya atthu akina yaapanke itampi suulupale khalai?

⁷ Vaavo nnaaleela ahu axitokweene itampi suulupale nipanke ahu, awo anninikhaliherya okhala wiira anniniphenta. Nuumala-vo, ninniimananiha wiira nihitthikele opaka itampi simosa-ru. (Mir. 28:13; Yak. 5:​14-16; 1 Yoh. 1:9) Masi hata Yehova onilevelenle ene itampi sahu, ikwaha sikina hiyo pooti oriipiwaka murima mwaha wa itthu soohiloka naapanke ahu khalai. Nave, hiyo pooti wiikohaka so: Kiireke tthiri Yehova ookilevelela etampi kipanke aka? (2 Akor. 2:7) Nto, eyo pooti owiiraneelani, mwaha woowi itthu soohiloka mutthu opanke awe khalai pooti opisa okhuma vamurimani aahiiso mmuupuweloni. Ti nthowa naya, mwene Davidi aalempe awe so: “Nkirina murettele mweerutthuni mwaka, mwaha wa etampi aka.” Nave-tho, aahihimya wiira: “Kinnihaawa vanceene, kihinoona owereya, nave nkirina-tho ikuru.” (Esal. 38:​3, 8) Nto, akhala wiira ikwaha sikina munniriipiwa murima mwaha wa itampi sa khalai, eliivuru ya Yesaya enimoomaalihani.

8-9. Yesaya 1:​18, onooniherya sai moota Yehova onnilevelela awe itampi sahu?

⁸ Mmusome Yesaya 1:18. Yoolepa ela, Yehova onnirumeela malikanyiho yaawo anooniherya moota onnilevelela awe itampi sahu. Owo onihimya wiira hata soottheka sahu sinakhala-ru “sooxeerya ntoko ekottokhwa”, Yena onimwiiriha okhala “sootteela ntoko nxotte.” Ekottokhwa enikhala yooxeerya, nto okathi eninanariha aya ekuwo ahu, khivanikweya okattha mpakha okumiha ekottokhwa yootheene. Hata vari siiso, Yehova onnirumeela nlikanyiho nla, ooniheryaka wiira okathi onnilevelela awe itampi sahu, owo khonuupuwela-tho.

⁹ Nrowe nthokorerye ntakiheryo na mwene Davidi. Nnaamwi aararunwe ni aamwiivale mutthu, Yehova aahimulevelela ni muhoolo mwaya aahimuhimya okhala mulopwana oororomeleya. (2 Sam. 11:​3, 4, 14, 15; 12:13; 1 Mam. 9:​4, 5) Okathi Yehova onimuupuwela awe Davidi, owo onimuupuwela okhala mulopwana oowaamini ohiya wuupuwela itampi aapanke awe. Mwa enamuna emosa-ru, okathi ninttharuwa ahu itampi sahu, moophenta Yehova onninlevelela ni onninikhaliherya ohihiya omurumeela nirina ene murima wooloka. Vaavo nintepa ahu wiivaha nthowa, etthu xeeni ekina Yehova onnileiherya awe eri eliivuru ya Yesaya?

10. Moolumo xeeni oomaaliha nimphwanya ahu Yesaya 38:17?

¹⁰ Mmusome Yesaya 38:17 ni enoota. Moolumo oowi: “Moorihela ottuli wanyu, itampi saka sootheene”, pooti otaphuleliwa-tho so: “Mookumiha ohoolo wanyu itampi saka sootheene.” Tivonto, yoolepa ela ennooniherya wiira Yehova, onnikuxa itampi sa mutthu ottharunwe, orihela ottuli wawe, opuro yoowo ohinwerya awe oweha nnakhala wuupuwela. Otthokiheryaka yoolepa ela, disionaario mmosa, ohimmye wiira: “Nyuwo mookilevelela [itampi saka] vanakhala ntoko wiira nkitonko ottheka.” Okathi Yehova onnilevelela awe itampi sahu, para yena onnithokorerya ntoko atthu ahitonko ottheka. Vaavo Yehova onnilevelela awe itampi sahu, owo khonikhala-khala onuupuxeryaka nnakhala orumeela iyo wiira onipuniri, mwaha woowi ooliyala. Owo onileiherya so: “Nkinrowa wuupuwela itampi sanyu.” (Yes. 43:25) Tthiri ala moolumo oolipiha! Okhala wiira Yehova, yoowo ori Mphuki Muulupale, khonuupuwela itampi sahu, nave hiyo nihaana oliyala ni ohiivaha nthowa mwaha wa itampi iyo.

11. Moohicikha itampi nipanke ahu khalai, etthu xeeni Yehova onivaha awe efaita? (Nwehe efootu.)

¹¹ Nnaamwi ikwaha sikina muupuwelo wa wiivaha nthowa orowaka okhumelela, nihaana wuupuwela etthu Yehova onihimya awe. Okathi Yehova onnilevelela awe, owo onipaka eyo ni murima wootheene. Yehova khonninyanyala mwaha wa itampi sahu nnakhala onuupuxerya ntoko aniira aya apinaatamu. (Yes. 57:16) Itthu Yehova onivaha awe efaita, khahiyo iye nipanke ahu khalai, masi itthu nimpaka ahu niinaano-va ni iye nniimananiha ahu opaka nuupuwelaka muhoolo. (Yes. 55:7) Yehova Muluku ahu, onniniphenta vanceene ni oniphavela onilevelela okathi ninttheka ahu! Tivonto, nihikhala-khale neemereryaka wiira itampi sahu sa khalai, sinikhoottiherye ohakalala vano ni ophwanya mareeliho a muhoolo.

OKATHI NINRIIPIWA AHU MURIMA MWAHA WA OKHWELIWA MUTTHU NAMPHENTA AHU

12. Ninkhala sai okathi ninkhweliwa ahu mutthu namphenta ahu?

¹² Okathi onikhwa awe mutthu namphenta ahu, ninniriipiwa murima vanceene, nto oriipiwa murima iwo pooti oviriha okathi munceene. Okathi mukina, hiyo pooti wiikohaka so: Xeeni Yehova ohalaka weemererya mmusi aka okhwa? Munna Michael, yoowo okhweliwe anamuyari awe mwaha wa empa aya yaapantte mooro, onihimya so: “Miyo kaahiriipiwa murima vanceene ni kaahinanariwa ni Yehova, mwaha wooweemererya etthu ele wiiraneya. Miyo kaahisuwela wiira Yehova khahiyo taakumihenrye mooro ole, masi khaapanke etthu wiira okhoottiherye etthu ele wiiraneya.” Woonasa wene, pooti wiira nyuwo mootoko wuupuwela siiso. Okathi ninriipiwa ahu murima, Yehova onnimaaliha sai ni nlipelelo xeeni onnivaha awe?

13. Etthu xeeni Yehova onnileiherya awe eri Yesaya 25:8?

¹³ Mmusome Yesaya 25:8. Yehova onileiherya wiira: “Onoomaliha okhwa”. Nkahaya muupuwele okathi munrowa anyu okhalaka muhilipelelaka okhwa! Khamunrowa oriipiwaka murima, mwaha wookhweliwa mutthu mwamphenta anyu. (Yes. 35:10) Nyuwo khamunrowa-tho oriipiwa murima, mwaha wooweha mahiye ovithiwe awe mutthu mwamphenta anyu. Masi okathi wootheene, nyuwo munrowa okhalaka ni amusi anyu ahiwereiwaka ni arina ene ekumi yooloka. Yooleiherya ela, khahiyo etthu enaamuupuweliwa paahi, masi enikhuma wa Yehova, yoowo onimaliherya etthu onileiherya awe. — Wis. 21:​4, 5.

14. Munikhala sai okathi munuupuwelela anyu ohihimuxiwa wa alipa-ookhwa? (Yesaya 26:19) (Nwehe efootu.)

¹⁴ Mmusome Yesaya 26:19. Yehova khahiyo onrowa omaliha paahi okhwa, masi-tho onrowa waahihimuxa atthu nnaaphenta ahu akhwiiye. Aahimyaka atthu awo akhwiiye, Yehova onihimya so: “Mirutthu sa atthu aka sinoovenya.” Moolumo ala, anooniherya wiira atthu awo ta Yehova. Nlelo Yehova onniwuupuwela atthu awo. Nto okathi othanlale awe, onrowa waahihimuxa. Ntoko siisaale voosiisu okame onikhaliherya awe malaxi anyaalale, Yehova yoowo aapattunxe atthu ootheene, onrowa waahihimuxa atthu akhwiiye. Mweekeekhai, vanrowa okhala voohakalaliha owaakhela atthu awo! — Mulikanyihe ni Marko 5:42.

15. Nlipelelo na ohihimuxiwa alipa-ookhwa, ninnikhaliherya sai?

¹⁵ Hata nikupaliki wiira Yehova onimwaahihimuxa alipa-ookhwa, nlelo ninniriipiwa murima vanceene okathi onikhwa awe mutthu nnimphenta ahu. Hiyo ninnisuwela wiira Yehova khaaliyanle, nto eyo enninlipiha vanceene. Nlipelelo na ohihimuxiwa alipa-ookhwa, naahimulipiha Michael, yoowo nimulavunle ahu ittima sivinre. Owo onihimya so: “Eliivuru ya Yesaya 26:​19, yookikhaliherya osuwela wiira Yehova onnaaphenta anamuyari aka. Yehova khaaliyanle, nto onrowa owuupuwelelaka, mpakha okathi onrowa awe waahihimuxa. Vaavo kinuupuwela aka eyo, kinnilipa ni omaaleleya.” Tivonto, nihihiye wuupuwelela okathi ninrowa ahu okhala vamosa ni atthu nnaaphenta ahu akhwiiye. Niira siiso, nnooweryaka ovilela oxanka oniphwanyale.

16. Okathi sinoophwanyaayani mixankiho, yoolepa xeeni enoolipihani?

¹⁶ Noothokorerya iversiikulu vakhaani sa eliivuru ya Yesaya, seiyo sinnimaaliha okathi sinniphwanya aya itthu sootutuxerya, okathi nniivaha ahu nthowa mwaha wa itampi sa khalai ni okathi ninriipiwa ahu murima mwaha wa okhweliwa mutthu namphenta ahu. Ninnimuxukhurela vanceene Yehova, mwaha woonimaaliha ni onlipiha orumeelaka Nuulumo nawe! (Esal. 94:19) Niireke yookhala yoolepa emosa enoolipihani vanceene okathi muniriipiwa anyu murima? Akhala wiira yookhala, muhele mmuru, mulepe aahiiso muhele opuro enrowa aya wookhweelakani oweha ikwaha sinceene. Nto muhihiye omaalihiwa ni moolumo oolipiha a Tiithi ihu oophenta a wiirimu, Yehova.