Owo aahituruka okumi awe

WANIPACERYA, Saulo a oTarso khaariipiwe murima mwaha wa wiirela mpantta wiiviwa wa Siteefano.a Owo aanikupali wiira etiini ya ayuda, yaari yeekeekhai. Tthiri Saulo “aahilakela waahaaxa ni owiiva awiixutti a Pwiya” oYerusalemu. Owo aahipacerya waalupattha awiixutti a Yesu epooma ele yootheene, ni aahaatthukwela mukhatteya alopwana ni athiyana yahaapanke etthu yootakhala. Okathi makristau awo yaaphukeliwa aya, Saulo aaphavela wiira yiiviwe. Mwaha woolupatthiwa vanceene, makristau manceene yaahitthyawa oYerusalemu. Saulo aanaanyokha makristau. Nto aahilakela waatthimakela wiira aalupatthe mapuro yaatthyawenle aya. Tivo, owo aahinvekela mukhulupale aanamukuttho, wiira olepe ikarta saamweemererya orowa waalupattha makristau oDamaasiko.

Nuumala ovahereriwa ikarta, Saulo ni atthu akina yaaheetta mukwaha arowaka onorti. Awo yaarowa esitati ya oDamaasiko. Okathi ole, Saulo aakupali wiira Yesu aahikhwa. Masi owo khaasuwela wiira Yesu ari mukumi ni aari ni Tiithi awe wiirimu. Yehova ni Yesu yaanimusuwela oratteene Saulo. Nave, yaanisuwela wiira Saulo aahikhalana mikhalelo sooloka ni anwerya opaka itthu sooloka. Okathi Saulo ni atthu eettana awe mukwaha yaattamela aya oDamaasiko, yaahiweha waarya wuulupale. Vano, waarya iwo waanivikana waarya wa nsuwa. Nto Saulo aahimorela vathi ni aahipacerya ohoona.

Vano Saulo aahiiwa nsu naahimya wiira: “Saulo, Saulo, xeeni munikilupattha anyu?” Nuumala-vo, Saulo aahikoha wiira: “Atokweene, nyuwo mwa pani?” Woonasa wene, Saulo aahixanka vanceene nuumala nsu nle omwaakhula, niiraka: “Miyo ka Yesu, yoowo munimulupattha anyu.” Yesu aahimuleela Saulo wiira eemele ni aahinvaha muteko. Muteko ene tuula: Waalaleerya atthu voohimya sa Yesu ni owooniherya wiira itthu sootheene aixuttihale awe saari sa ekeekhai. Saulo aahithanliwa wiira aakhaliheryeke atthu omusuwela oratteene Yesu ni ihapari sooreera sa Omwene wa Muluku.

Nuumala wiiwa ele Yesu aamulenle awe, Saulo aahoona wiira aari mutthu oowiixinnuwiha ni ootakhala, nto aahaana opaka marukunuxo. Nlelo ohiweryaka woona, Saulo aahikuxiwa oroihiwaka oDamaasiko. Nuumala ophiya, aahaana olipelela okhaliheriwa ni mukristau a elapo ele. Nto aahiviriha mahiku mararu otthukwaka. Eyo yooniherya wiira aahiriipiwa murima mwaha wa itthu soohiloka aapanke awe. Tthiri Saulo aaninvekela Yehova wiira omulevelele. Mwaha wa xeeni? Mwaha woowi, Saulo aamulupattha Mwaana a Muluku. Yesu aahimuruma mukristau mmosa aihaniwa Ananiya orowa okhumana ni Saulo. Wanipacerya, Ananiya anoova, masi aahirowa. Nuumala Ananiya ompweherya matata Saulo, “okathi ene yoowo, saahimora mmaithoni mwawe, itthu saakhala ntoko maapaliwe a ihopa, onatthikela woona.” Saulo aahipaka marukunuxo mweekumini mwawe. Owo aahikhala mutthu oowiiyeviha ni ankhili. “Nto aahivenya, opatisiwa.”

Moohipisa, nuumala Saulo okhala mukristau owo aahipacerya olaleerya. Ohiya otthikela oYerusalemu, Saulo aahipaka etthu yooniherya wiira aari mutthu oolipa murima. Owo aaronwe isinagoga sa oDamaasiko, woonasa wene opuro yoowo aasuweliwa awe oratteene. Owo aahinvekela Yehova wiira okhale oolipa murima. Nkahaya muupuwele moota atthu ale yaatikinihiwe aya, okathi yamoonale aya Saulo eemereryaka wiira aapaka itthu soohiloka, masi vano aari mutthareli a Yesu. Nave Saulo aahipaka itthu sikina. Maana “Saulo, aamutepa osuwela olaleerya saana ni aanaatikiniha ayuda yaakhala oDamaasiko, okathi aawooniherya awe oratteene wiira Yesu ti Kristu.”

Okathi aakhala awe oDamaasiko, Saulo aahirowa wArabia, woonasa wene moothakoni wa oSiiria. Biibiliya khonihimya etthu yaamwiirihale Saulo orowa elapo ele. Masi ninniwerya wuupuwelela ori ene moothakoni, ovekelaka ni wuupuwela muteko aavahiwa awe. Saulo khaahiyale osoma ni wuupuwelela Soolempwa. Tthiri Saulo aahituruka moota uupuwela awe. Nuumala-vo, Saulo aahaatumererya makristau a oRoma wiira yaahaana oturuka moota yuupuwela aya. — Arom. 12:2.

Saulo khaaliyanle itthu soohiloka aapanke awe. Hata nuumala ovira iyaakha sinceene, owo aahimmye so: “Khalai kanveeha Muluku, kaalupattha arumeyi awe ni kaari mutthu oowiisoona.” (1 Tim. 1:13) Nave owo aahimyale wiira khaareere oriipiwa murima mwaha wa okhaliherya wiiviwa Siteefano. (Mit. 22:​19-21) Saulo aanikupali ni murima awe wootheene wiira aahileveleliwa ni Yesu vamosa ni Yehova. Nave awo yaanimureeliha vanceene.

Nuuvira iyaakha 3 ori ene oDamaasiko, mwaha woolupatthiwa, Saulo aahitthyawa. Awiixutti a oDamaasiko yaahimukhaliherya otthyawa. Awo yaahimuhela muttankani amukuruxela vathi va exiri, onarowa oYerusalemu. Okathi ole wootheene aavirihale awe oDamaasiko, waari wanipacerya wa okumi awe ntoko mukristau, maana aahikhalana muteko munceene aarowa awe ovaraka muhoolo.

Musome yoowiiraneya ela mbiibiliyani, soolepa sinittharelana:

• Miteko 8:​1-3; 9:​1-25; 26:​4, 5, 9-20

• Akalaasia 1:​13-18

Nikoho para ovaanela:

Saulo a oTarso oonihenrye sai olipa murima?

Mutokose itthu sikina

1. 1. Xeeni Saulo aahimyale awe wiira epooma aayariwe awe ya oTarso, “yaari epooma yoosuweliwa vanceene”? (Mit. 21:39; Owehaweha 15/5/1999 epaax. 30 etti. 1) A

   Mwaakhule va

   

   Todd Bolen/BiblePlaces.com

2. 2. Exeeni enniiriha ohimya wiira Saulo aanisuwela ekultura ya ayuda, akereku ni aroma? (Mulaleyeke oratteene omwene wa Muluku epaax. 75, ekaaxa itti. 1-3)

   Mwaakhule va

3. 3. Exeeni Saulo aaphavela awe ohimya okathi aalavunle awe wiira aari ntoko “mwaana oyarinwe ohinatthi ophiya okathi”? (1 Akor. 15:8; Owehaweha 09/2022 epaax. 27)

   Mwaakhule va

4. 4. Etthu xeeni enooniherya wiira etthu Luka olempe awe Miteko 9:​11, 24, 25, ti yeekeekhai? (Nvenye! 08/02/2003 ipaax. 24-26) B

   Mwaakhule va

   

   Photo by ROLOC Color Slides

Muupuwelele itthu mwiixuntte anyu

• Saulo aari mutthu oowiiyeviha, nto aaheemererya okhaliheriwa ni Ananiya ni makristau makina. (Mit. 9:​17, 18; Akol. 4:​10, 11) Okathi xeeni ninreerela ahu weemererya okhaliheriwa ni atthu akina?

  Mwaakhule va

• Saulo kheemerenrye wiira itthu aapanke awe khalai ni soovonya sawe, simwiirihaka ohiya omurumeela Yehova. (Afil. 3:​4-8; 1 Tim. 1:​12-16) Ninrowa omutakiha sai Saulo? C

  Mwaakhule va

  

• Munrowa otakiha sai olipa murima wa Saulo nithokorenrye ahu yoowiiraneya ela?

  Mwaakhule va

Muupuwele yowiiraneya yootheene

• Yowiiraneya ela enikiixuttiha exeeni sa Yehova?

  Mwaakhule va

• Yowiiraneya ela enivarihana sai ni ele Yehova oniphavela awe?

  Mwaakhule va

• Yoowiiraneya ela, etthu xeeni mwiixuntte anyu nuumala osuwela wiira Saulo oothanliwa wiira alamuleleke ni Kristu wiirimu?

  Mwaakhule va

Mwiixutte itthu sikina

Eviitiyu enittharelana, nwehe moota mutthu mmosa, aalupattha Anamoona a Yehova ntoko Saulo, aapanke awe marukunuxo mweekumini mwawe.

Ophenta waahimukhaliherya “Saulo a oSado” (5:50)

Ntakiheryo na Saulo, ninnikhaliherya sai omusoma Biibiliya khula nihiku, waaphenta atthu ni okhalana moonelo wooloka? Musome mwaha oni:

“Mmutakihaka Paulo, mulipiheke ompatthani anyu ni Yehova” (Owehaweha 15/05/2008 ipaax. 21-25)