49 PEDRU
Aari mulopwana oolipa murima
OKATHI Yesu aamusuwenle awe Simoni, owo aahilakela onvaha nsina nsya, ohimyaka so: “Nyuwo mwa Simoni, mwaana a Yohani. Nyuwo munrowa wiihaniwaka Keefa” aahiiso “Pedru”, masina yaawo anitaphulela “epetaasu ya nluku aahiiso mwala.” Exeeni yaamwiirihale Yesu onvaha nsina nlo? Okhala wene, nluku aahiiso mwala ti woolipa ni khonittikinyeya, nave pooti orumeeliwa wiira elipihiwe aahiiso otekaniwa etthu. Vanikhala wiira Yesu aaphavela wooniherya wiira Pedru aamukhala mwala, okhalaka oolipa murima ni okhaliheryaka muloko okhala woolipa.
Niireke Pedru aanikhala moovarihana ni nsina nlo? Aayo, masi khahiyo ikwaha sootheene. Ntoko niwehale ahu ekapiitulu 45, ikwaha sikina Pedru aanihoverya, nave aanipaka soothanla soohiloka okathi oova awe. Hata vari siiso, Yesu khaahiyale omuroromela Pedru. Yesu aanikupali wiira nuuvira okathi, olipa murima wa Pedru waamuncerereya.
Nuumala Yesu okhwa ni ohihimuxiwa, aahaavaha arummwa muteko wa efaita yinceene, yoowo ori olaleya ihapari sooreera. Pedru aaheemererya muteko ole ni aahooniherya olipa murima ikwaha sinceene mookumini mwawe. Mwa ntakiheryo, okathi wa efesta yuulupale oYerusalemu, moolipa murima Pedru aahaaleela ayuda wiira ti yaamwiivale Yesu. Mwaha wa moolumo ale Pedru aalavunle awe, atthu anceene “yaahiriipiwa murima” ni yaahittharuwa. Nto mwaha waivaavo, atthu oowiiraka 3.000 yaahipatisiwa khukhala awiixutti a Yesu.
Etthu xeeni yaarowa omukhaliherya Pedru okhala mwala, ntoko Yesu aahimyale awe?
Etthu Pedru aavaha awe efaita yinceene, aari muteko woolaleerya. Yesu aahinvaha Pedru “ixaavi sa omwene wa wiirimu.” Eyo enitaphulela wiira Pedru aahikhalana muritti wa ohula ephiro para atthu a ikurupu 3 owerya okela moomweneni wa wiirimu. Ti maana aya, owo aahilakela olaleya moolipa murima ohaathanlaka atthu, aapaceryaka ayuda, asamariya ni wanikisa waya atthu a maloko makina. Pedru aahiviyaxari orowaka mapuro oovirikana ni yoolakela ya olaleya ihapari sooreera ni waalipiha anna. Nave ikwaha sikina, Pedru aanihooliwa ni mwaarawe. Yena aaheetta mukwaha woorakama orowaka oBabiloonia wiira aalaleerye atthu a weiwo.
Okathi aalaleya awe ihapari sooreera, Pedru saahimphwanya mixankiho ni olupatthiwa. Pedru ni arummwa akina, yaahitthukweliwa mukhatteya. Ahooleli a itiini, yaahaakhoottiherya arummwa olaleya ihapari sooreera. Pedru aahihimya wiira: “Hiyo nihaana omwiiwelela Muluku ohiya atthu.” Nnaamwi yaahaaxiwa vanceene, Pedru ni arummwa akina khiyaahiyale omulaleya moolipa murima mwene yoowo othanliwe ni Yehova ori Yesu Kristu ni olaleya Omwene wa Muluku.
Olupatthiwa iwe waamutepa wuncererya. Ntoko niwenhe ahu ekapiitulu evinre, Siteefano aahiiviwa. Nuuvira iyaakha 10, namalamulela aitthaniwa Herodi aahirumiha wiiviwa murummwa Yakobo. Okathi Herodi oonale awe wiira ayuda vaanaasivela olupatthiwa wa makristau, owo aahiruma otthukeliwa Pedru mukhatteya. Pedru aahitthukiwa ni ikwirinti, oriheliwa mukhatteya ni onalipeleliwa ni makwarta wiira ohitthyawe. Woonasa wene, Pedru aanuupuwela moolumo Yesu aalavunle awe yooniherya wiira Pedru anvariwa, otthukiwa ni wiiviwa. Niireke okathi owo waahiphiya?
Mootutuxerya, ohiyu eriyari naahikhumelela nlaikha. Nuumala nlaikha nle onvenxa Pedru, naahitaphula ikwirinti aatthukwaniwe awe ni yaahikhuma mukhatteya-mme. Awo yaahivira ohoolo wa makwarta ale ni yaahikhumela ota. Pedru aapanke exeeni moottharelana? Owo khuupuwenle wiira aahaana otthyawa wala wiipitha wiira ohooniwe ni ohivariwe-tho, masi aahirowa opuro yaathukumanne aya anna ni arokora anvekelaka ni anvuwihaka Yehova. Moohaanyiherya, anna ale yaahihakalala vanceene ni olipa, okathi yanwehale aya Pedru orwaaka!
Pedru khaaliyanle etthu Yesu aamuleelale awe oriki: “Mwaalipihe axinninyu” ni “mulyiheke ipwittipwitthi saka.” (Luka 22:32; Yoh. 21:17) Pedru aahilaleya moolipa murima ni aanaalipiha axinnawe khula opuro aarowa awe. Masi owo aari mutthu oottheka. Ekwaha emosa, mwaha wa owoova atthu, Pedru aahipaka etthu yoohiloka nto mwaha waivaavo, aahittaruxiwa ni murummwa mikina. Pedru aari oowiiyeviha ni aaheemererya ottaruxiwa iwe. Owo khaahiyale waalipiha axinnawe ni aahilepa ikarta piili seiyo siri mbiibiliyani. Nuuvira iyaakha sinceene ovaraka muteko wa Muluku voororomeleya, Pedru aahitthukweliwa ekwaha yookiserya wiira iiviwe. Owo khaahiyale wooniherya olipa murima ni waamini mpakha okhwa wawe. Moohaanyiherya Pedru aari ntoko “mwala”!
Musome yoowiiraneya ela mbiibiliyani, soolepa sinttharelana:
Nikoho para ovaanela:
Pedru oonihenrye sai olipa murima?
Mutokose itthu sikina
1. Yesu aahinvaha Pedru “ixaavi sa Omwene wa wiirimu.” Ixaavi iyo saarumeeliwe sai? (Math. 16:18, 19; Makoho Biibiliya onaakhula awe mwaha 124 ipaax. 1-5) A
EteseenyuA: Pedru aahilaleya Omwene wa Muluku para ayuda oYerusalemu, oSamariya ni para maloko makina a oKesareya
2. Ninsuwela sai wiira Pedru khaathanla atthu hata ohinatthi omuxukurya Kornelio? (Mit. 10:5-7, 23; Mulaleyeke oratteene omwene wa Muluku epaax. 77 etti. 1, enoota) B
EfootuB: Opuro wa khalai wa epooma ya oYope
3. Exeeni enooniherya wiira Pedru aaheemererya miruku aavahiwe awe ni Paulo? (Owehaweha 04/2017 ipaax. 26-27 itti. 15-17)
4. Exeeni yaamwiirinhe Pedru orowa okhalaka oBabiloonia? (Perspicaz vol. 1 “Weepotthani“ etti. 24)
Muupuwelele ele mwiixuntte anyu
Pedru, aahilavula moolipa murima ni mwa nttittimiho, okathi aari awe ohoolo wa muttitthi muulupale oYerusalemu. Ninrowa omutakiha sai?
Pedru aari mutthu aarina iparakha sinceene mmulokoni, masi hata vari siiso, aaheemererya miruku sa Paulo. Ninrowa omutakiha sai Pedru? C
EfootuC
Ninrowa otakiha sai olipa murima wa Pedru?
Muupuwele yoowiiraneya yootheene
Yoowiiraneya ela enkiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Xeeni munixukhurela anyu osuwela wiira Pedru oothanliwa wiira alamuleleke ni Yesu Kristu wiirimu?
Mwiixutte itthu sikina
Moota xeeni ntakiheryo na Pedru ninniixuttiha aya omuroromela Yehova ni oxintta woova? Nwehe eviitiyu eni:
Murumeele mpantta ola, wiira mwiixutte etthu ni Miteko ekapiitulu 10.
“Muluku khonaathanya atthu” (Nwehe musaitini mpantta oni: “Miteko sa omusoma Biibiliya”)