Moolipa murima aahimuttaruxa mwene

VANIWERYANEYA sai mulopwana ooreera murima opaka itthu soohiloka? Woonasa wene, profeta Natani aanuupuwelela nikoho nna, okathi aarowa awe empa ya mpatthani awe, mwene Davidi. Ohinatthi ophiya okathi ole, Yehova aahimuruma Natani orowa omuleela Davidi etthu yoohakalaliha yaarowa wiiraneya ohoolo: Mesiya aarowa okhumelela emusi ya Davidi! (2 Sam. 7:​4, 12, 13) Masi vano Davidi aahipaka itampi suulupale. Nave Yehova aaphavela wiira profeta Natani omuttaruxe.

Davidi aahipaka itampi moowiipitheya, uupuwelaka wiira khuuvo aarowa osuwela, masi Yehova aaniweha itthu sootheene aapaka awe. Pooti wiira Muluku aahimuleela Natani itthu Davidi aapanke awe. Ohiyu omosa, Davidi eettaka vasulu va empa ya mwene, aahinweha muthiyana orapaka. Owo aahiweha wiira muthiyana owo “aari ooreera vanceene”, nuumala-vo, aahiruma oroweliwa. Mwene Davidi aahisuwela wiira muthiyana ole, Bati-Xeba, aatheliwe ni nakhotto awe mmosa oororomeleya, aitthaniwa Uriya, muhiti. Hata vaari siiso, Davidi aahiraruwa ni muthiyana ole. Nuuvira okathi, Bati-Xeba aahimuleela Davidi wiira aahirupala. Okhala wiira Uriya iira ori ene okhottoni, Davidi aarowa wiipithiha sai etampi aapanke awe? Moowaakuveya, owo aahiruma wiitthaniwa Uriya ni aahimuleela wiira orooke owaani olipelelaka wiira owo aarowa oviriha ohiyu wootheene ori ene ni mwaarawe. (Munwehe 1 Samuweli 21:5.) Masi Uriya aahikhootta opaka eyo, okhala wiira apatthani awe yiira ari ene okhottoni awanaka ni awanani a Yehova, nto owo khoonale oreerela orowa owaani wiira alyeeke, awuryeke nuumala-vo arupeke ni mwaarawe. Tivonto, Davidi aahimuleela xeefi a anakhotto wiira omuhele Uriya nipuro noowoopiha aarowa awe waakuva wiiviwa okathi yaawaniwa aya ekhotto. Palano ole ootakhala aahikhumela saana. Nuumala Uriya okhwa okhottoni, Davidi aahimuthela Bati-Xeba.

Biibiliya onihimya wiira: “Itthu Davidi aapanke awe khisaamusivenle Yehova.” Muluku aahimuruma profeta Natani wiira orowe amuttaruxe Davidi mwaha wa mweettelo awe, aahiiso itthu sootakhala aapanke awe. Niireke Natani aanoova uupuwelaka moota Davidi aarowa awe omuthokorerya nuumala omuttaruxa? Akhala wiira Davidi aahimwiiva Uriya, exeeni aarowa awe omwiiriha profeta aarowa ohimya etampi awe ni omuttaruxa? Natani aaniphavelasa enamuna wiira omukhaliherye Davidi oweha wiira itthu aapanke awe saari sootakhala. Moohaanyiherya, profeta Natani aahivekela vanceene voohimya sa mwaha owo. Nto, owo aahuupuwela nlikanyiho nimosa ni aahirowa omuleela mwene.

Profeta Natani aahimuleela mwene voohimya sa alopwana anli yaakhala epooma emosa. Mmosa aari thaaciri, aahikhalana ipwittipwitthi ni ipooyi sinceene. Vano mulopwana mukina aari oohaawa ni aarina epwittipwitthi emosa aaphenta awe vanceene, yeeyo yaari ntoko mwanawe. Nihiku nimosa, mulopwana ole thaaciri aahiwaakhela aletto ni aapirisari wiiva epwittipwitthi wiira aavahe yoolya. Masi owo khaaphavenle wiiva epwittipwitthi awe nnakhala emosa. Ohiya-vo, “mulopwana owo aahikuxa epwittipwitthi ya mulopwana ole oohaawa”, omuhitela muletto. Nuumala Natani ohimya nlikanyiho nna, Davidi aahinanariwa vanceene! Owo aahimmye so: “Ntoko siisaale Yehova onikhala awe, mulopwana opanke etthu eyo oniphwanela wiiviwa!” Davidi aahinanariwa vanceene mwaha wa mulopwana owo thaaciri “ohooniherya omoriwa ikharari”.

Natani aahipaka nlikanyiho nooloka. Mwaneene ene Davidi aari makampusi ni aaninyokha ohikhala exariya. Nto moolipa murima, Natani aamulenle so: “Mulopwana owo ti nyuwo!” Davidi aahixanka vanceene. Nto profeta Natani aahimuleela wiira Yehova aahiweha itthu sootheene Davidi aapanke awe. Profeta owo aahimuleela mwene Davidi etthu Yehova aalakenle awe opaka. Owo aahimyale wiira atthu a vatthokoni va Davidi, samwaaphwanya ihasara iyaakha sinceene. Nto etthu xeeni Davidi aapanke awe?

Mwene aaheemererya, onahimya wiira: “Koomutthekela Yehova”. Davidi aahixanka vanceene ni aahirukunuxa murima awe. Vano, Natani aahimuleela wiira Yehova ookhalana owerya wommorela ikharari ohimyaka so: “Yehova oolevelela yoottheka anyu. Nyuwo khamunrowa okhwa”. Nto, Davidi saahimphwanya mixankiho sinceene mwaha wa etampi aapanke awe ni Bati-Xeba. Nave-tho, mwaana yaamuyanre aya ni Bati-Xeba aahikhwa. Mwa iyaakha sinceene, otakhala, ihasara ni ohiroromeleya, saahaaphwanya atthu a etthoko ya Davidi.

Nnaamwi saakhumelenle itthu iyo, Davidi khaahiyale ororomeleya. Owo aahilepa Isaalimu soovara murima olavulaka moota aarukununxe awe murima ni moota Yehova aamulevelenle awe. (Esaalimu 32 ni 51) Yehova aahimuthokorerya mwene Davidi ntoko mulopwana oororomeleya, yoowo iiwelenle miruku sa profeta Natani okumi awe wootheene. Davidi okhwiiye ori ene murumeyi oororomeleya a Yehova. (1 Mam. 9:4) Moohaanyiherya, profeta Natani aahiweha wiira vaanireerela olipa murima wiira onvahe miruku aapirisari awe mwene Davidi.

Musome yoowiiraneya ela mbiibiliyani, soolepa sinittharelana:

• 2 Samuweli 11:1–12:18

Nikoho para ovaanela:

Natani oonihenrye sai olipa murima?

Mutokose itthu sikina

1. 1. Natani oniirela mpantta elista ya alopwana yaamulepa Biibiliya, masi khaninsuwela etthu sa emusi awe ni okumi awe. Nto eyo enniixuttiha exeeni sa yena? (Owehaweha 15/02/2012 epaax. 25 itti. 2-3)

   Mwaakhule va

2. 2. Uriya aari muhiti. Xeeni anakhotto akina a mwene Davidi yahaakhanle aya aisarayeli? (Owehaweha 04/2024 epaax. 31)

   Mwaakhule va

3. 3. Natani aahihimya eprofesia ya ehasara yaarowa waaphwanya atthu a emusi ya Davidi. Nto eprofesia eyo yiiraneyale sai? (Perspicaz vol. 1 “Davidi” etti. 29)

   Mwaakhule va

4. 4. Natani oonihenrye sai olipa murima iyaakha sookiserya sa olamulela wa mwene Davidi? (Owehaweha 15/02/2012 epaax. 25 etti. 1) A

   Mwaakhule va

   

Muupuwelele itthu mwiixuntte anyu

• Ntakiheryo na Natani ninniixuttiha exeeni sa moota woomukhaliherya mpatthani ahu opanke etampi yuulupale?

  Mwaakhule va

• Natani aahipaka nlikanyiho nanvanre murima Davidi. Nto hiyo ninrowa owerya sai opaka eyo okathi oninvaha ahu miruku mutthu mukina? B

  Mwaakhule va

  

• Munrowa otakiha sai olipa murima wa Natani?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni ele Yehova oniphavela awe?

  Mwaakhule va

• Etthu xeeni kiniphavela aka omukoha Natani nuumala ohihimuxiwa?

  Mwaakhule va

Mwiixutte itthu sikina

Itampi Davidi aapanke awe, saaphwanyihale sai mixankiho apatthani awe, atthu a vatthokoni vawe ni Yehova Muluku?

Musuwele wiira ole omphenta — khoniphavela mureerelo awe (1:14)

Nwehe moota miruku sa Natani saamukhalihenrye aya Davidi.

“Mwiiyeviheke okathi munittaruxiwa anyu” (“Miteko sa omusoma Biibiliya” siri va jw.org)