Aahimuthanla Yehova okhala Muluku awe

EPOOMA ya oYeriko, yaahikhala empa aakhala awe namararuwa aitthaniwa Rahabi. Ori ene vaxanelani vawe, owo aaniwerya oweha oreera wa “epooma ya mikole”, eyo piiyo oYeriko. (Otum. 34:3) Masi, okathi eetta awe epooma ele, aanaaweha atthu axankale ene ni ariipiwe ene murima. Atthu a epooma ele yaanisuwela wiira Yehova aanaakhaliherya atthu awe, eyo piiyo, aisarayeli. Nave yaanisuwela wiira Muluku ampwetexa epooma ele ya oYeriko. Tthiri awo yaaniphwanelela.

Yaahikhala mathowa manceene yaawiiriha atthu a oYeriko woova. Okhala wiira khiwaavinre okathi munceene, vaavo Yehova aakhalihenrye awe aisarayeli waaxintta mamwene manli a wAmori, Sihoni ni Oogi. Eyo yaari etthu yootikiniha, okhala wiira aisarayeli khahiyo yaari anakhotto, masi mamwene awo yaahikhalana anakhotto aya ootupa. Ohiya-vo, iyaakha 40 saavinre Yehova aahiwoopola atthu awe, okathi ampwetexale awe Farawo ni anakhotto awe, Ephareya Yooxeerya. Vano, aisarayeli yaamanke waattamela epooma ya oYeriko, nave yaari oolikana ene wiira yaapwetexe atthu a epooma ele, okhala wiira yaanipaka itthu sootepa otakhala!

Rahabi aanisuwela wiira atthu a epooma awe yaanipaka itthu soohiloka. Owo aahikhalana mweettelo woohiloka, okhala wiira aari namararuwa. Moohaanyiherya, owo aaniphavela oturuka mweettelo awe. Masi nuumala Rahabi wiiwa voohimya sa Yehova, eyo yaahinvara murima. Ohiya woova, Rahabi aahikhalana nlipelelo. Owo aahiweha wiira Yehova, Muluku onaakhapelela atthu awe ni waathokorerya mwa nttittimiho, etthu yeeyo yaari yoovirikana ni amuluku eethiru a oKanaani. Okhala wiira Yehova, Muluku a xariya, oowaarya ni ookhapelela. Nto Rahabi aahiweha wiira owo aari Muluku amphavela awe wiira omukokhoreleke.

Ohiyu omosa, alopwana anli yaahimana mukhora awe aphavelaka opuro woomaka. Moowaakuveya, Rahabi aahisuwela wiira alopwana ale yaari anamahottela a wIsarayeli! Nave khahiyo aari yoowo paahi aawenhe anamahottela ale. Mwene a oYeriko aahaaruma anakhotto orowa owannyawe namararuwa ole, nto yaahimukhanyererya wiira aakumiherye ota anamahottela a wIsarayeli. Okathi yoole, Rahabi aahaana opaka yoothanla yaarowa oturuka okumi awe. Aarowa opaka exeeni? Niireke aarowa owiiwelela atthu ootakhala a oYeriko aahiiso anamahottela a wIsarayeli yaarummwale ni Yehova?

Moolipa murima, Rahabi aahithanla waakhaliherya anamahottela a Yehova. Rahabi aahiwiipithiha anamahottela ale vasulu va empa awe ni aahaawoka anakhotto yaarummwale ni mwene. Nuumala anakhotto orowa, owo aahiwela vasulu va empa eyo ni aahaaleela anamahottela a wIsarayeli etthu yaamwiirinhe opaka ele, oriki: “Koosuwela wiira Yehova onimoovahani elapo ela”. Tthiri Rahabi aahooniherya omwaamini Yehova! Nuumala-vo, Rahabi aahilavula etthu yahaareere waalipiha anamahottela ale, ohimyaka so: Atthu ootheene a oYeriko anniwoova vanceene aisarayeli. Nto, Rahabi aahaaxonttela anamahottela ale wiira amukhapelele yena ni emusi awe, okathi Yehova aarowa awe opwetexa epooma ele.

Rahabi aahiwoopola anamahottela ale. Nave anamahottela yaahiweha wiira Rahabi aahithanla omwaamini Yehova, ti nthowa naya yeemerenrye aya opaka etthu aavekenle awe. Nto Rahabi ni emusi awe khiyaarowa opwetexiwa. Masi aahaana ohimuleela mutthu, opuro yaari aya anamahottela a wIsarayeli. Owo aahaana otthukwelela mukhoyi wooxeerya vaxanelani va empa awe ni ohikhuma mpaani, okathi yaarowa aya opwetexiwaka epooma ele ya oYeriko. Akhala wiira ampaka eyo, Rahabi ni emusi awe yaamoopoliwa.

Rahabi aahaakhaliherya anamahottela okhuruwa vaxanelani arumeelaka mukhoyi ni aahiwoopola. Nuumala-vo, owo aahitthara malakiheryo aavahiwe awe, aahitthukwelela mukhoyi wooxeerya vaxanelani va empa awe ni khaamuleelale mutthu, etthu yaarwenle aya anamahottela ale. Rahabi aahaana wooniherya oolipa murima, maana vaakhanle wiira anakhotto a epooma ele yaahisuwela ele aapanke awe, owo aamwiiviwa. Ohiya-vo, Rahabi aahaathukumanya amusi awe mpaani mwawe. Okathi Yehova eemenxe awe maasi a muro Yordani wiira aisarayeli alapuwe, eyo yaahitepa omukupaliha Rahabi wiira aahipaka yoothanla yooloka. Eriyari ya mahiku 7, anakhotto arukureryaka epooma ele, atthu a epooma ele ya oYeriko yaanoova ni othukumela. Vano nihiku nookiserya, yaahaana orukurerya ikwaha 7, nto anamukuttho yaahoopa malope aya. Nave anakhotto yaahikhuwela vanceene, moohipisa ixiri sa epooma saahimora, masi Rahabi ni emusi awe yaahoopowa, okhala wiira yaahimuroromela Yehova.

Nuumala opwetexiwa epooma ele, anamahottela ale yaahimukumiherya ota Rahabi ni emusi awe. Epooma ele yootheene, empa ya Rahabi paahi ti yaahanle ehipwetexiwe. Ntoko Yooxuuwa aarumme awe, Rahabi ni emusi awe yaahoopowa. Nuuvira okathi, Rahabi aahiirela mpantta nloko na aisarayeli. Owo aahitheliwa ni mwisarayeli ni aahaayara anamwane. Nuuvira iseekulu sinceene, mweemusini mwawe aahikhumelela mulopwana oolipa murima aatonko okhala, Yesu Kristu. (Math. 1:​5, 16) Rahabi aahiphwanya mareeliho manceene mwaha wa waamini wawe ni olipa murima.

Musome yoowiiraneya ela mbiibiliyani, soolepa sinittharelana:

• Yooxuuwa 2:​1-24; 5:1; 6:​14-25

• Aheeperi 11:​30, 31

• Yakobo 2:​24, 25

Nikoho para ovaanela:

Rahabi oonihenrye sai olipa murima?

Mutokose itthu sikina

1. 1. Okumi wa Rahabi waari sai oYeriko? (Owehaweha 01/11/2013 epaax. 12 itti. 4 mpakha epaax. 13 etti. 1)

   Mwaakhule va

2. 2. Ninsuwela sai wiira anamahottela a wIsarayeli khiyaaphavela orupihana woohiloka, okathi yaamanke aya owannyawe Rahabi? (Perspicaz, vol. 2 “Namararuwa” etti. 16)

   Mwaakhule va

3. 3. Xeeni vasulu va empa ya Rahabi saapwehiwe aya mitathi sa eliinyu? Ni saarumeeliwa para xeeni? (Perspicaz vol. 2 “Eliinyu” itti. 1-3) A

   Mwaakhule va

   

   Thanks for your interest in my photos/Moment Open via Getty Images

4. 4. Xeeni vaari aya voohitthekeya Rahabi waawoka anakhotto yaarummwale ni mwene? (Owehaweha 01/12/2004 epaax. 9 etti. 1) B

   Mwaakhule va

   

Muupuwelele itthu mwiixuntte anyu

• Xeeni Rahabi aapirisari awe olipa murima wiira ohiye mweettelo awe woohiloka para omukokhorela Yehova hoothe ni aisarayeli? Anaskola a Biibiliya aniixutta exeeni ni ntakiheryo na Rahabi?

  Mwaakhule va

• Munrowa otakiha sai olipa murima wa Rahabi?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni yoolakela ya Yehova?

  Mwaakhule va

• Etthu xeeni kinrowa aka omukoha Rahabi nuumala ohihimuxiwa?

  Mwaakhule va

Mwiixutte itthu sikina

Wiira noopowe nihiku na Yehova, ntakiheryo na Rahabi ninniixuttiha exeeni? Musome mwaha oni:

“Okathi maxakha maalupale anrowa aya opacerya, munrowa okhala opuro xeeni?” (Owehaweha 15/05/2009 ipaax. 7-8)

Murumeele yoowiiraneya ela ya mbiibiliyani wiira mwaakhaliherye aniinyu, oweha itthu sa efaita siiraneyale. Musome mwaha oni:

“Rahabi aahiiwelela malakiheryo” (Matakiheryo a myaha sa mbiibiliyani mwaha 11)