Yehova ohaaphenta apinaatamu aavahaka anamukuttho

1. Xeeni apinaatamu ootheene anipirisari aya okhaliheriwa?

APINAATAMU ootheene, hata asuwelaka aahiiso ahisuwelaka, awo annipirisari okhaliheriwa. Mwaha wa xeeni? Mwaha woowi, aaravihiwa etampi. Tthiri, etampi enniwiiriha apinaatamu ootheene orakamelana ni Muluku. (Aef. 2:12; Akol. 1:21) Tivonto, etampi eri ntoko muro muulupale onaavalaanya apinaatamu ni Muluku. Nto khuuvo pinaatamu oniwerya otupha muro owo ohikhaliheriwe. Apinaatamu yaahikhaliheriwe okhalana waataana wooloka ni Muluku, awo khanrowa owerya ophwanya ohakalala weekeekhai. Nave khanrowa owerya okhalana nlipelelo na muhoolo. Yehova onniphavela waakhaliherya apinaatamu. Nto etthu xeeni opanke awe wiira aakhaliherye?

2. Exeeni ninrowa ahu wiixutta mwaha ola?

² Wiira aakhaliherye apinaatamu okhalana waataana wooloka ni yena hata ayariwe ene arina ene etampi, Yehova ohaavaha anamukuttho ni aalupale a anamukuttho wiira yaakhaliheryeke. Khalai, Yehova aahaavaha aisarayeli anamukuttho ni anamukuttho aalupale. Muhoolo mwaya, Yehova aahimuthanla Yesu Kristu wiira okhale muulupale a anamukuttho para muloko wa ekristau. Mpakha olelo-va, Yesu onnirumeela ntoko muulupale a anamukuttho. Mwaha ola, nnooweha moota anamukuttho ni aalupale a anamukuttho yaakhaliherya aya alopwana ni athiyana a khalai. Nave nnooweha moota muulupale a anamukuttho onnikhaliherya awe olelo-va ni moota makristau oothanliwa 144 000 ni anamukuttho akina, anrowa aya onikhaliherya muhoolo. Nuumala-vo, nnooweha wiira mwaha wa Yehova onivaha anamukuttho ni aalupale a anamukuttho, owo onniniphenta vanceene.

MOOTA ANAMUKUTTHO YAAKHALIHERYA AYA AISARAYELI

3. Anamukuttho yaakhaliherya sai ale yaaphavela omukokhorela Yehova ntoko oniphavela awe? (Aheeperi 5:1) (Nwehe eteseenyu.)

³ Murummwa Paulo, aahitthokiherya nthowa naya aisarayeli yaavahiwe aya anamukuttho ni Yehova. (Mmusome Aheeperi 5:1.) Yehova aaphavela wiira aisarayeli alipiheke ompatthani yaarina aya ni yena. Eyo ti etthu yaamwiirihale Yehova waathanla anamukuttho, yaawo yaarina muritti wa waakhaliherya aisarayeli ni myaha saavarihana ni “omukokhorela waya Muluku.” Aalupale anamukuttho ni anamukuttho ootheene, yaanaakhaliherya ale yaaphavela omukokhorela Yehova ntoko oniphavela awe ni okhala mpatthani awe.

4. Mwa enamuna xeeni anamukuttho a aisarayeli, yaari aya anamitthaka a Muluku?

⁴ Anamukuttho yaakhaliherya sai aisarayeli okhala apatthani a Yehova ni omukokhorela ntoko oniphavela awe? Awo yaanaakhaliherya mwa inamuna piili. Yoopacerya, anamukuttho yaari anamitthaka a Yehova, yaawo aaruma awe wiira awiixuttiheke atthu awe. Moota xeeni? Malakiya 2:​7, onihimya so: “Namukuttho ohaana okhalana osuwela mwaano mwawe, nave atthu aroweke wa yoowo wiira yiixuttihiwe nlamulo, okhala wiira owo namitthaka a Yehova a anakhotto.” Anamukuttho yaahithanliwa wiira awiixuttiheke aisarayeli nlamulo na Moise ni yaakhaliheryeke wiiwexexa ni weettela nlamulo nlo. Mwa ntakiheryo, okathi wa Nehemiya, alevi 13 yaahimukhaliherya namukuttho Eezira osoma ni waakhaliherya atthu wiiwexexa nlamulo. Awo yaanaatthokiherya mwa enamuna yookhweya ni yaakhaliherya atthu awo wiiwexexa etthu yaasommwa. Mwa enamuna ela, aisarayeli yaaniwerya osuwela ni opaka etthu Yehova aaphavela awe ni olipiha ompatthani yaarina aya ni yena. — Neh. 8:​2, 3, 6-8.

5. Muteko xeeni anamukuttho yaavara aya nave muteko owo onniixuttiha exeeni voohimya sa Yehova?

⁵ Ya nenli, anamukuttho yaanivaha mikuttho sa inama wiira Yehova aalevelele aisarayeli itampi saya. Aisarayeli yaanisuwela wiira yaanimutthekela Yehova khula nihiku. Nave yaanisuwela wiira yaahaana okhaliheriwa wiira Yehova aalevelele itampi saya. (Esal. 51:9) Eyo ti etthu yaamwiirihale Yehova waathanla anamukuttho wiira avaheke mikuttho sa inama para mureerelo wa aisarayeli. Nto aisarayeli yaawo yaaphavela omusiveliha Yehova, yaanihakalala osuwela wiira yaahileveleliwa itampi saya! Muteko yaavara aya anamukuttho, onnooniherya wiira Yehova onnaaphenta arumeyi awe, onnaamorela ikharari, oniphavela mureerelo aya ni owoopola.

MUTEKO WA ANAMUKUTTHO KHALAI, NIINAANO-VA NI MUHOOLO

6. Khalai muteko xeeni ahooleli a imusi yaavara aya, waalikana ni muteko wa anamukuttho?

⁶ Okhala wene, Yehova oniphavela okhalana murettele ni arumeyi awe oowiiwelela. Ohinatthi waathanla anamukuttho wiira yaakhaliheryeke aisarayeli, ahooleli a imusi yaawo yaamukokhorela Yehova, ikwaha sinceene yaanivaha mikuttho para mureerelo aya ni mureerelo wa emusi aya. Yehova aanihakalala okathi awo yaavaha aya mikuttho iyo wiira amuhakalalihe. Nave khula okathi, owo aaniphavela okhala mpatthani a apinaatamu oororomeleya. Mwa ntakiheryo, nuumala okhuma mukalawani, Nowe aahimuxukhurela Muluku onvahaka mikuttho. (Maph. 8:20) Abrahamu, aahimuteka altaari wiira onvaheke mikuttho Yehova. (Maph. 12:​7, 8) Nave Yoobi aahinvaha mikuttho Muluku para mureerelo wa anaawe. (Yoobi 1:5) Tivonto, Yehova aawiitthana awe alopwana akina ntoko “anamukuttho”, masi nlelo ohinatthi waathanla anamukuttho para aisarayeli. Nto, Yehova aahaaruma aisarayeli wiira: “Mwaaleele anamukuttho, [aahiiso ahooleli a imusi] yaawo ikwaha sinceene animwaattamela Yehova wiira yiireerihe, wiira Yehova ohiwiive.” — Okhu. 19:22.

7. Tani aari Melikhisedeki ni muteko aavanre awe waalikana sai ni muteko wa Mesiya?

⁷ Mulopwana oopacerya onilavuliwa mbiibiliyani okhala namukuttho, aari Melikhisedeki. (Maph. 14:18) Owo khahiyo aari namukuttho paahi, masi-tho aari mwene. Muhoolo mwaya, Yehova aahileiherya wiira Mesiya aarowa okhala mwene ni namukuttho, ntoko Melikhisedeki. Nto itthu sootheene sooreera Mesiya onrowa awe opaka, sinrowa okhala sa mahiku ootheene. — Esal. 110:4; Ahep. 7:17.

8. Tani yaari anamukuttho wIsarayeli ni muteko xeeni yaavara aya?

⁸ Ntoko nithokorenrye ahu, Yehova aahaavaha aisarayeli anamukuttho ni aahaavaha nlamulo omurumaka Moise. Nlamulo nlo, naanitthokiherya muteko yaarowa aya ovaraka anamukuttho ni aalupale aanamukuttho. Yehova aahimuthanla Aroni, yoowo aari a nihimo na Levi wiira okhale muulupale a anamukuttho ni aahaathanla anaawe wiira akhale anamukuttho. Nuumala-vo, anamukuttho ootheene ni aalupale a anamukuttho, yaari a osuulu wa Aroni. (Okhu. 40:​12-15) Yehova aahaavaha anamukuttho muteko wa ovahaka mikuttho. Nuumala-vo, alopwana akina a nihimo na Levi, yaahithanliwa wiira yaakhaliheryeke anamukuttho mwa inamuna soovirikana. Yehova aahaavaha malakiheryo ooluluwanya a mikuttho yaakhanle aya oovaha, yoolakela ya mikuttho iyo ni moota yaakhanle aya oovaha. Mikuttho iyo, saanooniherya etthu Yehova aarowa awe opaka muhoolo mwaya para mureerelo wa apinaatamu ootheene.

9-10. Tani anrowa okhala anamukuttho yaawo anrowa omukhaliheryaka Yesu okathi wa Iyaakha 1000 sa Olamulela wawe?

⁹ Nuumala Yesu opatisiwa, owo aahikhala Namukuttho Muulupale yoowo aakhaliherya apinaatamu okhalana waataana wooloka ni Yehova. (Ahep. 8:1) Moottharelana, owo aahivaha ekumi awe yoohittheka wiira apinaatamu aleveleliwe itampi saya moomalela. Mukuttho Yesu ovahale awe, wookhalana efaita yuulupale ovikana mikuttho sa inama seiyo saavahiwa ni anamukuttho a aisarayeli. Mpakha olelo-va, Yesu Namukuttho ahu Muulupale yoowo onnikhaliherya okhala apatthani a Yehova. (Ahep. 9:24) Okathi Namukuttho ahu Muulupale ni Mwene, Yesu, onrowa awe olamulelaka valaponi, makristau oothanliwa 144 000 anrowa okhala mamwene ni anamukuttho, avaraka vamosa ni Yesu. (1 Ped. 1:​3, 4; 2:9) Nto Yehova, Yesu ni makristau oothanliwa 144 000, anoorowa omala-maliha itampi sa apinaatamu ootheene animwiiwelela Yehova ni animwiiriha elapo okhala eparayiisu. Tthiri ninnilipelela okathi owo woohakalaliha!

¹⁰ Ntoko niixuntte ahu, khalai Yehova aahaathanla anamukuttho wiira yaakhaliheryeke apinaatamu okhalana waataana wooloka ni Yehova. Mikuttho anamukuttho awo yaavaha aya, saanaakhaliherya aisarayeli woona wiira awo yaanipirisari mukuttho waarina efaita yuulupale, eyo piiyo, mukuttho wa Yesu. Okathi wa Iyaakha 1000 sa Olamulelo wa Kristu, Yesu ni makristau oothanliwa 144 000, nlelo anrowa okhala anamukuttho yaakhaliheryaka apinaatamu okhala oohittheka, mpakha ophiya okathi apinaatamu ahinrowa aya opirisariki miteko sa anamukuttho. Yoovaha ela ya Yehova ya anamukuttho, enniixuttiha exeeni ni ennikhaliherya sai omphenta vanceene yena? Eyo ti etthu ninrowa ahu othokorerya ittima sinittharelana.

ANAMUKUTTHO ANNINIKHALIHERYA OMWAATTAMELA YEHOVA

11. Exeeni Yehova oniphavela awe?

¹¹ Yehova oniphavela wiira arumeyi awe akhalane waataana wooloka ni yena. Nuumala apinaatamu omutthekela Yehova, awo yaahirakamelana nuuwo. Masi Yehova oniphavela wiira nitthikele okhalana waataana wooloka ni yena. Nave oniphavela wiira ninvekeleke, nimukokhoreleke, nikhalane waataana wooloka ni yena ni nikhaleke mahiku ootheene. (2 Akor. 5:18) Yehova onnisuwela wiira khanirina nthowa mwaha wa etampi niravihiwe ahu. Tivonto, mwaha wa omoriwa ikharari onnimukhaliherya khula mmosa a hiyo wiira okhalane waataana wooloka ni yena. Niireke eyo kheniwiirihani omphenta vanceene Yehova?

12. Itthu xeeni Namukuttho ahu, Yesu, onivarerya awe ohinatthi omuxonttela Tiithi wiira onilevelele? Xeeni vari aya voolipiha osuwela eyo? (Aheeperi 7:25) (Nwehe efootu.)

¹² Yesu oniphavela wiira nikhalane waataana wooloka ni Yehova. Biibiliya onihimya wiira Namukuttho ahu Muulupale, Kristu, namakhaliherya a Tiithi. (1 Yoh. 2:1; mmusome Aheeperi 7:25.) Itthu xeeni Yesu onivarerya awe ohinatthi omuxonttela Tiithi wiira onilevelele vaavo nimpaka ahu etthu yoohiloka? Woonasa wene, owo onnivarerya makhalelo ahu, opuro ni moota ninnuwale ahu, mixankiho sinniphwanya aahiiso itthu sikina. Nave pooti wiira onnivarerya mikhalelo sanyu sooloka, itthu sootheene sooloka munipaka anyu ni omwaamini wanyu Yehova. Nave Yesu onnisuwela itthu munuupuwela anyu, moonelo anyu, akhala wiira munnivekela ikwaha sinceene Yehova wiira ooleveleleni ni moota muniimananiha anyu opaka itthu sooloka. Nikupaliki ni murima wootheene wiira Yehova onniwiriyana okathi onixontteliwa awe ni Yesu wiira onilevelele, maana Yehova tooreera murima ni ori oolikana ene wiira onilevelele. (Esal. 86:5) Yehova tomuthanlale Yesu wiira onikhaliheryeke olavula ni yena okathi nimpirisari ahu okhaliheriwa.

13. Etthu xeeni emwiirihale Yehova omuthanla Yesu okhala Namukuttho ahu Muulupale? Yesu onnikhaliherya sai okathi ninvekela ahu? (Aheeperi 4:16)

¹³ Yehova oniphavela wiira ninvekeleke khula etthu nimphavela ahu. (Mmusome Aheeperi 4:16.) Okhala wiira Yesu Namukuttho ahu Muulupale, owo onninikhaliherya olavula ni Yehova ni murima ahu wootheene. Yehova onnihakalala vanceene owiriyana mavekelo ahu. Vaavo nninvekela ahu, ninnooniherya wiira ninnimwaamini. Ikwaha sikina, hiyo pooti ohisuwelaka moota woomutthokiherya oratteene Yehova itthu sinnixankiha. Nave hiyo pooti oxanka nihinasuwela moota wonvekela Yehova. (Arom. 8:26) Hata vari siiso, Yehova onnisuwela, onniiwexexa ni onninikhaliherya. Tivonto, nihooveleleke omulela Yehova khula etthu ennixankiha, okhala wiira owo Tiithi ooreera murima ni oomoriwa ikharari.

14. Exeeni Yehova opanke awe enooniherya wira oniphavela wiira apinaatamu akhalane okumi woohimala?

¹⁴ Yehova oniphavela wiira apinaatamu akhalane okumi woohimala. (Ezek. 33:11) Mikuttho sa inama saavahiwa khalai, khisaamala-maliha itampi sa arumeyi a Muluku. (Ahep. 7:19) Masi Yehova aaphavela waakhaliherya arumeyi awe, osuwela wiira yaanipirisari mukuttho wa efaita yuulupale, niire so, mukuttho wa Yesu. Okhala wiira Yesu oovaha okumi awe, Yehova onninlevelela itampi sahu moomalela. Nave mukuttho wa Yesu, onnaakhaliherya apinaatamu oororomeleya ophwanya okumi woohimala. Tthiri ninnimuxukhurela Yehova mwaha woonivaha etthu nimpirisari ahu wira nikhalane okumi woohimala! — 1 Yoh. 4:10.

15. Ophenta wa Yehova onooneya sai okathi onaathanla awe atthu anrowa akhale anamukuttho?

¹⁵ Ninniweha ophenta wa Yehova, okathi ninwuupuwela ahu atthu Yehova onaathanla awe wiira akhale anamukuttho ahu. Moolikanasa ni Yesu, ale anithanliwa ni Yehova wiira yalamuleleke ni Yesu, khanihiya ororomeleya mpakha okhwa. (Afil. 2:8; Wis. 2:10) Omuroromela waya Yehova ohaana wooniwa ni atthu ootheene. Nto nikupaliki wiira okathi wa Iyaakha 1000 sa Olamulelo wa Kristu, awo anoonikhaliherya opaka itthu sooloka ni vakhaani-vakhaani ohikhalana etampi. Nave anoonikhaliherya ohikhalana etampi niravihiwe ahu ni Adamu ni Eva. Itthu iyo sootheene sooloka sinimwiiraneya mwaha wa mukuttho woowoopola wa Yesu. Nto Yesu ni ale anrowa olamulelaka ni yena, anoopaka itthu iyo sooreera mpakha okathi sinrowa aya wiiraneya itthu sootheene Yehova aaleihenrye awe apinaatamu ni elapo okhala eparayiisu. — Wis. 22:​1, 2.

16. Aheeperi 4:​15, onooniherya sai wira Yesu tonireerela okhala Namukuttho ahu Muulupale?

¹⁶ Okhala wiira ootoko okhala valaponi, Namukuttho ahu Muulupale Yesu, onnisuwela mixankiho sootheene sinniphwanya. (Mmusome Aheeperi 4:15.) Mwa ntakiheryo, niireke mootoko okhulumuwa ikwaha sikina? Yesu ootoko. (Yoh. 4:6) Niireke mootoko ovoliwa etala aahiiso ntthona? Yesu ootoko. (Math. 4:2; Yoh. 19:28) Niireke mootoko olupatthiwa ni oveehiwa mwaha wa waamini wanyu? Yesu ootoko. (Yes. 50:6; Yoh. 15:20) Niireke mootoko okhweliwa mutthu mwamphenta anyu? Yesu ootoko okhweliwa mpatthani awe aihaniwa Laazaro ni woonasa wene, paapa awe aihaniwa Yosefe. Nto nihaana okupali wiira Namukuttho ahu Muulupale, Yesu, onoowerya onikhaliherya okhala wiira sootoko omphwanya mixankiho sootheene sinniphwanya.

17. Exeeni ennikupaliha wiira makristau oothanliwa, animwaakhaliherya apinaatamu mooreera murima?

¹⁷ Okathi Yesu onrowa awe wakhaliheryaka apinaatamu ohikhalana etampi, anamukuttho 144 000 anrowa okhala ooreera murima ni anoosuwela mixankiho sinniphwanya. Awo yaari apinaatamu oottheka ni alopwana ni athiyana yaakhala valaponi. Nave awo aatoko owereyasiwa, okhulumuwa ni oxanka. Makristau awo oothanliwa, ta makhalelo oovirikana, iraasa, ikultuura, yaakhanle okathi woovirikana ni saahaaphwanya mixankiho soovirikana. Moohicikha mixankiho murina anyu, mukupaliki wiira makristau 144 000, anoowerya wookhaliheryani.

18. Itthu nithokorenrye ahu sa anamukuttho, sinniixuttiha exeeni voohimya sa Yehova? Vano munimoonela sai Yehova?

¹⁸ Itthu sootheene nithokorenrye ahu voohimya sa anamukuttho, sinniniixuttiha wiira Yehova toophenta, toomoriwa ikharari, ta othunku ni tooreera murima. Yehova oovirikana vanceene ni Satana, yoowo onnootherya khula nihiku. (Wis. 12:10) Mwaha ola, noothokorerya itthu sinceene sinnikhaliherya woona wiira nnoowerya okhala apatthani a Yehova ni opaka itthu sinimusivela. Vano munimoonela sai Yehova? Niireke khamunikupali wiira onnoophentani ni oniphavela woolevelelani?

19. Yehova onnoonela sai okathi nnuupuwela ahu itthu soohiloka nimpaka ahu?

¹⁹ Mwaha ola, woonikhaliherya okupali wiira Yehova onnisuwela mixankiho sahu ni moota nnuupuwela ahu, mwaha wookhala atthu oottheka. Yehova onninisuwela oratteene ni onnisuwela wiira hiyo na ntthupi. (Esal. 103:14) Hata vari siiso, Yehova onninlevelela itampi sahu, onniwehexexa itthu sooloka nimpaka ahu ni onnisuwela wiira nnoowerya opaka marukunuxo wiira nipakeke itthu sooreera. Akhala wiira nnuupuwela itampi sahu ni itthu soohiloka nimpaka ahu, nihiliyale wiira Yehova “ti muulupalexa ovikana mirima sahu, ni onnisuwela itthu sootheene.” — 1 Yoh. 3:20.

20. Munrowa opaka exeeni wiira mooniherye omuxukhurela wanyu Yehova mwaha woonivaha anamukuttho?

²⁰ Ntoko nithokorenrye ahu, Yehova ohaathanla anamukuttho wiira anikhaliheryeke omukokhorela ntoko oniphavela awe. Tthiri, owo oniphavela wiira nikhalane ompatthani wooloka ni yena. Wiira onikhaliherye otthikela okhalana waataana wooloka ni yena, Yehova oonivaha anamukuttho yaawo ari ntoko eponti ennaataaniha ni yena. Ntoko onooniherya awe Aheeperi 4:​16, “hiyo nnoowerya omwaattamela Muluku nihoovaka etthu, wiira nimoreliwe ikharari ni nikhaliheriwe okathi wooreerela, mwaha wa Muluku onireerela murima vaalupale.”