Mukhootteke “muupuwelo wa atthu a olumwenku ola”

1. Satana onirumeela sai muupuwelo wa atthu a olumwenku ola? (1 Yohani 2:​15, 16)

NINKHALA olumwenku, yoowo onilamuleliwa ni Satana. (Yoh. 14:30; 1 Yoh. 5:19) Biibiliya onihimya wiira Satana onniwana ekhotto ni atthareli eekeekhai a Kristu. (Wis. 12:​12, 13, 17) Masi eyo khenitaphulela wiira Satana onikhala mapuro ootheene okathi omosa-ru. Nave Biibiliya khonihimya wiira malaikha ooreera murima ni ootakhala murima, anniwerya okhala mapuro ootheene okathi omosa-ru. Hata vari siiso, Satana ookhalana malaikha manceene ootakhala, yaawo animukhaliherya. (Wis. 12:9) Masi yookhala etthu Satana onirumeela awe yeeyo ekhanle mapuro ootheene. Etthu ene tiila: Muupuwelo wa atthu a olumwenku ola. Hata vari siiso, atthu anceene anneettihiwa ni Satana hata asuwelaka aahiiso ahisuwelaka. (Mmusome 1 Yohani 2:​15, 16.) Nnaamwi ahikupaliki wiira Satana ookhala, masi awo annimusiveliha akhala wiira annipaka itthu attharaka muupuwelo wa atthu a olumwenku ola. Atthu awo, “aavariwa nuuwo, wiira evareke itthu siniphavela awe.” — 2 Tim. 2:26.

2-3. a) Arumeyi a Yehova avirikanne sai ni atthu aneettihiwa ni “muupuwelo wa atthu a olumwenku ola”? b) Xeeni ninreerela ahu okhalana ephoole?

² Ikwaha sikina, anamunceene a hiyo pooti wuupuwelaka ntoko atthu a olumwenku ola. Etthu xeeni nikhanle ahu oopaka, nasuwela etthu eniwiiriha atthu wuupuwela ni opaka itthu moovarihana ni olumwenku ola? Nihaana otthara miruku sa mbiibiliyani, seiyo sinnitumererya “okhootta itthu sootheene sinivirikana ni ele Muluku oniphavela awe, vamosa ni itthu sootakhala sa olumwenku ola.” (Tito 2:​11, 12) Nihaana ohihiya opaka eyo hata nisuwelaka wiira Satana ookhalana owerya ni onniwiiriha atthu akina wuupuwela ntoko yena onuupuwela awe. Niira siiso, nnimooniherya wiira ninnimukhootta Diabo, nave Yehova onoonikhaliheryaka. (Yak. 4:​7, 8) Nikupaliki wiira Yehova onnihakalala vanceene mwaha woowi, ninnikhootta wuupuwela ni opaka itthu ntoko atthu a olumwenku ola!

³ Hata vari siiso, nihaana okhalana ephoole. Hata nihisuwelaka, hiyo pooti ohapuxiwa ni muupuwelo aahiiso itthu anipaka aya atthu a olumwenku ola. Eyo ti etthu eniiraneya ni atthu akina, yaawo anipaka marukunuxo manceene wiira amukokhoreleke Yehova. (Aef. 6:11; Afil. 3:18) Mwaha ola, nnoothokorerya iponto sinrowa onikhaliherya okhootta muupuwelo wa atthu a olumwenku ola. Masi wanipacerya nrowe nithokorerye ele anitaphulela aya moolumo oowi “muupuwelo wa atthu a olumwenku ola”. — 1 Akor. 2:12.

ONITAPHULELA EXEENI “MUUPUWELO WA ATTHU A OLUMWENKU OLA”?

4. Onitaphulela exeeni, “muupuwelo wa atthu a olumwenku ola”? Olelo-va, atthu anceene anooniherya sai muupuwelo owo?

⁴ Biibiliya aalavulaka sa “muupuwelo wa atthu a olumwenku ola”, onihimya itthu anipaka aya ni anuupuwela aya atthu ale ahikhanle apatthani a Muluku. Atthu aneettihiwa ni muupuwelo wa olumwenku ola, ikwaha sinceene aniisuupuwela mmensaya paahi. Nave atthu awo annikhootta ele Yehova onihimya awe okhala yooloka ni yoohiloka. Mwa ntakiheryo, atthu anceene olelo-va, annipaka itthu attharaka mweettelo woohiloka onooniherya ohuuliwa muru. Atthu awo, annipaka “itthu sinipakiwa ni atthu a mulaponi”, ohiya opakaka itthu Yehova oniphavela awe. — 1 Ped. 4:3.

5. Mwa enamuna xeeni muupuwelo wa atthu a olumwenku ola onlikana awe ni “epheyo”? (Aefeso 2:​1, 2) (Nwehe efootu.)

⁵ Satana onnirumeela muupuwelo wa atthu a olumwenku ola wiira aahapuxe “atthu anikhala elapo yootheene ya vathi.” (Wis. 12:9) Murummwa Paulo onnilikanyiha muupuwelo owo ni “epheyo.” (Mmusome Aefeso 2:​1, 2.) Tthiri nla nlikanyiho nooloka! Xeeni nnihimya ahu siiso? Muupuwele etthu yaarowa wiiraneya vaakhanle wiira yoopahiwa etthu yoowunkha vanceene esaala yoowaliwa ni ehirina exanela! Atthu yaarowa okhala esaala eyo yaarowa omumulaka epheyo yoohiloka ni yaamwaakumiherya mixankiho. Mwa enamuna emosa-ru, “muupuwelo wa atthu a olumwenku ola” ori ntoko epheyo yoohiloka. Epheyo eyo enniphwanyaneya khula opuro. Nto vakhala wiira nnoomumula epheyo eyo yoohiloka, enoonikumiherya mixankiho sinceene. Vano nrowe nithokorerye moota eyo ekhanle aya oowiiraneya ni moota nikhanle ahu oosyaka wiira niikhapelele.

MUHILAVULEKE MOOLUMO OOHILOKA

6. Olelo-va, atthu anceene a olumwenku ola anilavula sai?

⁶ Biibiliya aahihimya khalai ene wiira mahiku ala ookiserya atthu “anrowa wiittottopaka, wiisoona”, ni “khanrowa ophavelaka wiiwanana”. (2 Tim. 3:​1-3) Atthu anceene mahiku ahu ala, annooniherya mikhalelo iyo ni enamuna anilavula aya. Mwa ntakiheryo, ninniweha aahiiso osoma muxornaaleni moolumo oohiloka aniwiiriha atthu owana. Nave itthoko sinceene, mulopwana aahiiso muthiyana annilavulelana aahiiso annaalavulela anaaya moolumo oohiloka. Nave-tho, khula nihiku atthu anceene akhale amiravo aahiiso aalupale annirumeela moolumo oohiloka aahiiso ooveeha. (Aef. 5:​3, 4) Moolumo awo, annooniherya muupuwelo wa atthu a olumwenku ola.

7. Makoho xeeni ninreerela ahu wiikoha wiira nivarerye moota ninlavula ahu?

⁷ Okhala wiira na makristau eekeekhai, okathi wootheene nihaana olavula moolumo ooloka, okhale okathi ninvaanela ahu ni atthu akina, ninvaanela ahu nirumeelaka mensaaxe aahiiso ni telefooni. (Yak. 1:​26, 27) Nto mwiikoheke so: Kiireke kinnilavula moolumo ooloka okathi kinipaciwaaka aahiiso kinivaanelaka ni mutthu ohinisuwela wiira ka Namoona a Yehova? Okathi kinivaanela aka ni anna ni arokora, kiireke kinnirumeela moolumo ooreerela murima, oottittimiha aahiiso kinirumeela moolumo ooveeha? Kiireke nkinaalavulela moolumo oowereya atthu a vatthokoni vaka? Etthu xeeni yaarowa aya ohimya sa moota kinilavula aka?

8. Etthu xeeni nikhanle ahu oopaka noona wiira ninlavula ntoko atthu a olumwenku ola? (Akolosi 3:​8-10)

⁸ Etthu xeeni nikhanle ahu oopaka noona wiira ninlavula ntoko atthu a olumwenku ola? Nihaana opaka marukunuxo ohiya paahi ni enamuna ninlavula ahu. Muhiliyale ele Yesu aahimmye awe wiira: “Veekeekhai, itthu sootheene sinikhuma mwaano, sinikhuma vamurimani. Nto iyo ti itthu sinimunanariha mutthu.” (Math. 15:18) Ntoko Yesu ohimmye awe, itthu ninlavula ahu sinnooniherya etthu eri vamurimani vahu. Tivonto Biibiliya onilikanyiha awe moolumo “ooruwana”, ni mikhalelo sikina soohiloka ntoko onanariwa, oviruwa ni itthu sootakhala sa khula enamuna. (Aef. 4:31) Akhala wiira munnilavula moolumo awo oohiloka, munvekeleke Yehova wiira ookhaliheryeni owara “omutthu wa niinaano”. (Mmusome Akolosi 3:​8-10.) Nave pooti otokosa iliivuru sahu wiira mphwanye malakiheryo anivarihana ni mwaha owo anrowa wookhaliheryani. Muheemererye muupuwelo wa atthu a mulaponi ohononaka muupuwelo anyu ni moota munilavula anyu. — Aef. 4:29.

MUSYAKEKE ITTHU YEHOVA ONINYOKHA AWE

9. Atthu anceene a mulaponi anoonela sai itthu Yehova onihimya awe okhala soohiloka?

⁹ Muupuwelo wa atthu a mulaponi, onniwiiriha atthu anceene opakaka itthu seiye Yehova onihimya awe okhala soohiloka. Olelo-va, atthu akina annaatumererya akhwaaya okumiha erukulu, orupihana alopwana-ru aahiiso athiyana-ru, ni orupihana ni mutthu ahithelanne aya. (Yes. 5:20) Naahikhalane ephoole, hiyo pooti opacerya wuupuwelaka ntoko atthu awo ni ohinyokha itthu sootakhala. (2 Akor. 11:3) Nave hiyo pooti opaceryaka wuupuwela wiira moonelo wa mulaponi ti wooloka ni itthu Biibiliya onihimya awe khasinivareleya muteko olelo-va. Masi eyo khahiyo ekeekhai! Okathi wootheene itthu Yehova onnivekela awe opaka ti sooloka ni oniphavela mureerelo ahu. Yehova onnisuwela itthu sinceene waavikana apinaatamu ni okathi wootheene itthu onnileela awe sinninikhaliherya. — Yes. 48:​17, 18; 55:9.

10. Makoho xeeni ninreerela ahu wiikoha wiira ninyokheke itthu Yehova oninyokha awe?

¹⁰ Atthu ale aniphavela omuhakalaliha Yehova, ahaana onyokha itthu sootakhala ntoko Yehova oninyokha awe. (Esal. 97:10) Nto ti vooloka wiikoha so: Kiireke malamulo a Yehova anikikhoottiherya opuha? Kiireke iviitiyu kiniwehaaka ni axooku kiniweetta aka kinnooniherya wiira kinninyokha itthu Yehova oninyokha awe? Kiireke kinniphavela wiira Yehova aaturunke malamulo awe wiira avarihaneke ni itthu kiniphavela aka ni sinikisivela?

11. Ninrowa owerya sai onyokha itthu Yehova oninyokha awe?

¹¹ Itthu xeeni mukhanle anyu oopaka vakhala wiira sinnoosivelani itthu Yehova oninyokha awe? Muhuupuweleke wiira khamuniwerya okhala moovarihana ni malamulo a Yehova. Muhiliyale wiira ootheene ahu niyariwe nirina ene etampi, nto okathi mukina ninnikhalana soophavela soohiloka. (Esal. 51:5; 103:14) Nyuwo pooti othanla opaka itthu sooloka ni ohivara itthu sinivarihana ni “soophavela sahu soohiloka”. (Aef. 2:3) Nave nyuwo pooti othanla ohithipelela wuupuwela itthu sinivarihana ni soophavela sahu soohiloka. Akhala wiira munnipacerya okhalana soophavela soohiloka, moowaakuveya muhaana ohiya oweha aahiiso wuupuwela itthu Yehova oninyokha awe. (Maph. 39:​9, 12) Nave muupuweleke moota itthu iyo sikhanle aya oohonona waataana wanyu ni Yehova aahiiso ni atthu akina. Nto muheemererye eyo owiiraneelani. (Aef. 5:5) Mukhaliheriwaka ni Yehova, munoowerya onyokha itthu Yehova oninyokha awe.

MUSYAKEKE OWEHA ITTHU SOOHILOKA SINOONIHERIWA MWINTERNEETINI

12. Itthu sinceene sinooniheriwa mwinterneetini, sinooniherya sai muupuwelo wa atthu a olumwenku ola?

¹² Anamunceene a hiyo, khula nihiku ninnirumeela interneeti wiira nivare muteko, miteko sa oskola, okela esaiti ahu jw.org, omusoma Biibiliya, orowela mithukumano ni muteko woolaleerya. Itthu sinceene sinooniheriwa mwinterneetini, sinikumiheriwa ni muupuwelo wa atthu a olumwenku ola. Mwa ntakiheryo, atthu anceene akhale aalupale aahiiso anamwane, annirumeela interneeti wiira awehe epornokrafiya. Nave atthu anceene otepexa wene amiravo anninviyari ni waakhela mensaaxe, ifootu ni iviitiyu sinitumererya orupihana woohiloka. Itthu sinceene sinikumiheriwa mwinterneetini khahiyo sa ekeekhai ni sinnitumererya opaka itthu soohiloka. Atthu akina annipostari iviitiyu ni ifootu muredes socias yooniheryaka itthu anipaka aya ni mapuro avinre aya. Nto ifootu iyo, ikomentaario ni iviitiyu saamukhaani pooti oniiriha wuupuwelaka wiira nihaana oviriha okathi munceene nitthekulaka ni orowa ilapo sikina hata eyo etaphulelaka ohiya omukokhorela Yehova. — Ahep. 10:​24, 25.

13. Makoho xeeni ninreerela ahu wiikoha sa moota ninrumeela ahu interneeti?

¹³ Nihaana okhalana ephoole wiira nihiviriheke okathi munceene nirumeelaka interneeti aahiiso ehiniirihe ohonona muupuwelo ahu. Nihaana wiikoha so: Okathi mikavi kiniviriha aka kiwehaka iviitiyu ni ifootu sinipostariwa muredes socias? (Aef. 5:​15, 16) Itthu xeeni sinikisivela oweha muredes socias? Okathi sinikhumela aya itthu soohiloka mwinterneetini, kiireke kinnaakuvela ohiya oweha? (Esal. 119:37) Kiireke kinnikupali khula etthu kiniweha aka aahiiso kinisoma aka mwinterneetini kihivarenrye vakhala wira ti ya ekeekhai? — Mir. 14:15.

14. Ninrowa osyaka sai itthu soohiloka sinooniheriwa mwinterneetini?

¹⁴ Etthu xeeni enrowa onikhaliherya osyaka oweha itthu soohiloka mwinterneetini? Muhiviriheke okathi munceene mwaarumeelaka aredes socias ni musyakeke oweha itthu soohiloka sihinireerela owehiwa ni makristau eekeekhai. Nave anamuyari ahaana osuwela itthu anaaya aniweha aya muredes socias. (Aef. 6:4) Asomi anceene, anihimya wiira amiravo yaawo aniviriha okathi munceene yaarumeelaka aredes socias anniixoona okhala mekhaya, annixanka ni anniriipiwa murima waavikana amiravo ale ahinaarumeela aredes socias. Akhala wiira munimweettela malakiheryo a mbiibiliyani, awo animookhaliheryani ohiweha itthu soohiloka sinooniheriwa mwinterneetini.

MUNOOWERYA OKHOOTTA MUUPUWELO WA OLUMWENKU OLA!

15. Yoowiiraneya ya Gloria, eniwiixuttihani exeeni? (Nwehe efootu.)

¹⁵ Moona wiira moohapuxiwa ni muupuwelo wa olumwenku ola, muhaana opaka marukunuxo moowaakuveya. Nrowe nithokorerye yoowiiraneya ya Gloria,a yoowo iixuntte ekeekhai ori ene mwali. Masi aahihapuxiwa ni muupuwelo wa olumwenku ola, maana aaphavela efaama ni musurukhu munceene. Gloria onihimya so: “Miyo khaaphavela okhala thaaciri ni okhalana efaama. Nto mwaha waivaavo kaahipacerya ohirowela mithukumano ni moohipisa nkaaphavela-tho okhala Namoona a Yehova.” Nuuvira okathi, Gloria aahoona wiira itthu aaphavela awe, seettihiwa ni muupuwelo wa atthu a olumwenku ola. Nto marukunuxo xeeni aapanke awe? Gloria onihimya so: “Kaahipacerya omusoma Biibiliya ikwaha sinceene, ovekela ni kaahihiya weetta ni atthu yahaamukokhorela Yehova. Nnaamwi kihirina musurukhu munceene niinaano-va, kinnihakalala mwaha woowi Yehova ookivaha itthu sinceene sooreera. Nave kinnihakalala osuwela wiira okumi aka oneettihiwa ni Yehova ohiya ni olumwenku ola wa Satana.”

16. Yoowiiraneya ya Robert, eniwiixuttihani exeeni?

¹⁶ Vano nrowe nithokorerye yoowiiraneya ya Robert. Mwaha wa ohapuxiwa ni atthu aasomana awe oskola ni itthu aaweha awe mwinterneetini, Robert aahipacerya ompaha soona, ohapaliwa ni orupihana alopwana-ru. Robert onihimya so: “Miyo koona wiira kaari ootaphuwa wiira kipakeke khula etthu kaaphavela aka.” Nuuvira okathi, Robert aahoona wiira ohiya okhala mutthu ootaphuwa, owo ari epottha ya olumwenku ola. (2 Ped. 2:19) Marukunuxo xeeni aapanke awe? Robert onihimya so: “Kaahihiya weetta ni apatthani oohiloka, kinaviriha okathi munceene kiri ene ni atthu animphenta Yehova. Kaahituruka mweettelo aka woohiloka, enamuna kaawaraaka ni wiitthokiha ni moota kaalavulaaka.” Olelo-va, Robert onoonela sai? Owo onihimya so: “Kinnihakalala khula nihiku osuwela wiira kinnimuhakalaliha Yehova. Nto eyo etthu yooreera ovikana moota kaakhala aka khalai. Nave koophwanya ohakalala weekeekhai.”

17. Exeeni ennikupaliha wiira nnoowerya okhootta muupuwelo wa atthu a olumwenku ola? (1 Yohani 4:4)

¹⁷ Itthu xeeni niixuntte ahu mwaha ola? Nihiixutta wiira nihaana okhootta muupuwelo wa atthu a olumwenku ola. Eyo enihela muhina osyaka olavula moolumo oohiloka, osyaka itthu Yehova oninyokha awe ni orumeela mwa miruku interneeti. Nnaamwi muupuwelo wa atthu a olumwenku ola orina ene owerya, masi Yehova onimookhaliheryani opaka itthu sooloka. Nave muhiliyale wiira Yehova toowerya onvikana Satana ni olumwenku awe wootakhala. (Mmusome 1 Yohani 4:4.) Ohiya-vo, Yehova onimoovahani ikuru sawe soowaarya, seiyo sirina owerya ovikana itthu sootheene olumwenku ola. Nto iyo sinimookhaliheryani okhootta weettihiwa ni olumwenku ola. (Luka 11:13) Nto ootheene ahu nihihiye “weettihiwa ni ikuru sa Muluku” ni okhootta muupuwelo wa atthu a olumwenku ola! — Akal. 5:16.