Nilaleye ihapari sooreera “mattaava ootheene a maloko”

1. Xeeni vari aya vooloka waalaleerya atthu ni nttaava naya? (Aroma 10:​13, 14)

ELIIVURU ya Maphattuwelo, ninniixutta moota atthu yahaamwiiwelela Yehova yaaphavela aya oteka epereetiyu yoorakamela osulu. Masi Yehova kheemerenrye eyo ni aahiwiiriha olavula mattaava oovirikana. Nto okathi yoonale aya wiira khiyaiwanana, awo yaahikhuma ni ale yaalavulana aya nttaava nimosa-ru arowaka mapuro makina. Eyo yaahiwiiriha atthu okhala mapuro oovirikana a olumwenku ola. (Maph. 11:​6-9) Nave eliivuru ya Wiisuupulula, ninniixutta wiira Yehova aahihimya wiira muttitthi muulupale wa atthu a maloko ootheene ni mattaava ootheene waarowa omurumeelaka ni waamoopowa okathi wa maxakha maalupale. Nto atthu awo anrowa woopowa, anrowa okhalaka mahiku ootheene elapo esya. (Wis. 7:​9, 10, 14) Masi moota xeeni atthu anilavula mattaava oovirikana anrowa aya owerya omuroromela Yehova okathi wa maxakha maalupale? Eyo enimwiiraneya, akhala wiira ninnilaleya ihapari sooreera nttaava atthu awo aniiwexexa aya. (Mmusome Aroma 10:​13, 14.) Tthiri eparakha yuulupale ovara muteko ola onaakhaliherya atthu woopowa!

2. Eprofesia xeeni ya Zakariya eniiraneya olelo-va?

² Eliivuru ya Zakariya, ennooniherya eprofesia yeeyo Zakariya aahimyale awe wiira atthu ootheene a olumwenku, yaarowa omukokhorelaka Yehova. (Zak. 2:11) Muhoolo mwaya, Zakariya aahilepa wiira: “Etthu onihimya awe Yehova a anakhotto, tiila: ‘Mahiku awo, atthu 10 a mattaava ootheene a maloko, anoovara, aayo, anoovarela oratteene nlaya na muyuda, ariki: “Nimphavela orowa ni nyuwo, okhala wiira nihiiwa wiira Muluku ori ni nyuwo.”’” (Zak. 8:23) Eprofesia ela enniiraneya mahiku ahu ala. Vano ninrowa oweha moota khula mmosa a hiyo, okhanle awe ookhaliherya olaleya ihapari sooreera nttaava atthu awo aniiwexexa aya.

WAAKHALIHERYA “ATTHU 10 A MATTAAVA OOTTHEENE”

3. Tani anithoonyerya “muyuda” ni “atthu 10”?

³ Eprofesia ya Zakariya, ennimulavula “muyuda”. Muyuda owo onithoonyerya exeeni? Onithoonyerya atthu yaale Muluku aathanlale awe ni ikuru sawe soowaarya. Nave annisuweliwa okhala “aisarayeli a Muluku”. (Akal. 6:16) Makristau awo oothanliwa, yiihaneliwe “orowa wiirimu”. (Ahep. 3:1) Nave “atthu 10” anithoonyerya arumeyi a Yehova, yaawo anrowa okhalaka mahiku ootheene, mparayiisu valaponi. Atthu awo anikhuma ilapo soovirikana ni anilavula mattaava oovirikana.

4. Etthu xeeni yiiraneyale mwaakha wa 1919, nuumala Yesu omuthanla “murumeyi oororomeleya ni a ankhili”?

⁴ Mwaakha wa 1919, Yesu aahithanla ekurupu ya atthu oothanliwa, yaawo ari “murumeyi oororomeleya ni a ankhili.” Alopwana awo, aavahiwa muteko wa wiiwexexa ni waatthokiherya muhupi wa mbiibiliyani atthu a mattaava ootheene. (Math. 24:45) Ohinatthi mwaakha wa 1919, arumeyi a Muluku yaanilaleya ihapari sooreera arumeelaka eviitiyu ya “Fotodrama da Criação”. Eviitiyu eyo yaahitaphuleliwa mattaava manceene. Masi murumeyi oororomeleya ni ankhili, aahoona wiira aahaana opaka etthu ekina ohiya paahi orumeela eviitiyu eyo. Nto muhoolo mwaya, mwaakha wa 1921, owo aahikumiherya eliivuru A Harpa de Deus. Eliivuru eyo yaahitaphuleliwa mattaava oowiiraka 36. Mwaakha wa 1935, “murumeyi oororomeleya ni ankhili”, aahitthokiherya wiira “muttitthi muulupale”, waarowa omurumeelaka Yehova okhalaka valaponi vaava mahiku ootheene. Nave aahoona wiira muttitthi muulupale waahaana waalaleerya atthu a ilapo soovirikana ni a mattaava oovirikana. Akhaliheryaka wiiraneya eprofesia ya Zakariya, alopwana oothanliwa a okathi ole, yaahitthokiha muteko woolaleerya yoowo waarowa ovariwaka elapo yootheene.

“ATTHU ANYU ANIMWIIVAHERERYAKA NI MURIMA AYA WOOTHEENE”

5-6. Eprofesia eri Yesaya 2:​2-4, eniiraneya sai olelo-va? (Nwehe efootu.)

⁵ Arumeyi a Muluku annikhalela nthiti olaleya ihapari sooreera olumwenku wootheene. Ntoko Yesaya aahimyale awe, atthu a elapo yootheene anniphavela wiixutta voohimya sa Yehova ni omurumeela. (Mmusome Yesaya 2:​2-4.) Aphavelaka waakhaliherya atthu awo wiixutta voohimya sa Yehova, arumeyi a Muluku anniivahererya ni “murima aya wootheene” olaleerya, otaphulela iliivuru, wimpirimiri ni waakawela atthu a mattaava ootheene a olumwenku. (Esal. 68:11; 110:3) Nave anna ni arokora anceene aapaka esaiti jw.org ni aplikatiivu JW Library^®. Esaiti ni aplikatiivu owo, sinnaakhaliherya atthu anilavula mattaava oovirikana omusuwela Yehova ni Biibiliya.

⁶ Atthu a maloko ni mattaava ootheene, annittottela mureerelo iviitiyu ni iliivuru sinikumiheriwa ni murumeyi oororomeleya ni a ankhili. Enamuna emosa nnooniherya ahu oxukhurela wahu, ori ovaha musurukhu ahu wiira nikhaliherye muteko woolaleerya onivariwa olumwenku wootheene. Musurukhu owo ninvaha ahu, onnikhaliherya opakiwa iviitiyu ni iliivuru mattaava anivikana 1 100. Nto khula mwakha, atthu anceene annipacerya omusoma Biibiliya ni annipatisiwa wiira amukokhoreleke Yehova.

7. Exeeni ninkupali ahu vaavo ninweha ahu yiiraneyaka eprofesia eri Zakariya ni Wiisuupulula? (Wiisuupulula 14:6)

⁷ Nnaamwi arumeyi a Muluku alavulaka mattaava oovirikana, awo annivara hoothe muteko woowaalaleerya ihapari sooreera atthu a elapo yootheene. Awo annivara muteko owo akhaliheriwaka ni malaikha oororomeleya. (Mmusome Wiisuupulula 14:6.) Okathi ninweha ahu iprofesia sa mbiibiliyani siiraneyaka, ntoko eri Zakariya ni Wiisuupulula, iyo sinninikupaliha wiira iprofesia sikina sinimwiiraneya. Nave ninneetta ni mutthenkeso wa Yehova, maana noosuwela wiira Yehova onnirumeela mutthenkeso owo wiira atthu a ilapo sootheene yiiwe ihapari sooreera.

OLELO-VA YEHOVA ONNIPAKA ITTHU SOOTIKINIHA

8. Etthu xeeni yootikiniha Yehova aapanke awe nihiku na Pentekoositi a 33 Nuumala Kristu Orwa?

⁸ Nihiku na Pentekoositi a 33 Nuumala Kristu Orwa, Yehova aahipaka etthu yootikiniha. Owo aahiwiiriha awiixutti a Yesu yaari oYerusalemu opacerya olavula mattaava oovirikana. (Mit. 2:​4-10) Exeeni yaamwiirihale opaka eyo? Mwaha woowi okathi ole, atthu yaakhuma ilapo soovirikana, yaahithukumana oYerusalemu wiira amukokhorele Muluku mutemplo. Nto Yehova aaphavela wiira atthu awo yiiwe ihapari sooreera ni nttaava naya. (Mit. 2:11) Olelo-va, iliivuru ni iviitiyu sahu sinninikhaliherya waalaleerya atthu ni nttaava naya.

9. Ninrowa waakhaliherya sai atthu anilavula nttaava nikina wiiwa ihapari sooreera?

⁹ Ti vooloka atthu wiiwa ihapari sooreera ni nttaava aniiwexexa aya oratteene. Mwa ntakiheryo, nkahaya mmuupuwele mulopwana oniwereiwa ori ene elapo ekina. Wiira openuwe, owo ohaana orowa ospitaali wiira alavule ni meetiku. Masi meetiku owo khonilavula nttaava na mulopwana owo. Nto wiira mulopwana owo iiwe malakiheryo a meetiku, yaawo anrowa omukhaliherya okhala saana, ohaana otaphuleliwa. Mwa enamuna emosa-ru, atthu anceene olelo-va khanimusuwela Yehova ni kharina nlipelelo. Nto wiira naakhaliherye, muhupi wa mbiibiliyani onnitaphuleliwa mattaava manceene atthu awo aniiwexexa aya. Eyo ennaakhaliherya omusuwela Muluku ni okhalana nlipelelo na muhoolo. Okathi nnimphwanya ahu mutthu onilavula nttaava nikina, nihaana omurumeela Biibiliya wiira nimukhaliherye osuwela moota woophuka mixankiho sawe. Mwa ntakiheryo, hiyo pooti onvaha eliivuru aahiiso omooniherya eviitiyu ya nttaava nawe.

10-11. Exeeni nniixutta ahu ni yoowiiraneya ya munna Robert ni yoowiiraneya eri ekaaxa eni: “Muthiyana aatthyawenle elapo ekina aahiixutta ekeekhai”?

¹⁰ Nrowe niwehe moota nikhanle ahu oorumeela iliivuru sahu ni aplikatiivu JW Library, wiira naalaleerye atthu anilavula mattaava makina. Nrowe niwehe etthu yaamwiiranenle Robert, yoowo onilavula Enkelexi. Okathi aalaleerya awe opoortu, owo aahimphwanya mulopwana a oTurquia, yoowo aavara munaviyuni. Owo khaasuwela saana olavula Enkelexi, masi aaheemererya eproxuura Ihapari Sooreera Sinikhuma wa Muluku!, ya nttaava na oTurquia. Robert aahisoma ikwaha sinceene eproxuura ele. Nto aahinvekela mulopwana ole osoma mpantta mmosa ni nttaava nawe. Mulopwana ole aahipaka makoho manceene voohimya sa itthu soohiloka siniiraneya molumwenkuni. Nto Robert aahimurumeela aplikatiivu JW Library wiira aakhule makoho awo omurumeela Biibiliya a nttaava na oTurquia. Mulopwana ole, ohimmye so: “Nnaamwi muhisuwelaka nttaava naka, nyuwo muhaakhula makoho aka manceene!” Robert onihimya so: “Naahivaanela ewoora ntero. Nuumala ovaanela, kaahoona wiira mulopwana ole aahiiwexexa muhupi ole wa mbiibiliyani ni aahoona wiira Biibiliya ookhalana efaita yinceene.” Tthiri nookhalana eparakha yuulupale ya waakhaliherya atthu akina wiiwa muhupi wa mbiibiliyani ni nttaava aniiwexexa aya!

¹¹ Nnoowerya waakhaliherya atthu akina naavahaka efolyeeto aahiiso niwooniheryaka mwaha wa nttaava naya ori esaiti ahu jw.org. Nto akhala wiira munomphwanya mutthu onilavula nttaava nikina, nyuwo pooti orumeela enamuna ela niixuntte ahu wiira mmulaleerye ihapari sooreera ni nttaava nawe.

NAAKHALIHERYEKE ATTHU AKINA OMUSUWELA YEHOVA

12. Omusoma Biibiliya a Elapo Esya onaakhaliherya sai arumeyi a Muluku?

¹² Muteko anivara aya anamataphulela, onninikhaliherya ootheene ahu. Okhuma khalai atthu anceene annimutaphulela Biibiliya.a Muteko owo anivara aya anamataphulela onnaakhaliherya atthu anceene omusoma Biibiliya ni nttaava naya. Biibiliya a Elapo Esya, ootaphuleliwa mattaava manceene nto eyo ennaakhaliherya arumeyi a Yehova a olumwenku wootheene wiixutta ekeekhai eri mbiibiliyani. Nwehe etthu ohimmye awe mutokweene mmosa a oNepal voohimya sa otaphuleliwa Biibiliya. Owo ohimmye so: “Omusoma Biibiliya ni nttaava naka wookikhaliherya omusuwela oratteene Yehova. Eyo yookikhaliherya okhala mpatthani a Muluku ni olipiha waamini waka.” Olelo-va, Biibiliya a Elapo Esya onniphwanyaneya oomalela aahiiso ipantta sikina, mattaava anivikana 300. Biibiliya owo teekeekhai ni tookhweya omusoma, nave onniixuttiha ekeekhai voohimya sa Yehova. Nto eyo ennaakhaliherya arumeyi a Yehova olumwenku wootheene, okupali itthu simosa-ru ni olaleya itthu simosa-ru. (1 Akor. 1:10) Masi yookhala etthu ekina enimwiiriha Biibiliya a Elapo Esya okhalana efaita yinceene. Nrowe niwehe etthu ene.

13. Xeeni abiibiliya anceene olelo-va ahinirumeela aya nsina na Muluku?

¹³ Abiibiliya anceene olelo-va, nookumihiwa nsina na Muluku. Masi Biibiliya a Elapo Esya, onnirumeela nsina nlo ikwaha sinceene. Iyaakha 100 sivinre, atthu yaaniwerya ophwanya nsina Muluku mbiibiliyani, otepexa wene soolempwa sa eheeperi. Masi olelo-va, ahooleli anceene a itiini, yaawo aniihimya okhala makristau, khaniphavela orumeela nsina na Yehova ni khaniphavela wiira atthu akina asuwele nsina nlo. Mwa ntakiheryo, ahooleli a ekerexa Katoolika, aakumiha nsina na Muluku mbiibiliyani mwaya ni iliivuru saya sikina.b Nave atthu a ikerexa sinceene aakumiha nsina na Muluku abiibiliya anaataphulela aya. Masi moovirikana ni abiibiliya awo, mattaava ootheene oniphwanyaneya awe Biibiliya a Elapo Esya, nookhala nsina na Muluku mapuro ootheene naaphwanyaneya aya okhuma khalai. Xeeni vari aya vooloka atthu osuwela nsina na Muluku? Nrowe niwehe.

14. Moovarihana ni Biibiliya, xeeni vari aya vooloka osuwela ni orumeela nsina na Muluku?

¹⁴ Biibiliya onihimya wiira ti vooloka hiyo osuwela ni orumeela nsina na Muluku. Eliivuru ya Isaalimu, arumeyi a Yehova annitumereriwa ottottopela “nsina na Yehova”. (Esal. 135:1) Okathi aawiixuttiha awe atthareli awe moota wonvekela Yehova, Yesu aalenle wiira avekeleke so: “Nsina nanyu nitteelihiwe.” Muhoolo mwaya, okathi anvekela awe Tiithi awe, Yesu aahimmye so: “Miyo kihaasuweliha nsina nanyu”. (Math. 6:9; Yoh. 17:26) Nave murummwa Paulo aahiromola moolumo a profeta Yoweli, yaawo anihimya so: “Ootheene ale anivekela aromolaka nsina na Yehova, animoopoliwa.” (Arom. 10:13) Nto anamataphulela yaale anikumiha nsina na Muluku mbiibiliyani, anniwiiriha atthu anceene wuupuwela wiira khahiyo ti vooloka osuwela ni orumeela nsina na Muluku.

15. Arumeyi a Yehova anoonela sai nsina na Muluku?

¹⁵ Arumeyi anceene a Yehova anniwerya omusoma Biibiliya a Elapo Esya ni nttaava aniiwexexa aya. Nto Biibiliya owo onnaakhaliherya osuwela ekeekhai voohimya sa Yehova, omphenta, omuroromela ni ottottopela nsina nawe. — Mir. 18:10; Yes. 56:6.

16. Xeeni vaari aya vooloka osuwela nsina na Yehova niinaano-va? (Yohani 17:3)

¹⁶ Biibiliya onihimya wiira moohipisa, Yehova onrowa owana ekhotto ni “mamwene a mulaponi mootheene”. (Wis. 16:14) Okathi wa ekhotto eyo, ale animusuwela Yehova ni ottottopela nsina nawe, animoopoliwa. (Esal. 9:10; mmusome Yohani 17:3.) Masi atthu ale anikhootta omuroromela ni omwiiwelela Yehova, anoosuwela wiira owo Muluku Oowerya Sootheene okathi onrowa awe waaphukela. Yehova onihimya so: “Mweekeekhai, miyo kinimwiivuwiha, kinimwiireeriha, ni kinimwiisuweliha ohoolo wa maloko manceene. Nto awo anoosuwela wiira miyo ka Yehova.” (Ezek. 38:23) Okathi owo, arumeyi a Yehova anoohakalala osuwela wiira Muluku mpatthani aya ohiya nwanani aya! — Mal. 3:16.

17. Eparakha xeeni nirina ahu?

¹⁷ Etthu yooreera okhaliherya waalaleerya ihapari sooreera atthu ootheene ntoko onihimya awe Zakariya 8:23! Nave nookhalana eparakha ya ovara hoothe ohiya paahi ni anna ni arokora, masi ni malaikha, yaawo Yehova oniruma awe wiira akhaliheryeke olaleerya ihapari sooreera. Yehova oonivaha itthu nimpirisari ahu wiira naalaleerye ihapari sooreera atthu a mahimo ootheene, a mattaava ootheene ni a iraasa sootheene. Nto nihaana orumeela itthu iyo wiira naakhaliherye atthu anceene omusuwela Yehova, yoowo ohirina nthalu, oomoriwa ikharari ni oopixa murima. Nto nihihiye olaleya ihapari sooreera mpakha atthu ootheene anikhala valaponi osuwela nsina na Yehova ni ekeekhai. — Luka 11:2.