Mmwiiweleleke Yehova ni murima wootheene

1. Etthu xeeni eniwiiriha atthu akina owiiwelela makhulupale?

AAKHALA mathowa manceene, aniwiiriha atthu akina owiiwelela makhulupale. Nto atthu akina anniwiiwelela makhulupale okathi aniwehiwa aya ni atthu akina aahiiso mwaha woowi anoova opuniriwa. Akina anniiwelela malamulo wiira yaasiveliheke atthu akina. Mwa ntakiheryo, mahiku a Yesu makhulupale a itiini yaahimya wiira yaaniiwelela malamulo a Muluku, masi awo khiyaiwelela. Nto awo yaanipaka eyo wiira atthu akina yuupuweleke wiira yaaneettela exariya. (Math. 23:5) Moovirikana ni atthu awo, hiyo ninnimwiiwelela Yehova mwaha woowi ninniweha mireerelo sinikhumelela okathi nniiwelela ahu malamulo awe. (Yes. 48:​17, 18) Eyo etthu yooloka enniiriha omwiiwelela Yehova. Masi yookhala etthu ekina ya efaita yinceene enniiriha omwiiwelela Yehova.

2. Etthu xeeni yuulupale enniiriha omwiiwelela Yehova?

² Etthu yuulupale enniiriha omwiiwelela Yehova, okhala wiira ninnimphenta ni murima ahu wootheene. (Math. 22:​37, 38) Nto omphenta wahu onniniiriha omwiiwelela “ni murima wootheene”. (Arom. 6:17) Omphenta Yehova ni omwiiwelela ni murima wootheene onniniiriha wiiwelela malamulo awe okathi wootheene ohiya paahi okathi ninwehiwa ahu ni atthu akina aahiiso ninweha ahu mireerelo sinikhumelela okathi nimmwiiwelela ahu. Masi, okhala wiira niyariwe nirina ene etampi, ikwaha sikina pooti woonaka oxankiha omwiiwelela Yehova. Mwaha ola, nnoothokorerya matakiheryo manli a mbiibiliyani, anrowa onikhaliherya omwiiwelela Yehova ni murima wootheene. Wanipacerya, ninrowa othokorerya etthu aisarayeli yaapanke aya okathi Yehova aawooponle awe wExiitu. Nuumala-vo, ninrowa othokorerya moota nikhanle ahu ootthara ntakiheryo nooloka na mwene Yosafati a oYuda.

MOOTA AISARAYELI YOONENLE AYA MALAKIHERYO A YEHOVA

3. Xeeni vaaxankiha aya aisarayeli wiiwelela malamulo a Yehova? (Nwehe eteseenyu.)

³ Ohinatthi Yehova owoopola aisarayeli wExiitu, owo aahaavaha malakiheryo yeeherenrye wiiwelela waya. Wiira aakhapelele aisarayeli ehukhumu yookiserya, Yehova aahaavaha malakiheryo a efaita yinceene, masi yaari oovila wiiwelela. Yehova aahaaleela wiira yaahaana wiiva epwittipwitthi yoolopwana aahiiso epuri yoolopwana, nto ephome ene yaahaana ottikitthela mukerekhere mwa mukhora wa empa aya. (Okhu. 12:​5, 7) Nto nlaikha na Yehova khinaarowa omwiiva mwaana aahiiso enama empa yeele yaattikittheliwe ephome vamukhora. Pooti wiira vaahaaxankiha aisarayeli wiiwelela malakiheryo ale. Mwaha wa xeeni? Mwaha woowi, atthu a wExiitu yaanikokhorela epwittipwitthi yoolopwana. Nto vakhala wiira yaamwaaweha aisarayeli yiivaka epwittipwitthi, pooti wiira awo yaamunanariwa ni yanwiiva. (Okhu. 8:​25-27) Hata vaari siiso, aisarayeli yaanisuwela efaita yaarina aya wiiwelela malakiheryo ale, nto, awo “yaahipaka siisaale ntoko Yehova” aarumme awe. (Okhu. 12:28) Yehova aahiwoopola anamwane oopacerya oyariwa a aisarayeli.

4. Etthu xeeni Yehova aarumme awe aisarayeli opaka nuumala okhuma wExiitu?

⁴ Ohiyu ene yoole, aisarayeli yaahikhuma wExiitu. Wanipacerya, Yehova aahaaleela wiira yaahaana orowa onorti wa ephareya Yooxeerya. Nuumala-vo, Yehova aahaavaha malakiheryo mwa moonelo wa apinaatamu yaakhala ntoko khiyaalonke. Moottharelana, Yehova aahaaleela wiira yaahaana otthikela osuuli ni omaka eriyari ya myaako ni ephareya. Vano Farawo ni anakhotto awe yaahaatthimakela ni ohoolo waya yaari ephareya Yooxeerya. Nto pooti wiira aisarayeli yaahuupuwela wiira yarowa opuro ole Yehova aalenle awe, yaamwiiviwa ni Farawo ni anakhotto awe. Masi, okathi Moise aalenle awe aisarayeli etthu Yehova aaphavela awe wiira apakeke, awo yaahiiwelela. (Okhu. 14:​1-4) Okathi yaawehale aya anakhotto a wExiitu, “aisarayeli yaahoova vanceene” ni ananariwe ene yaahimuleela Moise wiira aahaaroiha opuro ole wiira yiiviwe! (Okhu. 14:​5-11) Aisarayeli yuupuwela wiira yaari etthu yoohiloka omwiiwelela Yehova. Vano nrowe niwehe etthu yaawiiriha aisarayeli wuupuwela mwa enamuna eyo ni moota Yehova oonenle awe etthu yaapanke aya ni yaahimmye aya.

5. Etthu xeeni aisarayeli yahaapanke aya waattamela ephareya Yooxeerya? (Esaalimu 106:7 ni enoota)

⁵ Biibiliya onihimya wiira okathi yaari aya ephareya Yooxeerya, aisarayeli khiyaavaha efaita miteko sootikiniha sa Yehova. Nave “khiyuupuwenle” ophenta wawe woororomeleya. (Musome Esaalimu 106:7 ni enoota.) Awo khiyuupuwenle moota Yehova aakhapelenle awe anaaya oopaceriwa oyariwa ni inama saya, okathi wa ehukhumu yookiserya. Nave awo khiyaasuwela wiira Yehova aanaaphenta vanceene ni khiyaakupali wiira aamutthikela owoopola. Uupuwelaka mukhalelo wa murima aya, Yehova aahimmye wiira yaahimurukunuwela waattamela ephareya Yooxeerya. Aisarayeli yaahihiya omwiiwelela Yehova, nnaamwi yaamutthanre Moise okhuma wExiitu mpakha ephareya Yooxeerya. Muhoolo mwaya, Yehova aahihimya wiira aisarayeli ootheene oohiiwelela khiyaarowa okela elapo yooleiheriwa. (Esal. 106:​21, 24-26) Yoowiiraneya ya aisarayeli, enniixuttiha exeeni?

ETTHU NNIIXUTTA AHU NI NTAKIHERYO NOOHILOKA NA AISARAYELI

6. Omuroromela Yehova, onrowa onikhaliherya opaka exeeni? (Yeremiya 23:4)

⁶ Yoowiiraneya ya aisarayeli, enniniixuttiha wiira nihaana wuupuwela oratteene etthu enniiriha omwiiwelela Yehova ni atthu ale onaaruma awe wiira anikhapeleleke. Mwa ntakiheryo, nihaana wiikoha so: “Kiireke kinimwiiwelela Yehova paahi okathi kinoonaaka wiira eyo enookiphwanyiha mireerelo?” Aisarayeli akina yaahiiwelela yooruma ya Yehova ya ottikitthela ephome vamukhora va empa aya mwaha woowi yaanisuwela wiira eyo yaamwaakhaliherya owoopola anaaya ohiya mwaha wa omphenta Yehova ni murima aya wootheene. Nto nihaana wiikoha so: “Kiireke kinnimwiiwelela Yehova hata atthu akina ahimwiiwelelaka?” Ohiyu ole wa nihiku na Paasikha, Yehova aahiwiiriha aisarayeli, “wooniwaka saana ni atthu a wExiitu.” (Okhu. 12:36) Masi muhoolo mwaya, okathi atthu a wExiitu yaaphavela aya owiiriha aisarayeli etthu yootakhala, awo yaahihiya omuroromela Yehova ni yaahimurukunuwela. (Okhu. 14:​10-12) Nto hiyo khanimphavela waatakiha aisarayeli. Masi nimphavela omuroromelaka Yehova ni murima ahu wootheene ni waaroromela atthu ale onaathanla awe wiira anikhapeleleke. (Mmusome Yeremiya 23:4.) Hiyo nihaana otthara malakiheryo ootheene ninvahiwa ahu hata nihisuwelaka etthu yiirinhe ovahiwa malakiheryo awo. Nave nihaana otthara malakiheryo awo hata eyo ehirowaka waasivela atthu ale animunyokha Yehova. Ninrowa owerya sai omwiiwelela Yehova ni murima ahu wootheene ni osyaka itthu soohiloka aisarayeli yaapanke aya?

7. Olipiha omphenta wahu Yehova onnikhaliherya sai?

⁷ Mulipiheke omphenta wanyu Yehova. Wiiwelela wahu pooti weehereriwa, okathi yoole nihiniiwexexa ahu malakiheryo anikumiheriwa mmutthenkesoni mwa Yehova aahiiso okathi sinniphwanya aya mixankiho, mwaha wa omwiiwelela Yehova. Akhala wiira eyo enimwiiraneya, nihaana wuupuwela wiira nimmwiiwelela Yehova mwaha woowi ninnimphenta ni ninnimuroromela. (1 Yoh. 5:3) Omphenta wahu, onoonikhaliherya omulipelela Yehova moopixa murima ni okupali wiira onoonireeliha mwaha wa wiiwelela wahu. — Mus. 7:8; Mik. 7:7.

8. Mutokweene mmosa ni murokora mmosa, yoonihenrye sai wiira yaahilakela omwiiwelela Yehova?

⁸ Mahiku ahu ala, arumeyi a Yehova annivaha ntakiheryo nooloka na omwiiwelela Yehova hata ahiwehaka moowaakuveya mireerelo sinikhumelela mwaha wa wiiwelela waya. Mwa ntakiheryo, okathi wa koronaviiru, miloko saahivahiwa malakiheryo wiira sahaana opaka mithukumano simurumeelaka videoconferência aahiiso telefooni. Mutokweene mmosa a oPerú, ohimmye so: “Wanipacerya, kuupuwela wiira malakiheryo ale khiyaavareleya muteko muttetthe ahu.” Nnaamwi uupuwela siiso, owo aahilakela omwiiwelela ni omuroromela Muluku. (Mir. 3:​5, 6) Masi owo oonenle sai nuuvira okathi? Mutokweene owo ohimmye so: “Kaahoona wiira Yehova aahinireeliha mwaha wa wiiwelela wahu. Muloko ahu waahitepa olipa ni okhala woowiirana.” Nrowe nthokorerye ntakiheryo nikina. Mwaakha wa 2020, mutthenkeso waahipaka marukunuxo yaavarihana ni miloko ni ikurupu sinlavuliwa nttaava na elapo ekina. Murokora mmosa a oJapão aanirowela mithukumano ekurupu yaalavuliwa nttaava na elapo ekina. Owo onnihimya moota oonenle awe okathi anna yaahimmye aya wiira saamuhiiwa opakiwa mithukumano sa nttaava nle. Murokora owo onihimya so: “Kinnihakalala mwaha woopaka ele Yehova onikivekela awe wiira kipakeke ni nkaixinliha mwaha wa marukunuxo ale yaapakiwe. Kinnikupali wiira marukunuxo awo anookumiherya mireerelo.”

9. Ninrowa wiilokiherya sai wiira nihihiye olaleerya okathi ninrowa ahu olupatthiwaka? (Nwehe efootu.)

⁹ Mwiilokiheryeke muhinatthi opacerya olupatthiwa. Nihaana wiilokiherya wiira nihihiye olaleya ihapari sooreera sa Omwene, akhala wiira atthu akina anninlupattha. Ilapo sinceene, Anamoona a Yehova annilaleerya mootaphuwa. Masi hata vari siiso, nihaana olipa murima okathi ninlaleya ahu ihapari sooreera sa Omwene. Okhala wiira muhupi ninlaleya ahu onihela muhina waalela atthu wiira moohipisa Muluku onoopwetexa olumwenku ola wootakhala. Khaninrowa ohiya olaleya muhupi owo mpakha ophiya okathi olumwenku ola onrowa aya opwetexiwa ekhotto ya Harmagedoni. (Math. 24:14) Okathi anrowa aya opacerya maxakha maalupale, muhupi ninrowa ahu waalaleeryaka atthu onrowa otepaka waanyoonya mwaha woowi ahaana othanla akhala wiira anrowa okhaliheryaka Omwene wa Muluku aahiiso ikuvernu sa apinaatamu. Okathi owo, atthu ale animunyokha Yehova anrowa woonaka muhupi ninrowa ahu olaleyaka ntoko ehasara “yuulupalexa”.a (Wis. 16:21) Atthu awo anoonanariwa vanceene ni Yehova ni arumeyi awe, ntoko siisaale Farawo aananariwe awe ni aisarayeli ephareya Yooxeerya. Hiyo nihaana wiilokiherya wiira nihihiye olaleya ihapari sooreera okathi ninrowa ahu olupatthiwaka. Nto nihaana wiiwelelaka malakiheryo ninvahiwa ahu a moota woolaleerya hata atthu akina anilupatthaka.

MMWIIWELELEKE YEHOVA NTOKO MWENE YOSAFATI

10. Yosafati oonenle sai okathi maloko mararu yaaphavela aya opwetexa muttetthe wa oYuda?

¹⁰ Mbiibiliyani, aakhala matakiheryo manceene ooloka a atthu yaawo yaari oowiiwelela. Ntakiheryo nimosa na atthu awo, ti na mwene Yosafati. Owo aari mwene a oYuda, okathi maloko mararu yaaphavela aya opwetexa muttetthe ole wa oYuda. Nto Yosafati ni atthu a oYuda yaahipacerya woova. (2 Wah. 20:​1-3) Nnaamwi mwene Yosafati oova, owo aahipaka soothanla mwa miruku. Nrowe niwehe moota Yosafati aamuroromenle awe ni omwiiwelela Yehova, ni moota nikhanle ahu ootthara ntakiheryo nawe.

11. Etthu xeeni Yosafati apanke awe okathi oova awe? (2 Wahala 20:​5, 6, 10-12)

¹¹ Mwiimananiheke omwaavya Yehova ni omwiiwelela. Okathi Yosafati oova awe, owo “aahilakela omwaavya Yehova.” (2 Wah. 20:3) Okhuma khalai, Yosafati aahilimalela onvekela Yehova malakiheryo wiira omukhaliherye. (2 Wah. 19:3) Nto okathi ole wa mixankiho, Yosafati “aahilakela” olipiha yoolakela awe ya omwaavya Yehova ni wiiwelela malakiheryo awe. Nuumala-vo, Yosafati aahimuxonttela Yehova wiira omukhaliherye. (Mmusome 2 Wahala 20:​5, 6, 10-12.) Nto okathi sinniphwanya aya mixankiho, nihaana otthara ntakiheryo na Yosafati. Nihaana olakela omwiiwelela Yehova, waavya malakiheryo nimusomaka Biibiliya, ovekela ni okupali wiira onoonikhaliherya. — Esal. 119:112.

12. Ninrowa olipiha sai yoolakela ahu ya omwiiwelela Yehova?

¹² Mmusomeke Biibiliya khula nihiku. Itthu Yosafati aahimmye awe okathi aapaka awe nivekelo, sinnooniherya oratteene wiira aanisuwela itthu Yehova aapanke awe khalai. Owo aahisuwela wiira Yehova aahipaka ele aamuleihenrye awe Abrahamu wiira aamwaavaha aisarayeli elapo yooreera. (Maph. 12:7) Yosafati aanisuwela etthu Salomooni aahimmye awe okathi aavekela awe vaavo yaavahereriwa aya etemplo wa Yehova. Tthiri Yosafati aahirumeela moolumo mamosa-ru Salomooni aalavunle awe okathi aapaka awe nivekelo. (2 Wah. 6:​28-30; 20:​5-9) Nto itthu iyo Yosafati aasuwela awe saahimukhaliherya olipiha omuroromela wawe Yehova ni ohihiya omwiiwelela. Mwa enamuna emosa-ru, naahihiye omusuwela Yehova ni itthu onniixuttiha awe mbiibiliyani, khaninrowa ohiya omwiiwelela hata okathi sinniphwanya aya mixankiho sinceene — Math. 13:52.

13. Wiiyeviha onrowa onikhaliherya sai?

¹³ Mwiixutte okhala mutthu oowiiyeviha. Nivekelo Yosafati aapanke awe, naahooniherya wiira aari mutthu oowiiyeviha. Okhala wiira aari mwene ni aahikhalana anakhotto anceene, pooti wiira amuroromelaka osuwela wawe owana ekhotto ohiya omuroromela Yehova wiira ammukhaliherya oxintta. Ohiya-vo, nivekelo Yosafati aapanke awe ohoolo wa atthu, owo aahihimya wiira khaasuwela etthu yoopaka ni aahinvekela Yehova wiira omukhaliherye. (2 Wah. 20:12) Okhala wiira aari mwene oowiiyeviha, vahimukhweela otthara malakiheryo a Yehova. Mwa enamuna emosa-ru, nakhala atthu oowiiyeviha, vanoonikhweela omwiiwelela Yehova okathi wootheene. — Afil. 2:​5, 8.

14. Etthu xeeni Yosafati aapanke awe nuumala wiiwa malakiheryo a Yehova?

¹⁴ Nweheke itthu munipaka anyu moota sinrowa aya owaafetari atthu akina. Yehova aahaakhula nivekelo na Yosafati. Owo aahimuruma profeta Yahaziyeli orowa onvaha malakiheryo oowiiwanyeya mwene Yosafati. Yahaziyeli aahimmye wiira atthu ale khiyaarowa opirisari owana ekhotto. Yahaziyeli aahaalela wiira: “Mwiilokiherye, mweemele paahi, nweheke moota Yehova onrowa awe owoopolani.” Biibiliya onihimya wiira “Yosafati aahikokhora uurama mpakha vathi”. Nave atthu ootheene, “yaahuurama . . . wiira amukokhorele Yehova.” Nihiku naattharelana, Yosafati aahirowa waatumererya atthu oriki “mmwaamini Yehova” ni “mwaakupali maprofeta awe”. — 2 Wah. 20:​14-20.

15. Yosafati oonihenrye sai wiira aanimwaamini vanceene Yehova?

¹⁵ Mwaha wa omwaamini Yehova, Yosafati aahaathanla alopwana wiira amwiipeleke Yehova, “arowaka ohoolo wa alopwana yaakunxe ikaruma sa ekhotto”. (2 Wah. 20:21) Yosafati aahipaka yoothanla “nuumala waakohererya atthu”. Yosafati oonivaha ntakiheryo nooloka na omuroromela Yehova ni okhala atthu oowiiwelela! Yehova aahaareeliha mwaha wa waamini ni wiiwelela waya. Nave aahiwiiriha awanani aya owana yaawo-ru ni wiivanana yaawo-ru. — 2 Wah. 20:​22-24.

16. Ntakiheryo na Yosafati ninwiixuttiha exeeni axitokweene a mmulokoni, anamuyari ni ale arina okhulupale? (1 Mamwene 3:9) (Nwehe efootu.)

¹⁶ Axitokweene a mmulokoni, anamuyari ni atthu akina arina okhulupale, ahaana wiixutta etthu ni ntakiheryo na Yosafati. Wiiwelela wawe ni murima wootheene, waahaakhaliherya vanceene atthu ale aalamulela awe. Tthiri Yosafati aahimutakiha mwene Salomooni. Okathi Salomooni aari awe mutthu oororomeleya, owo aaninvekela ni omwiiwelela Yehova ni murima awe wootheene. Salomooni aahipaka nivekelo, ohiya para mureerelo awe, masi para mureerelo wa atthu akina. Owo aanaaphukela atthu ottharaka malakiheryo a Yehova. (Mmusome 1 Mamwene 3:9.) Moowiiyeviha Yosafati aahinwiriyana profeta a Muluku, aahaakohererya atthu akina ohinatthi opaka yoothanla ni aahaatumererya atthu omwiiwelela Yehova. Axitokweene ahaana otthara ntakiheryo na Yosafati amuroromelaka Yehova okathi anikhapelela aya muloko. Ahinatthi opaka yoothanla enrowa waafetari muloko, moowiiyeviha ahaana osoma Nuulumo na Muluku, osoma iliivuru sahu sinimutthokiherya Biibiliya ni waakohererya axitokweene akina. (Mir. 15:22) Moolumo ni itthu anihimya aya, sihaana owiiriha anna ni arokora omwiiwelela Yehova ni murima aya wootheene. Anamuyari, animwaakhaliherya anaaya okhala atthu owiiwelela, vakhala wiira annimwiiwelela Yehova ni annitthara malakiheryo awe. — Mir. 1:8; 14:1.

17. Xeeni vari aya vooloka okathi wootheene omwiiwelela Yehova?

¹⁷ Moohicikha muxankiho onrowa oniphwanya, akhala wiira nnoomwiiwelelaka Yehova ni murima wootheene, nikupaliki wiira onoonikhapelelaka ni onivaha malakiheryo. Khalai, Yehova aahaaruma alopwana wiira yaavaheke malakiheryo atthu awe. Olelo-va, Yehova onniruma Nikhuuru Noolamulela ni axitokweene a mmulokoni wiira anivaheke malakiheryo. Nto nnimooniherya wiira ninnimwiiwelela Yehova, vakhala wiira ninnitthara malakiheryo awo ninvahiwa ahu. Ikwaha sikina, khaninrowa wiiwexexaka nthowa naya Yehova onnivaha awe malakiheryo, masi khanimpirisari woova. Yehova onnisuwela itthu sinceene onivikana hiyo ni khiivo etthu onooceela awe. (Yes. 55:9) Tivonto, nihihiye omwiiwelela Yehova ni murima wootheene.