Mukupaliki wiira Yehova onimookhapelelani

1-2. Moohipisa, itthu xeeni sinrowa wiiraneya?

NINKHALA waanikisa wa mahiku ookiserya. Moohipisa, sinimwiiraneya itthu sa faita yinceene sinrowa oturuka olumwenku. Yehova onoowiiriha makhulupale a ikuvernu opaka “etthu onuupuwela awe”, ni onoovaha owerya ni okhulupale enama yoowali, eyo piiyo, Nações Unidas.a (Wis. 17:17) Nuumala-vo, Nações Unidas ni ikuvernu sootheene, sinrowa opwetexa itiini soowootha. (Wis. 17:16) Nto eyo enimwiiriha opacerya maxakha maalupale. Exeeni enrowa wiiraneya moottharelana?

² Nuumala opwetexiwa itiini soowootha, makhulupale a olumwenku wootheene animwiiraana wiira yaatuphele arumeyi a Muluku. (Ezek. 38:​14-16) Etthu xeeni enrowa owiiriha opaka eyo? Eliivuru A Adoração Pura de Jeová É Restaurada!, enitthokiherya so: “Satana onrowa owiiriha makhulupale a mulaponi ophavela waapwetexa atthu ootheene animukokhorela Yehova ntoko oniphavela awe. Nave onrowa omananiha omala-maliha okokhorela weekeekhai.” Nuumala wiiraneya eyo, enoopacerya ekhotto ya Harmagedoni. Nto, Yesu, malaikha oororomeleya ni makristau oothanliwa 144 000 anrowa olamulelaka ni Yesu, anrowa waapwetexa atthu ootakhala. Nto olumwenku wa Satana khonrowa okhala ni nnimoopoliwa ni okhaliheriwa wiira nikele elapo esya. — Wis. 16:​14-16; 19:​11-21.

3. Exeeni ninrowa ahu othokorerya mwaha ola?

³ Hiyo khaninreerela woova okathi Yesu ni malaikha oororomeleya anrowa aya opwetexa olumwenku ola wa Satana okathi wa ekhotto ya Harmagedoni. Mwaha wa xeeni? Mwaha woowi Yehova onnileiherya onikhapelela. Hiyo ninnisoma yooleiherya eyo Esaalimu 91:​7, yeeyo eni: “Atthu 1000 animookhwa vakhiviru vanyu, atthu 10 000 animookhwa moono anyu woolopwana, masi khiivo etthu yootakhala enrowa wookhumelelani.” Mwaha ola, ninrowa othokorerya Esaalimu 91 ni waakhula makoho anittharelana: Yehova onileiherya waakhapelela sai atthu awe? Yehova onnikhapelela sai mahiku ahu ala? Onrowa onikhapelela sai muhoolo? Nihinatthi waakhula makoho ala, nrowe nithokorerye Esaalimu 91.

ESAALIMU 91 ENNINIKHALIHERYA OKUPALI WIIRA YEHOVA ONOONIKHAPELELA

4. Iversu piili soopacerya sa Esaalimu 91, sinnikhaliherya sai okupali wiira Yehova onnaakhapelela atthu awe? (Esaalimu 91:​1, 2)

⁴ Etthu yuulupale nniixutta ahu Esaalimu 91, tiila: Okupali wiira Muluku onoonikhapelela. Iversu piili soopacerya sinnikhaliherya okupali wiira Yehova onrowa waakhapelela ale animuroromela. (Musome Esaalimu 91:​1, 2.) Yehova tori Muluku Oowerya Sootheene. Nto nihaana okupali ni murima wootheene wiira namuroromela, owo onrowa onikhapelela. (Rut. 2:12; Esal. 17:8) Moolumo oowi “ntthyawelo” ni “nipuro noowiipitha”, anninuupuxerya isitati siniromoliwa mbiibiliyani, seiyo saarina muuru wiira saakhapeleleke atthu. Atthu yaakhala esitati eyo, yaanikhapeleliwa ni muuru owo. Nave ale yaakhala ota wa esitati yaanitthyawela muhina wiira ahiiviwe ni awanani aya. Nto iversu sikina sa Esaalimu 91, ninniphwanya matakiheryo annikhaliherya okupali wiira Yehova onnaakhapelela atthu awe okathi wa mixankiho. — Esal. 91:​3-13.

5-6. a) Etthu xeeni Yehova onileiherya awe eri Esaalimu 91:​14-16? b) Xeeni ninreerela ahu okupali yooleiherya eyo?

⁵ Esaalimu 91:​14-16, ninniphwanya moolumo oomaaliha nasaalimu aarummwale awe olepa. Iversu iya sinninooniherya moota Yehova onnikhaliherya awe ni onikhapelela. Nave, iversu iya ninniphwanya etthu Yehova onaaleiherya awe ale animukokhorela. (Musome Esaalimu 91:​14-16.) Iversu iya Yehova onnileiherya waakhapelela atthu awe, mwaha woowi annimuroromela, annisuwela nsina nawe ni anninvekela. Nihaana omukupali Yehova ni murima ahu wootheene mwaha woowi khonootha. Tthiri itthu oleihenrye awe sinimwiiraneya! — Mmr. 23:19; Yox. 23:14.

⁶ Yehova aahimuruma nasaalimu olepa moolumo ari Esaalimu 91 wiira anikhaliheryeke vanceene. (Arom. 15:4) Hiyo pooti ohimya etthu emosa-ru, nasaalimu aamulenle awe Yehova oriki: “Nyuwo mwa ntthyawelo naka ni empa aka yoolipihiwa”. (Esal. 91:2) Masi mwa enamuna xeeni Yehova onileiherya awe onikhapelela?

MWA ENAMUNA XEENI YEHOVA ONILEIHERYA AWE ONIKHAPELELA?

7. Moovarihana ni Esaalimu 91, mwa enamuna xeeni Yehova onileiherya awe waakhapelela arumeyi awe?

⁷ Khalai, iliivuru sahu saatthokiherya wiira, Esaalimu 91 Yehova onnileiherya onikhapelela wiira waataana wahu ni yena ohihononeye. Nikupaliki wiira khula okathi, Yehova onoonikhaliheryaka wiira nimwiiweleleke ni nihihiye okhalana opatthani woolipa ni yena. Masi niireke Esaalimu ela enileiherya wiira Yehova onrowa okhapelela waataana wahu ni yena paahi? Nnaari. Esaalimu 91, Yehova onnileiherya wiira khonrowa weemererya wiira arumeyi awe ootheene apwetexiwe ni awanani aya. Nave okathi sinaaphwanya aya mixankiho, Yehova onimwaavaha arumeyi awe murettele wa mmuupuweloni. Etthu xeeni enniiriha ohimya siiso?

8-9. a) Yesu aakhunle sai okathi eehereriwa awe ni Satana? b) Moota Yesu aamwaakhunle awe, onniixuttiha exeeni? (Matheyo 4:​5-7)

⁸ Okathi Satana aamweeherenrye awe Yesu, Yesu aahaakhula orumeelaka moolumo ari Esaalimu 91. (Mmusome Matheyo 4:​5-7.) Esaalimu 91:​11, 12, Yehova onnileiherya onikhapelela wiira ehinikhumelele etthu yootakhala. Orumeelaka Esaalimu ela, Satana aahimweehererya Yesu wiira otuphe nipuro noorakamexa na etemplo, ohimyaka wiira malaikha yammukaphula mmatatani mwaya. Yesu aamwaakhunle sai Satana? Yesu khaamwaakhunle Satana oriki: Nyuwo Satana munimootha! Okhala wiira Yehova khonileiherya onikhapelela mixankiho sootheene sa weerutthuni. Masi Yesu aamwaakhunle so: “Muhimweehererye Yehova, Muluku anyu.” Enamuna Yesu aamwaakhunle awe Satana, enniixuttiha exeeni?

⁹ Yesu aanisuwela wiira khalai, Yehova aahirumeela malaikha wiira aakhapelele arumeyi awe okathi yaakumiheriwa aya mixankiho ni awanani aya. (2 Mam. 6:​15-17; 19:​34, 35; Dan. 3:​19, 20, 26-28; 6:​16-22) Yesu aahikhootta omweehererya Tiithi awe, uupuwelaka wiira malaikha yammukhapelela akhala wiira ampaka etthu ohuupuwenle saana. Masi Satana khaafalyanri orumeela moolumo ari Esaalimu 91, maana ennileiherya wiira Yehova onoonikhapelela. Etthu aafalyanri awe okhala wiira aahirumeela wiira omwiirihe Yesu omweehererya Yehova.b Moota Yesu aamwaakhunle awe Satana, onniniixuttiha wiira Esaalimu 91, Yehova onnileiherya waakhapela arumeyi awe mwa inamuna sootheene ntoko ekurupu. Nave onnaakhapelela wiira waataana waya ni yena ohihononeye, ahipwetexiwe ni akhalane murettele wa mmuupuweloni.

10. Etthu xeeni ninreerela ahu okupali?

¹⁰ Esaalimu 91, enninikhaliherya omuroromela Yehova. Okhala wiira ntthyawelo nahu, hiyo ninnikupali wiira owo onimwaakhapelela ale animuroromela ni murima wootheene. Nto hiyo khaninreerela woova itthu sinrowa wiiraneya, okathi olumwenku ola wa Satana onrowa aya opwetexiwa. Nrowe nthokorerye moota Yehova onrowa awe onikhapelela niinaano-va ni muhoolo.

YEHOVA ONNIKHAPELELA SAI MAHIKU AHU ALA?

11. Yehova onikhapelela sai waataana wahu ni yena?

¹¹ Olelo-va, Yehova onninooniherya moota nikhanle ahu ookhapelela waataana wahu ni yena. Owo onnisuwela wiira niyariwe nirina ene etampi ni khivannikhweela opaka itthu sinimusivela ni onyokha itthu oninyokha awe. (Arom. 6:16; 7:​21-23) Nto owo oonivaha itthu sinnikhaliherya ohihiya omwiiwelela ni okhala apatthani awe. Nrowe nithokorerye itthu iyo.

12-13. Ninrowa owerya sai okhootta soophavela soohiloka? (Matheyo 5:​28, 29)

¹² Yehova oonivaha Biibiliya. Mbiibiliyani, Yehova onninleela itthu soohiloka ninreerela ahu okhootta ni moota wookhootta. Mwa ntakiheryo, nrowe niwehe etthu Yesu onnivekela awe eri Matheyo 5:​28, 29. (Mmusome.) Yoolepa ela, Yesu onnimulavula mulopwana mmosa “oninwehexexa muthiyana mpakha ophavela orupana”. Olavulaka sa mulopwana owo, Yesu aahimmye so: “Owo ooraruwana muthiyana owo vamurimani.” Etthu xeeni nniixutta ahu?

¹³ Akhala wiira nnoothipelela oweha ifootu sintumererya orupihana woohiloka, vamurimani vahu hiyo pooti ophavelaka orupihana woohilika. Nto muhoolo mwaya, yakhumelela etthu ekhanle ooniiriha orupihana woohiloka ninrowa opaka yeeyo. (Yak. 1:​14, 15) Naaphavelaka osyaka orupihana woohiloka, moowaakuveya nihaana otthara malakiheryo a Yesu. Yesu ohimyale wiira nihaana opaka marukunuxo maalupale nimpirisari ahu. Owo onihimya so: “Akhala wiira niitho nanyu noolopwana ninnootthekihani, musyoole, murihele ottaiwene.” (Math. 5:29) Nto nihaana opaka marukunuxo wiira nisyake khula etthu yaakhanle ooniiriha orupihana woohiloka. Mwa ntakiheryo, nihaana osyaka oweha ifootu sinitumererya orupihana woohiloka. (Akol. 3:5) Akhala wiira nnimweettela malakiheryo ala a Yesu, nnookhapelela waataana wahu ni Yehova.

14. Ikuru soowaarya sinnikhapelela sai?

¹⁴ Yehova onninivaha ikuru sawe soowaarya. Yehova onninivaha ikuru sawe soowaarya wiira onikhaliherye ohihiya oororomeleya. Akhala wiira nnonvekelaka wiira onivahe ikuru sawe sowaarya, owo onoonivaha. (Luka 11:​9-13) Ikuru soowaarya sinnikhapelela sai? Murummwa Paulo aahimmye so: “Muhihiye weettihiwa ni ikuru sa Muluku, nto khamunrowa opakaka nnakhala vakhaani itthu siniphavela aya erutthu yoottheka.” (Akal. 5:16) Yoolepa ela enilavula sa mutthu yoole oniimananiha omwiiwelela ni otthara malakiheryo a Muluku. Vaavo nimpaka ahu eyo, Yehova onoonikhaliherya orumeelaka ikuru sawe soowaarya. Nave ikuru iyo sinoonikhaiherya wuupuwela ni opaka itthu sooloka. Nto okathi nnuupuwela ahu itthu soohiloka, ikuru soowaarya sinoonikhaliherya ohiya muupuwelo owo. Masi ikuru sa Yehova khasinniiriha omaliha miyuupuwelo sahu soohiloka. Hata vari siiso, iyo sinninikhaliherya opaka itthu sooloka ni osyaka itthu soohiloka. Nto eyo enninikhaliherya okhapelela waataana wahu ni Yehova.

15. Yehova onirumeela sai mutthenkeso awe, wiira onikhaliherye okhapelela waataana wahu ni yena? (Nwehe ifootu.)

¹⁵ Yehova oonivaha mutthenkeso awe wiira onikhaliheryeke. Orumeelaka mutthenkeso awe, Yehova onninivaha malakiheryo annikhaliherya okhapelela waataana wahu ni yena. Mwa ntakiheryo, okhala wiira niyariwe nirina ene etampi, ikwaha sikina hiyo pooti oriipiwaka murima mwaha wa itthu soohiloka nipanke ahu. Nave hiyo pooti oxanka aahiiso wuupuwelaka wiira khuuvo onnikhapelela. Okathi ninkhalana ahu moonelo owo, Satana pooti oniiriha otepa oriipiwa murima aahiiso oxanka, maana oniphavela wiira nuupuweleke wiira khanimphwanela omukokhorela Yehova. (Math. 4:3; 6:13) Mutthenkeso wa Yehova onninivaha iliivuru ni iviitiyu, seiyo sinnikhaliherya okupali wiira Yehova onoonilevelela, nookhalana efaita para yena ni onoonivahaka itthu nimpirisari ahu. (Esal. 86:5; Math. 10:​29-31; Luka 12:28; Ahep. 13:5) Niireke wookhala mwaha mutonko anyu osoma iliivuru sahu, woovarani murima ni munuupuwela wiira: Mwaha ola kilepeliwe miyo? Eyo enooniherya wiira Yehova onnirumeela mutthenkeso awe, wiira onivahe malakiheryo annikhaliherya okhapelelaka waataana wahu ni yena.

16. a) Etthu xeeni ewiiranenle arumeyi akina a Yehova ni mwaha wa xeeni? b) Etthu xeeni ninreerela ahu okupali?

¹⁶ Yehova khonrowa weemererya wiira awanani awe yaamala-malihe arumeyi awe ootheene. Ekeekhai wiira arumeyi akina a Yehova aatoko olupatthiwa ni wiiviwa. Ikwaha sikina Yehova onneemererya eyo wiiraneya, ophavelaka wooniherya wiira Satana nawoothe. (Wis. 2:10; 6:9) Masi Satana khonihakalala mwaha woowi arumeyi a Yehova vakhaani ahiiviwa ni atthu annilupattha. Owo aaphavela wiira arumeyi a Yehova ootheene yiiviwe ni awanani aya. (Math. 24:9; Wis. 12:​9-12) Masi eyo khenikhala-khala yiiraneyaka! Nihaana okupali wiira Yehova khonrowa ohiya oruma malaikha awe wiira anikhaliheryeke ni onikhapelela. Nto eyo enooniiriha ohihiya omukokhorela ni olaleya ihapari sooreera. — Ahep. 1:​7, 14.

17. Etthu xeeni enniiriha okupali wiira Yehova khonrowa onikhapelela itthu sootheene sikhanle ooniiriha oniphwanya mixankiho nenna-va?

¹⁷ Yehova oonivaha malakiheryo ni malamulo mbiibiliyani. Nto okathi nniiwelela ahu malamulo ni malakiheryo awo, ninnisyaka opaka itthu sikhanle oonikumiherya mixankiho. Orumeelaka enamuna eyo, Yehova onninikhapelela. (Mir. 14:​29, 30; 22:3; 2 Akor. 7:1) Masi ninnisuwela wiira Yehova khonrowa waakhapelela arumeyi awe ootheene wiira ehaakhumelele etthu ekhanle oowaakumiherya mixankiho. Vaakhanle wiira Yehova onninikhapelela khula muxankiho, Satana aarowa ohimyaka wiira Yehova nawoothe, nave nimmurumeela mwaha woowi onninikhapelela. (Yoobi 1:​10, 11) Akhala wiira khannihiya omurumeela Yehova hata siniphwanyaka mixankiho, nnimooniherya wiira Satana nawoothe. Nave nnimooniherya wiira nimmukokherela Yehova mwaha woowi Muluku eekeekhai ni ninnimphenta. (Arom. 9:22) Moohipisa, Yehova khonrowa weemererya wiira arumeyi awe saaphwanyeke mixankiho. Nilipelelaka ophiya okathi Yehova onrowa awe waapwetexa awanani awe ootheene, owo khonrowa ohiya onikhaliherya wiira nimwiiweleleke ni okhalana waataana wooloka ni yena. — 1 Akor. 10:13; 1 Ped. 5:10.

YEHOVA ONROWA ONIKHAPELELA SAI MUHOOLO?

18. Yehova onrowa onikhapelela sai muhoolo?

¹⁸ Okathi wa maxakha maalupale, Yehova khonrowa ohiya onikhaliherya wiira nihihiye omwiiwelela. Masi yookhala enamuna ekina Yehova onrowa awe onikhapelela. Okathi ikuvernu sa mulaponi sinrowa aya waatuphela arumeyi a Muluku, Yehova khonrowa weemererya wiira awo awiive arumeyi awo ootheene. (Ezek. 38:​1, 2, 10-16) Yehova onoomuruma Yesu Kristu ni malaikha oororomeleya wiira yaakhapelele arumeyi awe. Nto eyo enimwiiriha opacerya ekhotto ya Harmagedoni. Nto Yesu ni malaikha oororomeleya anrowa owana ni atthu ootheene animunyokha Muluku. (Wis. 17:​12-14; 19:​11, 14, 15) Yehova onrowa waakhapelela sai arumeyi awe okathi wa ekhotto ya Harmagedoni?

19-20. Xeeni nihinreerela ahu woova okathi Yesu ni malaikha oororomeleya anrowa aya waapwetexa awanani a Muluku okathi wa ekhotto ya Harmagedoni? (Nwehe eteseenyu vakaapani.)

¹⁹ Hiyo khanimpirisari woova okathi Yesu ni malaikha oororomeleya anrowa aya waapwetexa awanani ootheene a Muluku, okathi wa ekhotto ya Harmagedoni. Mwaha wa xeeni? Mwaha woowi ninnimuroromela Yehova ni ninnisuwela wiira onoonikhapelela. Masi yookhala etthu ninreerela ahu okupali ni murima wootheene. Etthu ene tiila: Yesu ni malaikha oororomeleya anoowiiva awanani ootheene a Muluku okathi wa ekhotto ya Harmagedoni. (Yer. 25:33; Zak. 14:12) Masi nihaana okupali wiira okathi wa ekhotto eyo, khuuvo murumeyi oororomeleya a Muluku onrowa wiiviwa, okhale ni pinaatamu aahiiso ni malaikha ootakhala. — Luka 21:28; 2 Ped. 2:9.

²⁰ Nasaalimu aahirummwa olepa moolumo anrowa wiiraneya okathi wa ekhotto ya Harmagedoni. Owo aahimmye so: “Atthu 1 000 animookhwa vakhiviru vanyu, atthu 10 000 animookhwa moono anyu woolopwana, masi khiivo etthu yootakhala enrowa wookhumelelani. Munooweha ni maitho anyu, okathi atakhali anrowa aya ovahiwa ehukhumu. Okhala wiira moohimya wiira: ‘Yehova tori ntthyawelo naka’, nave mompaka Muluku Muulupalexa okhala empa anyu.” (Esal. 91:​7-9) Nihaana okupali wiira okathi wa ekhotto ya Harmagedoni, khuuvo muxankiho Yehova onrowa awe weemererya wiira waakhumelele arumeyi awe. Yehova onoomukhapelela khula mmosa wiira ohihiye okhalana waataana ni yena, ohiiviwe ni okhalane muretteele wa mmuupuweloni. Okhala wiira moohimya wiira: “Yehova tori nthyawelo naka” owo onnileiherya so: “Khiivo etthu yootakhala enrowa wookhumelelani.” Nto khanimpirisari woova itthu sinrowa wiiraneya muhoolo. Tthiri nihaana okupali ni murima wootheene wiira Yehova onoonikhapelela naahihiye omuroromela.