44 YOHANI MPATISA
“Khuuvo mutthu ori muulupalexa”
SAAHIVIRA iyaakha sinceene, Yehova ohimurumme profeta wiira aalopole atthu awe. Masi Muluku aahimuruma mulopwana mmosa aihaniwa Yohani, wiira aaleele atthu muhupi awe. Owo aakhala mekhawe mothakoni wa oYudeya, opuro yoowo saakhala aya inowa, makharanace, inama suulupale ni soowoopiha ni anakirime. Yohani aahaana okhala oolipa murima ohiya paahi opuro ole aakhala awe, masi-tho mwaha wa ihapari aalaleya awe.
Pooti wiira anamuyari a Yohani, Zakariya ni Elizabeti yaahimuleela ele nlaikha naahimyale aya sa muteko Yohani aarowa awe ovara. Nto Yohani aahisuwela wiira aahaana okhala profeta ooluttuweliwa ntoko Eliya, munaziri ntoko Samuweli ni mutthu aarowa olokiherya ephiro ya mutthu muulupalexa onvikana yena. Orina ene iyaakha 30, Yohani aahithanliwa wiira okhale namukuttho ntoko paapa awe. Ohiya-vo, owo aahipacerya waaleela atthu wiira yaahaana ottharuwa itampi saya. Owo aahikhala “nsu na mutthu onikhuwela moothakoni”. Aahilaleya sa “omwene wa wiirimu” okupaliki wiira atthu anceene yaamukhuma mpooma mwaya wiira arwe anwiriyane. Ottharaka malakiheryo yaakhuma wiirimu, aahaapatisa atthu yaale yaattharunwe itampi saya. Nave Aahaalopola atthu sa ophukela wa Muluku, ohiwoovaka ahooleli a itiini, asaduki ni afarisi.
Yohani kheemerenrye wiira muteko aavahiwe awe omwiirihe okhala mutthu oowiixinnuwiha. Ohiya-vo, moowiiyeviha owo aahilaleya wiira aarwaale olokiherya ephiro ya mutthu muulupalexa aakela orwa onvikana yena. Yohani aahimmye wiira khaaphwanela otaphula mikhoyi sa isantaalya sawe. Okathi ampatinse awe Yesu, Yohani aahiiwa nsu na Yehova naahimya wiira: “Ola Mwanaka, kinimphentexa aka, onikihakalaliha vanceene”. Ovinre ene okathi vakhaani, nuumala Yesu weehereriwa ni Satana, Yohani aahikhuwela ohimyaka wiira: “Mmooneke! Ola ti Mwaapwittipwitthi a Muluku, yoowo onttipiha itampi sa moolumwenkuni!”
Moowiiyeviha, Yohani aahaatumererya atthareli awe wiira yaahaana omuttharaka Yesu. Nto anceene a yaawo yaahipaka eyo, omuhela muhina Andreya, munnawe Pedru ni woonasa wene Yohani mwaana a Zebedeyo. Muhoolo mwaya oowanli aya yaahikhala arummwa a Kristu. Nuuvira okathi vakhaani, Yesu aahivara muteko waalikana ni muteko wa Yohani, aatumereryaka atthu wiira yaahaana opatisiwa para yooniherye wiira aattharuwa itampi saya. Okathi Yohani aaleeliwe awe wiira awiixutti a Yesu yaanaapatisa atthu anceene onvikana yena, Yohani khaananariwe. Masi moowiiyeviha, Yohani aanisuwela wiira: “Miteko sa Kristu sihaana wuncerereya,” vano miteko sawe sivukuweke.
Olaleerya wa Yohani waahaaveeha atthu ootakhala ni ale yaarina owerya, masi waahaalipiha ale yaamulipelela Mesiya
Moolipa murima, Yohani orumeelaka muhupi aalaleya awe aahaattaruxa alopwana oowerya. Herodi Antipa yoowo onihimmwa wiira aari namalamulela oororomeleya, aahimuthela Herodiya mwaara a muulupale awe. Yohani aahaana olipa murima wiira omuleele mwene mwaha wa mweettelo awe. Herodi aahimutthukwela Yohani, masi khahiyo ti yeeyo Herodiya aaphavela awe, owo aaphavela omwiiva.
Ori ene mukhatteya, Yohani aaniphavela olipihiwa. Yohani aahaaruma awiixutti orowa omukoha Yesu wiira: “Nyuwo ti Kristu yoole onimulipelela ahu, aahiiso onimoorwa mukina?” Nto Yesu aahaakhula ni moolumo oovara murima oriki: “Alipa-oohoona, vano annoona . . . Alipa-oohiiwa, vano anniiwa. Alipa-ookhwa, annihihimuxiwa.” Nnaamwi Yohani aari profeta ntoko Eliya, owo khaarina owerya wa opaka miiriirya. Ori ene mukhatteya, Yohani aahilipa osuwela wiira aahilokiherya ephiro para Yesu, yoowo vano aavara miteko sootikiniha.
Masi nuuvira okathi vakhaani, Herodiya aahoona moota woomwiiviha Yohani. Nuumala mwanawe Herodiya wiina, Herodi aahileiherya wiira aamunvaha khula etthu aarowa awe oveka. Herodiya aahimuruma mwanawe wiira oveke muru wa Yohani Mpatisa. Nnaamwi Herodi ahaaphavenle wiira iiviwe, owo khaawenrye okhootta. Nto aahiruma wiiviwa Yohani. Okumi awe wootheene, Yohani aari oolipa murima.
Omuhimyaka Yohani, Yesu aahimmye so: “Kinooleelani wiira, eriyari ya apinaatamu ootheene, khuuvo mutthu ori muulupalexa onvikana Yohani.” Khuuvo pinaatamu, nnakhala maprofeta ntoko Moise aahiiso Eliya, aarina eparakha ya okhala “nsu na mutthu onikhuwela moothakoni”, yoowo aalokihenrye ephiro para Mesiya. Nave olipa wawe murima onnaakhaliherya makristau mpakha olelo-va.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Yohani Mpatisa oonihenrye sai olipa murima?
Mutokose itthu sikina
1. Etthu xeeni Yohani Mpatisa ni Yesu yaalikana aya? (Owehaweha 01/09/2010 epaax. 15 itti. 4-6)
2. Etthu xeeni musomi a eseekulu yoopacerya aihaniwa Flávio Josefo aalempe awe sa okhala wa Yohani Mpatisa? (Myaha sikina mwaha 14) A
Eteseenyu A: Musurukhu waakumiheriwe ni Herodi Antipa mwaakha wa 30 Nuumala Kristu Orwa. Moolumo yaalempwale vaavo yaahimya so: “Herodi, namalamulela a edistritu”
3. Moota xeeni Yohani aarina awe owerya onlikana ni wa Eliya? (Luka 1:17; Perspicaz vol. 1 “Ikuru soowaarya” etti. 60) B
Efootu B
4. Ninsuwela sai wiira Yohani khoronwe wiirimu? (Matheyo 11:11; Makoho Biibiliya onaakhula awe mwaha 178 etti. 4)
Muupuwelele itthu mwiixuntte anyu
Nnaamwi Yohani omalelinhe ene eprofesia ya mbiibiliyani ni olokihenrye ene ephiro para Mesiya, owo aahikhalana moonelo wooloka. (Yoh. 1:26, 27) Ntakiheryo nawe ninniixuttiha exeeni?
Yohani aahikhweiherya okumi awe, nave aahivahererya okumi awe wiira opakeke ele Muluku oniphavela awe. (Math. 3:4) Exeeni enrowa onikhaliherya okhweiherya okumi ahu? C
Eteseenyu C
Ninrowa otakiha sai olipa murima wa Yohani Mpatisa?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Yohani Mpatisa nuumala ohihimuxiwa?
Mwiixutte itthu sikina
Musuwele etthu yaamwiiriha Yohani okhala oohakalala ni oopixa murima, nnaamwi samphwanya mixankiho. Musome mwaha oni:
Yohani Mpatisa — onniniixuttiha ovikaniha ohakalala (Owehaweha 08/2019 ipaax. 29-31)
Ntakiheryo na Yohani ninrowa onikhaliherya sai ovilela olupatthiwa, othoiwa musurukhu ni mixankiho sikina? Nwehe eviitiyu eni: