45 PEDRU
“Miyo ka natampi”
PEDRU ni atthu akina a etthoko awe, yaahivara muteko munceene wa ototha ihopa. Pedru aari mulopwana oolipa murima. Owo aari oowaakuva olavula itthu uupuwela awe ni aanaakuva opaka etthu okathi oonaawe oreerela. Nihiku nimosa, munnawe aihaniwa Andreya, ohakalanle ene aahimuhimeerya wiira: “Nomphwanya Mesiya”. Moohipisa, Pedru aahikhala mutthareli a Yesu.
Nuuvira miyeeri vakhaani, Yesu aahirowa oKafarnawu weiwo Pedru aakhala awe. Pedru iira ovirinhe ene ohiyu ntero otothaka ihopa, masi owo khavanre etthu. Yesu aahimuruma wiira orowe opuro ori maasi manceene wiira atthikele orihela matthavi. Pedru khaakupali wiira anvara ihopa. Waari othana okathi yoowo wahaareerela aya ototha ihopa. Owo aahimmye so: “Noototha ohiyu wootheene khuhivara etthu”. Masi hata vari siiso Pedru aahiiwelela. Niinaano-ru, ikalawa piili saahisareya ihopa sinapacerya osama! Nto Pedru aahoova. Owo aahikokhora ohoolo wa Yesu, onahimya wiira: “Pwiya, mukhume-va, maana miyo ka natampi”. Pedru aixoona okhala natampi, ahaaphwanelela okhala ni mwaana a Muluku yoowo aapaka miiriirya. Yesu aahimmaaliha ohimyaka wiira: “Muhoove! Okhuma olelo orowa ohoolo, munrowa okhala mutothi a atthu”.
Yesu aahiweha mikhalelo sooloka Pedru aarina awe, nto nuuvira okathi aahimuthanla wiira okhale mmosa arummwa awe 12. Pedru aahooniherya olipa murima mwa inamuna sinceene. Mwa ntakiheryo, okathi Yesu aalavula awe etthu yeeyo awiixutti awe yahiiwexexa aya, ikwaha sinceene Pedru aaninvekela Yesu wiira aatthokiherye ele yaataphulela aya. Okathi Yesu eetta awe vasulu va maasi, Pedru aahooniherya olipa murima onvekelaka Yesu wiira nuuwo nave eette vasulu va maasi.
Pedru aanaakuva olavula, nto mwaha waivaavo, owo aanipirisari okhala olipa murima wiira eemererye ottaruxiwa ni Yehova
Nave-tho, Pedru aahooniherya olipa murima mwa enamuna ekina. Okathi mutthu onittaruxiwa awe, onipirisari olipa murima wiira okhalane moonelo wooloka sa yena ni wiiyeviha, weemererya soovonya sawe, nuumala-vo opaka marukunuxo anireerela. Pedru aahooniherya olipa murima ikwaha sinceene. Okathi Yesu aahimmye awe wiira aamwiiviwa, Pedru aahimpwapwela omuhimeeryaka so: “Pwiya, mwiireerele murima”. Yesu aahimpwapwela vanceene okhala wiira aalavunle ntoko Satana, ovirikanyaka ele Muluku oniphavela awe. Moowiiyeviha, Pedru aaheemererya opwapweliwa.
Ohiyu wookiserya ohinatthi wiiviwa, Yesu aahiwiixuttiha arummwa awe wiira yaahaana okhala oowiiyeviha, orapihaka inawu saya, muteko yoowo waavariwa ni epottha yoowiiyeviha. Pedru aaheererya omuhiiha Yesu onamuhimeerya wiira: “Tthiri, miyo nkinoohiyani murapihaka inawu saka”. Yesu aahimpwapwela-tho. Nto Pedru aahirukunuwa onamuhimeerya Yesu wiira ohirapihe inawu sawe paahi, nave-tho, aahaana orapiha matata awe ni muru awe. Ekwaha ela-tho, Yesu aahimpwapwela. Nuuvira okathi, Yesu aahihimya wiira arummwa ootheene yammuhiya. Pedru aahihimya wiira hata atthu ootheene amuhiyaka Yesu, owo khaarowa omuhiya! Yesu aahimwaakhula Pedru wiira ammukhootta ikwaha tthaaru ohiyu ole.
Nuuvira iwoora vakhaani, Yesu aahivariwa khutthukweliwa. Moolipa murima, Pedru aanimutthara omurakamenle ene. Owo aari vate va namukuttho muulupale, okathi Yesu aaroihiwa awe mpaani okoha-kohiwaka ni ophukeliwa voowuuliha muru ni voohixariya. Nto, atthu akina yaahisuwela wiira Pedru aari mutthareli a Yesu. Ikwaha tthaaru, Pedru aahikhootta ohimyaka wiira khaamusuwela mulopwana ole, ntoko Yesu saahimyale awe.
Yesu iira okhumaka mpaani onwehexexaka oratteene Pedru. Nto Pedru aahiriipiwa murima vanceene. Biibiliya onihimya wiira: “Pedru aahikhumela ota, onanla oriipiwe ene murima vanceene.” Nuumala Yesu wiiviwa, Pedru aahiriipiwa murima vanceene. Masi owo kheemerenrye wiira oriipiwa murima omwiirihe ohiya ororomeleya. Ohiya-vo, owo aahivilela. Pedru aapanke exeeni? Aahithukumana ni awiixutti akina. Muhoolo mwaya, owo aahikhalana etthu yoovara murima aaphavela awe waaleela okhala wiira Yesu aahimukhumelela! Biibiliya khonihimya etthu Yesu aahimmye awe nuumala yena ohihimuxiwa, masi Pedru aahilipihiwa ni aahimaalihiwa.
Nuuvira isumana vakhaani, Yesu aahaaphwanya awiixutti awe ephareya ya oGalileya, nto aahinvaha Pedru muteko a vameekhaaya. Ntoko siisaale Pedru aamukhoottale awe ikwaha tthaaru Yesu, owo aahimukoha ikwaha tthaaru Pedru wiira osuwele vakhala wiira aanimphenta. Nuumala-vo, Yesu aahinvaha muteko wa efaita yinceene, oriki: “Mulyiheke ipwittipwitthi saka”. Ntoko ninrowa ahu oweha ekapiitulu 49, moolipa murima Pedru aahivara muteko owo ntoko aarummwale awe.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Pedru oonihenrye sai olipa murima?
Mutokose itthu sikina
1. Muteko woototha ihopa wa Pedru waahela muhina exeeni? (Perspicaz vol. 1 “Oxaya ni ototha ihopa” itti. 6-7) A
Eteseenyu A
2. Xeeni Yesu aamwiihanne awe Simoni Keefa, nsina nenlo nintaphulela Pedru? (“Nyuwo mwa Simoni” enoota ya Bíblia de estudo eri Yohani 1:42)
3. Moolumo Yesu aamulenle awe Pedru ni Andreya wiira yaarowa okhala “atothi a atthu”, yooniherya exeeni? (Matheyo 4:18-20; Owehaweha 05/2016 epaax. 9 itti. 3-4) B
Efootu B
4. Ohinatthi Yesu orowa wiirimu, aahimukoha Pedru wiira: “Munnikiphenta ovikana iya?” Nikoho nla Yesu aapanke awe naataphulela exeeni? (“Nyuwo munnikiphenta ovikana iya?” enoota ya Bíblia de estudo eri Yohani 21:15)
Muupuwelele itthu mwiixuntte anyu
Ntakiheryo na Pedru ninrowa wookhaliheryani sai ohihiya omukokhorela Yehova hata nfalyariki ikwaha sinceene? C
Efootu C
Munrowa ottottela sai mureerelo moota Yehova ni Yesu yaamulevelenle aya moomalela Pedru?
Munrowa otakiha sai olipa murima wa Pedru?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni yoosivenleni osuwela wiira Yesu oomuthanla Pedru wiira alamuleleke wiirimu?
Mwiixutte itthu sikina
Eviitiyu enittharelana, nwehe moota anamuyari anrowa orumeela ntakiheryo na Pedru wiira awiixuttihe anaaya osuwela wiira Yehova toomoriwa ikharari.
Muthokorerye yoowiiraneya ya Pedru enooniherya moota ahaahiyale awe oororomeleya, hata atthu akina yaahiyale omutthara Yesu. Musome mwaha oni:
“Owo aahiroromeleya okathi wooweehereriwa” (Mutakiheke waamini waya ipaax. 188-195)