21 SAMUWELI
Moolipa murima aahilavula moolumo a Yehova
SAMUWELI, aari ntoko mwaana mwaamuthiyana a Yefte ni Sansoni. Ootheene aya yaarina yoolukama emosa-ru: Miteko sooloka yaavara aya axipapaya, saahaakhaliherya vanceene mookumini mwaya. Ntoko mwaana a Yefte, Samuweli aahivahererya okumi awe wa Yehova wiira ovareke miteko soowaarya. (1 Sam. 2:11) Ntoko siisaale Sansoni, Samuweli aahirumeela ntoko muNaziri okumi awe wootheene. (Aph. 13:7) Nave, ntoko Sansoni mwaana a Yefte, Samuweli aapirisari olipa murima.
Nuumala Ana omuhiiha Samuweli waamwa, owo aahimukuxa, omuroiha otapernaakulu ya oSilo wiira arumeeleke, ntoko aamuleihenrye awe Yehova. Woonasa wene, Samuweli aarina iyaakha tthaaru. Khula mwaakha Ana aanimuxukurya Samuweli, omuroihelaka nlaya nsya wiira owareke. Samuweli annunwe otapernaakulu, okhapeleliwaka ni namukuttho muulupale, Eli. Woonasa wene, athiyana akina a otapernaakulu yaanimukhaliherya Eli omukhapelela Samuweli.
Masi waahikhala muxankiho, okhala wiira atthu akina yaanipaka itthu soohiloka otapernaakulu. Nto Eli aahikhalana nthowa okhala wiira aanaaweha atthu awo ohinaattaruxa. Anaawe anli, Hoofini ni Pineha, khiyaamuttittimiha Yehova. Awo yaanirupihana moohiloka ni athiyana yaarumeela otapernaakulu. Masi khahiyo yaari yeeyo paahi. Oowanli aya yaari atthu ohiphiyeriwa ni ananrima. Vanikhala wiira, okathi atthu yaaroiha aya soovaha saya, yaanaaruma anamakhaliherya aya orowa wiiya ipantta sooloka sa inama saarooheliwa Yehova. Eli aanisuwela itthu anaawe yaapaka aya. Masi hata vari siiso, owo aattarunxe vakhaani paahi. Nave awo yaahikhootta wiiwelela okathi yaattaruxiwa aya. Nnaamwi saapakiwa itthu sinceene soohiloka otapernaakulu, Samuweli aahinnuwa omusivelihaka Yehova ni atthu. Nuumala ophiya okathi wiira Yehova ophuke mixankiho saakhumelela oSilo, owo aahimuthanla mmiravo Samuweli wiira olavule muhupi awe.
Ohiyu omosa, Samuweli aahivenya mwaha wa nsu naamwiitthana. Aari Yehova! Samuweli uupuwelaka wiira aari Eli, aahivenya onarowa wa yena wiira asuwele etthu aaphavela awe. Eli, yoowo aari oowuuluvala ni ahoona, aahimuleela Samuweli wiira atthikele orupa okhala wiira khamwiitthanne. Eyo yaahiiraneya ikwaha piili. Wookiseryani, Eli aahisuwela wiira aari Yehova aamwiitthana Samuweli, nto aahimuleela wiira arupeke. Akhala wiira Yehova aamutthikela omwiitthana ekwaha ekina, owo aahaana waakhula so: “Mulavuleke Yehova, okhala wiira murumeyi anyu onnoowiriyanani”. Samuweli aahiira itthu sootheene aahimeeriwe awe.
Ekwaha ya neexexe, Yehova aahimwiihana oriki: “Samuweli, Samuweli!” owo aahaakhula wiira: “Xontte, mulavuleke, okhala wiira murumeyi anyu onnoowiriyanani”. Nuumala-vo, Yehova aahilavula ni Samuweli. Muluku aahimmye wiira amphuka muxankiho wa oSilo ni ammuhukhumu Eli mwaha woohaattaruxa anaawe. Owo ni emusi awe, waahela muhina anaawe anli, yaamurowa ophukeliwa. Nto Samuweli aahaana omuleela itthu iye sootheene namukuttho muulupale, Eli!
Samuweli aahitthikela wummaathi, masi Biibiliya khonihimya vakhala wiira aahiwerya orupa. Nuumala oxa, Samuweli aahivenya wiira ohule mikhora sa otapernaakulu. Masi, “Samuweli aanoova omuleela Eli, ele Muluku aamulenle awe.” Eli aahimwiitthana Samuweli ni aahimukoha etthu Muluku aamulenle awe. Eli aahisuwela wiira Samuweli anoova omuleela. Tivonto, owo aamulenle so: “Xontte, muhikikhuwe etthu.”
Nnaamwi aari mmiravo, Samuweli aahimuleela namukuttho Eli, muhupi woophukela wa Yehova
Moohaanyiherya, ole waari okathi woovila para Samuweli. Pooti wiira Samuweli animuttittimiha vanceene Eli ntoko taata awe, ohiya-vo, ntoko namukuttho muulupale, Eli taarina muritti woowaakhaliherya atthu omwiiwelela Yehova. Hata vaari siiso, moolipa murima Samuweli aahimuleela Eli. “Siiso, Samuweli aahimuleela itthu sootheene ni khamukunwe etthu”. Moohipisa Eli aahisuwela wiira saamumphwanya mixankiho. Niireke Eli aahaattaruxa anaawe? Biibiliya khonihimya eyo.
Samuweli aahiphwanya mareeliho manceene mwaha woowi aahooniherya olipa murima. Biibiliya onihimya wiira: “Yehova aari nuuwo”. Ohiya-vo, owo aahikhala profeta a Yehova. Nave itthu sootheene Samuweli aalavunle awe sa Eli ni anaawe saahiiraneya. Okathi ole, aisarayeli yaanirowa wa Samuweli wiira aavahe miruku aahiiso malakiheryo yaakhuma wa Yehova. Mwa iyaakha sinceene, owo aahimurumeela Yehova moororomeleya ori ene profeta ni mphuki. Okhaliheriwaka ni Yehova, Samuweli aahiixutta wooniherya olipa murima okhuma omiravo awe, ni khaahiyale wooniherya olipa murima omurumeelaka Yehova okumi awe wootheene.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Samuweli oonihenrye sai olipa murima?
Mutokose itthu sikina
1. Waari sai oSilo opuro yaari aya Etapernaakulu? (Owehaweha 01/11/1992 ipaax. 8-9) A
Todd Bolen/BiblePlaces.com
Eteseenyu A: oSilo wa khalai
2. Okumi wa Samuweli waari sai otapernaakulu? (Mutakiheke waamini waya, ipaax. 60-62 itti. 9-13) B
Eteseenyu B
3. Okathi xeeni mmiravo Samuweli nlelo ahaamusuwela awe Yehova? (1 Sam. 3:7; Owehaweha 15/12/2002 epaax. 8 itti. 5-6)
4. Eprofesia yaalavula etthu yaarowa omwiiraneela Eli ni emusi awe, yiiraneyale sai? (Perspicaz, vol. 1 “Eli, I” itti. 5-7)
Muupuwelele itthu mwiixuntte anyu
Amiravo aniixutta exeeni ni ntakiheryo na Samuweli sa efaita erina aya . . .
okhala mutthu oowiiwelela? (1 Sam. 3:5)
oottittimiha? (1 Sam. 3:6-10)
oororomeleya? (1 Sam. 3:15) C
Efootu C
Okathi xeeni amiravo anipirisari aya olipa murima wiira alavule? Ntakiheryo na Samuweli ninrowa waakhaliherya sai?
Munrowa otakiha sai olipa murima wa Samuweli?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Exeeni kiniphavela aka omukoha Samuweli nuumala ohihimuxiwa?
Mwiixutte itthu sikina
Okathi xeeni amiravo ni atthu aalupale anipirisari aya olipa murima wiira yaakiherye ekeekhai? Moone eviitiyu eni:
Nnaamwi atthu aakhalana awe Samuweli yahaamwiiwelela Yehova, masi owo anipaka itthu sooloka. Musome mwaha oni:
“Samuweli aahithanla opaka khula etthu aawerya awe, wiira omuhakalalihe Yehova” (Matakiheryo a myaha sa mbiibiliyani mwaha 15)