Aari oolipa murima hata okathi ahaarina awe ikuru

SANSONI khaawerya woona. Masi aaniwerya wiiwa okathi afilisti yanveeha aya. Nto exeeni yaamwiirinhe ohoona ni oveehiwa? Sansoni aahipaka etthu yoohiloka mwaha woowi aahihimya esiiri ya ikuru aavahiwe awe ni Yehova. Mwaha waivaavo, owo aahivariwa, aahikumihiwa maitho, aahitthukiwa, aahiriheliwa mukhatteya ni aahikhanyereriwa ovara muteko ntoko epottha. Nave afilisti yaanimutheya ni onveeha Sansoni omuhela muhina Muluku awe, Yehova. Sansoni aanisuwela wiira muxankiho ole waakhumelenle, waari mwaha wa etthu yoohiloka aapanke awe. Wanipacerya owo aari oolipa murima. Vano, olipa wawe murima waaheehereriwa mpakha ohimya esiiri ya ikuru sawe.

Sansoni aahikhala mphuki wIsarayeli mwa iyaakha 20, masi aari oovirikana ni aphuki akina. Moota xeeni? Aphuki akina, ntoko Baraki, Gedeyoni ni Yefte, yaahaahoolela anakhotto a Muluku wiira yaaxintte awanani aya. Masi Sansoni nnaari. Yehova aahimurumeela Sansoni wiira aaxintte awanani awe mekhawe. Sansoni aahaaxintta afilisti anceene. Aaxinttale sai?

Attharaka malakiheryo a Yehova, anamuyari awe Sansoni yaahimwiixuttiha wiira omurumeeleke Yehova ntoko muNaziri. Ti maana aya, ahaatonko awe omettha ikharari sawe. Okathi aari awe oororomeleya ni natiri ammanenle awe Yehova wiira aarowa omurumeelaka yena ntoko muNaziri, Yehova aahimureeliha onvahaka ikuru sinceene. Nihiku nimosa, Sansoni aahimwiiva kharamu ni matata awe khumukawanya ipantte piili! Nave aahirumeela owerya iwo wiira aaxintte afilisti, yaawo yaahaaxa aisarayeli.

Ekwaha emosa, nuumala Sansoni owiiva afilisti anceene, aisarayeli yaanoova wiira afilisti yanwunlela ikuhu mwaha wa etthu ele Sansoni aapanke awe. Mwaha waivaavo, awo yaahimutthukwa Sansoni yaavahererya afilisti. Masi Sansoni aahikwasa mikhoi saatthukaniwe awe, ntoko malaxi ni aahiwiiva afilisti 1.000 orumeelaka nikhuva na puuru. Muhoolo mwaya, okathi Sansoni aaphiyale awe epooma ya oGaza, awanani awe yaahiiwanana wiira alipelele oxa wiira amwiive Sansoni. Masi, ohiyu eriyari, owo aahivenya, ophela mukhora muulupale wa epooma ele. Nuumala-vo, aahikapatta oneettana ikiloomo soowiiraka 60, mpakha vasulu va mwaako, waattamela epooma ya oHebroni.

Khula okathi, Sansoni aahooniherya wiira aari mulopwana a ikuru. Owo aahiwooniherya afilisti wiira amuluku aya, ntoko Dagoni, khiyaarowa owerya omuxintta murumeyi oororomeleya a Yehova. Nto afilisti yaahiphavela enamuna ekina wiira amuxintte Sansoni, amurumeelaka muthiyana aitthaniwa Dalila.

Sansoni aahisiveliwa ni Dalila, masi owo aari oohiroromeleya, okhala wiira muhoolo mwaya aahinvariha Sansoni. Dalila aaheemererya musurukhu aavahiwe awe ni afilisti, yaawo yaaphavela osuwela etthu yaamwiiriha Sansoni okhalana ikuru sinceene. Tivonto, khula okathi owo aanimukhanyererya Sansoni wiira omuleele esiiri awe. Okhala wiira Sansoni aahooceya mwaha wa okhanyereriwa, owo aahimuleela Dalila etthu yaamwiiriha okhalana ikuru. Owo aahimmye wiira, ametthiwa ikharari sawe, ikuru sawe saamummalela. Nuumala osuwela, Dalila aahimulipelela Sansoni orupa, nuumala-vo onawiitthana alopwana ale wiira ametthe ikharari sawe. Nto, Sansoni saahimmalela ikuru sawe, okhala wiira “aahinyanyaliwa ni Yehova”. Moohipisa afilisti yaahinvara Sansoni, amukumiha maitho.

Sansoni aakhanyereriwa wiira oxileke ephepa para awanani awe, tthiri muteko ole aari wookhulumula. Afilisti khiyaareere ohakalala vanceene mwaha wa onvara Sansoni, yoowo aari nwanani aya ootupa, masi vano aari epottha aya. Nave awo yaahilokiherya efesta wiira amutthapele ni omuxukhurela muluku aya Dagoni mwaha woowaakhaliherya onvara Sansoni. Nihiku na efesta yaahithukumana atthu anceene etemplo ya muluku aya. Nave afilisti oowiiraka 3.000, yaahithukumana mutemplo mwa muluku aya. Awo yaahuupuwela omukuxa Sansoni wiira atthu amutheyeke ni yaahiruma oroweliwa, eemexiwa eriyari ya maripu manli maalupale a etemplo aya. Okathi owo, ikharari sa Sansoni siira sitthikenle ene wunnuwa ni khaareere oriipiwa murima mwaha wa etthu ele yoohiloka aapanke awe.

Sansoni aahivarela maripu a empa ele, onanvekela Yehova wiira omuttikiherye ikuru aarina awe. Owo aavekenle so: “Xontte, mukuupuwele, ni mukivahe ikuru, koovara metto, ekwaha yeela paahi, khoo Muluku aka.” Nuumala-vo, aahikhuwela iiraka: “Kikhweeke vamosa ni afilisti!” Nkahaya mmuupuwele Sansoni orumeelaka ikuru sawe sootheene wiira ottikinye maripu ale maalupale. Afilisti ahinatthi opacerya omukhoottiherya, maripu yaahimora ni etemplo yaahinyaanyeya. Ela yaari ekwaha yookiserya Sansoni aarumenle awe ikuru sawe. Nto owo aahiwerya owiiva awanani a Muluku anceene ovikana ale aawiivale awe khalai.

Nuuvira iyaakha sinceene, murummwa Paulo aahilepa nsina na Sansoni, elista ya alopwana yaarina waamini woolipa. Okathi aalepa awe elista ya “atthu yahaawerya, masi khukhalihiwa oowerya”, murummwa Paulo aahimuupuwela mphuki ola oonihenrye olipa murima. — Ahep. 11:​32-34.

Musome yoowiiraneya ela mbiibiliyani, soolepa sinittharelana:

• Aphuki 13:1–16:31

Nikoho para ovaanela:

Sansoni oonihenrye sai olipa murima?

Mutokose itthu sikina

1. 1. Xeeni Sansoni aakhanle awe oovara mirutthu ni okathi omosa-ru khukhala muNaziri? (Owehaweha, 15/01/2005 epaax. 30 etti. 1 mpakha epaax. 31 etti. 1)

   Mwaakhule va

2. 2. Exeeni enooniherya wiira Sansoni aanipirisari okhaliheriwa ni ikuru sa Muluku wiira owerye oteexa mikhora okhuma oGaza mpakha oHebroni? (Owehaweha, 15/10/2004 epaax. 15 itti. 7-8) A

   Mwaakhule va

   

3. 3. Exeeni enooniherya wiira Dalila aari mwisarayeli? (Owehaweha, 15/03/2005 epaax. 28 etti. 3)

   Mwaakhule va

4. 4. Xeeni Sansoni aavekenle awe wiira owunlele ikuhu afilisti wiira oliverye niitho nawe nimosa? (Aph. 16:28; Perspicaz vol. 2 “Sansoni” etti. 10)

   Mwaakhule va

Muupuwelele itthu mwiixuntte anyu

• Okathi Dalila aamukhanyererya awe Sansoni wiira omuleele esiiri, owo aahimuleela etthu ahaareerela awe ohimya. Axitokweene ni axaara aya aniixutta exeeni? B

  Mwaakhule va

  

• Nnaamwi Sansoni aapanke etthu yoohiloka, masi muhoolo mwaya Yehova aahimurumeela mwa enamuna yooloka. Ntakiheryo nla, ninrowa omukhaliherya sai mukristau ohihiya omurumeela Yehova hata ofalyanri ene?

  Mwaakhule va

• Munrowa otakiha sai olipa murima wa Sansoni?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni yoolakela ya Yehova?

  Mwaakhule va

• Etthu xeeni kiniphavela aka omukoha Sansoni nuumala ohihimuxiwa?

  Mwaakhule va

Mwiixutte itthu sikina

Nwiixuttihe aniinyu etthu yaamukhaliherya Sansoni okhala mulopwana a ikuru. Musome mwaha oni:

“Ikuru sa Muluku saahinvaha owerya Sansoni” (Matakiheryo a myaha sa mbiibiliyani mwaha 14)

Itthu xeeni sikina nniixutta ahu ni yoowiiraneya ya Sansoni? Musome mwaha oni:

“Mmuroromele Yehova ntoko Sansoni” (Owehaweha 09/2023 ipaax. 2-7)