“Murettele wa Kristu weettiheke mirima sanyu”

Akolosi 3:​15, onnilavula sa “murettele wa Kristu”. Masi “murettele wa Kristu” ontaphulela exeeni? Onitaphulela murettele wa mmuupuweloni, mutthu oniphwanya awe mwaha wookhala mwiixutti a Kristu. Murettele owo onikhumela mwaha woosuwela wiira ninniphentiwa ni Yehova vamosa ni Yesu. — Yoh. 14:​23, 27.

Murummwa Paulo, aahaatumererya makristau a muloko wa okolosi, wiira murettele wahaana weettiha mirima saya aahiiso omutthu aya. Moota xeeni? Nuulumo na ekereku murummwa Paulo orumenle awe noowi “weettiheke” ninvarihana ni muteko onivara awe arpituru okathi wa xooku. Eyo enitaphulela wiira ntoko siisaale arpituru onihimya awe etthu yoopaka okathi wa xooku, nave “murettele wa Kristu” ohaana onikhaliherya opaka soothanla mookumini mwahu.

Mwa ntakiheryo, okathi nihiniiwanana ahu ni munna aahiiso murokora, “murettele wa Kristu” ohaana oniiriha osuwela etthu yoopaka. Nave, ohaana onikhaliherya okhaliha murettele ni wiiraana ni munna aahiiso murokora owo. Wiira nipake eyo, ikwaha sikina nihaana ohiya itthu nimphavela ahu ni sinnisivela, wiira “murettele wa Kristu” weettiheke mirima sahu. — Akol. 3:​12-14.