Munoowerya omuxintta Satana ni malaikha ootakhala!

1. Arumeyi a Yehova aniwana naani? (Aefeso 6:11, 12)

ARUMEYI a Yehova, khaniirela mpantta ikhotto sa olumwenku ola. (Yes. 2:4; Yoh. 18:36) Masi Biibiliya onihimya wiira ootheene ahu ninniwana ekhotto ni Satana ni malaikha ootakhala. (Mmusome Aefeso 6:11, 12.) Ninrowa owerya sai omuxintta Satana ni malaikha ootakhala yaawo arina owerya onivikana hiyo? Nikhaliheriwaka ni Yehova nnoowerya waaxintta. Masi nihaana osuwela miraakho Satana ni malaikha ootakhala anirumeela aya, wiira ahonone waamini wahu ni waaroromela wahu anna ni arokora.

2. Exeeni ninrowa ahu othokorerya mwaha ola?

² Mwaha ovinre, noothokorerya miraakho Satana onirumeela awe wiira ohonone omuroromela wahu Yehova Muluku ni Yesu Kristu. Mwaha ola, ninrowa othokorerya miraakho sikina miili, Satana onirumeela awe wiira oniirihe ohiya omurumeela Yehova. Woopacerya, owo onniimananiha wiira ohonone wiiraana nirina ahu ni anna ni arokora. Wa nenli, Satana onniwiiriha atthu onilupattha mwaha woowi oniphavela niwooveke ni nihiye olaleerya.

SATANA ONIPHAVELA OHONONA WIIRAANA NIRINA AHU NI ANNA NI AROKORA

3. Etthu xeeni Satana oniphavela awe oniiriha?

³ Satana oniphavela wiira nihiiwananeke ni anna ni arokora. Yoolakela awe oniphavela wiira niwaneke yoohi-ru ohiiya owana ni yena. Owo onipaka sai eyo? Atthu anceene a olumwenku ola wa Satana, tootakhala ni khanaaphenta atthu akina. Nave ikwaha sinceene, khaniroromelana mukina ni mukhwaawe. Nto Satana oniphavela wiira naatakiheke atthu awo, maana onnisuwela wiira napaka eyo nnoopaceryaka waanyokha anna ni arokora ni ohiroromela mutthenkeso wa Yehova. — Arom. 16:17.

4. Exeeni yaamwiirihale Sawuli opacerya omulupattha Davidi? (Nwehe eteseenyu.)

⁴ Nrowe nthokorerye ntakiheryo nimosa. Mwene Sawuli aahipacerya omulupattha Davidi. Masi wanipacerya, Sawuli aanimphenta Davidi. Owo aanisiveliwa ni Davidi okhala wiira yena aanisuwela owana ekhotto. (1 Sam. 18:5) Nuuvira okathi, Sawuli aahipacerya omukhalela nrima Davidi, okhala wiira owo aanittottopeliwa ni atthu akina. Nto eyo yaahimwiiriha Sawuli ophavela omwiiva Davidi. (1 Sam. 18:9-11) Vaakhanle wiira Davidi aahiiviwa, eyo yammusivela vanceene Satana. Mwaha wa xeeni? Mwaha woowi Yehova aahimuthanla Davidi para okhala mwene a wIsarayeli, yoowo aarowa omuranttela Sawuli. (1 Sam. 16:13) Nto Satana aamuhakalala vanceene vaakhanle wiira khiyaarowa wiiraneya ele Yehova aaphavela awe. Nkahaya muupuwele moota Satana aahakalanle awe vaavo anweha awe Sawuli omukhalelaka nrima ni ophavelaka omwiiva Davidi, yoowo aathanliwe ni Yehova wiira okhale mwene.

5. Xeeni Satana oniphavela awe wiira naakhaleleke nrima anna ni arokora? (Yakobo 3:14-16)

⁵ Satana onnisuwela wiira wiiraana wahu onnimwiiriha Yehova onireeliha ni onikhaliherya. (Esal. 133:1) Nto okhala wiira Satana onniphavela ohonona wiiraana nirina ahu, owo oniphavela wiira naakhaleleke nrima anna ni arokora ntoko siisaale Sawuli aamukhalela awe nrima Davidi. Owo onnisuwela wiira naakhalelaka nrima anna ni arokora, vanoonixankihaka waaphenta. (Mar. 12:30, 31) Nto naahaaphenteke anna ni arokora, niireke Yehova onimweemererya enamuna nimmukokhorela ahu? Mwiixutti Yakobo aahihimya wiira ti vootakhala waakhalela nrima anna ni arokora. — Mmusome Yakobo 3:14-16.

6. Ntakiheryo na Yonathani ninniixuttiha exeeni? (Nwehe eteseenyu.)

⁶ Akhala wiira nnimwaaphentaka anna ni arokora ni murima ahu wootheene, hiyo khaninrowa waakhalelaka nrima nave eyo enoonikhaliherya olipiha ompatthani ahu naawo. Nrowe nthokorerye ntakiheryo nooloka na Yonathani yoowo ari mwaana a Sawuli. Yonathani khaamukhalela nrina Davidi ntoko iirale awe paapa awe. Owo aanimuthokorerya Davidi ntoko mpatthani awe ni aahimuleela wiira Yehova ampaka ele aamuleihenrye awe. Yonathani aahimuleela Davidi wiira: “Nyuwo munookhala mwene a atthu a Isarayeli”. Moowiiyeviha Yonathani aanikupali wiira Yehova aaphavela wiira Davidi okhale mwene aarowa omuranttela Sawuli, nto aahimukhaliherya. — 1 Sam. 23:16, 17.

7. Etthu xeeni nikhanle ahu oopaka wiira nihinvahe opuro Diabo? (Aefeso 4:25-27)

⁷ Satana onneererya orumeela mixankiho nirina ahu ni anna ni arokora, wiira ohonone wiiraana nirina ahu. Arumeyi anceene a Yehova anikhuma ilapo soovirikana. Nave noovirikana mikhalelo ni itthu sinnisivela. Nto Satana oniphavela wiira nuupuweleke wiira khivaniweryaneya okhala apatthani mwaha woowi naatthu oovirikana. Owo onnisuwela wiira muupuwelo owo pooti oniiriha ohiiwanana mukina ni mukhwaawe. Munrowa owerya sai osyaka onvaha opuro Satana? Munoowerya akhala wiira munimwaakuvelaka ophuka mixankiho ni waalevelela anna ni arokora ni murima wootheene okathi anootthekelayaani. (Mmusome Aefeso 4:25-27.) Nave Mulipiheke waaphenta wanyu anna ni arokora. Muhiliyale wiira ootheene ahu nookhalana efaita yinceene para Yehova nave nihaana okhaliheryana mukina ni mukhwaawe, ntoko siisaale ipantta sa erutthu sinivara aya hoothe. (1 Akor. 12:12) Anna ni arokora ootheene anniwana ni Satana ni malaikha awe ootakhala. — 1 Ped. 5:8, 9.

8. Nipakeke exeeni akhala wiira munna aahiiso murokora oonipakela etthu eniwereyale?

⁸ Okathi munna aahiiso murokora onihimya awe wala onipaka awe etthu ehinoosivelani, muupuweleke wiira nave-tho nyuwo mootoko olavula aahiiso opaka etthu yahaasivenle atthu akina. Vaavo onivira aya okathi nivaraka ni anna ni arokora, ikwaha sikina nnanweha mikhalelo saya soohiloka. (Mus. 7:20) Okathi eyo eniiraneya aya, nihaana otthara malakiheryo a Yehova, waapixerya murima anna ni arokora ni waalevelela moowaakuveya akhala wiira aanitthekela. (Akol. 3:12-14) Nto nihaana olipiha ompatthani ahu ni waaphenta wahu anna ni arokora, maana noosuwela wiira ti yeeyo Yehova ni Yesu aniphavela aya wiira nipakeke. — Yoh. 17:20, 21.

SATANA ONNIRUMEELA OLUPATTHIWA WIIRA ONIKHULUMULE

9. Muraakho xeeni mukina Satana onirumeela awe wiira oniirihe ohiya omurumeela Yehova?

⁹ Satana onnirumeela olupatthiwa wiira oniirihe ohiya omurumeela Yehova. Murummwa Paulo aahihimya wiira makristau eekeekhai yaamulupatthiwaka. (2 Tim. 3:12) Khuuvo onimusivela aalupatthiwaka. Okathi ninlupatthiwa ahu aahiiso othokoreriwa moohiloka, hiyo pooti oviriha okathi munceene nuupuwelaka moota nikhanle ahu oowaapuniri ale annipakela itthu iyo. Nto eyo pooti oniiriha ohikhalana okathi ni ikuru wiira nivare muteko orina efaita yuulupale, yoowo nivahiwe ahu ni Yehova, okhanle olaleya Omwene. — Arom. 12:19-21.

10. Etthu xeeni Isaakhi aapanke awe okathi afilisti yaamulupattha aya?

¹⁰ Nkahaya muupuwele etthu yaamwiiranenle Isaakhi mwaana a Abrahamu. Isaakhi aahithaaciri ni aahikhalana inama sinceene. Nto afilisti yaahipacerya omukhalela nrima ni yuuheelela ihime sawe wiira ohikhalane maasi. (Maph. 26:12-18) Masi Isaakhi, emusi awe, ni inama sawe yaapirisari maasi wiira akhale akumi. Nto Isaakhi aahithanla othaamela elapo ekina ni othipa ihime sikina. Masi hata vari siiso, afilisti yaahimyale wiira ihime iyo nlelo saari sawaya. Tthiri ele yaari etthu yoohiloka ni woonasa wene yaahimukhulumula. Masi Isaakhi khaaphavenle wiira amakampusi awe ni afilisti amakeleke onyakulihana. Moota xeeni? Mwaha woowi Isaakhi aahiimananiha okhaliha murettele. Nto Isaakhi aahithanla othaamela-tho elapo ekina nto Yehova aahimureeliha. (Maph. 26:19- 25) Nimutakihaka Isaakhi, okathi nimpakeliwa ahu etthu yoohiloka nihaana okhala oopixa murima ni wiimananiha okhaliha murettele.

11. Yesu aapanke exeeni okathi aathokoreriwa awe voohiloka?

¹¹ Okathi Yesu, yoowo ari Mesiya aaleiheriwe, aaphiyale awe valaponi, atthu anceene khiyaamureerela murima. Mwa ntakiheryo, amusi awe akina yaahimya wiira Yesu aaroovahuwa. (Mar. 3:21) Nave ahooleli a itiini yaaneererya omuhiiha olaleerya. (Luka 11:15, 16) Nave mmosa a arummwa awe, aahinvariha Yesu. (Math. 26:14-16) Nave ahooleli a itiini akhaliheriwaka ni ahooleli a ikuvernu, yaaniphavela omwiiva Yesu ntoko nakirime. (Mar. 15:1, 13-15) Masi Yesu kheemerenrye wiira olupatthiwa omwiirihe ohiya ovara muteko arummwale awe ni Yehova. Owo khaatonko owunlela ikuhu ale yaamulupattha nave okathi Yesu aavariwe awe, murummwa Pedru aaphavela omwaakiha. Pedru aahiikittha niyaru na murumeyi mmosa a mukhulupale anamukuttho. Masi Yesu khaasiveliwe ni etthu Pedru aapanke awe nto mwa mwiiriirya aahimpenuxa mulopwana ole. (Luka 22:50, 51) Nnaamwi saamwiiranenle itthu iyo sootheene, Yesu khaatonko owunlela ikuhu ale yaamulupattha. Nave khaahiyale ovara muteko wa faita yoowo aarummwale awe ni Yehova.

12. Moovarihana ni Matheyo 5:43, 44, naathokoreryeke sai ale anninyokha aahiiso annilupattha?

¹² Moolikanasa ni okathi wa Yesu, olelo-va pooti oniiraneela itthu sikhanle oonikhulumula. Satana oniphavela onihiiha olaleya ihapari sooreera. Nave amusi ahu ahinimurumeela Yehova aahiiso atthu akina pooti opacerya oninyokha wala onilupatthaka. Masi Yesu oniixuttihale wiira nihaana waaphenta ale annilupattha. (Mmusome Matheyo 5:43, 44.) Eyo enooniherya wiira nihaana osyaka waahaaxa ni waanyokha ale annilupattha. Nto nihaana wiiwelela yooruma ya Yesu niimananihaka waareerela murima, waapixerya murima ni waattittimiha atthu ootheene hata ale annilupattha. — 1 Akor. 13:4.

13. Xeeni ninreerela ahu waattittimiha makhulupale hata awo anilupatthaka? (Nwehe efootu.)

¹³ Nihaana waattittimiha makhulupale a ikuvernu, hata ikwaha sikina apakaka malamulo annikumiherya mixankiho, aahiiso annikhottiherya omukokhorela Yehova ni olaleerya. Mwaha wa xeeni? Mwaha woowi Biibiliya onnivekela wiira naattittimiheke makhulupale a ikuvernu. (Arom. 13:1, 2) Satana khahiyo toniwiiriha okathi wootheene makhulupale a ikuvernu opaka malamulo annikumiherya mixankiho. Masi owo oniphavela wiira nihiiweleleke malamulo awo anipakiwa ni makhulupale a ikuvernu. Satana oosuwela wiira napaka eyo nnoopacerya waalavula moohiloka aahiiso waanyokha makhulupale awo. Olelo-va atthu anceene anipaka manifestasau okathi makhulupale a kuvernu anikumiherya aya malamulo ahinaasivela atthu awo. Masi makristau eekeekhai khakhanle oowiirela mpantta manifestasau! (Mir. 24:21, 22; Mus. 8:2, 3) Akhala wiira nnoopakaka manifestasau ni ohiya ororomela Omwene wa Muluku, ninrowa opakaka ele Satana oniphavela awe. — Yoh. 15:19.

14. Exeeni nihinreerela ahu oliyala voohimya sa ale annilupattha?

¹⁴ Atthu akina yaawo yaanilupattha khalai, vano Anamoona a Yehova. (1 Tim. 1:12, 13) Nto “mwaaveehiwaka, mwaalupatthiwaka ni mootheriwaka itthu sootakhala” muhiliyale wiira nihiku nlo, atthu awo pooti oturuka muupuwelo aya apaceryeke omurumeela Yehova. (Math. 5:11) Mwaavekeleleke makhulupale, nto awo anooneemereryaka omukokhorela Yehova mootaphuwa. (1 Tim. 2:1, 2) Nave mwaavekeleleke ale anoolupatthani akhale amusi anyu, ale munivarana anyu muteko ni ale munisomana anyu oskola. Munvekeleke Yehova wiira ookhaliheryeni oweha etthu mukhanle anyu oopaka wiira mwaakhaliherye oturuka muupuwelo aya. Nave mukhaleke oopixa murima! Muthiyana mmosa yoowo aamulupattha iyawe mwa iyaakha sinceene, vano ori Anamoona a Yehova onihimya so: “Nnoowerya waakhaliherya atthu akina oturuka muupuwelo aya vakhala wiira khannihiya okhala oopixa murima.”

15. Xeeni nihinreerela ahu wuupuwela wiira nnoomaliha itthu soohixariya siniiraneya moolumwenkuni?

¹⁵ Yehova onnisuwela mixankiho sootheene ninvilela ahu. Nave onnisuwela wiira khivanikhweya ovilela mixankiho sootheene sinniphwanya. (Esal. 37:18) Hiyo khaninrowa owerya omaliha itthu sootheene soohixariya siniiraneya moolumwenkuni. (Mus. 1:15) Masi Yehova onoowerya omaliha. Nave ooleiherya wiira moohipisa, Omwene awe onoomaliha ohaawa wootheene okumiheriwe ni Satana ni ale animukhaliherya. (1 Yoh. 3:8; Wis. 21:5) Nto nilipelelaka okathi owo Yehova onrowa awe omaliha mixankiho, nihaana opixa murima ni waaphenta atthu ootheene. Nave nihaana orumeela oratteene okathi ni ikuru sahu, wiira naakhaliherye atthu anceene okhala apatthani a Yehova.

NNOOWERYA OMUXINTTA SATANA NI MALAIKHA AWE!

16. Exeeni enrowa onikhaliherya oxintta ekhotto ninwana ahu ni Satana ni malaikha awe ootakhala? (Nwehe ifootu.)

¹⁶ Biibiliya onihimya wiira nnoowerya omuxintta Satana ni malaikha awe ootakhala. (Yak. 4:7; 1 Yoh. 5:4, 5) Omwaamini Yehova ni Yesu tonrowa onikhaliherya oxintta ekhotto ninwana ahu ni Satana ni malaikha awe ootakhala. (Aef. 6:16) Tivonto, muhihiye olipiha omwaamini wanyu Yehova Muluku ni Yesu Kristu. Omwaamini iwo onimookhaliheryani ohihiya waaphenta anna ni arokora ni wiiraana naawo.

17. Tiivi enireerela okhala yoolakela ahu?

¹⁷ Nto nihimweemererye Satana onixintta ekhotto ninwana ahu ni yena. Owo khonihiya opaka itthu sikhanle ooniiriha ohiiwanana ni anna ni arokora ni sikhanle ooniiriha ohiya olaleerya. Nto naahihiye omuroromela Yehova ni Yesu, awo annileiherya onikhaliherya omuxintta nwanani ahu muulupale, Satana. Nave anna ni arokora anniwana ni Satana. Okathi atthu akina annilupattha aya, nihaana waareerela murima ntoko Yesu onirumme awe. (Luka 6:27, 28) Tivonto, muhihiye owana ni Satana! Nave mukupaliki wiira munoowerya omuxintta Satana ni malaikha awe.