Mukhootteke miraakho sa Satana ni mmuroromeleke Yehova ni Yesu

1. Satana oneererya sai onihiiha omurumeela Yehova?

OKHUMA okathi nipacenrye ahu omurumeela Yehova, Satana ni malaikha awe ootakhala khareere onyoonyiwa ni anniimananiha wiira nihiye omurumeela Yehova. Masi okhala wiira Yehova onninikhaliherya, Satana onnisuwela wiira khonrowa owerya onihiiha omurumeela Yehova. Nto, onniimananiha wiira onihiihe omphenta Yehova, maana napaka eyo Yehova khonrowa onikhaliheryaka. Enamuna emosa onipaka awe eyo, ori oniiriha waanyiherya akhala wiira Yehova ni Yesu anninikhapelela. — 2 Akor. 11:14; Yak. 1:6.

2. Xeeni vari aya vooloka omuroromela Yehova ni Yesu?

² Okathi wa ekhotto, atoropa annisuwela wiira ahaana waaroromela ale anaahoolela. Akhala wiira khanaaroromela, awo khanrowa owiiwelelaka, nto eyo enimwaakumiherya mixankiho sinceene. Nave eyo pooti owiiriha wiiviwa. Mwa enamuna emosa-ru, hiyo niri ntoko atoropa masi ninwana ni “malaikha manceene ootakhala”. (Aef. 6:12) Satana onnisuwela wiira nahiya omuroromela Yehova Muluku ni Yesu Kristu, khaninrowa owiiwelelaka. Mwaha waivaavo, owo onniimananiha wiira onihiihe omuroromela wahu Yehova ni Yesu. Mwaha ola, nnooweha moota Satana aarumenle awe muraakho owo khalai ni moota onirumeela awe olelo-va. Nuumala-vo, nnooweha moota nikhanle ahu ookhootta miraakho iyo sa Satana. Mwaha onittharelana, nnooweha miraakho sikina miili sa Satana, seiyo onirumeela awe wiira onihiihe omukokhorela Yehova.a

SATANA ONNIMOOTHERYA YOHOVA NI YESU

3. Etthu xeeni Satana aamulenle awe Eva yaamwiirihale ohiya omuroromela Yehova?

³ Ohivinre okathi munceene nuumala Yehova ompattuxa Adamu ni Eva, Satana aahiwiiriha ohimwiiwelela Yehova. Satana aahinwoka Eva omwiirihaka okupali wiira Mpattuxa awe khaaphavela itthu sooloka para yena. Satana aahimukoha Eva wiira: “Ekeekhai wiira Muluku ohookhoottiheryani olya mihokorokho sa miri sootheene sa muxarti?” (Maph. 3:1-5) Satana aahimwiiriha Eva wuupuwela wiira Mpattuxa awe khanvahale itthu sootheene aapirisari awe yena ni Adamu. Masi Satana aamootha. Mooriipiha murima, Adamu ni Eva yaahipaka ele Satana aaphavela awe. Awo yaahihiya omwiiwelela Yehova, yoowo aavahale okumi ni itthu sootheene yaarina aya. — Maph. 3:6.

4. Okathi wa Yoobi, itthu xeeni soowoothiwa Satana aaphavela awe wiira Yoobi okupali?

⁴ Okhuma okathi wa Adamu ni Eva, Satana khohiyale omootherya Yehova. Mwa ntakiheryo, Satana aahaarumeela apatthani araru a Yoobi wiira amuleele itthu soohiloka voohimya sa Yehova. Satana aaphavela omukupaliha Yoobi wiira Yehova khamphenta ni khaavaha efaita ororomeleya wawe. (Yoobi 22:1-3) Nave, Satana aahimukumiherya mixankiho Yoobi, okupaliki wiira apaka eyo ammwiiriha ohiya omphenta Yehova. Nnaamwi Yoobi aakumiheriwe mixankiho iye ni Satana, owo khaahiyale ororomeleya ni okhala mpatthani a Yehova. — Yoobi 27:1, 5.

5. Satana aakhoottihenrye sai atthu omutthara Yesu? (Matheyo 11:19)

⁵ Nuumala Yesu orwa valaponi, Satana aaheererya waakhoottiherya atthu omutthara Yesu. Owo aahipaka eyo aarumeelaka ahooleli a itiini ni atthu akina wiira amootheryeke Yesu. Nto atthu anceene yaanikupali itthu iyo soowoothiwa, yaanimuhimya Yesu okhala nakrime, nuumala-vo yaahimwiiva. — Mmusome Matheyo 11:19; 27:27-31; Mar. 14:55, 56; Yoh. 8:41-45.

6-7. Satana eerenrye sai waahiiha awiixutti a Yesu olaleerya?

⁶ Nuumala Yesu okhwa, Satana aaheererya owiiriha awiixutti a Yesu ohiya olaleya itthu saamwiiranenle. Mwa ntakiheryo, Satana khaaphavela wiira apinaatamu akupaliki wiira Muluku aahimuhihimuxa Yesu. Nave Satana aahiwiiriha atthu akina wootha. Nto atthu awo yaahimya wiira awiixutti yaahiiya murutthu wa Yesu. (Math. 28:11-15) Nuumala-vo, Satana aahaaruma ahooleli a itiini ni anapoliitika, waalupattha awiixutti a Yesu. Satana uupuwela wiira eyo yanwiiriha awiixutti woova vanceene. Nave, aaphavela owiiriha ohiya muteko yaarummwale aya ni Yesu Kristu. — Mit. 7:57–8:1; 12:1-3; 28:22.

⁷ Makristau makina, yaahipacerya woova ni yaahihiya olaleerya. Masi awiixutti anceene a Yesu, khiyaahiyale ororomeleya ni waalela atthu akina itthu saamwiiranenle Yesu. Awo yaanikupali wiira nwanani aya muulupale ti Satana ni malaikha awe ootakhala. (Mit. 4:18-20; 1 Ped. 5:8) Ankhi olelo-va, miraakho xeeni Satana onirumeela awe wiira oniirihe ohiya omurumeela Yehova?

SATANA KHOHIYALE OMOOTHERYA YEHOVA NI YESU

8. Satana onirumeela sai etiini yoowootha wiira omootherye Yehova ni Yesu?

⁸ Olelo-va, Satana onniimananiha owiiriha atthu ohisuwela ekeekhai voohimya sa Yehova ni Yesu. Okhala wiira Satana “topacenrye wootha”, owo onnimootherya Yehova ni Yesu orumeelaka itiini soowootha. (Yoh. 8:44) Mwa ntakiheryo, owo onniwiiriha atthu ohisuwela ovirikana okhanle Yehova ni Yesu. (2 Akor. 4:3, 4) Nave ahooleli a itiini aniixuttiha wiira Yehova ni Yesu mutthu mmosa-ru. Atthu anceene khanisuwela wiira nsina na Muluku ti Yehova. Nto eyo enniwiiriha omukokhorela Yesu ohiya Yehova. Awo khanisuwela wiira Yehova ni Yesu khaniphavela enamuna eyo ya okokhorela. (Math. 4:10; Yoh. 4:23) Atthu anceene annikupali itthu iyo soowoothiwa, nto okathi nnaalaleerya ahu, awo khaniphavela oniwiriyana ni anninlupattha.

9. Satana onirumeela sai itiini sowootha, wiira owiirihe atthu ohisuwela nsina na Muluku? (Yeremiya 23:26, 27)

⁹ Okathi nimphavela ahu okhala mpatthani a mutthu mukina, etthu yoopacerya nimpaka ahu ori osuwela nsina nawe. Nave, wiira nikhale apatthani a Yehova, nihaana osuwela nsina nawe. Satana onnaakhoottiherya atthu osuwela nsina na Yehova, wiira awo ahikhale apatthani a Yehova. Nto okhuma khalai, Satana onnirumeela itiini soowootha wiira owiirihe atthu oliyala nsina na Muluku. (Mmusome Yeremiya 23:26, 27.) Biibiliya onihimya wiira nasuwela nsina na Muluku ni okhala mpatthani awe, nnoomuroromelaka ni onoonikhapelela. Tivonto, onniwiiriha anamataphulela akina okumiha nsina na Yehova abiibiliya anaataphulela aya. (Mir. 18:10) Nave Satana onnirumeela itiini soowootha wiira owiirihe atthu okupali wiira Muluku tonikumiherya ohaawa wahu. Mwaha waivaavo, atthu anceene annimoova Muluku ni anuupuwela wiira khivaniweryaneya okhala mpatthani awe. (Yak. 4:8) Nave-tho, Satana oniphavela onikhoottiherya omukokhorela Yehova.

10. Exeeni eniwiiriha arumeyi a Yehova onanariwa ni yena?

¹⁰ Okathi ninkhalana ahu mixankiho, Satana oniphavela wiira nuupuweleke wiira Yehova khonnithokorerya. Nave akhala wiira ninniviriha okathi munceene nihaawaka, Satana oniphavela wiira ninanariwe ni Yehova nuupuwelaka wiira khonnikhaliherya. (Mir. 19:3) Atthu anuupuwela siiso, anniikoha so: Akhala wiira Yehova khonikikhaliherya, nto xeeni kinthipelela aka otthara malamulo ni malakiheryo awe? Akhala wiira nnuupuwela siiso, eyo pooti oniiriha opaka ele Satana oniphavela awe ni ohiya omurumeela Yehova.

11. Satana onirumeela exeeni wiira oniirihe ohiroromela malamulo ni malakiheryo a Yehova? (Nwehe efootu.)

¹¹ Satana khoniphavela wiira nimuroromeleke Yehova okathi onnileela awe etthu eri yooloka ni yoohiloka. Satana onnipaka eyo omurumeelaka redes socias aahiiso interneti. Mwa ntakiheryo, redes sociais ni isaiti sikina, atthu anniveeha ele Biibiliya onihimya awe, akupaliki wiira Muluku khokhanle oonileela etthu eri yooloka ni yoohiloka. Satana yoowo ori “namalamulela a olumwenku ola” onniwiiriha atthu ohisuwela etthu eri yooloka ni yoohiloka. — Yoh. 14:30; Yes. 5:20; 1 Tim. 4:1, 2.

12. Xeeni ninreerela ahu osyaka itthu anihimya aya atthu a olumwenku ola sa ele eri yooloka ni yoohiloka?

¹² Akhala wiira nnookupaliki itthu anihimya aya atthu a olumwenku ola wa Satana sa ele eri yooloka ni yoohiloka, eyo pooti oniiriha ohiya omurumeela Yehova. Murokora mmosa oniitthaniwa Shannon,b onihimya so: “Waahikhala okathi kahaawerya aka woona wiira itthu atthu akina yaahimya aya ni iye kiixutta aka oskola saanihonona muupuwelo aka. Nto kaahipacerya osiveliwa ni itthu Yehova oninyokha awe. Kaahipacerya oviriha okathi munceene kiwehaka itthu atthu akina yaahela aya aredes sociais ni isaiti sikina. Vaavo kaawehaka itthu iyo, saanikisivela ni kaaniphavela okhala ntoko atthu awo. Kaahipacerya ohisiveliwa omukokhorela Yehova, okhala ni amusi aahiiso anna ni arokora.” Muhoolo mwaya, Shannon aahipaka marukunuxo ni aahitthikela okhala mpatthani a Yehova. Nto eyo yaahimukhaliherya ohimweemererya Satana ohonona muupuwelo awe. Nrowe niwehe etthu Shannon aapanke awe.

13. Yoowiiraneya ya Shannon eniwiixuttihani exeeni?

¹³ Shannon aahoona wiira aahaana opaka marukunuxo wiira ohihiye okhala mpatthani a Yehova ni Yesu. Owo onihimya so: “Kaahinvekela Yehova wiira okikhaliherye waaphwanya apatthani ooloka ni kaahitokosa kirumeelaka iliivuru sahu sinimutthokiherya Biibiliya. Eviitiyu eni: Os Jovens Perguntam — Como Fazer Verdadeiros Amigos?, yaahikikhaliherya vanceene.c Murokora onooniheriwa nviitiyuni aahikhalana mixankiho ntoko kaarina aka. Masi moowiiyeviha owo aahaavekela anamuyari awe wiira amukhaliherye. Nto kaahithanla otthara ntakiheryo nawe. Anamuyari aka, axitokweene a mmulokoni ni arokora akina arina waamini woolipa, yaahikikhaliherya onyokha itthu Yehova oninyokha awe ni waathanla apatthani animphenta yena. Nto kaahiixutta wiira omurumeela Yehova khahiyo paahi orowela mithukumano ni waasiveliha anamuyari aka. Kaahaana okhalana ompatthani woolipa ni Yehova ni osuwela nthowa naya kinikupali aka itthu Yehova onikileela awe mbiibiliyani.”

MUKUPALIKI WIIRA YEHOVA NI YESU ANNOOPHENTANI VANCEENE

14. Ninrowa owerya sai ohimweemererya Satana ohonona omwaamini wahu Yehova? (Nwehe efootu.)

¹⁴ Wiira nihihiye okhala mpatthani a Yehova, nihaana waathanla mwa miruku apatthani ahu. (Yak. 4:4) Nave nihaana osyaka okupali khula etthu ninsoma ahu aahiiso nniiwa ahu elavuliwaka ni atthu a olumwenku ola. Mwa ntakiheryo, hiyo pooti osoma aahiiso wiiwa itthu sa ethiru aahiiso sinikhala ntoko wiira ti seekeekhai. Akhala wiira nnoohela vamurimani itthu iyo, nnoopacerya okupali itthu soowoothiwa. Masi hiyo khaninrowa owokiwa ni Satana, akhala wiira khula nihiku nnoomusomaka Biibiliya, iliivuru sinimutthokiherya Biibiliya, orowela mithukumano ni waapaka apatthani anna ni arokora arina waamini woolipa. Akhala wiira nnoosuwela oratteene ele Biibiliya oniixuttiha awe, nnoosyaka soohimmwa sa ethiru ni khaninrowa omweemererya Satana ohonona omwaamini wahu Yehova. — Mir. 13:20; Mit. 17:11.

15. Ninrowa olipiha sai okupali wahu wiira Yehova ni Yesu anniniphenta?

¹⁵ Akhala wiira nnoomusomaka Biibiliya ni ephoole ni omusuwela oratteene Yehova ni Yesu, nnookupaliki wiira awo aniphavela wiira nihakalaleke. (Mir. 22:19) Biibiliya onnaalavula alopwana ni athiyana, yaawo yaamuroromela Yehova ni Yesu. Nto okathi nnuupuwelela ahu moota Yehova ni Yesu yaakhapelela aya, omwaamini wahu onrowa otepaka olipa. Mbiibiliyani sookhala soolepa sinceene sinooniherya wiira Yehova ni Yesu anniniphenta. Biibiliya onihimya wiira Yehova onnaaphenta apinaatamu ovikana moota maama onimphenta awe mwanawe onaamwa. (Yes. 49:15) Nave onihimya wiira Yehova onnaavaha efaita yinceene atthu ale anittittimiha nsina nawe. (Mal. 3:16, 17.) Mbiibiliyani ninniphwanya etthu Yesu aalavunle awe. Owo aahimyale wiira onniniphenta vanceene mpakha ovaha okumi awe wiira noopowe. — Yoh. 15:12, 13.

16. Xeeni vari aya vooloka wuupuwela moota Yehova onikhalihenrye awe ni aakhalihenrye awe atthu akina khalai? (Esaalimu 118:5, 6)

¹⁶ Wuupuwelela moota Yehova ni Yesu anikhalihenrye aya mookumini mwahu, eyo enoonikhaliherya okupali wiira awo anniniphenta. Woonasa wene, hiyo pooti wuupuwelaka okathi nanvekenle ahu Yehova aakhula nivekelo nahu ni aanikhaliherye awe ovilela muxankiho ahu. Nto vaavo nnuupuwela ahu moota Yehova aanikhalihenrye awe, eyo enninikupaliha wiira yena khonrowa ohiya onikhapelela. Nave hiyo pooti waakoha anna ni arokora wiira anileele moota Yehova aakhalihenrye awe. (Mir. 22:17) Nto akhala wiira nnoopaka eyo, nnoolipiha okupali wahu wiira hata siniphwanyaka mixankiho, Yehova ni Yesu khanrowa ohiya onikhaliherya. — Musome Esaalimu 118:5, 6.

17. Moovarihana ni Yohani 10:29, Yesu aaleihenrye exeeni ale ahinihiya omphenta yena ni Tiithi awe?

¹⁷ Ootheene ahu nimphavela okhala apatthani a Yehova Muluku ni Yesu Kristu. Masi okhala wiira Satana ni malaikha awe ootakhala nlelo khanatthi opwetexiwa, hiyo nihaana okhootta miraakho saya, seiyo sikhanle ooniiriha ohiya omuroromela Yehova ni Yesu. (Wis. 20:1-3, 10) Nto naaphavelaka okhootta miraakho sa Satana, nihaana ohihiya olipiha ompatthani ahu ni Yehova ni okupali wiira yena ni Mwanawe anniniphenta ni anninivaha efaita. Yesu ooleiherya wiira Yehova khonrowa ohiya onikhapelela ni khiivo etthu ekina ekhanle oomwiiriha ohiya opaka eyo. — Mmusome Yohani 10:29; Yak. 4:7.

18. Exeeni ninrowa ahu othokorerya mwaha onittharelana?

¹⁸ Mwaha onittharelana, nnoorowa wiixutta miraakho sikina miili Satana onirumeela awe wiira ohonone ompatthani ahu ni Yehova. Satana khoniphavela wiira nikhalane waataana wooloka ni anna ni arokora. Nave onniwiiriha atthu akina onilupattha. Nave nnoorowa othokorerya etthu enrowa onikhaliherya ohihiya omuroromela Yehova nnaamwi Satana ophavelaka onihiiha.