Moota woohihiya okhala mpatthani a anna ni arokora

1. Ninrowa waaphwanya woowi apatthani eekeekhai?

MAHIKU ALA ookiserya, itthu sinootepa oxankiha. Masi itthu sinnitepa oxankiha, vakhala wiira khanirina apatthani. Yehova onnisuwela eyo. Tivonto, onninivaha eparakha yookhalana apatthani eekeekhai mmutthenkesoni mwawe. (Esal. 119:63) Hiyo, nniirela mpantta emusi ya olumwenku wootheene, yeeyo enimukokhorela Yehova ni eniphentana mukina ni mukhwaawe.

2. Opatthani xeeni nimphavela ahu okhalana ni anna ni arokora?

² Hiyo ninniphavela waasuwela oratteene anna ni arokora. Nave nimphavela okhalana opatthani weekeekhai ni woororomeleya ni anna ni arokora. Hiyo, nniirela mpantta emusi ya olumwenku wootheene enimphenta Yehova ni Yesu. Nto ophenta iwo, onniniiriha okhala oowiiraana. (Yoh. 13:35) Masi ompatthani ahu ni anna ni arokora, khonikhumela mahala ene. Nto nihaana wiimananiha vanceene wiira nikhale apatthani eekeekhai. Mwaha wookhala atthu oottheka, ikwaha sikina pooti okhumelelaka itthu sikhanle ooniiriha ohiya okhala apatthani a anna ni arokora.

3. Xeeni vanixankiha aya okhala mpatthani a anna ni arokora?

³ Ohimya ekeekhai, hiyo pooti opatthana ni anna ni arokora akina, masi akina ahikhala apatthani ahu. Eyo eniiraneya mwaha wa xeeni? Eyo enniiraneya, akhala wiira nrina soophavela simosa-ru aahiiso nnuupuwela ni nimpaka itthu mwa enamuna emosa-ru. Woonasa wene, pooti wiira mmulokoni aakhala anna ni arokora vanixankiha okhala apatthani ahu. Ikwaha sikina, pooti ohiiwanana ni munna aahiiso murokora, mwaha waivaavo vanaxankiha omphenta munna aahiiso murokora owo. Pooti wiira moota nnuupuwela ahu ni nimpaka ahu itthu ti woovirikana ni munna aahiiso murokora owo, nto nihinaphavela okhala hoothe ni yena. Nave akhala wiira munna aahiiso murokora onnixanka wala owereiwa, eyo pooti oniiriha omala-maliha opatthani ahu. Mwaha ola, ninrowa oweha moota ntakiheryo na Yesu ninnikhaliherya aya ohihiya okhala apatthani a anna ni arokora, hata okathi wa mixankiho. Masi ninrowa opacerya oweha moota okhalana mikhalelo sa ekristau, sinrowa aya onikhaliherya ohihiya okhala mpatthani a anna ni arokora.

MIKHALELO SA EKRISTAU SINNINIKHALIHERYA OHIHIYA OKHALA APATTHANI

4. Ninrowa olipiha sai ompatthani nirina ahu ni anna ni arokora?

⁴ Wiira nilipihe ompatthani nirina ahu ni anna ni arokora, nihaana waavya mikhalelo sooreera arina aya. Oviriha okathi niri ene ni anna ni arokora, onoonikhaliherya woona mikhalelo sooreera arina aya. Murummwa Paulo, aaniphavela vanceene okhala ni anna ni arokora. Ti etthu yaamwiirihale waalepela anna a oTesaloonika wiira: “Naahiimananiha vanceene wiira nirwe wooxukuryani.” (1 Ates. 2:17) Anna ni arokora anceene, ahoona wiira etthu enaakhaliherya olipiha ompatthani aya, oviriha okathi ari ene hoothe avaanelaka. Sookhala inamuna sinceene sinnikhaliherya okhala hoothe, ntoko okathi ninlaleerya ahu, ninrowela ahu mithukumano sa mmulokoni, waasempeleeyani ni okonkereesuni. Masi hiyo pooti wuupuwelaka wiira okhala ni anna ni arokora paahi, khonikhoottiherya okhumelela itthu sikhanle oohonona opatthani.

5. Exeeni enrowa onikhaliherya ohimaliha ompatthani nirina ahu ni anna ni arokora, okathi wa mixankiho? Nvahe ntakiheryo. (Akolosi 3:12)

⁵ Okhalana mikhalelo sa ekristau, pooti onikhaliherya ovilela wiira nihimalihe opatthani nirina ahu ni anna ni arokora, okathi wa mixankiho. (Mmusome Akolosi 3:12.) Akhala wiira nnookhalana mikhalelo ntoko wiiyeviha, opixa murima, oreera murima ni othunku, nnoowerya oxintta itthu siniphavela ohonona ompatthani ahu. Mwa ntakiheryo, ntoko siisaale ooleyo onikhaliherya awe mutooro wa kaaro weetta saana, mwa enamuna emosa-ru, mikhalelo sa ekristau sinoonikhaliherya okhala saana ni anna ni arokora. Vano, nrowe niwehe mixankiho miraru sikhanle ooniiriha omaliha ompatthani nirina ahu ni anna ni arokora. Khula muxankiho, nnoowehaka moota otakiha mikhalelo Yesu oonihenrye awe ntoko wiiyeviha, opixa murima, oreera murima ni othunku, sinrowa aya onikhaliherya ohihiya okhalana opatthani weekeekhai.

OKATHI MUHINIIWANANA ANYU NI MUNNA AAHIISO MUROKORA

6. Moota xeeni ohiiwanana okhanle aya oohonona opatthani?

⁶ Xeeni vanixankiha aya? Okathi atthu anli ahiniiwanana aya, khula mmosa onuupuwela wiira moonelo awe tokhanle saana. Nkawuupuwelani anna anli, yaawo ahiniiwanana sa moota woolokiherya ekurupu ya muteko woolaleerya. Khula munna onuupuwela wiira moonelo awe, ti wootepa oreera ovikana moonelo wa mukhwaawe. Nnaamwi muxankiho owo ori ene mwaamukhaani, ohiiwanana waya pooti wiiriha muxankiho owo wunnuwa mpakha ophavelaka ohiya okhala apatthani. Wiixinnuwiha, pooti omwiiriha khula mmosa wuupuwelaka wiira moonelo awe ori saana, ohiya ophavela okhapelela ompatthani arina aya. Akhala wiira khanivaanela mwaha owo wiira akhalane moonelo mmosa-ru, khula mmosa pooti opaceryaka opweha mathowa vamurimani. Vakhaani-vakhaani, pooti owiiriha ohiphavelana ni ohiya okhala apatthani. Masi itthu sootheene sipacenrye ni muxankiho mwaamukhaani paahi.

7. Wiira axintte ohiiwanana, Yesu aapanke exeeni wiira aakhaliherye awiixutti awe okhala oowiiyeviha?

⁷ Mwiixutte etthu ni wiiyeviha wa Yesu. Yesu aahaaleela awiixutti awe wiira para ophuka muxankiho wa ohiiwanana, awo yaahaana okhala oowiiyeviha. Awiixutti yaaninyakulihana ikwaha sinceene, aphavelaka omusuwela ti pani aari muulupale eriyari aya. Mwaha ola, waahikhalana efaita yinceene para awiixutti. Tivonto, wiira aakhaliherye oturuka muupuwelo aya, Yesu aahaaleela wiira yaahaana waaweha atthu akina okhala aalupale waavikana awo. (Math. 20:​25-28) Mweekeekhai, Yesu aawiixuttiha moota wookhala atthu oowiiyeviha. Ohiyu wookiserya Yesu ohinatthi wiiviwa, aahaavaha “nthoonyeryo”, okhala wiira moowiiyeviha aahirapiha inawu sa awiixutti awe, muteko yoowo okhala wene waavariwa ni ipottha. (Yoh. 13:​3-5, 12-16) Mwaha woopaka eyo, Yesu aahooniherya moota awiixutti ale yaakhanle aya ookhapelela ompatthani aya. Akhala wiira yaamwaathokoreryaka atthu akina okhala aalupale waavikana awo, eyo yaamwaakhaliheryaka weemererya miyoonelo sa atthu akina. Nto eyo, yaamwaakhaliherya ohihiya okhala apatthani eekeekhai, hata arina ene miyoonelo soovirikana.

8. Wiiyeviha onrowa wookhaliheryani sai ohihiya waataana ni anna ni arokora, okathi muhiniiwanana anyu? (Akolosi 3:13) (Nwehe ifootu.)

⁸ Moota woohihiya okhala apatthani. Wiiyeviha, pooti wookhaliheryani ohiwehexexa ifaalya saamukhaani sa atthu akina ni ophavela waalevelela ni murima wootheene. (Mmusome Akolosi 3:13.) Wiiyeviha, pooti wookhaliheryani ohinanariwa okathi muhiniiwanana anyu ni munna aahiiso murokora. Nto eyo, enimookhaliheryani ohihiya okhala apatthani. (Esal. 4:4) Hata mutthu owo olavunle ene etthu yoohiloka, muhiliyale wiira ootheene ahu ninnihimya itthu muhoolo mwaya nnathanana. (Mus. 7:​21, 22) Mwiikoheke so: Etthu ya faita para miyo othipelela wooniherya wiira moonelo aka tori saana aahiiso okhapelela opatthani kirina aka ni munna wala murokora? Nto nyuwo, pooti othanla weemererya moonelo wa atthu akina. Mwathanla ohitthikela olavula mwaha owo muhoolo, eyo enookhaliherya muupuwelo anyu okhala woomaaleleya.

9. Wiiyeviha onrowa wookhaliheryani sai okathi muhiniiwanana anyu? (Miruku 17:9)

⁹ Wiiyeviha onimookhaliheryani ohihiya okhala mpatthani a anna ni arokora, hata okathi muhiniiwanana anyu. Khonipirisari ohimya itthu sinceene mphavelaka wooniherya wiira moonelo anyu tori saana. (Musome Miruku 17:9; 1 Akor. 6:7) Muhiliyale wiira etthu erina efaita, ori ohihiya okhala apatthani a anna ni arokora. Anna ni arokora anceene, aawerya ophuka muxankiho aya, okhala wiira mooreerela murima aalavula ni munna aahiiso murokora owo. (Esal. 34:14) Nyuwo pooti ohimya so: Hiyo na apatthani okhuma khalai. Munoonela sai ovaanela muxankiho ahu ola? Mweemereryeke wiira moohimya etthu ekumihenrye ohiiwanana. Nave okathi munivaanela anyu ni mutthu owo, mmuleeleke wiira munnoona wiira yookhala etthu ehimusivenle. Nuumala-vo, munvekeleke wiira ooleveleleni. Akhala wiira munna aahiiso murokora onnivekela wiira mmulevelele, moowiiyeviha mmuleveleleke. (Luka 17:​3, 4) Muhiliyale wiira etthu muniphavela anyu, khahiyo wooniherya tuuvi ofalyanri aahiiso ohifalyanri, masi muniphavela omaliha ohiiwanana wiira muhihiye okhala apatthani. — Mir. 18:24.

OKATHI MUNIKHALANA ANYU MIYOONELO SOOVIRIKANA

10. Xeeni ikwaha sikina vanixankiha aya okhapelela opatthani?

¹⁰ Xeeni vanixankiha aya? Vannixankiha ohihiya okhala apatthani a anna ni arokora, akhala wiira nrina miyoonelo soovirikana. Pooti wiira anna ni arokora akina aakhalana mikhalelo aahiiso soolema sinninyoonya. Atthu akina, pooti opakaka itthu mwa enamuna nihilimalenle ahu, mwaha wa ekultuura aya aahiiso mwaha woowi khalai khiyaathokoreriwa saana. Nave atthu akina toomaala, masi akina toolavula vanceene. Pooti wiira hiyo noovirikana ni atthu awo, okhala wiira onisivela okhala opuro ari atthu anceene, variki awo khonaasivela okhala opuro ari atthu anceene.

11. Yesu aawenrye sai ohihiya okhala mpatthani ni atthu yaale yaarina moonelo woovirikana ni wawawe?

¹¹ Mwiixutte etthu ni opixa murima wa Yesu. Yesu khaahiyale okhala mpatthani a atthu yaale yaarina moonelo woovirikana ni wawawe. Mwa ntakiheryo, murummwa Yakobo ni Yohani, yaahooniherya wiixinnuwiha, okathi yaavekenle aya wiira mukina okhale moono woolopwana, mukina okhale moono woothiyana, moomweneni. (Mar. 10:​35-37) Moovirikana ni muupuwelo owo, moowiiyeviha Yesu aahihiya opuro awe wiirimu orwa okhala pinaatamu valaponi. (Afil. 2:​5-8) Nrowe nuupuwelele miyoonelo iya miili. Moonelo wa awiixutti ni wa Yesu waahivirikana vanceene. Hata vari siiso, Yesu aahimpixerya murima Yakobo ni Yohani ni atthu akina.

12. Etthu xeeni yaamukhalihenrye Yesu waapixerya murima awiixutti awe?

¹² Yesu khaalipelela wiira okathi wootheene awiixutti awe yaarowa okhalanaka moonelo wooloka. Aahisuwela wiira mukhalelo ole wa ophavela oxinttana khahiyo aarina Yakobo ni Yohani paahi, masi awiixutti akina yaahikhalana. (Mar. 9:34) Yesu annuwale ni atthu yaakhala muttetthe ole, yaawo yaarina mukhalelo ole. Okathi ole, ahooleli a itiini yaatumererya atthu ophavela ovuwa ni okhulupale. Yesu aanisuwela muupuwelo awiixutti ale yaarina aya. Tivonto, aanaapixerya murima awiixutti ale. Nto khaalipelela wiira yaamuturuka moowaakuveya, okhala wiira yaahikhalana mukhalelo ole wa wiixinnuwiha mwa iyaakha sinceene. — Mar. 10:​42-45.

13. Opixa murima, onrowa onikhaliherya sai ohihiya okhala apatthani? (Aefeso 4:2)

¹³ Moota woohihiya okhala apatthani. Muhihiye okhala oopixa murima, maana eyo enimookhaliheryani weemererya mikhalelo ni soolema sihinoosivelani sa anna ni arokora. (Mir. 14:29) Ootheene ahu, nookhalana mikhalelo aahiiso soolema sihikhanle sootthekeya, masi sikhanle oowaananara atthu akina. Nto ninnixukhurela vaavo atthu akina anivilela aya aahiiso aneemererya aya mikhalelo sahu iyo. (Mmusome Aefeso 4:2.) Nave hiyo, nihaana weemererya mukhalelo wa atthu akina. Mwa ntakiheryo, ti vooxankiha mutthu oowuuliwa muru oviriha okathi ovaanelaka ni atthu akina. Nave nihaana ompixerya murima, mutthu yoole okathi wootheene oniphavela okhala ni atthu akina ni oolavulasa. Nihilipeleleke wiira ninrowa okhala mpatthani a khula munna aahiiso murokora. Masi nikupaliki wiira hata makristau arina ene mikhalelo soovirikana, awo anoowerya ovara hoothe moowiiraana amurumeelaka Yehova.

14. Opixa murima, onrowa onikhaliherya sai?

¹⁴ Opixa murima, onoonikhaliherya oweha mikhalelo sooloka arina aya anna ni arokora. Niira siiso, eyo enoonikhaliherya ohiwehexexa mikhalelo soohiloka seiyo sikhanle ooniiriha omala-maliha opatthani nirina ahu. Mwa ntakiheryo, Yakobo ni Yohani, mwaha wa nrima yaahiphavela okhulupale. Masi yooveka aya, yaahooniherya wiira yaanikupali wiira Omwene etthu yeekeekhai. Nto Yesu aahiweha eyo ni aahisuwela wiira yaahikhalana waamini. Okathi ninweha ahu mikhalelo sooloka sa anna ni arokora, ninnimutakiha Yesu ni Tiithi awe, Yehova.

15. Exeeni enrowa onikhaliherya ohihiya okhala apatthani ni atthu nrina ahu mikhalelo soovirikana?

¹⁵ Etthu yootepexa okhalana efaita, okhala wiira nnoowerya onvekela Yehova wiira onikhaliherye ohihiya okhala apatthani ni atthu yaale arina mikhalelo soovirikana ni sawihu. Muupuweleke itthu sikhanle oowiirihani omala-maliha opatthani murina anyu ni mutthu owo ni munvekeleke Yehova wiira ookhalihenryeni okhala oomaaleleya. Muhiliyale wiira Yehova, yoowo ori Mpattuxa ahu, onnisuwela wiira khula mmosa a hiyo toovirikana ni mukhwaawe. Nto okathi muninvekela anyu, mukupaliki wiira Yehova onnisuwela etthu munipirisari anyu wiira muhihiye ovilela. Tivonto, okathi opixa wanyu murima oneehereriwa aya, munvekeleke Yehova ikuru sawe soowaarya wiira sookhaliheryeni osuwela etthu yoopaka. — Luka 11:13; Akal. 5:​22, 23.

OKATHI ANNA NI AROKORA ANIHAAWA AYA

16. Etthu xeeni ekhanle oowiiraneya okathi anna ni arokora anihaawa aya?

¹⁶ Xeeni vanixankiha aya? Okathi anna ni arokora anihaawa aya aahiiso oxanka, pooti olavula aahiiso opaka etthu enrowa oniiriha oriipiwa murima. Mwa ntakiheryo, awo pooti ohiphavelaka olavula ni hiyo aahiiso pooti opaka wala olavula etthu nahaalipelela ahu. Woonasa wene, pooti ohimyaka etthu enrowa oniwereya. (Yoobi 6:​2, 3) Okhala wiira khaninsuwela mixankiho sinaaphwanya anna ni arokora, hiyo pooti olipelelaka wiira anoopaka itthu sinceene variki ahiweryaka.

17. Moota Yesu aamuthokorenrye awe Baritimeyo, oniwiixuttihani exeeni?

¹⁷ Onniixuttiha exeeni, oreera murima ni othunku Yesu aarina awe? Yesu aanaareerela murima ni owoonela othunku atthu yaahaawa hata yaale ahaasuwela awe. Mwa ntakiheryo, nwehe moota aamuthokorenrye awe mulopwana ahoona iihaniwa Baritimeyo. Okathi Baritimeyo iiwale awe wiira Yesu anvira opuro ole waari awe, owo aahipacerya okhuwela wiira Yesu iiwe. Atthu akina yaari muttitthi ole yaahimwiirela Baritimeyo wiira omaale. Masi Baritimeyo aamutepa okhuwela, mwaha woowi aaphavela wiira Yesu iiwe ni ompenuxe. Atthu akina yaari muttitthi ole, yaahinanariwa ni etthu Baritimeyo aapanke awe. Masi Yesu, “aahimoriwa ikharari”. Nuulumo nla, nnooniherya wiira aahimoonela othunku vanceene Baritimeyo. (Math. 20:34; Mar. 10:​46-52) Yesu aahilavula mooreera murima ni Baritimeyo, maana aahoona waamini wawe. Tivonto, mwa mwiiriirya Yesu aahimwiiriha Baritimeyo opacerya woona.

18. Munrowa omukhaliherya sai munna aahiiso murokora onihaawa? (1 Atesaloonika 5:14)

¹⁸ Moota woohihiya okhala mpatthani a anna ni arokora. Mukhaleke mutthu ooreera murima ni oniwoonela othunku atthu akina. Nakhalana mikhalelo iya sooreera, sinoonikhaliherya waalipiha anna ni arokora, yaawo anihaawa aahiiso axankale. (Mmusome 1 Atesaloonika 5:14.) Muhiliyale wiira apatthani eekeekhai, ti yaale anikhaliheryana, otepexa wene “okathi wa mixankiho.” (Mir. 17:17) Mpatthani eekeekhai khonimoonela othunku paahi munna ni murokora onihaawa, masi-tho, onnipaka sootheene oniwerya awe wiira omukhaliherye, omulipihe ni onvahe itthu onipirisari awe.

19. Itthu xeeni sikina nikhanle ahu oopaka sinrowa wooniherya wiira ninnaareerela murima ni owoonela othunku anna ni arokora? (Nwehe ifootu.)

¹⁹ Itthu xeeni sikina nikhanle ahu oopaka, sinrowa wooniherya wiira ninnaareerela murima ni owoonela othunku anna ni arokora? Ekeekhai wiira khaninrowa owerya waapenuxa anna ni arokora aniwereiwa. Masi hiyo pooti omananiha mpakha vaniwerya ahu wiira nisuwele mixankiho sinaaphwanya. (Math. 7:12; 1 Ped. 3:8) Nnoowerya opaka eyo, akhala wiira nnimwaawiriyanaka ni ephoole okathi annileela aya mixankiho saya. Vaareerelaka, pooti weererya olavula moolumo akhanle oowaalipiha. (Mir. 12:25) Muhuupuweleke wiira munnisuwela itthu sootheene sinaaxankiha, variki muhisuwelaka. (Mir. 18:13) Mweererye waapixerya murima ni muhilipeleleke wiira anoopaka itthu sinceene variki ahiweryaka. — Aef. 4:32.

20. Tiivi enireerela okhala yoolakela ahu?

²⁰ Ootheene ahu, ninnivaha efaita opatthani weekeekhai nirina ahu ni anna ni arokora. Masi nihiliyale wiira mwaha wa okhala atthu oottheka, ikwaha sikina ninnipaka itthu nahaaphavela ahu. Akina a hiyo, ninnipaka aahiiso olavula itthu soohiloka mwaha wa itthu siniiranenle mookumini mwahu. Hata vari siiso, ninnaaxukhurela vanceene anna ni arokora, yaawo ahinihiya okhala apatthani ahu yooniheryaka okhala oowiiyeviha, oopixa murima, ooreera murima ni a othunku. Nto ootheene ahu, nrowe niimananihe owooniherya mikhalelo iya anna ni arokora.