Moota woohihiya okhala oororomeleya okathi wa mixankiho

1-2. Okathi Yesu iixuttiha awe oKafarnawu, etthu xeeni yiiraneyale?

NIHIKU nimosa, Yesu aawiixuttiha atthu oKafarnawu. Owo aahimmye wiira: “Mwaahikhuure-ru erutthu ya Mwaana a Mutthu, ni mwaahiwurye-ru ephome awe, khamunrowa ophwanya okumi.” Nave aahihimya-tho wiira: “Ole onikhuura erutthu aka ni oniwurya ephome aka, onoophwanya okumi woohimala, nave miyo kinrowa omuhihimuxa nihiku nookiserya.” (Yoh. 6:​53, 54) Awiixutti anceene a Yesu khiyaasiveliwe ni moolumo ale. Awo yaahimmye wiira: “Moolumo ala toovila otthara. Ti pani oniwerya owiriyana?” — Yoh. 6:60.

² Atthu ale yahaasiveliwe ni moolumo a Yesu, yaahihiya omutthara. Niireke yaapanke eyo mwaha woowi khiyaamwaamini Yesu? Khahiyo ti siiso, okhala wiira ohinatthi Yesu olavula moolumo ale yahaasivenle, atthu akina waahela muhina awiixutti awe, yaahisiveliwa ni etthu Yesu aapanke awe, mpakha ohimya wiira: “Tthiri ola Profeta aakela orwa moolumwenkuni.” (Yoh. 6:14) Tivonto, moolumo ala annooniherya wiira awiixutti ale yaanimwaamini Yesu. Masi okathi waamini waya weehereriwe aya, awo yaahihiya omuroromela Yesu.

3. Arummwa yoonenle sai moolumo a Yesu, ni mwaha wa xeeni? (Nwehe eteseenyu.)

³ Masi arummwa a Yesu khiyaahiyale omuroromela. Okathi Yesu aakohale awe arummwa akhala wiira yaaniphavela orowa, Pedru aakhunle so: “Pwiya, ninrowa omutthara pani? Ti nyuwo murina moolumo a okumi woohimala. Hiyo nookupali ni noosuwela wiira nyuwo mwa murumeyi Oowaarya a Muluku.” (Yoh. 6:​68, 69) Moone wiira Pedru khaahimyale wiira yena ni arummwa akina yaahiiwexexa ele Yesu aahimyale awe oriki: Nyuwo muhaana okhuura erutthu aka ni owurya ephome aka. Masi hata yahiiwexenxe moolumo a Yesu, awo khiyaahiyale omuroromela. Mwaha wa xeeni? Mwaha woowi yaanikupali wiira Yesu, aari “Kristu a Muluku.” — Luka 9:​20, 35.

4. Itthu xeeni sikhanle ooweehererya omuroromela wahu Yehova?

⁴ Omuroromela wahu Yehova pooti weehereriwaka mwa inamuna soovirikana. Mwa ntakiheryo, enamuna emosa, okathi yoole mutthenkeso onilokiherya aya moota nniiwexexa ahu eversiikulu emosa ya mbiibiliyani aahiiso onilokiherya aya moota ninlaleya ahu ihapari sooreera. Enamuna ekina, okathi yoole onikhumelela aya muxankiho nnaikoha etthu emwiirihale Yehova weemererya muxankiho owo onikhumelela. Enamuna ekina, okathi yoole munna aahiiso murokora onnipakela awe etthu yoohiloka aahiiso okathi mutthu mukina nimmuttittimiha ahu ohinnithokorerya awe saana.

5. Nvahe ntakiheryo nnooniherya wiira waamini wahu ohaana okhala woolipa. (Akolosi 1:23)

⁵ Wiira nihihiye omuroromela Yehova okathi wa mixankiho, nihaana okhalana waamini woolipa. Mwa ntakiheryo, waamini wahu pooti olikanyihiwa ni mwiri. Akhala wiira mwiri owo waaliwe etthaya yoohilipa ni mitathaari saya khasironwe vathi, epheyo yuulupale pooti ophela mwiri owo. Mwa enamuna emosa-ru, akhala wiira waamini wahu khahiyo woolipa, okathi sinniphwanya aya mixankiho ntoko siromoliwe ettima evinre, iyo pooti oniiriha ohiya omuroromela Yehova. Tivonto, nihaana olipiha waamini wahu wiira nihihiye omurumeela Yehova okathi sinnikhumelela aya mixankiho. — 1 Akor. 15:58; mmusome Akolosi 1:23.

6. Exeeni yaakhalihenrye arummwa ohihiya omuroromela Yesu?

⁶ Etthu xeeni yaakhalihenrye arummwa ohihiya omuroromela Yesu, okathi atthu akina yaamuhiyale aya? Arummwa yaanikupali ni murima wootheene wiira yaahaana omukokhorela Yehova, okhala wiira topanke itthu sootheene. Nave yaanikupali wiira Yesu, Mwaana a Muluku ni yamwiiwelela vale, yaarowa ophwanya okumi woohimala. Nto yaanisuwela wiira Yehova aanisiveliwa ni etthu Yesu aavara awe. Masi ohiya othokorerya paahi itthu sineehererya waamini wahu, vano nrowe niixutte ikeekhai tthaaru, sinrowa onikhaliherya ohihiya omuroromela Yehova, okathi waamini wahu oneehereriwa aya. Ikeekhai iyo tiiya: 1) Yehova topattunxe itthu sootheene. 2) Yehova tori mwaneene Biibiliya. 3) Yehova tonikhaliherya mutthenkeso awe olelo-va. Nto akhala wiira ninniroromela ikeekhai iya ni murima ahu wootheene, khaninrowa ohiya omuroromela Yehova okathi waamini wahu oneehereriwa aya.

YEHOVA TOPATTUNXE ITTHU SOOTHEENE

7. Wiisuupulula 4:11 onihimya exeeni voohimya sa Yehova, nave eyo ennikhaliherya sai okathi onihaawa ahu?

⁷ Mmusome Wiisuupulula 4:11. Yoolepa ela, ennooniherya wiira Yehova topattunxe itthu sootheene. Nla nthowa nuulupale ninniiriha omukokhorela Yehova. Nave wuupuwelela owerya orina awe, eyo enniniiriha okupali wiira onoonikhaliheryaka okathi sinniphwanya aya mixankiho. Masi, Satana oosariha olumwenku ola itthu soowoothiwa, seiyo siniwiiriha atthu anceene waanyiherya akhala wiira Muluku ookhala. Masientista makina, anihimya wiira itthu siri moolumwenkuni sikhumenle mekhaya. Nto ti va faita okupali wiira Yehova ti Mpattuxa ni onniniphenta. Mwaha wa xeeni? Mwaha woowi okathi sinniphwanya aya mixankiho, khaninrowa waanyiherya vakhala wiira Yehova tori Mpattuxa ni onoorowa onikhaliherya. — Ahep. 11:6.

8-9. Exeeni mukhanle anyu oopaka, mwapacerya waanyiherya wiira Yehova ti Mpattuxa? (Nwehe efootu.)

⁸ Mwapacerya waanyiherya akhala wiira ookhala Mpattuxa, muhaana opaka etthu moowaakuveya. Musome iliivuru sahu sinimutthokiherya Biibiliya, wiira mphwanye myaha sinooniherya oreera waya okupali wiira Yehova topattunxe itthu sootheene. Nave, nyuwo pooti wiixutta itthu sinceene sinrowa olipiha waamini wanyu iproxuura sini: Será Que a Vida Teve Um Criador? ni A Origem da Vida — Cinco Perguntas Que Merecem Resposta. Nave-tho, nyuwo pooti oweha mpantta oni: Será Que Houve Um Projeto?, ori esaiti jw.org. Murokora mmosa mwali oniitthaniwa Jessica, onikhala wEstados Unidos, onihimya so: “Nuumala osoma eproxuura eni: Será Que a Vida Teve Um Criador?, itthu kiixuntte aka saahikikhaliherya okupali wiira ookhala Mpattuxa. Ekeekhai wiira kaanisuwela, masi nuumala osoma eproxuura ele, kaahimaliha itthu sootheene kaanyiherya aka.” Atthu anceene ahiixutta itthu sinceene saakhalihenrye siri eliivuru eni: Existe um Criador Que Se Importa com Você? Woonasa wene, nyuwo mootoko osoma iliivuru aahiiso iproxuura iya. Masi munoonela sai otthikela-tho osoma?

⁹ Yoosoma anyu ya Biibiliya enittharelana, muthokorerye itthu sinooniherya wiira Muluku ookhala. Osoma myaha iyo, khonrowa wookhaliheryani olipiha waamini wanyu paahi wiira Muluku ookhala, masi onimookhaliheryani osuwela saana mikhalelo sawe. (Arom. 1:20) Nave munoowerya orumeela itthu munrowa anyu wiixutta, wiira mwaakhaliherye atthu akina yaawo anaanyiherya wiira Muluku ookhala. Nave sookhala itthu sinceene Muluku opattunxe awe sinnikupaliha wiira ookhala.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

YEHOVA TORI MWANEENE BIIBILIYA

10. Xeeni Biibiliya ori awe eliivuru erina efaita yuulupale? (2 Timootheyo 3:​16, 17)

¹⁰ Mmusome 2 Timootheyo 3:​16, 17. Biibiliya, eliivuru erina masu a Yehova para apinaatamu. Biibiliya onnaakhula makoho arina efaita yuulupale ntoko ala: Okumi opacenrye sai? Xeeni nipattuxiwe ahu? Nave Yehova oniphavela wiira nipakeke exeeni? Hiyo ninnikupali wiira Yehova tori mwaneene Biibiliya. Tivonto, okupali eyo enniniiriha woona wiira Biibiliya eliivuru erina efaita yuulupale mookumini mwahu. Nto nimphavela wiiwexexa etthu ninsoma ahu ni wiimananiha wiiwelela itthu nniixutta ahu mbiibiliyani.

11. Etthu xeeni enookupalihani wiira Biibiliya okumiheriwe ni Muluku?

¹¹ Etthu xeeni ennikupaliha wiira Biibiliya okumiheriwe ni Muluku? Sookhala itthu sinceene sinnikupaliha. Mwa ntakiheryo, itthu sootheene Biibiliya onihimya awe ti seekeekhai ni sinniiraneya. (Luka 3:​1, 2) Nave okathi onilavula awe itthu siri moolumwenkuni, Biibiliya onihimya ekeekhai. (Yoobi 26:7) Nnaamwi Satana eerenrye ene ikwaha sinceene ommala-maliha Biibiliya, masi khoreere okaiwa olumwenku wootheene. Biibiliya olempwale ni alopwana 40 ni soovira iyaakha 1 600 olempwaka. Hata vari siiso, moolumo awo alempwale ni alopwana oovirikana, annivarihana. Nnaamwi Biibiliya olempwale ene khalai, miruku sawe sinnaakhaliherya atthu imilyau sinceene olelo-va. (Mir. 13:20; 15:21; Math. 7:12) Nave iprofesia sinceene sa mbiibiliyani sihiiraneya. Nla nthowa nikina ninniiriha okupali wiira Biibiliya onilavula ekeekhai. (Yox. 23:14) Mweekeekhai, Biibiliya eliivuru ekumiheriwe ni Muluku!

12. Nihaana opaka exeeni akhala wiira khaninkupali wiira Biibiliya okumiheriwe ni Muluku?

¹² Nihaana opaka exeeni vakhala wiira khaninkupali wiira Biibiliya okumiheriwe ni Muluku? Nihaana onvekela Yehova nimuleelaka muxankiho ahu, ninvekelaka wiira onikhaliherye ni otokosa voohimya sa mwaha owo. Nrowe niwehe etthu onihimya awe munna mmosa mmiravo, yoowo ohuuwale etthoko ya Anamoona a Yehova. Owo ohimmye so: “Miyo nkinikupali khula etthu kinileeliwa aka. Kihinatthi okupali kinipacerya toko oweha akhala wiira ekeekhai. Tivonto, ikwaha sikina nkinikupali itthu kiniiwa aka aahiiso kinisoma aka. Masi okathi eyo eniiraneya aya, kinnitokosa kirumeelaka iliivuru sinikumiheriwa ni mutthenkeso ahu wiira kiphwanye waakhuliwa wa makoho aka.” Akhala wiira khaninliyala mathowa anniiriha okupali wiira Yehova tomukumihenrye Biibiliya, waamini wahu onrowa otepaka olipa. — 1 Akor. 3:​12, 13.

YEHOVA TONIKHALIHERYA MUTTHENKESO AWE OLELO-VA

13. Etthu xeeni nikhanle ahu oopaka, akhala wiira ninnaanyiherya wiira Anamoona a Yehova, mutthenkeso Muluku onikhaliherya awe?

¹³ Akhala wiira khannikupali wiira Anamoona a Yehova mutthenkeso Muluku onikhaliherya awe olelo-va, nihaana opaka etthu moowaakuveya. Etthu nikhanle ahu oopaka, ori ophavelasa waakhuliwa wa makoho ala anittharelana: Olelo-va, atthu a etiini xeeni mweettelo aya onivarihana ni ele Biibiliya oniixuttiha awe? Atthu a mutthenkeso xeeni sookupali saya sinivarihana ni ele Biibiliya onihimya awe? (2 Tim. 4:​3, 4) Olelo-va, tani anipaka ele Yehova oniphavela awe? — Math. 7:​20, 21.

14. Niireke Anamoona a Yehova annivara muteko ori Matheyo 24:14?

¹⁴ Nilavulaka sa opaka etthu Muluku oniphavela awe, nihaana wiikoha so: Atthu xeeni anilaleya ihapari sooreera ntoko Yesu aahimyale awe wiira yaarowa opakaka mahiku ookiserya? (Math. 24:14) Nikoho nla, ti nookhweya waakhula. Muluku onnaarumeela arumeyi awe, eyo piiyo, Anamoona a Yehova wiira alaleyeke ihapari sooreera. Anamoona a Yehova paahi, tanilaleya ihapari sooreera sinilavula sa Omwene wa Muluku ilapo sinivikana 240. Nikhaliheriwaka ni Omwene wa Muluku, hiyo ninnivara muteko ola iyaakha sinivikana 100. Mweekeekhai, ninniluttuweliwa vanceene muteko woolaleya ni owiixuttiha atthu. — Math. 28:​19, 20.

15. Olelo-va, Anamoona a Yehova anipaka exeeni enikhaliherya ovuwiha nsina na Muluku? (Matheyo 6:9; Yesaya 43:10)

¹⁵ Mmusome Matheyo 6:9 ni Yesaya 43:10. Hiyo ninnisuweliwa ni nsina na Muluku ahu Yehova. Tivonto, eparakha yuulupale wiihaniwa Anamoona a Yehova. Atthu anceene olelo-va, khanisuwela wiira nsina na Muluku ti Yehova. Masi hiyo noowerya omukumiherya Biibiliya orina nsina na Muluku mapuro ootheene naari aya soolempwa sa khalai. Nsina na Muluku, ninniphwanyaneya Biibiliya a elapo esya ikwaha sinivikana 7 000.

16. Xeeni ohimyaka wiira Anamoona a Yehova anniiwelela yooruma eri Yohani 13:​34, 35? (Nwehe efootu.)

¹⁶ Mmusome Yohani 13:​34, 35. Olelo-va, atthu anceene khaniiwanana ni anninyokhana. Masi Anamoona a Yehova, toowiiraana ni anniphentana mukina ni mukhwaawe. Anamoona a Yehova, atthu anikhala ilapo soovirikana ni arina makhalelo oovirikana. Masi hata vari siiso, awo toowiiraana ni anniphentana. Niireke mootoko weetta mukwaha, murowa oxukurya muloko mukina? Akhala wiira munoorowa mapuro makina, munimoona moota anna ni arokora ari aya oowiiraana ni aniphentana aya mukina ni mukhwaawe. Eyo enooniherya wiira Yehova, onnaarumeela Anamoona awe wiira apake ele oniphavela awe olelo-va. Ohiliyala ela, onoonikhaliherya ohihiya omuroromela Yehova okathi waamini wahu oneehereriwa aya.

MUHIKHALA-KHALE MMUHIYAKA YEHOVA

17-18. Itthu xeeni sooxankiha sikhanle oonikhumelela, nave exeeni nikhanle ahu oolavula nihaanyiheryaka?

¹⁷ Ninkhala okathi wooxankiha ni woovila okhala. Tivonto, mahiku ala ookiserya, ootheene ahu ninnikhalana mixankiho. (2 Tim. 3:​1, 13) Nave pooti oniphwanyaka itthu sikina sooxankiha. Mwa ntakiheryo, mutthenkeso wa Yehova, pooti opaka soothanla nihiniiwexexa ahu saana aahiiso onivaha malakiheryo oovila otthara. Nave munna aahiiso murokora, pooti olavula aahiiso opaka etthu enrowa oniwereya. Hiyo pooti ohisuwela moota woophuka muxankiho ahu aahiiso ohisuwela etthu yiirihale opakiwa marukunuxo aahiiso yoothanla epakiwe ni mutthenkeso.

¹⁸ Hata niriipiwaka murima ni oxanka mwaha wa itthu sinniiraneela, okathi wootheene nihaana okhala oororomeleya wa Yehova. Mwaha wa xeeni? Mwaha woowi ninnisuwela wiira Yehova Mpattuxa ahu, tomukumihenrye Biibiliya, ni Anamoona a Yehova ti arumeyi awe. Ntoko Pedru aamulenle awe Yesu, nave-tho hiyo nnoowerya omuleela Yehova wiira: “Ninrowa omutthara pani? Ti nyuwo murina moolumo a okumi woohimala.”