39 ESTERI
“Vakhala okhwa, kinaamookhwa”
MWALI mmosa aahirowa opalaasio, opuro aakilanthe awe mwene. Owo aanisuwela wiira aamwiiviwa mwaha woorowa opalaasio wa mwene ohilattuliwe. Owo aanoova, masi hata vaari siiso, aaphavela olavula ni mwene. Mwali owo aari aani? Nave exeeni yaamwiirinhe orowa opuro ole?
Nsina nawe aihaniwa Esteri. Anamuyari awe yaakhwiiye ori ene mwaana, nto pirimu awe aitthaniwa Mordekayi aahimukuxa Esteri onamuhuwa “ntoko mwanawe” mwaamuthiyana. Awo yaakhala muttetthe wa oSusa wa oPersia, weiwo Mordekayi anvarela awe muteko mwene. Esteri aahinnuwa, khukhala “muthiyana ooreera ni ookuxa murima.”
Nihiku nimosa, mwene Asuwero aahilakela omwaavya muthiyana mukina wiira okhale mwaarawe, nto aahiruma oruuhiwa athiyana ootheene ooreera yahaatonko orupa ni mulopwana. Arumeyi a mwene yaahiweha wiira Esteri aari ooreera vanceene, nto yaahimukuxa amuroiha opalaasio. Esteri ohinatthi okuxiwa, Mordekayi “aahimuruma wiira ohimuleele mutthu mukina”, wiira yena aari muyuda.
Ori ene opalaasio, atthu ootheene yaamoona yaanisiveliwa ni Esteri. Nuuvira miyeeri 12 oreerihiwaka, owo aahiroihiwa wa mwene. Mwene “aahisiveliwa vanceene ni Esteri”, nave aahimuthanla wiira okhale pwiyamwene. Esteri aahikhala pwiyamwene a namalamulela ooweryexa a oPersia. Hata vaari siiso, Esteri aahimwiiwelela Mordekayi, maana khaamulenle mutthu mukina wiira yena aari muyuda.
Okathi ole, mulopwana mmosa aitthaniwa Hamani, aahithanliwa wiira okhale namakhaliherya a mwene. Hamani aanimunyokha Mordekayi, okhala wiira aanikhootta wuurama ohoolo wawe. Woonasa wene, Mordekayi aanikhootta opaka eyo okhala wiira aari murumeyi oororomeleya a Yehova, nave Hamani aari nwanani a Muluku. Hamani aahinanariwa vanceene ni Mordekayi, nto aahimpaka palano wiira owiivakase ayuda ootheene yaaphwanyaneya elapo ele. Nuumala Mordekayi omusuwela palano a Hamani, owo aahiriipiwa murima vanceene. Aahiruma oleeliwa Esteri para olavule ni mwene wiira owoopole ayuda. Nto wiira Esteri opake eyo, aahaana olipa murima.
Esteri aahimutthokiherya Mordekayi wiira arowa wa mwene ohilattuliwe, aamwiiviwa. Mwene aari mutthu oowaakuva onanariwa, masi Mordekayi aahimulipiha ni aahimuupuxerya wiira woonasa wene, yena aahithanliwa okhala pwiyamwene wiira owoopole atthu a Yehova. Esteri aahaakhula ohimyaka so: “Vakhala okhwa, kinaamookhwa”. Owo aahaavekela ayuda ootheene otthukwa mahiku mararu. Woonasa wene, Esteri ni atthu awe yaahinvekela Yehova ikwaha sinceene wiira aakhapelele. Nuumala-vo, Esteri aahirowa olavula ni mwene.
Okathi Asuwero aanwehale awe Esteri eemenle ene vate vawe, owo khaananariwe. Nto Esteri khaarowa wiiviwa, ohiya-vo, mwene aahimukoha etthu Esteri aaphavela awe. Owo aahaakhula omulattulaka mwene ni Hamani wiira yalye hoothe, eyoolya aarowa awe olokiherya. Okathi ole, Esteri aahimaaleleya ni aahaarumeela ankhili ohimuhimyaka palano a Hamani a waapwetexa ayuda. Owo aahimulattula-tho mwene ni Hamani wiira yalye hoothe eyoolya aarowa awe olokiherya nihiku naattharelana. Nihinatthi ophiya nihiku naattharelana, Hamani aahiruma weemexiwa mwiri wiira othomeiwe Mordekayi. Nto palano Hamani ammanne awe ammukumiherya mixankiho suulupale muhoolo mwaya.
Owo aanipirisari ovaanela ni mwene ooweryexa, wiira atthu a Muluku ahiiviwe
Nihiku na nenli, okathi mwene Asuwero aalya awe aahimukoha-tho etthu Esteri aaphavela awe. Ekwaha ela, Esteri aahimuleela mwene etthu aaphavela awe. Mwa nttittimiho, owo aahimuleela mwene wiira ookhala mutthu ammanne palano wiira iiviwe Esteri ni waamala-maliha atthu a nloko nawe. Esteri aahimmye wiira anwerya omaala, masi palano ole ammukumiherya mixankiho mwene. Asuwero aahikoha wiira mulopwana owo tani? Esteri aahimmye wiira mulopwana owo ootakhala ti Hamani. Mwene aahinanariwa ni aahiruma wiiviwa Hamani. Hamani aahithomeiwa mwiri yoole aaruminhe awe weemexiwa wiira omwiive Mordekayi.
Hamani aaphavela owiiva ayuda ootheene yaakhala oPersia. Yena ni ale yaaphavela owiiva ayuda ti yaakhwiiye. Nto Yehova aahimurumeela mwali oolipa murima ni oowaamini, wiira aakhapelele atthu awe.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Esteri oonihenrye sai olipa murima?
Mutokose itthu sikina
1. Itthu xeeni sikina sinooniherya wiira yoowiiraneya ela ti yeekeekhai? (Mutakiheke waamini waya epaax. 138, ekaaxa) A
Archiv für Orientforschung, Vol. 19, p. 79; Institut für Orientalistik
Eteseenyu A: Moolumo alempwale khalai oPersia animuhimya Marduka (Mordekayi)
2. Woonasa wene, etthu xeeni yaamwiiriha Mordekayi okhootta wuurama ohoolo wa Hamani? (Mutakiheke waamini waya epaax. 131 etti. 18)
3. Etthu xeeni enooniherya wiira Satana ni malaikha awe ootakhala yaanimukhaliherya palano ole a wiiviwa ayuda? (Nvenye! 08/09/2002 epaax. 7 etti. 3 mpakha epaax. 8 etti. 2) B
Cube. Lot of Yahali, puru. Neo-Assyrian Clay. (YPM BC 021122). Courtesy of the Peabody Museum, Division of Anthropology, Babylonian Collection, Yale University; peabody.yale.edu.
Eteseenyu B: Etthu yaarumeeliwa khalai wiira yaavereriwe esorti
4. Eprofesia xeeni Esteri ni Mordekayi yaakhalihenrye aya wiiraneya waya? (Mutakiheke waamini waya epaax. 142, ekaaxa)
Muupuwelele itthu mwiixuntte anyu
Esteri aahikhalana ankhili ni aari mutthu oowiiwelela hata okathi yoole aakhala awe ni atthu yahaamukokhorela Yehova. Amiravo olelo-va, aniixutta exeeni ni ntakiheryo nawe?
Mwene Asuwero aahiwiriyana yooveka awe, okhala wiira Esteri aari oopixa murima, oottittimiha ni oororomeleya. Athiyana ootheliwa makristau aniixutta exeeni ni ntakiheryo nawe? C
Efootu C
Munrowa otthara sai ntakiheryo na olipa murima wa Esteri?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Esteri nuumala ohihimuxiwa?
Mwiixutte itthu sikina
Eviitiyu ya nsipo enittharelana, nwehe itthu sinceene anamwane aniixutta aya ni ntakiheryo na Esteri.
Moota xeeni anna a mahiku ahu ala yaatthanre aya ntakiheryo na Esteri okathi anna ni arokora yaari aya mmaxakhani? Nwehe eviitiyu eni:
Mwaatakiheke ale anaakhela itthu sileiheriwe mwaha wa opixa murima — Mardokeyo ni Estheri (3:05)