37 DANIYELI
Khaaphavenle wiinanariha
DANIYELI aakhala epooma yoottaivela elapo awe. Ababiloonia yaahavara amusi a Daniyeli ni atthu akina a oYuda yaaroiha oBabiloonia. Yaahiviriha miyeeri 4 wiira aphiye oBabiloonia. Nto atoropa yaahimukuxa Daniyeli ni amiravo akina wiira yakhaleke opalaasio wa mwene. Daniyeli, aahikhalana apatthani awe araru, yaawo yaitthaniwa Hananiya, Mixayeli ni Azariya. Amiravo ale araru yaahipacerya wiixuttihiwa soolema sa oBabiloonia.
Ori ene otteiwene ni amusi awe, Daniyeli aanipirisari olipa murima wiira ohihiye ororomeleya wa Yehova
Wanipacerya, amiravo ale nuumala ophiya opalaasio, mwene Nabukhodonosori aahimuruma mukhulupale a arumeyi awe aihaniwa Axipenazi, wiira oturuke masina a amiravo ale. Masina manceene a eheeperi yaaninvuwiha Muluku eekeekhai. Mwa ntakiheryo, nsina noowi “Daniyeli” nintaphulela “Muluku mphuki aka”. Masina manceene a oBabiloonia yaavuwiha amuluku eethiru. Daniyeli aahivahiwa nsina na oBabiloonia, noowi Belitesazari, nenlo naataphulela onvekela muluku eethiru Beli wiira okhapelele okumi wa mwene. Mwene owo aaphavela wiira amiravo ale yuupuweleke ni apakeke itthu yaatakihaka atthu a oBabiloonia. Etthu xeeni-tho mwene Nabukhodonosori aapanke awe?
Mwene aahimuthanla Axipenazi wiira aahooleleke, okathi yaarowa aya wiixuttihiwaka amiravo ale. Amiravo ale, yaahaana owurya eviinyu ni olya yoolya yooloka ya mwene. Woonasa wene, amiravo akina vaanasivela okhapeleliwa mwa enamuna ele. Masi Daniyeli ni apatthani awe yaahiweha wiira yaari etthu yoowoopiha olya eyoolya ele. Mwaha wa xeeni?
Woonasa wene, Daniyeli aanuupuwela so: Atthu ala annisuwela wiira sookhala itthu nihinilya ahu mwaha wa nlamulo na Yehova. Kiireke amphavela oniiriha ohimwiiwelela Yehova anivahaka yoolya ya mwiikho? Vakhala wiira anoonivaha enama, kiireke enoohitiwa ni omwarexiwa ephome yootheene aahiiso, anrowa oniwoka wiira nihiiwelele nlamulo na Yehova sa olya ephome? Daniyeli aahaana okhalana ephoole ni eyoolya ya oBabiloonia, okhala wiira epantte ekina yaanirumeeliwa okathi yaakokhoreliwa aya amuluku eethiru, nave vakhala wiira yanwurya eviinyu yoowaatta, vamwaavila opaka soothanla sooloka.a
Moohaanyiherya Daniyeli aahinvekela vanceene Yehova ni aahaakoha apatthani awe ale araru, etthu yaakhanle aya oopaka. Owo aahithanla vamurimani vawe, etthu aakhanle awe oopaka wiira omuhakalalihe Yehova. Nto mwa nttittimiho, Daniyeli ni apatthani awe araru, yaahinvekela Axipenazi wiira ahilye yoolya ya mwene, wiira ahihonone waamini waya. Yehova ahimukhaliherya Daniyeli wiira Axipenazi omureerele murima ni ohinanariwe ni yooveka awe ele. Masi Axipenazi aanoova, nto aahimuleela Daniyeli ni apatthani awe wiira vakhala wiira munoowereyasiwaka mwaha woohilya eyoolya ela, mwene Nabukhodonosori onookiiva. Daniyeli aahiiwa ele Axipenazi aahimmye awe, nto aahuupuwela etthu aakhanle awe oopaka. Nuuvira okathi, moolipa murima, Daniyeli aahinvekela mulipa-aakhapelela amiravo ale wiira aavaheke mathaapa a makukhu ni maasi paahi. Nto yavira mahiku 10 yaalikanyihe amiravo ale axexe ni amiravo akina yaalya yoolya ya mwene.
Vano mulipa aakhapelela amiravo ale aaheemererya! Nuuvira mahiku 10, Daniyeli ni apatthani awe araru yaari ooreera ni yaahikhalana erutthu yooloka waavikana amiravo yaalya yoolya ya mwene. Nto, yaahooniwa wiira enamuna ele yaari yooloka, siiso awo yaaheemereriwa olyaaka mathaapa ni owurya maasi paahi. Yehova aahimureeliha Daniyeli ni apatthani awe, mwaha wa waamini ni olipa waya murima. Awo khiyaaliyanle moota Yehova aakhalihenrye awe okathi ole.
Ntoko enooniherya aya ekapiitulu enittharelana, apatthani araru a Daniyeli waahaaphwanya muxankiho yaapirisari aya olipa murima vanceene. Daniyeli khaahiyale okhala oolipa murima okumi awe wootheene, mpakha okathi aakhwiiye awe orina ene iyaakha 100. Mwa ntakiheryo, okathi Yehova aamwiirihale awe Nabukhodonosori oloha, Daniyeli aahaana olipa murima wiira omutthokiherye mwene ole, etthu aalonhe awe. Yooloha ele, yaataphulela mixankiho saarowa omukhumelela Nabukhodonosori ni omwene awe. Nuuvira iyaakha sinceene, okathi Belisazari aalamulela awe, Daniyeli aahitaphulela moolumo yaalempwale vaxirini ni ntata, yooniherya wiira mwene ole ampwetexiwa. Hata Daniyeli uuluvanle, owo aahiriheliwa munlittini mwa akharamu. Nave, Daniyeli khaahiyale olipa murima okumi awe wootheene. Eyo ti etthu yiirinhe nlaikha na Yehova omuleela Daniyeli wiira: “Mulopwana ookhalana efaita yinceene”!
Musome yoowiiraneya ela mbiibiliyani, soolepa sinittharelana:
Nikoho para ovaanela:
Daniyeli oonihenrye sai olipa murima?
Mutokose itthu sikina
1. Niireke Daniyeli 1:1, onnivirikanya ele onihimya awe Yeremiya 25:1? (Eprofesia ya Daniyeli ipaax. 18-19 itti. 14-15)
2. Moota xeeni eliivuru elempwale myaha sa oBabiloonia enooniherya aya wiira Nabukhodonosori aahipweha mihakhu mpaani mwa muluku awe? (Dan. 1:2; Perspicaz vol. 2 “Mihakhu” etti. 3) A
© The Trustees of the British Museum. Licensed under CC BY-NC-SA 4.0. Source. Modifications: Box added.
Eteseenyu A: Moolumo oolempwa anooniherya empa ya mihakhu ya Nabukhudonosori, etemplo ya Merodaki
3. Muteko xeeni yaavara aya anahako ni asuweli? (Dan. 1:20; Perspicaz vol. 2 “Maxitta ni ehako” itti. 2-6) B
Eteseenyu B: Ethaapwa yaamukhaani enitthonikiherya moota yaapenuxiwa aya ale yaavariwa ni malaikha ootakhala
4. Woonasa wene, exeeni yaahela muhina mathaapa Daniyeli ni apatthani awe yaalya aya? (Dan. 1:12; Eprofesia ya Daniyeli epaax. 40 etti. 25)
Muupuwelele itthu mwiixuntte anyu
Amiravo anrowa omutakiha sai Daniyeli ahihiyaka okhala ororomeleya hata amusi aya ahikhanle vakhiviru?
Exeeni yaamukhalihenrye Daniyeli okhala oolipa murima wiira ohiinanarihe? (Dan. 1:8) Ninrowa omutakiha sai? C
Eteseenyu C
Munrowa otakiha sai olipa murima wa Daniyeli?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Daniyeli nuumala ohihimuxiwa?
Mwiixutte itthu sikina
Nwehe eviitiyu yuulupale, enooniherya yoowiiraneya ela ya mbiibiliyani.
Daniyeli aahaamini okumi awe wootheene — mpantta l— epantta yaamukhaani (13:07)
Moota xeeni amiravo olelo-va, anrowa aya otakiha olipa murima ni ororomeleya wa Daniyeli? Musome mwaha oni:
“Mwiixutte etthu ni ntakiheryo na Daniyeli” (Owehaweha 08/2023 ipaax. 2-7)