35 MANASE
Moolipa murima, owo aahittharuwa
YEHOVA ahaapanke miiriirya, Manase khaayariwa. Ezekiya aari mwene ooreera murima yoowo aamukokhorela Yehova. Okathi aawereiwa awe ni aahala awe vakhaani okhwa, Yehova aahimpenuxa. Nuumala ompenuxa, Ezekiya aahimuyara mwaana yoowo aitthaniwa Manase. Okathi Manase aarina awe iyaakha 12, mooriipiha murima Ezekiya aahikhwa. Mmiravo Manase, aahikhalihiwa mwene. Masi owo khaatthanre ntakiheryo nooloka na paapa awe.
Manase, aahipaka itampi sinceene. Mwa iyaakha sinceene, Manase aahaakokhorela amuluku eethiru, aanikokhorela ilatarato ni aanaatumererya atthu opakaka etthu emosa-ru. Owo aanipaka maxintta, onammunepani, mpakha waapaha anaawe aavahaka mukuttho. Moomweneni mwawe, otakhala waamutepa wuncerereya. Manase aahiwiiva atthu anceene, nto mwaha waivaavo atthu a oYerusalemu yaahipaka itthu sinceene sootakhala. Yehova aahiriipiwa murima vanceene okathi aaweha awe atthu awo apakaka itthu sootakhala. Yehova aahaaruma maprofeta wiira yamulopole, masi owo khaaphavenle waawiriyana. Woonasa wene nyuwo pooti wiikoha so: Xeeni Manase ori awe ntakiheryo nooloka na olipa murima? Nrowe niwehe.
Moohipisa, okumi wa Manase waahiturukeya. Okhala wiira mwene aanikhootta olopoliwa ni maprofeta, Yehova aaheemererya wiira asiiria apwetexe muttetthe wa oYuda. Biibiliya onihimya wiira: “Awo yaahinvara Manase amutthukwa ni onyoolo ni ikwirinti piili sa ekoopiri amuroiha oBabiloonia.” Vannooneya wiira mwene ole oowiixinnuwiha aahuulihihiwa muru ni aanihaawa vanceene vaavo aaroihiwa awe oBabiloonia otthukiwe ene ni ikwirinti.
Manase aari ootakhala murima, masi Yehova ahinvaha eparakha wiira ottharuwe itthu soohiloka aapanke awe
Otthukweliwe ene oBabiloonia, Manase aanuupuwela itthu sootheene sootakhala aapanke awe. Woonasa wene, owo aaniixoona okhala mekhawe ni uupuwela wiira khaarowa otaphuliwa-tho. Pooti wiira Manase aahisuwela wiira waakokhorela amuluku eethiru khahiyo etthu yooloka, ni kharina owerya wiira anikhaliherye. Nave pooti wiira aahiriipiwa murima vanceene mwaha wa waapaha anaawe para waavaha mikuttho amuluku awo. Owo aahoona wiira aahaana oturuka mweettelo awe. Nto etthu yoopacerya aapanke awe, waari onvekela Yehova. Owo aari oowiiyeviha wiira onvekele Yehova nikhaliheryo. Owo “aahiiyeviha vaalupale ohoolo wa Muluku a amuhavinre awe.” Yehova aahiweha wiira Manase aahipacerya oturuka mweettelo awe, nto aahiwiriyana nivekelo nawe. Vaavo Manase aatepa awe okhala mutthu oowiiyeviha, Yehova aanitepa omwaattamela. (Esal. 138:6) Manase “aahimuxonttela Yehova Muluku awe” wiira ommorele ikharari. Tthiri, “Manase khaahiyale onvekela Muluku”.
Yehova oonela sai mavekelo a Manase? Biibiliya onihimya so: “Owo aahimmorela ikharari ni aahiwiriyana mavekelo awe ooxonttela”. Muluku eekeekhai, aahimmorela ikharari Manase ni aahimukhaliherya. Biibiliya onihimya wiira Yehova aahimuttikiherya oYerusalemu wiira atthikele omwene awe. Manase aahitaphuliwa, vano anwerya omooniherya Yehova wiira aahituruka mweettelo awe woohiloka.
Nuumala Manase ohokolowela oYerusalemu, aapirisari omuroromela Yehova wiira aakhaliherye atthu ohiya iphiro saya sootakhala. Manase vaanimuxankiha waakhaliherya atthu, okhala wiira mwa iyaakha sinceene owo taatumerenrye opaka itthu sootakhala. Woonasa wene, owo aanoova wiira khiyaarowa onwiriyana, ni yaamunyoonyiheya mwaha owo oturuka mweettelo awe. Nnaamwi Manase aaxanka mwaha wa itthu iyo, nlelo aari mutthu oolipa murima wiira opake itthu sooloka. Owo aahiteka ixiri soolipa wiira okhapelele oYerusalemu. Nuumala-vo, aahikumiha ilatarato saari mpooma niiye saari mpaani mwa Yehova. Manase aahaalokiherya altari a Yehova ni aahivaha mikuttho valtari vaavo. Nave hata vaaxankihale, Manase aaheemela ohoolo wa atthu awe. Ohiya waatumererya wiira yaakokhoreleke amuluku eethiru ntoko iira awe khalai, masi owo aanaatumererya atthu a oYuda wiira: “Amurumeeleke Yehova, Muluku a Isarayeli.” Manase, yoowo aari ootakhala, aahituruka mweettelo awe. Nave Yehova aahivuwihiwa, okhala wiira aahooniherya-tho wiira tooreera murima ni okathi wootheene ori oolikana ene wiira olevelele. — Esal. 86:5.
Mooriipiha murima, khaawenrye olokiherya itthu sootheene soohiloka aapanke awe. Yehova aahimulevelela Manase. Masi Yehova khaahiyale siiso atthu ale yaapaka itthu sootakhala, okathi Manase aari awe mwene. Atthu awo khiyaarukununxe murima ni khiyaattharunwe itampi saya. Hata mwanawe Manase aihaniwa Amoni, khanwiriyanne paapa awe ni aahithipelela opaka itthu sootakhala. Masi Manase aahiwerya omukhaliherya musulu awe, Yosiya, wiira omphenteke Yehova. Moohaanyiherya, mmiravo owo aahuupuwela wiira taata awe aari oolipa murima wiira okhale oowiiyeviha ni ottharuwe. Nuuvira iyaakha sinceene opakaka itthu sootakhala, Manase aahittharuwa opaka itthu soohiloka. Nto owo okhwiiye osuwelaka wiira Tiithi awe oophenta Yehova, oomulevelela.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Manase oonihenrye sai olipa murima?
Mutokose itthu sikina
1. Atthu a wAmori yaamanke elapo ya oKanaani. Etthu xeeni yaamwiirihale Manase opaka “itthu sootepa otakhala waavikana atthu a wAmori yaakhala ohinatthi yena”? (2 Mam. 21:11; Owehaweha 15/10/200 epaax. 16 itti. 5-6; Boa Terra, epaax. 10 etti. 5, enoota)
2. Itthu xeeni sinnooniherya wiira Manase aari mutthu eekeekhai ni Asiria yaari ekuvernu yoowerya okathi ole? (Perspicaz vol. 2 “Manase” n.o 4 etti. 2) A
© The Trustees of the British Museum. Licensed under CC BY-NC-SA 4.0. Source
Eteseenyu A: Nsina na Manase, mwene a oYuda, ninniphwanyaneya nluku na Esarhadon mwene a wAsiria
3. Etthu xeeni enooniherya wiira asiiria yaanaatthukwa ni onyoolo atthu yaavara aya? (2 Wah. 33:11; Perspicaz vol. 1 “Coolo” etti. 4) B
Eteseenyu B: Eteseenyu eri vaparetini yeeyo yeeyo Asiiriya yaapanke aya mwaakha 700 Yesu Ohinatthi Orwa
4. Yehova aahukhummu sai atthu a oYerusalemu? (2 Mam. 21:13; Perspicaz vol. 2 “Niivele; Epurumu” etti. 2)
Muupuwelele itthu mwiixuntte anyu
Yoowiiraneya ela enniixuttiha exeeni sa ottharuwa?
Yehova onnaalevelela ale anittharuwa. Masi owo khonikhoottiherya wiira mutthu owo simukhumelele mixankiho mwaha wa soothanla sawe. Nto yoowiiraneya ya Manase ni atthu a oYuda enooniherya sai ekeekhai eyo? (Yer. 15:3-5) C
Efootu C
Munrowa otthara sai ntakiheryo na olipa murima wa Manase?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni ele Yehova oniphavela awe?
Etthu xeeni kiniphavela aka omukoha Manase nuumala ohihimuxiwa?
Mwiixutte itthu sikina
Nwehe moota ntakiheryo na Manase naamukhalihenrye aya munna mmosa otthikela wa Yehova. Nwehe eviitiyu eni:
Otthukweliwa mukhatteya wookiphwanyiha otaphuwa wekeekhai (5:10)
Vakhala wiira munuupuwela wiira khamurina efaita mwaha wa itampi sanyu sa khalai, yoowiiraneya ya Manase enrowa woolipihani sai? Musome mwaha oni:
“Manase aahimuxonttela Yehova” (Owehaweha 1/01/2011 epaax. 18)