11 MOISE
“Murowe wa Farawo”
MOISE aahiturukeya vanceene. Nuumala okhuma wExiitu, saahivira iyaakha sinceene. Vanikhala wiira owo khuupuwela-tho wiira aamurummwa ni Yehova, wiira owoopole aisarayeli weepotthani. Orina ene iyaakha 80, Moise iira othenle ene; nave aahaayara anamwane anli axilopwana. Saahivira iyaakha 40 ovaraka muteko wa omakampusi a inama sa taata awe, elapo yoowuuma ni yooviha, yeeyo yaakhala aya atthu a oMidiyani.
Yehova aahiweha wiira vano Moise aahiturukeya vanceene tthiri. Nihiku nimosa, Yehova aahiiriha mwiri wa miiwa waari vathi va mwaako Horebi (Sinayi), opatta mooro. Masi mwiri ole khiwaalala. Okathi Moise oonale awe etthu ele yootikiniha, owo aahaattamela wiira awehe etthu yiiraneya. Nto Yehova aahimulavuliha vamooroni vaavale, orumeelaka nlaikha noowerya. Muluku aahimuruma Moise wiira otthikele wExiitu, aakumihe aisarayeli elapo ele. Wiira omulipihe Moise, Muluku aahimusuweliha etthu emosa yuulupale, eyo piiyo, ele enitaphulela aya nsina nawe noowaarya, noowi Yehova. Owo aahimmye so: “Miyo Kinookhala Ele Kiniphavela Aka Okhala”. Yehova anwerya okhala Moopoli a atthu awe yaahaaxiwa. Ampaka khula etthu wiira owoopole ni owiirihe okhala nloko noowerya.
Masi Moise nlelo aanoovelela! Owo uupuwela wiira khaaphwanelela, nnakhala khaarowa owerya olavula ohoolo wa Farawo a wExiitu. Yehova aahimukhaliherya oturuka muupuwelo awe ni aahilipiha waamini wawe opakaka etthu yootikiniha. Yehova aahinvaha owerya Moise, wiira opake miiriirya! Ela ekwaha yoopacerya mbiibiliyani, ninsoma ahu wiira Yehova aahinvaha pinaatamu owerya siiso. Nave aahinvaha namakhaliherya, yoowo aarowa olavulaka ni Farawo. Namakhaliherya owo aari muulupale awe aihaniwa Aroni. Moise aaheemererya etthu ele aarummwale awe, nnaamwi woopaceryani oovelela. Vano, owo aari ntoko mesiya, eyo piiyo, mutthu aathanliwe ni Yehova wiira owoopole atthu a Muluku. — Ahep. 11:26.
Moise aahitthikela wExiitu. Yena ni Aroni yaahirowa olavula ni Farawo. Masi itthu khaseettale saana woopaceryani. Ohiya waataphula aisarayeli, Farawo aahitepa olipiha muteko wa ipottha iye. Yehova aahimuruma Moise otthikela wa Farawo para amuleele wiira aamwaahukhumu atthu a wExiitu, aakumiheryaka ehasara. Yehova aahiiriha maasi a muro Nilo othatuwa ephome. Masi Farawo khaahiyale aisarayeli arowaka. Yehova aahimuruma Moise ikwaha sinceene, orowa wa Farawo. Moolipa murima, khula ekwaha Moise aalavula awe ni Farawo, aanimuleela moota Yehova aarowa awe waahukhumu atthu a wExiitu. Masi namalamulela ole oowiixinnuwiha, aanikhootta wiiwa. Okhuma ehasara ya neexexe, Yehova aahaakhapelela atthu awe. Masi atthu a wExiitu yaanihaawa.
Khula ehasara yaakhumelela wExiitu, yaanooniherya wiira amuluku yaakokhoreliwa elapo ele, yaari eethiru. Hata Farawo nnakhala anahako awe khiyaawerya opaka etthu. Masi Farawo aahuumiha murima awe ni aahikhootta otaphula ipottha iye. Ehasara ya neethanu neexexe, yaahikumiherya epiphi elapo yootheene ya wExiitu. Masi mmaitthokoni wa aisarayeli waari mookokola. Farawo aaheemererya wiira aisarayeli aroweke, masi aahitthikela oturuka muupuwelo awe. Farawo aahihimya wiira Moise atthikela wa yena, aamwiiviwa.
Moise aahaana ovilela khula okathi, oviruwa wa anamalamulela ootepexa owerya a elapo ele
Hata vaari siiso, Yehova aahimuruma-tho Moise orowa wa Farawo, nto owo aahiiwelela. Vano yaahikhumelela ehasara ya namuloko, yaawiivale anamwane ootheene oopacerya oyariwa a wExiitu, vamosa ni inama. Nuumala okhwa mwanawe, Farawo aaheemererya waahiya aisarayeli arowaka. Wuuliwe ene muru, aahimwiihana Moise, aahaahiya aisarayeli arowaka ni aahivekela wiira oreelihiwe. Vano, aisarayeli yaari ootaphuwa, sivinre ene iyaakha 430 nuumala Abrahamu okela elapo yooleiheriwa! Atthu ale yaari ipottha yaahikhuma ahooliwaka ni “atthu anceene”, nave anceene a yaawo, woonasa wene yaari atthu a wExiitu. Masi Farawo aahitthikela oturuka muupuwelo awe. Owo aahaathukumanya anakhotto awe anceene, onaatthimakela aisarayeli!
Ari ene waattamela wa ephareya Yooxeerya, Moise ni atthu ootheene, yaakhala ntoko khiyaarina manera. Aisarayeli yaahoova vanceene. Moise aahinvekela Yehova wiira aakhaliherye. Nto Yehova aahaakhula, opakaka miiriirya sootikiniha. Owo aahikawanya ephareya Yooxeerya. Nto aisarayeli yaahiwerya ovira opuro ole. Okathi Farawo aawehale awe wiira aisarayeli yaanilapuwa, aahaatthimakela ni anakhotto awe. Masi aisarayeli alapuwaka-ru, Yehova aahittikiherya ephareya ntoko saari aya. Nto Farawo ni anakhotto awe yaahisama. Anakhotto ooweryexa a elapo ele, yaahipwetexiwa!
Moise khaatonko oliyala soowiiraneya iye sootikiniha. Vano waamini wawe waahitepa olipa ovikana khalai. Nto saahivira iyaakha 40 Moise aahooleelaka ni aakhapelelaka atthu a Muluku. Owo okhwiiye orina ene iyaakha 120. Moohaanyiherya, Moise ntakiheryo na waamini, ophenta, ni olipa murima.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Moise oonihenrye sai olipa murima?
Mutokose itthu sikina
1. Khaninsuwela nsina na Farawo aalamulela wExiitu okathi aisarayeli yaakhuma aya. Nave, mpakha olelo-va khasiphwanyiwe ipaphelo sa soowiiraneya sa wExiitu sinilavula mwaha owo. Nto xeeni ninreerela ahu okupali yoowiiraneya ela ya mbiibiliyani? (Nvenye! 08/04/2004 epaax. 7 etti. 4 mpakha epaax. 9 etti. 1)
2. Xeeni atthu yaamoova aya Farawo? (Owehaweha 15/04/2014 epaax. 8 etti. 1) A
PRISMA ARCHIVO/Alamy Stock Photo
Eteseenyu A: Eteseenyu eri vaxirini enimooniherya Farawo, yoowo aakhanle nuuvira okathi wa Moise
3. Ihukhumu wala ihasara 10 saakhumelenle wExiitu, soonihenrye sai wiira amuluku aya khiyaarina owerya? (Perspicaz vol. 1 “Amuluku ni amuluku axithiyana” itti. 24-26)
4. Etthu xeeni enooniherya wiira ephiro Yehova aahunle awe yaari yuulupale, yaaphiyerya atthu ootheene ovira? Aisarayeli akavi yaalapunwe ephareya Yooxeerya? (Perspicaz vol. 1 “Okhuma wa aisarayeli wExiitu” itti. 46-51) B
Eteseenyu B: Ephareya Yooxeerya yooneyaka mpantta wa mwaako Sinayi, weiwo woonasa wene aisarayeli yaalapunwe aya
Muupuwelele itthu mwiixuntte anyu
Ntakiheryo na olipa murima wa Moise, ninnilipiha sai okathi nnoona ahu wiira khanimphwanela ovara muteko Yehova onirumme awe? (Okhu. 4:10; 7:6, 7)
Aroni aahimukhaliherya Moise omaleliha yoothanleliwa awe moolipa murima. Olelo-va ninrowa waakhaliherya sai anna ni arokora? (Okhu. 4:14-16) C
Efootu C
Ninrowa ootakiha sai olipa murima wa Moise?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Moise nuumala ohihimuxiwa?
Mwiixutte itthu sikina
Nwehe moota ele enitaphulela aya nsina na Yehova, enrowa aya waakhaliherya anamwane okhala oolipa murima. Nwehe eviitiyu eni:
Itthu saamwiiranenle Moise saamwiixuttinhe sai mikhalelo sa Yehova? Musome mwaha oni:
“Musuwele iphiro sa Yehova” (Owehaweha 15/05/2005 ipaax. 20-25)