4 ABRAHAMU
Mulopwana oopacerya, aawanne ekhotto ya Yehova
YEHOVA aahimuleiherya etthu yooreera mpatthani awe aihaniwa Abrahamu. Owo aahimmye so: “Kinimookhalihani nloko noowaatta”. Yooleiherya ela ehaavaha nlipelelo apinaatamu ootheene. Muluku aahimooniherya Abrahamu elapo yooreera, yeeyo muhoolo mwaya, yaarowa aya okhalaka osuulu awe. (Maph. 12:2; 13:14, 15) Masi Satana aaphavela omala-maliha osuulu owo nlelo ohinatthi okhumelela. Okhala wiira Diabo aanisuwela wiira owo ni atthu awe ootakhala, aarowa opwetexiwa ni osuulu owo waarowa okhumelela nloko nno. — Maph. 3:15.
Ohivinre okathi munceene, Abrahamu ni emusi awe yaahipacerya olupatthiwa ni Satana. Mutthu oopacerya olupatthiwa, aari musulwaawe aihaniwa Lothi. Okathi ole, Lothi aakhala waattamela esitati ya oSodoma. Abrahamu aahinvekela Lothi othanla opuro aaphavela awe okhala elapo ele yooleiheriwa. Lothi aahithanla opuro wooreera ni woowunttelana waattamela esitati ya oSodoma. Masi atthu a oSodoma “yaari ootakhala ni yaanimutthekela vanceene Yehova.” (Maph. 13:8-13) Ohiya-vo, mwene a oSodoma aahaataana ni mamwene 5 a oKanaani. Mamwene awo yaahitemwa omuliva mpoosito mwene a wElami. Nto awo yaahimurukunuwela. Nuumala osuwela eyo, mwene a wElami aahaataana ni mamwene 3 a mittetthe soorakamela. Mamwene awo yaakhuma onorti, yaahaaxintta mamwene ootheene a oKanaani ni yaahikuxa mireerelo saya sootheene. Ohiya-vo, yaahaakuxa atthu a ilapo iyo, yaakhaliha ipottha. Lothi ni emusi awe yaari eriyari ya atthu awo.
Abrahamu ni ekurupu awe ya alopwana 318, awanaka ni anakhotto oowerya a mamwene maxexe
Abrahamu aarowa opaka exeeni? Owo anwerya wupuwela so: Nthowa ti naawawe. Yena onihepha ele yaalale awe. Aahiiso pooti wiira aahuupuwela so: Wiira kimoopole Lothi, kihaana owana ni mwene ola oowerya a wElami ni atthu animukhaliherya. Masi miyo nkitonko owana ekhotto, aahiiso nkihiyo nakhotto, ka makampusi paahi onimakela okhala mutentani. Nave nihaana osuwela wiira mmosa a mamwene ale, aari a oXineyari, elapo ya wUri weiwo aakhala awe Abrahamu. Abrahamu anwerya wuupuwela so: Vakhala wiira kinoorowa owana ni mwene ola, nkinrowa otthikela elapo ya wUri weiwo kaakhala aka. Masi Abrahamu khaatonko wuupuwela itthu iyo nnakhala vakhaani. Owo aanisuwela etthu Yehova aaphavela awe wiira opakeke.
Okathi ole, woonasa wene Abrahamu aahikhalana arumeyi anivikana 1.000. Owo aahaathukumanya arumeyi awe 318 oolikana ene para owana ekhotto. Akhaliheriwaka ni atthu akina, yaahirowa owana. Mpantta wa onorti muttetthe wa oDani, awo yaahaaphwanya awanani aya. Abrahamu aahaakawanya arumeyi awe, vano awo yaahaatuphela nuumala wiila. Nnaamwi anakhotto a Abrahamu yaari vakhaani, yaahaaxintta awanani aya, nave akina yaahipacerya otthyawa. Mamwene ale 4 yiiraanale ni anakhotto aya, yaahitthyawa arowaka mpantta wa onorti, Abrahamu aahithipelela owoomola. Waattamela oDamaasiko, Abrahamu aahaaxintta awanani awe ni aahiwaakha mireerelo yaakunxe aya elapo ya oKanaani. Vano Lothi ni emusi awe yaahoopowa.
Yehova oonenle sai olipa murima ni waamini Abrahamu aarina awe? Waakhuliwa wa nikoho nno, waahooneya oratteene vaavo Abrahamu aavinre awe waattamela esitati ya oSalemi. Mwene a esitati ele, aari namukuttho a Yehova. Owo aahirowa okumana ni Abrahamu ota wa esitati ele, ni aahimuleela wiira Yehova ammureeliha. Moowiiyeviha, Abrahamu aahinvaha Melikhisedeki epantta ya namuloko ya itthu aawaakhale awe awanani awe.
Hiyo khinnaanyiherya wiira ekhotto ele khahiyo yaari ya apinaatamu, masi yaari ya Muluku. Biibiliya onnilavula “Eliivuru ya Ikhotto sa Yehova”. (Mmr. 21:14) Woonasa wene, ekhotto eyo Abrahamu aawanne awe moolipa murima, ti yaapacenrye olempwa muliivuruni-mmo. Nuuvira iyaakha sinceene, okathi osuulu wa Abrahamu (yoowo muhoolo mwaya waasuweliwa okhala aisarayeli) waahiwana ni atthu ootakhala a oKanaani, yaawo yaakhala Elapo ele Yooleiheriwa. Nto Yehova aahaakhaliherya oxintta ikwaha sinceene.
Masi okathi yahaamwiiwelela aya Muluku, awo yaanixinttiwa. Wanikisa waya, Yehova aahaakhootta okathi yoole yahaamweemerenrye aya mwanawe, okhala Mesiya aaleiheriwe. Aaranttelihaka aisarayeli a weerutthuni, Yehova aahipacerya waareeliha aisarayeli a Muluku, yaawo ari atthareli oothanliwa a Kristu. (Akal. 6:16) Yesu ohaakhoottiherya atthareli awe wiirela mpantta ikhotto siniwaniwa mulaponi. (Math. 26:52) Ohiya-vo, owo onniwiixuttiha moota akhanle aya oowana ekhotto wiira yaakiherye waamini waya. Yesu oonihiyerya ntakiheryo, ooniheryaka wiira ekhotto ela enipirisari olipa murima.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Abrahamu oonihenrye sai olipa murima?
Mutokose itthu sikina
1. Itthu sa khalai siphwanyiwe, sinooniherya sai wiira yoowiiraneya ela ti yeekeekhai? (Owehaweha 01/07/1989 epaax. 5 etti. 4 mpakha epaax. 6 etti. 1)
2. Moovarihana ni ele Biibiliya, woonasa wene, isitati sa oSodoma ni oGomora saari opuro xeeni? Exeeni ennikupaliha wiira eyo ekeekhai? (Perspicaz vol. 2 “ephareya ya Maakha” etti. 6) A
© Yadid Levy/age fotostock
Efootu A: Mpakha olelo-va, sookhala miri sinlikana ni mikole ni miri sikina mukerekhere mwa Ephareya Yookhwa, opuro yoowo woonasa wene yaaphwanyaneya aya esitati ya oSodoma
3. Melikhisedeki aari mwene ni namukuttho muulupale a oSalemi. Yaaphwanyaneya opuro xeeni esitati ela? (Perspicaz vol. 2 “Salemi”)
4. Melikhisedeki aamureperesentari sai Yesu? (Perspicaz vol. 2 “Namukuttho muulupale” itti. 27-28) B
Eteseenyu B
Muupuwelele itthu mwiixuntte anyu
Abrahamu aahimweemererya Lothi othanla epantta yoowunttelana ya elapo. Ninrowa omutakiha sai Abrahamu, vaavo nimphuka ahu myaha sa vatthokoni, anna ni arokora ni atthu akina? C
Efootu C
Nniixutta exeeni ni wiivahererya wa Abrahamu wiira omoopole musulwaawe?
Munrowa anyu otakiha sai olipa murima wa Abrahamu?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Abrahamu ni Lothi nuumala ohihimuxiwa?
Mwiixutte itthu sikina
Nwehe moota Abrahamu aixuntte awe omuroromela Yehova. Nwehe eviitiyu eni:
Abrahamu oonihenrye sai olipa murima, okathi aakhala awe esitati ya wUri?
“Abrahamu — Mulopwana oolipa murima” (Owehaweha 01/01/2012 ipaax. 6-7)