3 SARA
Owo khuupuwelela itthu saahiyale awe ottuli
SARA aatheliwe ni Abrahamu, yoowo amphenta awe vanceene. Awo yaakhala elapo ya wUri, epooma yoowaatta atthu ya oXineyari yeeyo yaatekeleliwe ni ixiri soolipa, nave yaakhala waattamela muro Eufrate. Atthu a elapo ya wUri yaakokhorela amuluku eethiru, masi Abrahamu khaatakiha atthu awo. Owo aamukokhorela Muluku mmosa paahi eekeekhai. Sara aanimwaamini Yehova. Masi nihiku nimosa, yaahikhumelela etthu yeeherenrye waamini ni olipa wawe murima.
Abrahamu aahimuleela Sara wiira Yehova aahilavula ni yena. Nkuupuwelani moota Sara aahakalanle awe nuumala wiiwa eyo! Masi etthu Yehova aamulenle awe Abrahamu wiira opake, khahiyo yaari etthu yookhweya. Abrahamu ni Sara yaahaana ohiya empa aya, amusi aya, elapo ya wUri, arowaka opuro woorakamela. Ohiya-vo, awo yaahaana waakuxa arumeyi aya ni weetta mukwaha woorakama wiira yakhaleke mutentani. Awo khiyaarowa otthikela okhala epooma yaakhapeleliwa ni ixiri ni makwarta. Nave, khiyaarowa-tho okhalaka empa yuulupale erina makhalelo ooloka, ntoko maasi ooreera ni itthu sikina sooreera, woonasa wene yaarina aya. Sara khaarowa oweryaka orowa omerkaatu wiira athumeke yoolya ni itthu sikina, ntoko iira awe elapo ya wUri! Moohaanyiherya, yaamukhalana mixankiho sinceene. Masi Sara aari oolikana ene wiira okhume elapo ele. Omuroromelaka Yehova, Sara aahilokiherya mireerelo sawe, aahaalaxerya amusi awe ni apatthani awe ni aahikhuma ni Abrahamu arowaka elapo yahaasuwela aya.
Sara aahimukhaliherya Abrahamu, okathi Yehova aavekenle awe wiira athaame elapo ya wUri. Nave khaamukhanyerenrye Abrahamu wiira atthikele elapo ya wUri
Sara aahooniherya olipa murima mwa enamuna ekina. Omuhimyaka Abrahamu ni Sara, murummwa Paulo olempe so: “Vaakhanle wiira awo yaanuupuwela opuro yaakhumme aya, yanwerya otthikela weiwo.” (Ahep. 11:15) Woonasa wene, Sara pooti aanuupuwela empa awe ni ovareleleya aarina awe elapo ya wUri. Masi, moolipa murima owo khuupuwelela itthu aahiyale awe.
Nuumala ophiya elapo ya oKanaani, Sara aahiweha wiira aamukhalana mixankiho sinceene. Sara aahoona wiira khiwaakhanle muro muulupale, ntoko muro Eufrate ni apakiti yaakhanle ooruuha eyoolya ni itthu sikina wiira awo athumeke. Tivonto, nuumala okhumelela etala elapo ya oKanaani, khiivo-tho etthu ekina awo yaakhanle aya oopaka ohikhanle othaama. Muxankiho ole khiwaamwiirinhe Sara omukhanyererya Abrahamu otthikela elapo ya wUri. Ohiya-vo, owo aahikhaliherya moonelo wa iyawe, nto awo yaahirowa elapo ya wExiitu.
Sara aari muthiyana ooreera vanceene. Abrahamu aanoova wiiviwa mwaha wa mwaarawe. Sara aahaana woothererya wiira Abrahamu ari murokorawe, hata vari siiso, saahaaphwanya mixankiho sikina, okathi Farawo aasuwenle awe wiira Sara aari muthiyana ooreera. Farawo aahaaruma arumeyi awe wiira yamukuxe Sara wiira akhaleke opalaasio wawe. Okhala opalaasio wa mwene, yaarowa okhala etthu yooreera ni aarowa okhala oovareleleya, ohiya omakela othaama ni okhala mutentani. Masi niireke wiira Sara aahimuhiya Abrahamu wiira okhalane okumi wooloka ni Farawo? Nnaari. Owo aahooniherya olipa murima ni khaahiyale ororomeleya wa Abrahamu, nave Yehova aahimoopola. Nuuvira okathi vakhaani, Sara aahitthikela okhala ni iyawe.a
Yehova aahimuleiherya Abrahamu wiira aamukhala tiithi a maloko manceene. Masi Sara khaayara, nto eyo yaanimuxankiha vanceene. Nuuvira iyaakha sinceene akhalaka oKanaani, Yehova aahimureeliha Sara. Nnaamwi aarina iyaakha 90, yena aahinvaha etthu aaphavelexa awe: Omuyara mwaana. Yehova aahihimya wiira mwaana owo aarowa wiitthaniwaka Isaakhi, okhala wiira nsina nno, nintaphulela “otheya”. Abrahamu ni Sara yaahitheya ni otteeliwa murima, okathi yaasuwenle aya wiira yammuyara mwaana. Nave Sara aanikupali wiira atthu akina yaamutteeliwa murima ni otheya vamosa ni yena, nuumala osuwela ele Yehova aapanke awe.
Sara aahikhala iyaakha sinceene wiira omuhuwe mwanawe ni onweha innuwaka. Eyo yaahiweryaneya okhala wiira yena aari maama oophenta ni aahimukhapelela mwanawe moolipa murima. Sara khaatonko wuupuwelela itthu aahiyale awe ottuli mpakha okhwa wawe. Ohiya-vo, aaniwehexexa itthu soohakalaliha aalipelela awe muhoolo. Sara ni emusi awe khiyaawenhe sooleiherya sa Yehova siiraneyaka, masi hiyo ninnikupali wiira sooleiherya iyo, sinimwiiraneya moohipisa!
Musome yoowiiraneya ela mbiibiliyani, soolepa sinittharelana:
Nikoho para ovaanela:
Sara oonihenrye sai olipa murima?
Mutokose itthu sikina
1. Niireke vaari vootthekeya Abrahamu omuthela Sara, yoowo ari murokorawe? (Owehaweha a Atthu Otheene N.o 3 2017 epaax. 12 etti. 5, enoota)
2. Woonasa wene, itthu xeeni Sara aahiyale awe elapo ya wUri? (Owehaweha a Atthu Otheene N.o 3 2017 epaax. 13 etti. 4 mpakha epaax. 14 etti. 2) A
Photograph taken by courtesy of the British Museum
Efootu A: Epeerola yaaphwanyiwe muttetthe wa wUri
3. Exeeni enooniherya wiira vaari va miruku Abrahamu ohihimya wiira Sara aari mwaarawe? (Owehaweha a Atthu Otheene N.o 3 2017 epaax. 14 etti. 6 mpakha epaax. 15 etti. 2)
4. Sara aanimwiiwelela Abrahamu. Niireke eyo enitaphulela wiira yena khaahimya moonelo awe? Mutthokiherye. (Nvenye! 01/2008 epaax. 29 itti. 4-5) B
Eteseenyu B
Muupuwelele itthu mwiixuntte anyu
Mmulikanyihe Sara ni mwaarawe Lothi.
Itthu xeeni awo yaalikana aya? (Maph. 12:1; 13:5-7; 19:12, 15)
Itthu xeeni saawiiriha okhala oovirikana? (Maph. 19:17, 26; Luka 17:28-32)
Exeeni nniixutta ahu ni soothanla yaapanke aya? Nave exeeni yaakhumelenle mwaha wa soothanla iyo?
Sara aari muthiyana ooreera, nave iyawe aari thaaciri. Exeeni nikhanle ahu oowiixutta ni ntakiheryo na Sara, vakhala wiira sinooniphwanya mixankiho simosa-ru? (Mir. 31:30; 1 Tim. 6:17-19)
Munrowa otakiha sai olipa murima wa Sara? C
Efootu C
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Sara nuumala ohihimuxiwa?
Mwiixutte itthu sikina
Kiireke ntakiheryo na Sara ninvareleya muteko paahi para athiyana ootheliwa? Aahiiso ninnivareleya-tho muteko para alopwana oothela?
Nwehe moota okumi wa Sara onnikhaliherya aya wiiwexexa nivarihano Yehova aapanke awe ni aisarayeli ni makristau oothanliwa 144.000.
“Yoowiiraneya ya nthoonyeryo” erina efaita para hiyo (Owehaweha 15/03/2006 ipaax. 10-12)
a Nuuvira okathi, Sara waahimphwanya muxankiho mmosa-ru, okathi mwene Abimeleki aaphavela awe omukuxa. Moolipa murima Sara aahitthara miruku sa Abrahamu, nave ekwaha ela Yehova aahimoopola.