Son drio servir a Geovà in Cuba romai fà 70 ani

Me ricordo che la nostra vita la era pròpio tranquila. Èrino de star darente dei nostri zii, zie e noni. Gaveino el magnar e i soldi che ne ocorea par gaver una vita felice.

Quando mi gavea intorno de sinque ani, i me genitori i ga scominsià a studiar la Bìblia con Walton Jones. Lu l’era un bravo predicador che el caminea quasi diese ore sol par rivar ala nostra pìcola cità. Sempre che el vegnea, tanti dela me fameia i se riunia nela casa dei me noni par passar ore drio discorer sora la Bìblia con lu. I me genitori, el me zio, Pedro, e la me zia, Ela, i amea quel che i era drio imparar e suito i se ga batesà. Ancoi, la me zia, Ela, la ga quasi 100 ani e la ze ancora drio laorar come pioniera in Cuba.

In quel tempo, le Testimònie de Geovà le gavea libertà par adorar a Dio in Cuba. Le persone in Cuba le cognossea le Testimònie de Geovà par causa dela predicassion de casa in casa. Sempre gaveino tante publicassion sora la Bìblia par darghe, e camineino tanto! Mi go bei ricordi de servir a Geovà in quela època che le robe le era fàcile, ma no l’è stà sempre cossita. — 2 Tim. 4:2.

GA SCOMINSIÀ I PROBLEMI IN CUBA

Quando mi gavea intorno de sinque ani, el me pare e el me zio i ze ndati a una assemblea in nantra parte dela ìsola. Ma in quel viaio, lori due i ga ciapà la fiévera tifòide par causa dela àqua contaminada. Me ricordo che dopo che i ze tornadi, el me zio el ga perso i cavei, ma l’è restà vivo. Ma me pare l’è morto. Lu el gavea sol 32 ani.

Dopo che me pare l’è morto, me mama la ga dessidio che ndarìssino de star col so fradel, nela pìcola cità de Lombillo. Alora, ne tocaria assar indrio i nostri parenti e i nostri noni che ameino tanto. Ma la nostra fameia la ga seità a adorar a Geovà insieme.

In 26 de agosto de 1957, son stà batesà nte una stua darente de Lombillo quando mi gavea diese ani. Mi gnanca imaginea come che, in manco de due ani, la vita dele Testimònie de Geovà in Cuba la ndaria cambiar. In 1959, el governo el ga perso el poder e el paese l’è restà soto el governo comunista.

El novo governo el volea gaver un esèrsito forte e con tanti soldadi. Questo l’era un problema par le Testimònie de Geovà, che in tuto el mondo no le se mete nela polìtica e gnanca nele guere. Par quela, pin pian ghemo scominsià a perder la libertà par riunirse e par predicar. Col tempo, el governo el ga proibio la nostra predicassion e le nostre riunion, e sentene de fradei fedeli i ze stati metesti in preson. I guardi i seitea a darghe bote in arquanti de lori e no i ghe dea magnar che basta. Dele volte, i ghe dea magnar con sangue, una roba che la Bìblia la dise che la ze sbaliada.

Anca cole dificoltà, ghemo seità a riunirse par adorar a Geovà. (Ebr. 10:25) Fin gaveino assemblee in colònie o altri posti fora par el paese. Me ricordo che, una volta, un fradel el me ga assà doperar el posto ndove el metea le piégore par far la assemblea. No semo stati boni de netar vanti e gnanca de mandar via le piégore. Ancora cossita, ghemo bio la assemblea con tute le piégore insieme, quele de Geovà e quele del fradel! — Mic. 2:12.

Noantri ghe deino tanto valor al laoro dei fradei che i ne giutea a seitar a imparar dela Bìblia in quel tempo. Par esémpio, i discorsi dele assemblee i era gravadi in fita cassete e, dopo, le gravassion le era mandade par le Testimònie de Geovà in tuto el paese. Dele volte, sol due fradei i gavea de pareciar, far e gravar tuti i discorsi de una assemblea. E come ghe tochea far queste gravassion sconti, dele volte, se scoltea gali e altri bordei nela gravassion che ne fea rider. Se no ghen’era energia nel posto dela assemblea, un fradel el ghe tochea pedalar una bissicleta che la era ligada nte un mestier che fea luce col movimento dei pedai. Cossita, èrino boni de sonar la fita cassete e scoltar le assemblee. Noantri no gaveino tuta la libertà o tute le publicassion che i nostri fradei dei altri paesi i gavea. Ma sempre gaveino quel che ocorea par seitar darente de Geovà. E ne piasea tanto servir a Geovà insieme. — Nee. 8:10.

PIONIERI E GENITORI

Quando mi gavea 18 ani, go scominsià a servir come pioniero nela cità de Florida. Intorno de un ano dopo, son deventà pioniero spessial nela cità de Camagüey, che la era la capital de quela provìnsia. L’è stà lì che go cognossesto Emilia, una bela sorela de Santiago de Cuba. Ghemo scominsià a smorosar e, manco de un ano dopo, se ghemo maridà.

Go scominsià a laorar tuta la giornada nte una fàbrica de sùcaro. Mi e la Emilia no èrino pi boni de esser pionieri. Ma ancora cossita, voleino far tuto quel che podeino nel laoro par Geovà. Go scominsià a laorar dele tre dela note fin ùndese de matina nela fàbrica. No me piasea mia desmissiarme bonora cossita. Ma ero bon de ndar ala predicassion e a tute le riunion cola Emilia.

In 1969, ghemo bio el nostro primo fiol, Gustavo. Poco tempo dopo che l’è nassesto, i fradei che i tendea dela organisassion i me ga domandà par scominsiar a servir come superintendente de sircuito. In quel tempo, l’era normal in Cuba che i superintendenti i gavesse fioi. In quei ani, gaveino tanto de far, ma anca l’è stà una dele èpoche pi bele dela nostra vita. Par mi e la Emilia, l’era un privilègio poder giutar i nostri fradei e sorele de quela maniera. Intanto che laoreino nel sircuito, ghemo bio el nostro fiol Obed, dopo Abner e dopo de arquanti ani ghemo bio la nostra fiola, Mahely.

Quando me ricordo dei ani che ghemo laorà nel sircuito, resto contento de veder come Geovà el ga tendesto del so pòpolo in Cuba. Geovà anca el ne ga giutà a insegnar i nostri fioi a amarlo. Adesso, vao contarve come che la era la vita par mi e la Emilia nel tempo che laoreino nel sircuito.

EL LAORO DE SUPERINTENDENTE QUANDO NO SE PODEA PREDICAR E RIUNIRSE

Nei ani 60 e 70, quando el governo el ga proibio i fradei de adorar a Geovà, l’è stà tanto fadiga par lori seitar a predicar e a riunirse. I Saloni del Regno i ze stati saradi, missionari i ze stati paradi via del paese, tanti fradei gióveni i ze stati metesti in preson e el Betel in Havana l’è stà sarà.

Par causa dela proibission, sol podeino visitar i fradei nei fin de stimana. Alora, cada congregassion la ricevea una vìsita de due fin de stimane. Porteino poche robe e, tante volte, ndeino de bissicleta par no ciamar mia la atension dela polìssia e dei altri. Sicuro che i fradei no i parlea ai altri che ndeino visitarli. Gaveino de far finta che ndeino visitar i nostri parenti. E l’era fàcile far cossita parché ne parea pròpio che èrino drio visitar la nostra fameia. Dele volte, quasi desmentegheino che èrino là par far una vìsita de sircuito. (Mar. 10:29, 30) Ancora cossita, gaveino de ténderse. Tante volte, la polìssia la ne vegnea drio e la ne fea domande. I fradei che i ne ricevea casa soa i podea fin ndar in preson se i polissiai i vegnesse a saver. — Rom. 16:4.

In quei ani, ghemo cognossesto tanti fradei e sorele che i ze stati tanto generosi con noantri, anca se i gavea pròpio poco. In arquanti posti, ghen’era de pi moschini che persone. Ma i fradei i ne mostrea bontà e i ne assea doperar la ùnica rede contra moschini che i gavea, e cossita, podeino dormir meio ala note. Altri i ne ricevea de volentiera, anca se no i gavea tanto de magnar. Dele volte, èrino noantri che porteino el magnar par spartir con quei che i ne ricevea.

No podeino mia menar tuti i nostri fioi insieme quando ndeino visitar una congregassion. Alora, meneino solche un intanto che me mama e me sorela le tendea dei altri. In fati, viaiar con un bambin l’era una protession. Dele volte, i polissiai i sfrugnea nele nostre robe par veder se i catea publicassion. Ma noantri le scondeino rento el saco de panesei sporchi parché saveino che i polissiai no i ndaria sfrugnar lì.

Mi me stimo tanto dela Emilia par tuto quel che la ga fato par tender dei nostri fioi e giutarme nei ani che ghemo laorà nel tempo integral. In quela època, mi ero bon de laorar nela fàbrica e come superintendente de sircuito nel medèsimo tempo. Come? Dele volte, mi laorea una o due ore de pi par la stimana. Cossita, no me ocorea laorar nei fin de stimana. Ma dopo, go ricevesto de pi autorità nela fàbrica e me tochea laorar sete giorni par stimana. Ma go capio che, se mi desse ala me echipe laoro par mantegnerli ocupadi nei fin de stimana, mi saria bon de visitar una congregassion. Par quel che mi sò, i me paroni mai i ga savesto che mi no ndea mia laorar nei fin de stimana!

SON RESTÀ CONTENTO ANCA COI CAMBIAMENTI

Un giorno in 1994, i fradei che i era drio tender dela organisassion in Cuba i ga ciamà tuti i 80 superintendenti de sircuito par una riunion spessial in Havana. Che alegria l’è stà par tuti noantri riunirse dopo de tanti ani! In quela riunion, prima ghemo parlà sora arquanti cambiamenti dela organisassion. Dopo, i fradei i ga fato un anùnsio che ne ga assà spaventadi. Lori i ne ga dito che i ndaria dar i nostri nomi ale autorità! Parché far una roba cossita?

I fradei i ga spiegà che i era drio parlar cole autorità del governo par proar farli rispetar de pi le Testimònie de Geovà. Le autorità le ga domandà una lista con tuti i nome dei superintendenti de sircuito, e semo stati de acordo in dargheli. De lì avanti, lori i ga scominsià a rispetarne de pi.

Col tempo, i ne ga dato libertà par predicar e riunirse, anca se gnancora no èrino registradi de maniera ofissial come una religion. Dopo, ghemo savesto che le autorità le gavea belche i nomi de arquanti superintendenti, ma lori i volea che noantri ghe dessino questi nomi par veder se le informassion che i gavea le era giuste.

In setembre de 1994, ghemo ricevesto la permission de verder nantra volta el nostro Betel, e ghemo podesto doperar el stesso prèdio che l’era stà sarà 20 ani vanti.

Alora, in 1996, i fradei de Betel i ga ciamà mi e Emilia par telèfono e i ne ga convidà par servir in Betel. Nel scomìnsio, son restà spaventà e go dito ai fradei che ancora gavea de tender de due fioi che i era de star casa con noantri. Con bontà, i fradei i ga pensà sora la me situassion e dopo i ga dito che, ancora cossita, i volea che ndessino servir in Betel. Ghemo acetà el convite e ghemo scominsià a rangiarse par tuta la fameia ndar de star in Havana.

Par dir la verità, nel scomìnsio, no me piasea mia laorar in Betel. Mi gavea passà tanti ani nel laoro del sircuito e la me mente e el me cuor i era ancora in quela designassion. No me piasea tanto restar rento un scritòrio. Ma i altri beteliti, e ancora de pi la me sposa, Emilia, i me ga giutà a veder le robe dela maniera giusta. Col tempo, go scominsià a gaver alegria in quel laoro e, adesso, son contento de laorar in Betel.

Mi e la Emilia no semo pi gióveni. Ma semo tanto contenti quando pensemo in tuti i fradei e sorele che ghemo bio el privilègio de cognosser e de laorar insieme in quei ani. Semo ancora pi contenti de veder i nostri fioi e i nostri neti servir a Geovà. Se sentimo come el apòstolo Gioani el se sentia quando l’era vècio. Lu el ga dito: “No go alegria pi granda che questa: scoltar che i me fioi i continua a caminar nela verità.” — 3 Gio. 4.

Adesso, fà quasi 30 ani che mi e la Emilia semo drio servir in Betel. Anca se semo veci e ghemo problemi par causa dela età e de un càncaro, seitemo a far el nostro meio par tender dela nostra designassion. In tuti i ani che ghemo laorà par Geovà, ghemo bio arquante dificoltà. Ma semo contenti parché semo stati boni de servir al “Dio felice” par quasi 70 ani qua nela ìsola de Cuba! — 1 Tim. 1:11; Sal. 97:1.