DOMANDE DEI LETORI

De che due acordi Paolo l’era drio parlar in Gàlati 4:24?

Dopo de parlar sora Abraon, Sara e Agar, Paolo el ga dito: “Queste robe le rapresenta altre robe: le due done le rapresenta due acordi.” (Gàl. 4:22-24) Nel passà, penseino che Paolo l’era drio parlar del novo acordo e del acordo dela Lege mosaica. Dopo de studiar de pi questi versìcoli, ghemo visto che ghemo de cambiar quel che credeino sora questo assunto. Par che Paolo no l’era drio parlar del novo acordo, ma l’era drio parlar del acordo che Dio el ga fato con Abraon. Ndemo capir un pochetin meio.a

Agar, che la era schiava, la vol dir el acordo dela Lege che l’è stà fato nel Monte Sinai in 1513 vanti de Cristo. (Éso. 19:5, 6; Gàl. 4:25) Come i giudei i era imperfeti, nissuni i era boni de obedirghe del tuto ala Lege. Cossita, lori i se ricordea che i era schiavi del pecato. El acordo dela Lege anca giutea i giudei a saver chi che saria el Messia parché sol lu el saria bon de obedir ala Lege de maniera perfeta. Dopo che Gesù el ga dato la so vita come sacrifìssio, tuti i umani imperfeti i podaria esser lìberi del pecato e dela morte. (Gàl. 3:19, 24, 25) Par quela, dopo de questo nissuni pi i gavaria de bisogno dela Lege mosaica. — Rom. 10:4.

Paolo el ga dito che Sara, “la dona lìbera” la ga bio un fiol ‘par meso de una promessa’. (Gàl. 4:23) Questa promessa la era el acordo che Dio el gavea fato con Abraon. (Gàl. 3:29; 4:28, 30) In Génesi 22:18, Geovà el ga parlà sora questo acordo: “E, par meso dela to dissendensa, tute le nassion dela tera le riceverà una benedission, parché te ghè scoltà la me voce.”

Par meso del acordo che Geovà el ga fato con Abraon, lu el ga mostrà come el ndaria realisar la promessa che el gavea fato nel giardin del Èden. (Gén. 3:15) Lu el ga mostrà che el “dissendente” el ndaria vegner dela fameia de Abraon. Paolo el ga spiegà che la parte prinsipal de questo “dissendente” la ze Gesù Cristo. Ma i 144.000 untadi anca i ndarà governar insieme de Gesù. (Gàl. 3:16, 29; Apo. 14:1-3) Par causa dela promessa che Geovà el ga fato a Abraon, quei che i va drio a Gesù i ndarà ricever tante benedission.

Alora, cossa Paolo el volea dir quando el ga scrito le parole in Gàlati 4:24? Lu l’era drio mostrar che, se i giudei in quel tempo i seitesse a ndar drio ala Lege mosaica, lori i seitaria a esser schiavi, cossita come Agar. Ma se lori i credesse e ndesse drio al “dissendente” de Abraon, Gesù Cristo, lori i saria lìberi compagno a Sara. Parché? Parché lori i saria lìberi del pecato e dela morte. (Gio. 8:32-34) Se lori no i gavesse fede in Gesù, i ndaria mostrar che no i gavea capio parché Geovà el gavea fato la Lege mosaica.

Tanti dei fradei dela congregassion dela Galàssia che Paolo l’era drio scriverghe no i era giudei e mai i ga bio de obedir ala Lege. Ma arquanti giudei i volea che lori i ndesse drio ala Lege, come la lege dela sirconsision. Alora, Paolo el ga spiegà che no l’era giusto spetar che i fesse cossita. Lori no i gavea de esser schiavi dela Lege. Lori i era lìberi parché i era belche deventadi dissìpoli de Gesù. — Gàl. 5:1, 10-14.