Oboresorọ Avwanre Vwọ Guọnọ Ọtanhirhe Na

1-2. Die yen e che sivwin avwanre vrabọ rọyen, kẹ diesorọ? (Rom 7:22-24) (Ni uhoho na.)

VWẸ ẹwẹn roro ọshare ọvo rẹ uwevwin she teyen, erọnvwọn ri she teyọn na gbarọ siotọ. Ẹkẹvuọvo, o ji rhi ghwuu, jẹ o se vrẹn nẹ uwevwin na fikirẹ ekuakua ri she teyọn naa. Ọtiọyena ko bunu rere ihwo sa vwọ vwẹ ukẹcha vwọ kẹ.

² Ẹdia avwanre ohwo ọvuọvo pha kerẹ ọ rẹ ọshare yena. Diesorọ a vwọ ta ọtiọyen? Ọke rẹ Adam vwo gbevwọso Ọmemama rọyen nu, ọ da rhe dia orumwemwu. Ọke vwọ yanran na, emọ rọyen da riuku rẹ umwemwe. Fikirẹ ọnana, umwemwu ra riuku rọyen da rhe gba ihworakpọ eje siotọ kerẹ ufi, jẹ ohwo vuọvo herọ rọ cha sa vrabọ rẹ oborẹ umwemwu ghwa chaa. Ọyinkọn Pọl nabọ djisẹ rẹ ẹdia umwemwu rẹ avwanre hepha vwẹ ileta ro si rhe iniọvo ri Rom. (Se Rom 7:22-24.) Ọ rẹ re nẹ e sivwin ọyen nẹ “ugboma nana ro ghwẹ na.” Umwemwu rẹ Pọl riuku rọyen, rọ je ghwa ughwu cha yen gbarọ siotọ. (Rom 6:23) Ẹdia nana yen avwanre eje hepha. Avwanre guọnọ usivwin!

3. Erhọ yen idjerhe evo ọtanhirhe na se vwo sivwin avwanre?

³ Pọl nama vwo ẹwẹn ivivẹ ro vwo ku eta rọyen phiyọọ. Rọ vwọ nọ nẹ: “Ono yen che sivwin uvwe vwo nẹ ugboma nana ro ghwẹ na?” ọyen ọvo da kpahenphiyọ onọ na gorigori nẹ: “Me kpẹvwẹ Ọghẹnẹ womarẹ Jesu Kristi Ọrovwavwanre!” (Rom 7:25) Ọtanhirhe ri Jesu yen Pọl rionbọ ra.a Ọtanhirhe na se sivwin avwanre womarẹ (1) evwoghovwo rẹ imwemwu avwanre, (2) sivwin avwanre vwo nẹ ẹdia rẹ umwemwu ra hepha, je (3) nẹrhẹ avwanre vẹ Ọmemama avwanre rhuẹrẹ kugbe. Re che vwo djunute ẹkpo ọvuọvo na, ẹguọnọ avwanre kpahen Jihova kọ cha rha ganphiyọ, rọ dia “Ọghẹnẹ rọ kẹ ohwo iphiẹrophiyọ.” (Rom 15:13) Ọtiọyen ọdavwaro avwanre kpahen Jesu je cha ganphiyọ rọ dia ohwo ra​—‘wan oma rọyen vwọ tan avwanre hirhe.’​—Kọl. 1:14.

ỌTANHIRHE NA YEN NẸRHẸ JIHOVA SE VWO GHOVWO AVWANRE

4-5. Diesorọ avwanre eje vwọ guọnọ ọtanhirhe na? (Aghwoghwo 7:20)

⁴ Avwanre guọnọ ọtanhirhe na rere a sa vwọ reyọ imwemwu avwanre vwo ghovwo avwanre. Kohwo kohwo yen ru umwemwu, owenẹ vwọrẹ ota yẹrẹ uruemu. (Se Aghwoghwo 7:20.) O vwo imwemwu evo re pha gangan. Kerẹ udje, vwẹ otọ rẹ Urhi ri Mosis, ohwo ro gbe igberadja yẹrẹ dẹ ozighẹ, orhiẹn rẹ ughwu yen e brẹ hwe. (Liv. 20:10; Ukeri 35:30, 31) Jẹ, imwemwu evo ghwa gan te ọtiọyeen, dedena ayen eje imwemwu. Kerẹ udje, ọbuine Devid da ta: “Me sẹro rẹ idjerhe mẹ, rere ẹrẹnvwe mẹ vwo jẹ imwemwu eruo.” (Une 39:1) Uyota nẹ, o vwo ọkievo avwanre vwọ reyọ ẹrẹnvwe avwanre vwo ruẹ umwemwu.​—Jems 3:2.

⁵ Vwẹ ẹwẹn roro obo wo ruru vẹ eta evo ru wọ tare vwẹ obuko re. O vwo obo wọ tare ru wo niri nẹ o fori nẹ wọ rhan rhivwin? O vwo erọnvwọn evo wo ruru ru wọ da viẹ idiekpọvwẹ? Aphro herọọ nẹ, ẹkpahọnphiyọ wẹn vwọ kẹ enọ nana e. Baibol na tare nẹ: “Avwanre da tanẹ, ‘Avwanre ruẹ umwemwu-u,’ jẹ avwanre phiẹn oma rẹ avwanre, jẹ uyota na hẹ oma rẹ avwanre-e.”​—1 Jọn 1:8.

6-7. Die yen Jihova mu evwoghovwo rẹ imwemwu rẹ avwanre kpahen? (Ni uhoho na.)

⁶ Ọtanhirhe na yen Jihova mu evwoghovwo rẹ avwanre kpahen. (Ẹfe. 1:7) Ẹkẹvuọvo, ọ dia ọyen o vwo mudiaphiyọ nẹ o rhe nẹ imwemwu rẹ avwanre fiemuu. Jihova nẹ imwemwu kuẹrofiaa. (Aiz. 59:2) Vwo nene orhiẹn abavo rọyen, o vwo ghovwo avwanre siẹrẹ o de fo nẹ o ru ọtiọyen.

⁷ Urhi ri Mosis guọnọre nẹ ihwo rẹ Izrẹl ri ru umwemwu ze izobo rẹ arhuẹrẹ. (Liv. 4:27-31; 17:11) Izobo tiọyena rionbọ kpo izobo rọ ma rho kparobọ rọ dia izobo ri Jesu vẹ ebruphiyọ rọ cha ghwa rhe. Womarẹ izobo rọyen yen Jihova cha vwọ reyọ imwemwu avwanre vwo ghovwo avwanre. Pọl nabọ vwo ẹruọ rẹ ọghanrovwẹ rẹ oborẹ ughwu ri Jesu mudiaphiyọ vwẹ ileta ro si rhe iniọvo ri Kọrẹnt. O vwo kere erharhe iruemu rẹ ayen ruẹ jovwo nu, ọ da vuẹ ayen: “A hworhẹ ovwan fon re; e ru ovwan fuanfon re; e se ovwan evwata re vwẹ odẹ rẹ Ọrovwavwanre Jesu Kristi kugbe ẹwẹn rẹ Ọghẹnẹ rẹ avwanre.”​—1 Kọr. 6:9-11.

8. Die yen o fori nẹ wo vwo vwẹ ẹwẹn ru wo vwo muegbe wo vwo kpo Ẹkarophiyọ rẹ ughwu ri Jesu na?

⁸ Ru wo vwo muegbe wo vwo kpo Ẹkarophiyọ rẹ ughwu ri Jesu na, ghwọrọ ọke vwo roro kpahen oborẹ evwoghovwo ri Jihova mudiaphiyọ kẹ wẹ. Kerẹ udje, fikirẹ ọtanhirhe na, o rhe fo wọ vwọ ro ẹnwan kpahen imwemwu ru wo ruru vwẹ obuko re, ru wọ je dobọ rayen ji ree. Kẹ, ọ da rha dianẹ wọ mrẹ bẹnbẹn wo vwo ru ọtiọyen vwo? Ọ sa dianẹ wọ vuẹ oma wẹn nẹ, ‘Me riẹnre nẹ Jihova se vwo ghovwo uvwe, jẹ mi che se vwo ghovwo oma mẹẹ.’ Ọ da dia ọtiọyen oma ru we, karophiyọ ọnana: Jihova yen vwo ghovwo ohwo, ọ je vwẹ ogangan kẹ Ọmọ rọyen nẹ ọ vwẹ ihwo vwo guẹdjọ. Jihova je reyọ owẹ yẹrẹ ohwo ọfa vwo mu nẹ o brorhiẹn rẹ ohwo rẹ ọyen che gbe arodọnvwẹ kẹ yẹrẹ ohwo rẹ ọyen che gbe kẹẹ. Baibol na da: “Ọ da dianẹ avwanre yan vwevunrẹ urhukpẹ na kirobo rẹ [Jihova] hẹ evunrẹ urhukpẹ na, . . . ọbara ri Jesu rọ dia Ọmọ rọyen ji ru avwanre fon vwo nẹ imwemwu ejobi.” (1 Jọn 1:6, 7) Kirobo avwanre vwo imuẹro kpahen iyono efa rehẹ Baibol na ọtiọyen o ji fo nẹ e vwo imuẹro kpahen ọtanhirhe na. Ọtanhirhe na yen nẹrhẹ Jihova gbe arodọnvwẹ kẹ avwanre kirobo Baibol na tare nẹ ọ vọnre “vẹ evwoghovwo.”​—Une 86:5.

ỌTANHIRHE NA NẸRHẸ AVWANRE VWO USIVWIN

9. Vwọ vrẹ obo re brare, die yen umwemwu churobọ si? (Une rẹ Ejiro 51:5 kugbe eta rehẹ obotọ)

⁹ Vwẹ Baibol na, ọ dia obo re ruẹ ọvo yen ota na “umwemwu” mudiaphiyọọ, ẹkẹvuọvo o ji mudiaphiyọ jẹgba rẹ avwanre riuku rọyen ghwe vwo nẹ ọke ra vwọ mrevun avwanre. (Se Une rẹ Ejiro 51:5) Ọ dia jẹgba na di mu avwanre vwo ru obo re brare ọvoo, ẹkẹvuọvo, ọ siẹ ẹgba rẹ oma rẹ avwanre vwọ họnre ega kpotọ, ọnana kọ nẹrhẹ avwanre muọga, ghwa ji ghwẹ. Ọyena nẹrhẹ e vwo ẹruọ rẹ oboresorọ emọboba ri ji ru umwemwu dẹvoo vwọ muọga je tobọ ghwẹ. O ji djisẹ oboresorọ emamọ ihwo vẹ erharhe ihwo vwọ rioja ji ghwẹ. Ọtiọyena, kohwo kohwo ro nẹ uvwiẹ rẹ Adam rhe yen riuku ri jẹgba nana.

10. Die yen jẹgba ru vwẹ oma rẹ Adam vẹ Ivi?

¹⁰ Roro kpahen oborẹ jẹgba nana ru vwẹ oma rẹ ọshare vẹ aye rẹsosuọ na. Ọnana hra ẹwẹn rayen totọ. Ayen vwo gbe vwọso nu, o rhe krii Adam vẹ Ivi da rioja oborẹ ayen ruru rẹ ayen vwo gbevwọso urhi rẹ Ọghẹnẹ​—urhi re si “phiyọ ubiudu rayen.” (Rom 2:15) Ayen vwo oniso ewene ọvo vwẹ oma rayen​—jẹ ọ dia ọ rẹ erhuvwuu. Ayen niro nẹ o fori ayen vwo rhurhu oma rayen ji siomanu kẹ Ọmemama rayen kerẹ ihwo re churhi. (Jẹn. 3:7, 8) Ọnana yen obọ rẹsosuọ ẹnwan, oshọ, ọmiaovwẹ, omavovwẹ kugbe ẹwẹn rẹ abe vwo kpokpo Adam vẹ Ivi. Unu che se gbe oborẹ erọnvwọn nana kpokpo ayen te rhi te ẹdẹ ughwu rayeen.​—Jẹn. 3:16-19.

11. Die yen jẹgba ru vwẹ oma rẹ avwanre?

¹¹ Oborẹ jẹgba ru vwẹ oma rẹ ọshare vẹ aye rẹsosuọ na, ọtiọyen yen o ji ruẹ vwẹ oma rẹ avwanre. Jẹgba rẹ avwanre riuku rọyen na yen ghwa omaẹlaghọ avwanre eje rhe. O toro obo ra davwẹngba te ẹdia avwanre se vwo yovwinphiyọọ, asan ra gba ẹghwẹre phiyọ etiyin ọ je hepha. Diesorọ? Kidie Baibol na tare nẹ avwanre hẹ ‘ẹdia ofefe.’ (Rom 8:20) Uyota nẹ ọ dia avwanre ohwo ọvuọvo yehẹ ẹdia nanaa, ẹkẹvuọvo ihworakpọ eje. Kerẹ udje, roro kpahen oborẹ ihworakpọ davwẹngba te ayen vwọ vwẹrote akpọ na, si uweren no, urhi-ẹchọ kugbe oborẹ ayen sa vwọ ghwa ufuoma rhe akpọ na eje. Dede nẹ ayen ru enana eje erọnvwọn se vwo yovwinphiyọ, ẹgbaẹdavwọn rayen eje ofefe. Mavọ yen ọtanhirhe na se vwo si avwanre nẹ abọ rẹ jẹgba nana?

12. Iphiẹrophiyọ vọ yen ọtanhirhe na vwọ kẹ avwanre?

¹² Ọtanhirhe na nẹrhẹ e vwo iphiẹrophiyọ nẹ “e che si emama na vwo nẹ ọviẹn vwọ kẹ egbon.” (Rom 8:21) Siẹrẹ a da rhe reyọ erhuvwu rẹ ọtanhirhe na cha ghwa rhe vwo ruiruo vwẹ akpọ kpokpọ na​—oshọ, ẹnwan, ọga, omavovwẹ, ọmiaovwẹ kugbe ẹwẹn rẹ abe rhe che kpokpo avwanree. Vwọba, ẹgbaẹdavwọn rẹ avwanre vwọ vwẹrote akpọ na je dia vwọrẹ ufuoma rha cha dia ofefee, avwanre ki che phi ebẹnbẹn eje kparobọ vwẹ otọ rẹ usuon “Ọmọ rẹ ovie rẹ Ufuoma,” Jesu Kristi rọ tan avwanre hirhe.​—Aiz. 9:6, 7.

13. Ọrhọ yen orọnvwọn ọfa wo se roro kpahen ru wo vwo muegbe kẹ Ẹkarophiyọ rẹ ughwu ri Jesu na?

¹³ Roro kpahen obo ro mudiaphiyọ re vwo sivwin uwe vwo nẹ ẹdia umwemwu. Vwẹ ẹwẹn roro oborẹ akpọ cha dia rẹ wo de vrẹn sasasa kurhiọke kurhiọke ababọ rẹ oshọ nẹ owẹnvwe che hwe we vẹ ihwo ru wo vwo ẹguọnọ kpahen, nẹ ayen cha muọga yẹrẹ ghwuu. Asaọkiephana, wọ vwọ yọnrọn iphiẹrophiyọ na kokoroko ‘kerẹ ọtan vwọ kẹ erhi na, ro muẹro rọ je ghwotọ’ na, wo ji se vwo ufuoma. (Hib. 6:18, 19) Kirobo rẹ a reyọ ọtan vwọ sa okuna viẹ ye, ọtiọyen iphiẹrophiyọ rẹ Onenikristi ji ru esegbuyota rọyen gan je cha uko vwo chirakon rẹ kọdavwini kọdavwini ro hirharokuẹ. Vwọrẹ uyota, e se vwo imuẹro nẹ Jihova cha “hwosa vwọ kẹ ihwo re nabọ guọnọ.” (Hib. 11:6) Ọtanhirhe na yen kẹ avwanre omafuvwe asaọkiephana kugbe iphiẹrophiyọ rẹ avwanre vwo kpahen obaro na.

ỌTANHIRHE NA RHIE UPHẸN RẸ ARHUẸRẸ PHIYỌ

14. Idjerhe vọ yen umwemwu vwo gbowọphiyọ oyerinkugbe avwanre vẹ Jihova, kẹ diesorọ?

¹⁴ Ghwe vwo nẹ ọke rẹ Adam vẹ Ivi vwo ru umwemwu nu, yen ayen vwọ hẹrioma yẹrẹ sherabọ kẹ Ọghẹnẹ. Baibol na tobọ tanẹ ihworakpọ eje de rhi sherabọ kẹ Ọmemama na. (Rom 8:7, 8; Kọl. 1:21) Diesorọ? Kidie iwan egbagba ri Jihova nẹrhẹ ọ rhọnvwaphiyọ umwemwuu. Baibol na da ta kpahen Jihova nẹ: “Ẹro rọye fon nọ o rhe ju we vwo ni umiovwo-o o rhe ju we vwo ni obo re chọre-e.” (Hab. 1:13) Umwemwu de rhi phi uvwre phiyọ oyerinkugbe rẹ ihworakpọ vẹ Ọghẹnẹ. O vwo ohwo vuọvo rọ vẹ Jihova se vwo oyerinkugbee jokpanẹ avwanre vẹ ọyen ke rhuẹrẹ kugbe. Ọtanhirhe na yen nẹrhẹ avwanre vẹ ọyen sa rhuẹrẹ kugbe.

15. Ono yen a reyọ ọtanhirhe na vwo pharo, kẹ dia yen nẹ obuko rọyen rhe?

¹⁵ Baibol na tare nẹ Jesu yen “izobo rẹ arhuẹrẹ vwọ kẹ imwemwu rẹ avwanre.” (1 Jọn 2:2) Ota ri Grik ra fan phiyọ “izobo rẹ arhuẹrẹ” se mudiaphiyọ “re vwo pharo.” Idjerhe vọ yen ọtanhirhe na vwọ dia aroephoro kẹ Jihova? E jẹ e no nẹ ughwu rẹ Ọmọ rọyen na ghwa omavwerhovwẹn rhe Jihovaa. Ukperẹ ọtiọyen, ọtanhirhe na yanmu iwan orhiẹn abavọ ri Jihova. Ọnana kọyen nẹrhẹ ọ mrẹ obo rọ vẹ ihworakpọ se vwo vwo oyerinkugbe. (Rom 3:23-26) Ọtiọyena, ko se kere ihworakpọ re fuevun ga vwẹ obuko re ba ‘evwata’ tavwen Jesu ki ghwu. (Jẹn. 15:1, 6) Vwẹ idjerhe vọ? Fikirẹ ọtanhirhe ri Jesu rọ cha vwẹ obaro na. Jihova vwo imuẹro kokoroko nẹ Jesu rọ dia Ọmọ rọyen cha hwosa rẹ ọtanhirhe na. (Aiz. 46:10) Ọtiọyena, ọtanhirhe na de rhi rhie uphẹn phiyọ rẹ ihworakpọ vẹ Ọghẹnẹ sa vwọ rhuẹrẹ kugbe.

16. Die yen erọnvwọn efa wo se roro kpahen wo vwo muegbe wo kpo Ẹkarophiyọ rẹ ughwu ri Jesu rẹ enukpe nana? (Ni uhoho na.)

¹⁶ Roro kpahen oborẹ arhuẹrẹ rẹ avwanre vẹ Ọghẹnẹ mudiaphiyọ kẹ wẹ. Kerẹ udje, ọ sa dianẹ wo se Jihova kerẹ “Ọsẹ” wẹn, kirobo rẹ Jesu tare. (Mat. 6:9) Ọkievo wo ji se djisẹ rẹ Jihova kerẹ “Ugbeyan” wẹn. Siẹrẹ e de se Jihova “Ugbeyan” yẹrẹ “Ọsẹ” rẹ avwanre, e je ruo vwọrẹ ọghọ vẹ oshọẹdjẹ. Diesorọ? Kidie avwanre muwan avwanre vwo sikẹrẹ Jihova fikirẹ ẹdia rẹ umwemwu rẹ avwanre hephaa. Womarẹ ri Jesu, Jihova de ruo rere o vwo “nene erọnvwọn ri chekọ eje rhuẹrẹ kugbe womarẹ ọbara [ri Jesu] ku kuotọ vwẹ enu rẹ urhe rẹ oja na.” (Kọl. 1:19, 20) Ọna yen sorọ avwanre vẹ Jihova se vwo vwo uvi oyerinkugbe dede nẹ avwanre ihwo re gbaree.

ỌTANHIRHE NA DJE ARODỌNVWẸ RI JIHOVA PHIA

17. Idjerhe vọ yen ọtanhirhe na vwo dje arodọnvwẹ ri Jihova phia? (Ẹfesọs 2:4, 5)

¹⁷ Ọtanhirhe na djere phephẹn nẹ Jihova “vwo arodọnvwẹ mamọ.” Ọ “kẹ avwanre arhọ . . . dede nẹ avwanre ghwuru vwevunrẹ imwemwu.” (Se Ẹfesọs 2:4, 5.) Ihwo ri “vwo omamọ ẹwẹn rẹ ayen vwọ dia idjerhe ro suẹn kpo arhọ ri bẹdi bẹdẹ” na kperẹ nẹ a rhe vwẹ ukẹcha kẹ ayen, kidie umwemwu rẹ ayen riuku rọyen gba ayen siotọ, ọtiọyena ayen guọnọ ukẹcha. (Iruo 13:48) Jihova kpahenphiyọ use rẹ ihwo tiọyena womarẹ ovuẹ rẹ Uvie na rere ayen sa rhe vwọ riẹn vẹ Jesu rọ dia Ọmọ rọyen. (Jọn 17:3) Ọ da dianẹ Idẹbono roro nẹ ẹvwọsuọ rẹ Adam vẹ Ivi gbowọphiyọ ọhọre rẹ Ọghẹnẹ, jẹ iroro phiẹn rẹ.

18. Ọrhọ yen okpota ọvo rọhẹ otọ ro fori nẹ e vwo vwẹ ẹwẹn re vwo roro kpahen ọtanhirhe na?

¹⁸ E vwo roro kokodo kpahen erhuvwu rẹ ọtanhirhe na ghwa rhe na, o ji fo a vwọ karophiyọ okpota rọhẹ otọ. Ukpe re vwo no nẹ e ru ọrhuẹrẹphiyotọ rẹ ọtanhirhe na fikirẹ usivwin rẹ avwanre ọvo, e jẹ a karophiyọ nẹ Jihova je reyọ ọtanhirhe na vwọ kpahenphiyọ kẹ Eshu ro sere abọ vwẹ ogba rẹ Idẹn. (Jẹn. 3:1-5, 15) Jihova je womarẹ ọtanhirhe na vwo ru odẹ rọyen fon ji phoro kekan kekan re mu banre odẹ rọyen no. O dje ẹguọnọ rọyen phia womarẹ o vwo si avwanre vwo nẹ abọ rẹ umwemwu vẹ ughwu. Dede nẹ avwanre irumwemwu, ọ je vwẹ uphẹn kẹ avwanre re vwo dje Eshu phiyọ ọvwọrefian fikirẹ ẹse re muwan rọyeen na. (Isẹ 27:11) Mavọ wo se vwo dje ọdavwaro phia kpahen ọtanhirhe na? A cha kpahenphiyọ onọ yena vwẹ uyono rọ vwọ kpahen ọnana.