Die Wo Che ru Vwo Dje Ọdavwaro Kpahen Ọtanhirhe Na?

1-2. Die yen izobo rẹ ọtanhirhe ri Jesu na che mu avwanre vwo ru, kẹ diesorọ? (2 Kọrẹnt 5:14, 15) (Ni uhoho na.)

Ọ DA dianẹ ohwo ọvo kpono uwe vwo nẹ evunrẹ uwevwin ro she teyen owẹ na, o muẹro nẹ wo che dje ọdavwaro kẹ ohwo tiọyen ro sivwin arhọ wẹn na. Ọ da tobọ dianẹ e ji sivwin ihwo efa, wẹ komobọ cha kpẹvwẹ ohwo na vwo djephia nẹ wọ vwẹ ẹro okueku vwo nẹ obo ro ru kẹ wẹ naa.

² Kirobo ra ta ota kpahen vwẹ uyono rọ wanre na, avwanre ọvo che se sivwin oma rẹ avwanre vwo nẹ umwemwu ra riuku rọyen naa. Ẹkẹvuọvo, izobo rẹ ọtanhirhe ri Jesu se sivwin avwanre (1) womarẹ evwoghovwo rẹ imwemwu rẹ avwanre, (2) vwo nẹ ẹdia rẹ umwemwu rẹ avwanre hepha na, kugbe (3) a vẹ Ọghẹnẹ sa vwọ rhuẹrẹ kugbe. Ọnana nẹrhẹ e vwo iphiẹrophiyọ rẹ avwanre vwọ dia bẹdẹ vwẹ akpọ kpokpọ ri Jihova veri na. Vwọrẹ uyota, ọtanhirhe na dje oborẹ Jesu vwo ẹguọnọ rẹ ihworakpọ te​—o vwo ẹguọnọ nana ọke grongron tavwen e ki rhi vwiẹ kerẹ ohwo rọ gbare. (Isẹ 8:30, 31) Ọyinkọn Pọl siri nẹ “ẹguọnọ rẹ Kristi vwori yen suẹn avwanre.” (Se 2 Kọrẹnt 5:14, 15.) Ọnana mudiaphiyọ nẹ e dje ọdavwaro phia fikirẹ ẹguọnọ ri Jesu na, nẹ a vwẹ ẹro okueku vwo noo.

3. Diesorọ ọdavwaro rẹ ohwo ọvuọvo kpahen ọtanhirhe sa vwọ fẹnẹ?

³ Die yen wo che ru vwo dje ọdavwaro phia kpahen izobo rẹ ọtanhirhe na? Ẹkpahọnphiyọ wẹn sa fẹnẹ ọ rẹ ohwo ọfa. Kerẹ udje, vwẹ ẹwẹn roro nẹ ihwo erha guọnọ kpo asan ọvo, ẹkẹvuọvo asan sansan yen ayen nẹ cha. Idjerhe rẹ ayen cha wan fẹnẹre. Ọtiọyen ọ je pha nẹ “idjerhe”​—kọyen obo ri che mu we vwo dje ọdavwaro phia kpahen ọtanhirhe na, e muro kpahen oyerinkugbe wẹ vẹ Jihova vwori enẹna. Vwẹ uyono nana, a cha ta ota kpahen ẹko rẹ ihwo erha: (1) ihwo ra vwẹ Baibol vwo yono, (2) Inenikristi ri bromaphiyame re, kugbe (3) iniọvo ri bo ghwru nẹ ukoko na.

IHWO RA VWẸ BAIBOL VWO YONO

4. Idjerhe vọ yen Jihova vwo vwo oniso rẹ ihwo ra vwẹ Baibol vwo yono?

⁴ Roro kpahen ọnana ọ da dianẹ wo yono Baibol na: Owenvwe wẹn kpahen iyẹnrẹn esiri na odjephia nẹ wẹwẹ ọvo usun rẹ ihwo ri Jihova guọnọ sikẹrẹ oma rere ọ vẹ owẹ se vwo vwo oyerinkugbe. (Jọn 6:44; Iruo 13:48) “Ọrovwohwo re davwa udu rẹ ihwo nẹ.” Ọnana mudiaphiyọ nẹ ọ mrẹ ẹgbaẹdavwọn ru wo vwo yono kpahọn, oma je vwerhọn siẹrẹ ọ da mrẹ wẹ wọ yanphiaro vẹ ewene ru wo ruẹ wo se vwo nene iwan rọyen. (Isẹ 17:3; 27:11) Ọtanhirhe na nẹrhẹ wọ vẹ Jihova se vwo oyerinkugbe ọkpẹkpẹkpẹ. (Rom 5:10, 11) Wọ vwẹ ẹro okueku vwo noo.

5. Mavọ yen ihwo ra vwẹ Baibol yono sa vwọ reyọ odjekẹ rọhẹ Filipae 3:16 vwo ruiruo?

⁵ Kerẹ ohwo ra vwẹ Baibol yono, mavọ wo se vwo dje ọdavwaro kpahen ọtanhirhe na? Idjerhe ọvo yen wo vwo nene uchebro rẹ ọyinkọn Pọl vwọ kẹ iniọvo ri Filipae: “Asan rẹ avwanre yan obaro te, e jẹ avwanre rha yan obaro vwẹ idjerhe vuọvo na.” (Fil. 3:16) Baibol ọfa da rha fan ẹkpo nana ọtiọna: ‘Ofori nẹ avwanre rha yan vwẹ idjerhe vuọvo rẹ avwanre hepha na.’ Vwo nene odjekẹ yena, wo jẹ emu vuọvo gbowọphiyọ ẹyan obaro wẹn vwẹ idjerhe rẹ arhọ naa.​—Mat. 7:14; Luk 9:62.

6. Die yen ihwo ra vwẹ Baibol yono se ru ayen da mrẹ bẹnbẹn ayen vwo ru ewene? (Diutaronomi 30:11-14) (Ni uhoho na.)

⁶ Kọ da rha dainẹ o vwo uyono ri Baibol ọvo rẹ yono uwe o krinọ naa ru wọ mrẹre bẹnbẹn vwo? Gbe ru ehiahiẹ kpahọn, wọ je nẹrhovwo rhe Jihova nẹ ọ cha wẹ uko vwo vwo ẹruọ rọyen. (Une 86:11) Kọ da rha dianẹ wo nene odjekẹ ra vwọ kẹ wẹ vwẹ obenu na jẹ wọ je mrẹ bẹnbẹn wo vwo vwo ẹruọ rẹ uyono na vwo, gba ka vwẹ ọke kẹ oma wẹn​—ẹkẹvuọvo wọ dobọ rẹ uyono ri Baibol na jẹẹ. Kọ da rha dianẹ o vwo uruemu ọvo rọ riẹnriẹn owẹ obọ rọ vwọso Baibol na ru wọ mrẹ bẹnbẹn wọ vwọ dobọ rọyen ji vwo? Karophiyọ nẹ o vwo ọke vuọvo rẹ Jihova cha vwọ vuẹ ihworakpọ nẹ ayen ru vrẹ asan ẹgba rayen muruu. Wo se yeren akpọ vwo nene iwan rọyen. (Se Diutaronomi 30:11-14.) Jihova ji ve nẹ ọyen cha cha wẹ uko. (Aiz. 41:10, 13; 1 Kọr. 10:13) Ọtiọyena wo jẹ ofu dje wee. Dje ọdavwaro phia kpahen erọnvwọn eje ri Jihova vwọ kẹ wẹ, ọtiọyen ji te ọrhuẹrẹphiyotọ rẹ ọtanhirhe na, ukpe ru wo vwo mu ẹwẹn kpahen ebẹnbẹn wo hirharokuẹ nẹ i mu we rọ. Ẹguọnọ wẹn kpahen Jihova vwọ ganphiyọ ye, ku wọ cha mrẹvughe nẹ “irhi rọyen na dia oghwa ọhọhọhọ-ọ.”​—1 Jọn 5:3.a

7. Die yen imighene ra yọnre ghwanre vwevunrẹ uyota na se roro kpahen?

⁷ Kẹ ovwan imighene ra yọnrọn ghwanre vwevunrẹ uyota na vwo? Ovwan jẹ ihwo ra vwẹ Baibol yono. Vwọrẹ uyota, ovwan yen ihwo rẹ esẹ vẹ ini rẹ ovwan vwẹ Baibol yono re ma ghanre kẹ ayen. Baibol na da ta: “Sikẹrẹ Ọghẹnẹ, ko sikẹre owẹ.” (Jems 4:8; 1 Ikun 28:9) Wọ da jowọ wo vwo sikẹrẹ Jihova, ko ji che sikẹrẹ owẹ. Ọ dia kidie nẹ orua rẹ Iseri ri Jihova yen wọ dia ghwanre yen sorọ Jihova vwọ davwerhọn wẹẹ. O si we te oma kidie ọ guọnọre nẹ owẹ komobọ dia ugbeyan rọyen. Die yen nẹrhẹ wẹ vẹ Jihova komobọ se vwo uvi rẹ oyerinkugbe? Ọtanhirhe na​—wọ vwẹ erọ okueku vwo noo. (Rom 5:1, 2) Ọtiọyena, tavwen wo ki kpo Ẹkarophiyọ rẹ ughwu ri Jesu vwẹ enukpe nana, roro kpahen oborẹ ughwu ri Jesu mudiaphiyọ kẹ wẹ. Ọtiọyena, e jẹ ọdavwẹ yena mu we vwọ wian gangan kpahen kemu kemu wọ vwọ tua vwẹ ẹga ri Jihova​—vwo djephia nẹ wo vwo ọdavwaro kpahen ọtanhirhe ri Jihova ru ọrhuẹrẹphiyotọ rọyen womarẹ Ọmọ rọyen.b

INENIKRISTI RI BROMAPHIYAME RE

8. Idjerhe vọ yen Inenikristi ri bromaphiyame re vwo djephia nẹ ayen vwo esegbuyota kpahen ọtanhirhe na?

⁸ Wọ da dia Onenikristi ro bromaphiyame re, kọyen o vwo idjerhe sansan wo vwo dje esegbuyota kpahen ọtanhirhe na re. Kerẹ udje, wọ jowọ wo vwo sikẹrẹ Jihova ji yan nene iwan rọyen. Wo ji ru nene iji ri Jesu rọ tare nẹ a vuẹ ihwo efa kpahen obo ru wo segbuyota ji yono ihwo vwọ dia idibo. Wọ vwomakpahotọ kẹ Jihova ji bromaphiyame. A vwọso owẹ kidie nẹ ẹga rẹ uyota yen wọ hepha? (2 Tim. 3:12) Akoechiro wẹn djerephia nẹ wo vwo ẹguọnọ ri Jihova, nẹ wo ji vwo ọdavwaro kpahẹn ọtanhirhe na ro ru ọrhuẹrẹphiyotọ rọyen womarẹ Ọmọ rọyen.​—Hib. 12:2, 3.

9. Imuoshọ vọ yen ofori nẹ Inenikristi ri bromaphiyame re niso?

⁹ Kerẹ Inenikristi ri bromaphiyame re, o vwo imuoshọ ọvo ro fori nẹ e niso. Kidie ọke vwọ yanran na, a sa vwẹ ẹro okueku vwo nẹ ọtanhirhe na. Vwẹ idjerhe vọ? Roro kpahen obo re phia kẹ Inenikristi rehẹ Ẹfesọs vwẹ ẹgbukpe ujorin rẹsosuọ. A vwọ rhọvwọn Jesu nushi nu, o de jiri ayen fikirẹ akoechiro rayen. Ẹkẹvuọvo, ọ je vuẹ ayen nẹ: “Mi kere ọnana ba wẹ obọ, nẹ wo siobọnẹ ẹguọnọ ru wo vwori ẹsosuọ.” (Ẹvwọ. 2:3, 4) Eta ri Jesu na djerephia nẹ ọke vwọ yanran na, ẹga rẹ Onenikristi tiọyena kọ cha dia ọ rẹ e di ru. Ohwo tiọyena de nẹrhovwo, kpo uyono, ji vwobọ vwẹ iruo rẹ aghwoghwo na. Ẹkẹvuọvo, ọ dia ẹguọnọ yen muo vwo ru ọtiọyeen. Kẹ die wo se ru wo de noso nẹ ẹguọnọ wẹn kpahen Jihova rha gan kerẹ obo ri jovwoo?

10. Mavọ yen wo se vwo “roro kpahen” ji “muomaphiyọ” ẹga wọ vwọ kẹ Jihova? (1 Timoti 4:13, 15)

¹⁰ Ọyinkọn Pọl vuẹ Timoti nẹ o “roro kpahen” ji “muomaphiyọ” ẹga rọ vwọ kẹ Jihova. (Se 1 Timoti 4:13, 15.) Vwo nene uchebro yena, davwẹngba vwo roro kpahen idjerhe sansan wo se vwo ru ẹga wẹn yovwinphiyọ rere ‘ẹwẹn ọfuanfon na se vwo phi oruru phiyọ owẹ oma.’ (Rom 12:11) Kerẹ udje, wọ sa nabọ kerhọ vwẹ uyono womarẹ wọ vwọ nabọ frẹkotọ muegbe rẹ uyono na. Yẹrẹ wọ sa mrẹ erere vọnvọn vwo nẹ uyono ri Baibol wẹn rhe womarẹ wo vwo kpo asan ro fuoma wo de se roro kokodo kpahen oborẹ wo yonori. Kirobo re koko irhe phiyọ erhanre rere erhanre na vwo je fuen ye, ọtiọyen o ji fo nẹ avwanre rhe ru erọnvwọn nana rere ọdavwaro avwanre vwọ kpahen ọtanhirhe na vwọ rha ganphiyọ. Ọtiọyena, udughwrẹn evo tavwen e ki ruẹ Ẹkarophiyọ rẹ ughwu ri Jesu na, wo se roro kpahen ebruphiyọ rẹ oghẹresan buebun rẹ avwanre riavwerhen rọyen kerẹ Iseri ri Jihova. Aphro herọọ nẹ ọyena cha cha wẹ uko vwo ru ọdavwaro wẹn kpahen ọtanhirhe na ganphiyọ​—rọ dia obo re mu oyerinkugbe wẹn vẹ ọ rẹ Jihova kpahen.  

11-12. Ọ da dianẹ oruru kanre owẹ vwẹ ọmọke kẹ ọnana mudiaphiyọ nẹ ẹwẹn ọfuanfon rẹ Ọghẹnẹ re rhe wee? Djekpahọn. (Ni uhoho na.)

¹¹ Wo de noso nẹ oruru wẹn kpahen ẹga rẹ uyota rha hepha kirobo ro fori nẹ ọ diaa, wo jẹ ofu dje wee yẹrẹ wo rhe no nẹ ẹwẹn ọfuanfon rẹ Ọghẹnẹ rhe rhe wee. Karophiyọ oborẹ ọyinkọn Pọl si rhe iniọvo ri Kọrẹnt kpahen iruo rẹ aghwoghwo rọyen: “Mi rhe vwo owenvwe ri mi vwo ruo-o, mi ji che ruo ghene, kidie ọyen iruo ra vwọ kẹ vwẹ.” (1 Kọr. 9:17) Die yen otọ rẹ ota rọyen na?

¹² O ji vwo ọke evo rẹ owenvwe rẹ Pọl vwo ghwoghwota na vwo je rhe. Dedena, ọ choma ro vwo muomaphiyọ iruo rẹ aghwoghwo rọyen dede nẹ owenvwe na ghwe rhe ẹsosuọọ. Wo ji se ru ọtiọyen. Davwẹngba vwo ru obo ri fori ọ da tobọ dianẹ owenvwe na herọọ. Ọtiọyena gba nẹrhovwo rhe Ọghẹnẹ nẹ ọ kẹ wẹ ‘owenvwe vẹ ẹgba’ wo vwo ruiruo. (Fil. 2:13) Muomaphiyọ irueru rẹ ẹga na. Jẹ o muwẹro nẹ obo ru wo ruẹ enẹna cha nẹrhẹ ẹguọnọ ru wo vwo kpahen Jihova ganphiyọ ọke vwọ yanran na.

13. Mavọ yen a sa vwọ davwan oma rẹ avwanre ni sẹ a “hẹ evunrẹ esegbuyota na”?

¹³ Nọke ra ruọke, ofori a vwọ reyọ odjekẹ ri 2 Kọrẹnt 13:5 rọ tare nẹ, “ovwan rha davwan oma rẹ ovwan nẹ sẹ ovwan hẹ evunrẹ esegbuyota na; ovwan rhe dje oborẹ ovwan komobọ hepha phia” vwọ fuẹrẹn oma rẹ ovwan. Kọke kọke, a sa nọ oma avwanre enọ kerẹ: ‘Me vwẹ ọdavwẹ rẹ Uvie na vwọ kobaro vwẹ akpeyeren mẹ?’ (Mat. 6:33) ‘Erọnvwọn me vwọ diotọ djephia nẹ mi vwo utuoma rẹ obo re brare?’ (Une 97:10) ‘Mi toroba ufuoma vẹ okugbe rẹ ukoko na?’ (Ẹfe. 4:2, 3) Ẹkarophiyọ rẹ ughwu ri Jesu na ọyen uvi rẹ ọke re vwo roro kpahen ọtanhirhe na​—rọ kẹ avwanre uphẹn ra vwọ fuẹrẹn oma avwanre je davwẹngba vwo yeren akpọ vwo nene oborẹ Kristi guọnọre ukperẹ oborẹ avwanre guọnọre.c

INIỌVO RI BO GHWRU NẸ UKOKO NA

14. Diesorọ iniọvo evo vwo bo ghwrẹ nẹ ukoko na?

¹⁴ Iniọvo evo re ga Jihova vwẹ emeranvwe evo yẹrẹ ikpe buebun rhire rhi sioma nẹ ukoko na. Diesorọ? Kidie “ẹnwan rẹ akpeyeren” mu ayen rọ. (Luk 21:34) Eta vẹ uruemu rẹ iniọvo evo nẹrhẹ itu evo she nẹ ukoko na. (Jems 3:2) O ji vwo efa ri ru umwemwu ọgangan ri siomauko rẹ ayen vwọ nokpẹn rẹ ukẹcha. O toro obo rọ wanree, die yen wo se ru ọ da dianẹ wo bo ghwru nẹ ukoko na? Die yen ọrhuẹrẹphiyotọ rẹ ọtanhirhe na se mu we vwo ru?

15. Idjerhe vọ yen Jihova vwo djephia nẹ ọyen vwo ọdavwẹ rẹ idibo rọyen ri bo ghwru? (Izikiẹl 34:11, 12, 16)

¹⁵ Vwẹ ẹwẹn roro oborẹ oma ruẹ Jihova kpahen iniọvo ri bo ghwru nẹ ukoko na. Jẹ ọ diẹ ọyen ọ vwọ sen ayeen. Ẹkẹvuọvo, ọ hiẹ guọnọ igodẹ ri bo ghwru. Ọ ghẹrẹ ayen je cha ayen uko rere ayen se vwo rhivwin bro rhe. (Se Izikiẹl 34:11, 12, 16.) Kẹ Jihova rhe se ru ọtiọyen kẹ wẹ? E! Kidie nẹ wẹwẹ evunrẹ uyono na yẹrẹ se kpahen uyovwinrota nana, ọnana djephia nẹ wẹwẹ ohwo ro vwo ẹwẹn esiri rọ guọnọ ru obo re vwerhen Jihova oma. Kirobo ri Jihova mrẹ erhuvwu vwẹ ubiudu wẹn o de se we ro uyota na, ọ dia ọtiọyen o ji se we rhivwin enẹna?

16. Die yen sa vwẹ ukẹcha kẹ iniọvo ri bo ghwru vwo rhivwin bru Jihova rhe? (Ni uhoho na.)

¹⁶ Ọbe na Rhivwin Bru Jihova Rhe ta eta rẹ ọbọngan nana: “Wo che vwo rhivwin bru Jihova na, vwo imuẹro nẹ ọ cha chọn wẹ uko. Ọ cha vwẹ ukẹcha kẹ wẹ vwo yerin ghene ẹnwan, si ophu nẹ evun, ji vwo ufuoma fikirẹ ẹwẹn obrorhiẹn rọ fonro. Ọke yena, ku wọ sa rhoma kuomakugbe idibo ri Jihova vwọ ga.” Je karophiyọ nẹ ekpako na vwo owenvwe rẹ ayen vwọ vwẹ ukẹcha kẹ wẹ. Ayen sa “dia kerẹ asan odjahọ vwọ kẹ aphopho, urhurho vwọ ọke rẹ ogiribo.” (Aiz. 32:2) Kpahen ọdavwaro wo vwo kpahen ọtanhirhe na, nọ oma wẹn, ‘Erhọ yen owọẹjẹ evo mi se vwo ruiruo enẹna mẹ vẹ Jihova sa vwọ rhuẹrẹ kugbe?’ (Aiz. 1:18; 1 Pita 2:25) Kerẹ udje, wo se kpo uyono vwẹ Ọguan Ruvie? Wo se bru ọkpako ọvo ra vwọ kẹ ukẹcha rere a sa vwọ vwẹ uyono ri Baibol vwo mu kẹ wẹ vwẹ ọmọke? Wo se vwo imuẹro nẹ Jihova che ku ebruphiyọ rọyen ku we wọ vwọ davwẹngba wo vwo dje ọdavwaro phia kpahen ọtanhirhe rẹ Ọmọ rọyen na.

DIE YEN WO CHE RU VWO DJE ỌDAVWARO PHIA?

17-18. Mavọ yen a sa vwọ reyọ ọke avwanre vwo ruiruo vwẹ idjerhe ro fori tavwen e ki ruẹ Ẹkarophiyọ rẹ enukpe na?

¹⁷ Jesu tare nẹ e ru ọrhuẹrẹphiyotọ ọtanhirhe na “rere kohwo kohwo ro vwo esegbuyota kpahọn vwo jẹ ẹghwọrọ, ẹkẹvuọvo ko vwo arhọ ri bẹdẹ.” (Jọn 3:16) Womarẹ ọtanhirhe na yen Jihova che vwo si avwanre vwo nẹ abọ umwemwu vẹ ughwu. E jẹ a vwẹ ẹro okueku vwo noo. (Rom 3:23, 24; 2 Kọr. 6:1) Tavwen e ki ruẹ Ẹkarophiyọ na, avwanre vwo uphẹn re vwo roro kpahen ẹguọnọ rẹ Jihova vẹ Jesu djephia, ọnana ko mu avwanre vwo dje ọdavwaro kpahen oborẹ ayen ru kẹ avwanre.

¹⁸ Die yen ọtanhirhe na che mu we vwo ru? Ẹkpahọnphiyọ wẹn sa fẹnẹ ọ rẹ ohwo ọfa. Imuẹro herọ nẹ Jihova che bruba ẹgbaẹdavwọn ru wọ vwọ vwomaba iduduru rẹ iniọvo rẹ avwanre ri ‘yerẹn akpọ kẹ oma obọ rayeen, ẹkẹvuọvo vwọ kẹ ohwo ro ghwu kẹ ayen na.’​—2 Kọr. 5:15.