Wọ sa Họnre Vwọso Erharhe Iroro

1-2. Mavọ yen oma ru ọyinkọn Pọl ọke evo, kẹ idjerhe vọ yen obo ro siri na je vwọ phia kẹ avwanre? (Rom 7:21-24)

DIE yen djẹ ro wẹ ẹwẹn wo de roro kpahen ọyinkọn Pọl? Iroro wẹn djẹ kpo imishọnare ro fiudugberẹ, oyono rọ tẹn ọna, gbanẹ ọvo usun rẹ ihwo ri si Baibol na? Idjedje yena eje gbare. Dedena, Pọl ji nene erharhe iroro muabọ fikirẹ obo ro ruru vwẹ obuko re ri kpokpo ẹwẹn kirobo rẹ avwanre buebun ruẹ.

² Se Rom 7:21-24. Vwẹ ileta ro si vwo rhe iniọvo ri Rom, ọyinkọn Pọl da ta oborẹ oma ruro wan. Oborẹ Pọl ta ota kpahen na je phia kẹ avwanre. Pọl ọyen Onenikristi rọ fuevun, ọ guọnọ ru obo re vwerhan Ọghẹnẹ oma, jẹ kidie nẹ ọ gbaree, kọ bẹn kẹ ro vwo ru obo ri je Ọghẹnẹ ọke evo. Vwọba, Pọl nene ẹwẹn rẹ abe muabọ fikirẹ obo ro ruru vwẹ obuko re, o ji hirharoku obẹnbẹn ọvo ọke grongron vwẹ akpeyeren.

3. Die yen a cha ta ota kpahen vwẹ uyono nana? (Ni “Oborẹ Ota Nana Mudiaphiyọ.”)

³ Dede nẹ Pọl vwo erharhe iroroa ro nene muabọ, ọ vwẹ uphẹn kẹ ayen nẹ i muo rọọ. Vwẹ uyono nana, avwanre cha ta ota kpahen enọ nana: Die yen phiare ro mu Pọl vwọ tanẹ ọyen “dia ohwo rẹ emuọvo-o”? Die yen vwẹ ukẹcha kẹ vwọ họnre vwọso erharhe iroro? Mavọ yen avwanre sa vwọ họnre vwọso erharhe iroro rehẹ ẹwẹn rẹ avwanre?

DIE YEN PHIARE RỌ NẸRHẸ PỌL VWO ERHARHE IRORO

4. Die yen phiare rọ nẹrhẹ Pọl vwo erharhe iroro?

⁴ Erọnvwọn ro ruru vwẹ obuko re. Tavwen Pọl ra ka riẹn phiyọ Sọl ke rhe dia Onenikristi, o ru erọnvwọn buebun re brare. Kerẹ udje, Sọl rhọnvwephiyọ ughwu ri Stivin na. (Iruo 7:58; 8:1) Vwọba, ọyen kobaro rẹ ẹvwọsuọ rẹ Inenikristi buebun vwẹ ọke yena.​—Iruo 8:3; 26:9-11.

5. Mavọ yen oma ru Pọl fikirẹ obo ro ruru vwẹ obuko re?

⁵ Pọl rhe vwọ dia Onenikristi nu, o ji vwo ọke evo ẹwẹn vwo kpokpo fikirẹ obo ruru vwẹ obuko re. Ọ sa dianẹ erọnvwọn ebrabra ro ruru vwẹ obuko re ro vwo mukpahen Inenikristi se kpokpo ẹwẹn rọyen ọke vwọ yanran na. Kerẹ udje, ọke ro vwo si ileta rẹsosuọ rọyen vwọ rhe iniọvo ri Kọrẹnt, omarẹ ukpe 55 C.E., ọ da ta: “Mẹvwẹ yen ma hanvwe vwẹ usun rẹ iyinkọn na, mi fo ohwo re se ọyinkọ-ọn, kidie mi mukpahen ukoko rẹ Ọghẹnẹ.” (1 Kọr. 15:9) Omarẹ ẹgbukpe iyorin vwọ wan nu, ro vwo siẹ rhe iniọvo rẹ Ẹfesọs, o de djisẹ oma rọyen nẹ ọyen ma “hanvwe vrẹ ọ rọ ma hanvwe vwẹ usun rẹ ihwo efuanfon na eje.” (Ẹfe. 3:8) Ọ jẹ tanẹ jovwo ọyen “ohwo rọ ta eta rẹ ẹgua, ohwo ro muẹkpahan ihwo, kugbe ohwo ro yinvwaro” ọke ro vwo si rhe Timoti. (1 Tim. 1:13) Wọ sa vwẹ ẹwẹn roro oborẹ oma ru Pọl ọke rọ da mrẹ ihwo ro mukpahen vwevunrẹ ukoko rọ rare, yẹrẹ erua rẹ ihwo ro mukpahen?

6. Die ọfa yen kpokpo Pọl ẹwẹn? (Ni eta rehẹ obotọ.)

⁶ Unwe ro duvwon. Pọl reyọ emuọvo ro kpokpo vwo dje ‘unwe ro duvwon.’ (2 Kọr. 12:7) Pọl vuẹ avwanre oboresorọọ, jẹ ọ họhọre nẹ ọga yẹrẹ orọnvwọn ọfa kirobo ro djisẹ rọyen wan yen nẹrhẹ ofu dje.b

7. Mavọ yen jẹgba rẹ oma ri Pọl kpokpiro te? (Rom 7:18, 19)

⁷ Jẹgba romobọ rọyen. Pọl nene jẹgba muabọ. (Se Rom 7:18, 19.) O vwo ọke buebun ri jẹgba romobọ rọyen vwo gbowọphiyọ owenvwe ro vwori ro vwo ru obo ri yovwirin. Ọ tare nẹ ọkieje yen ọyen vwo nene iroro umwemwu rọhẹ oma rọyen vẹ owenvwe ro vwo ru obo ri yovwirin muabọ. Dedena, Pọl davwẹngba gangan o se vwo yerin ghene. (1 Kọr. 9:27) Vwẹ ẹwẹn roro oborẹ ofu ke dje Pọl te siẹrẹ ọ da rhoma she ro uruemu tiọyena!

OBORẸ PỌL SE VWO YERIN GHENE ERHARHE IRORO

8. Die yen ileta ri Pọl djephia kpahen obo ro ruru vwo yerin ghene jẹgba rọyen?

⁸ Vwo nene obo ro siri vwẹ ileta rọyen, Pọl roro kokodo kpahen obo rọ vẹ iniọvo na sa vwọ họnre vwọso iroro umwemwu rọhẹ oma na womarẹ ukẹcha rẹ ẹwẹn ọfuanfon rẹ Ọghẹnẹ. (Rom 8:13; Gal. 5:16, 17) Ọkieje yen Pọl vwọ ta ota kpahen erharhe iruemu vẹ ojevwe rẹ ugboma ri fori nẹ Inenikristi kẹnoma kẹ. (Gal. 5:19-21, 26) Aphro herọọ nẹ Pọl roro kokodo kpahen asan ọyen komobọ da vwiẹrẹ, nene odjekẹ ri Baibol na, je jokaphiyọ idjerhe evo kiriguo re sa vwẹ ukẹcha kẹ vwo yerin ghene jẹgba rọyen. O muẹro nẹ Pọl nene uchebro rọ vwọ kẹ ihwo efa.

9-10. Die yen vwẹ ukẹcha kẹ Pọl vwọ họnre vwọso erharhe iroro? (Ẹfesọs 1:7) (Ni uhoho na.)

⁹ Dede nẹ o vwo ọkievo rẹ ofu vwo dje Pọl, ọ je vwẹ ẹro abavo vwo ni ẹdia rọ hepha. Kerẹ udje, oma vwerhenrọ ọke rẹ iniọvo re vẹ ọyen gba wian kuẹgbe vwọ ghwa omamọ iyẹnrẹn nẹ ikoko na bro rhe. (2 Kọr. 7:6, 7) Ọ mrẹ omavwerhovwẹn vwo nẹ oyerinkugbe rọyen vẹ iniọvo na. (2 Tim. 1:4) Ọ je riẹn nẹ ọyen vwo aroesiri ri Jihova. Kidie nẹ ọ ga Ọghẹnẹ vẹ “ẹwẹn obrorhiẹn rọ fonro,” ọnana da ghwa omavwerhovwẹn bro rhe. (2 Tim. 1:3) Ọke rọ vwọ hẹ uwodin vwẹ Rom dede, o ji jiro kẹ iniọvo na nẹ ayen “ghọghọ ọkieje vwevunrẹ Ọrovwori na.” (Fil. 4:4) Eta rọyen na họhọ eta rẹ ohwo rẹ ẹwẹn kpokpoo. O phẹnre nẹ ọke erharhe iroro da kọ ro ẹwẹn ri Pọl, kọ davwẹngba ọ sa vwọ vwẹ ẹro abavo vwo ni ẹdia rọ hepha.  

¹⁰ Kidie Pọl vwo imuẹro nẹ ọyen komobọ yen e ruẹse rẹ ọtanhirhe na vwọ kẹ, ọnana da nẹrhẹ ọ sa họnre vwọso erharhe iroro. (Gal. 2:20; Se Ẹfesọs 1:7.) Ọtiọyena, ọ da vwẹroso evwoghovwo ri Jihova womarẹ izobo rẹ ọtanhirhe ri Jesu Kristi. (Rom 7:24, 25) Dede nẹ jẹgba ri Pọl vẹ imwemwu ro ru vwẹ obuko re kpokpiro, ọ sa vwẹ ‘ẹga rọ fọnro’ kẹ Ọghẹnẹ vẹ aghọghọ.​—Hib. 9:12-14.

11. Ọbọngan vọ yen udje ri Pọl vwọ kẹ avwanre?

¹¹ Kerẹ Pọl, avwanre ji se nene erharhe iroro tiọyena muabọ ọkieje. Ọnana se churobọ si oborẹ avwanre ruẹ, oborẹ avwanre ta kugbe obo re vwo vwẹ ẹwẹn. Ọkievo erharhe iroro tiọyena se kpokpo avwanre ẹwẹn te ẹdia rẹ ohwo da tanẹ, ‘Mẹvwẹ dia ohwo rẹ emuọvo-o!’ Ọna yen oborẹ oniọvo aye ọvo rọ vrẹ ẹgbukpe 20 re se Elizac tare: “Oma vwerhen ovwẹ mi de roro kpahen obo re phia kẹ Pọl. Ọnana nẹrhẹ ẹwẹn mẹ totọ kidie ọ dia omẹvwẹ ọvo yen oma ru ọtiọyeen. Ọ nẹrhẹ me karophiyọ nẹ Jihova riẹn ebẹnbẹn rẹ ihwo rọyen hirharokuẹ.” Kerẹ Pọl, die yen e se ru vwo vwo ẹwẹn obrorhiẹn rọ fonro je ga Jihova vẹ aghọghọ dede nẹ o vwo erharhe iroro re nene muabọ?

OBO RA SA VWỌ HỌNRE VWỌSO ERHARHE IRORO

12. Mavọ yen irueru rẹ ukoko na sa vwẹ ukẹcha kẹ avwanre vwọ họnre vwọso erharhe iroro?

¹² Muomaphiyọ obo re cha nẹrhẹ wo sikẹrẹ Jihova. A sa tẹnrovi obo ri yovwirin siẹrẹ e de muomaphiyọ irueru rẹ ukoko na. A sa reyọ irueru tiọyena vwo dje omaẹsasọ rẹ ọkieje ro se toroba omakpokpọ rẹ ohwo. A da nabọ re omamọ emu, sasa oma ọkieje, nabọ vwerhẹn, oma avwanre kọ dia sasasa. Ọtiọyen ọ je hepha nẹ e de se Ota rẹ Ọghẹnẹ ọkieje, muegbe ji kpo uyono je davwẹngba vwo toroba uyono na ji vwobọ vwẹ iruo aghwoghwo na, oma kọ vwerhan avwanre. Irueru tiọyena cha avwanre uko vwo yerẹn ghene erharhe iroro.​—Rom 12:11, 12.

13-14. Mavọ yen Inenikristi evo vwọ mrẹ erere vwo nẹ irueru rẹ ukoko na rhe?

¹³ Roro kpahen udje ri John, ra mrẹ oka ọga rẹ kansa ọvo vwẹ oma rọyen rọ vwọ hẹ ẹgbukpe 39. Ẹsosuọ ọnana kpokpiro ẹwẹn mamọ. Ko roro, ‘mavọ yen mi se vwo vwo ọga tiọyena ọke eghene mẹ?’ Vwẹ ọke nana ọmọshare rọyen hẹ omarẹ ẹgbukpe erha. Die yen cha rọ uko vwo yerin ghene iroro tiọyena? Ọ da ta: “Dede nẹ oma mẹ bruku vwẹ ọke yena, me davwẹngba orua avwanre se vwo vwobọ vwẹ irueru ukoko na. Avwanre kpo emẹvwa eje, vwobọ vwẹ iruo aghwoghwo ri kudughwrẹn kudughwrẹn ji ruẹ ẹga rẹ orua, ọ da tobọ dianẹ me mrẹrẹ bẹnbẹn mi vwo ru ọrhuẹrẹphiyotọ rọyen.” Ro vwo ni kpuko, John da ta: “Uguegue na rhi vwo nẹ oma mẹ nu, me da reyọ ẹguọnọ ri Jihova vẹ ogangan rọyen vwo wene iroro ri kpokpo uvwe ẹwẹn jovwo na. Jihova se ru we gan kirobo ro ru vwe gan na.”

¹⁴ Eliza ra ta ota kpahen siẹvure da ta: “Kọke kọke mi de kpo uyono ji ruẹ uyono romobọ, ọ karophiyọ ovwẹ nẹ Jihova vwo ẹguọnọ mẹ, o ji nyo ẹrhovwo mẹ. Ọnana nẹrhẹ oma vwerhen ovwẹ.” Oniruo okinriariẹ ọvo vwẹ Africa re se Nolan vwọ ta ota kpahen oma rọyen vẹ aye rọyen Diane, ọ da ta: “Ọ da tobọ dianẹ ofu dje avwanre, avwanre ji tinkamuẹ irueru rẹ ukoko na. Ọkieje kọyen Jihova vwọ cha avwanre uko vwo vwo aghọghọ. Avwanre je vwẹ ọkieje vwọ karophiyọ nẹ Jihova che bruba kẹ avwanre je cha avwanre uko dede nẹ avwanre ghwa riẹn obo ro che ruo waan.”  

15. Die yen avwanre se ru vwo phiẹ erharhe iroro kparobọ? Djudje rọyen.

¹⁵ Avwanre da guọnọ phi erharhe iroro kparobọ, e che ru vrẹ e di vwo vwobọ vwẹ irueru rẹ ukoko na. Kerẹ udje, vwẹ ẹwẹn roro nẹ ugbuko wẹn miaowẹ. Rere ọmiaovwẹ na se vwo kpotọ, wo che ru vrẹ wọ de vwọ sasoma kẹdi kẹdẹ. Wọ sa vwọ riẹn obo re sua obẹnbẹn na, ofori nẹ wọ guọnọ obo re sorọ ji bru idọktọ ra. Vwẹ idjerhe vuọvo na, e de nene erharhe iroro muabọ, o ji fo nẹ avwanre reyọ Baibol na vẹ ẹbe ukoko na vwo ru ehiahiẹ, yẹrẹ ta ota kẹ Onenikristi ro tedje. Vwọ vrẹ enana, o ji vwo erọnvwọn efa re sa vwẹ ukẹcha phia.

16. Die yen sa vwẹ ukẹcha kẹ wẹ vwọ riẹn obo re so erharhe iroro na? (Une rẹ Ejiro 139:1-4, 23, 24)

¹⁶ Frẹkotọ ta ọdavwẹ wẹn vwẹ ẹrhovwo. Ovie Devid riẹnre nẹ Jihova nabọ vughe ọyen. Ọtiọyena Devid da rẹ Jihova nẹ ọ cha ọyen uko vwọ riẹn obo re so “iroro” rọyen na. (Se Une rẹ Ejiro 139:1-4, 23, 24.) Wọ je sa rẹ Jihova nẹ ọ cha wẹ uko vwọ riẹn obo re sua erharhe iroro tiọyena kugbe obo wo se vwo phi ayen kparobọ. Wọ je sa nọ oma wẹn enọ kerẹ: ‘Die yen ghwa ẹnwan mẹ na cha? O vwo emuọvo rọ nẹrhẹ iroro na kọn cha? Me sa kpairoro vrẹ gbanẹ mi mu ẹwẹn kpahọn?’  

17. Iyovwinreta vọ yen sa cha wẹ uko vwọ kẹnoma kẹ erharhe iroro ọke wo de ru uyono romobọ? (Ni uhoho na.)

¹⁷ Ru uyono romobọ vwo nene ọdavwẹ wẹn. Wo de yono kpahen iruemu ri Jihova evo nọke ra ruọke wọ cha mrẹ erere. Kerẹ udje, ọke rẹ ọyinkọn Pọl vwo roro kpahen izobo rẹ ọtanhirhe na vẹ evwoghovwo ri Jihova, ọ mrẹ erere gbidiki. Wo ji se ru ọtiọyen. Reyọ Research Guide for Jehovah’s Witnesses, Watch Tower Publications Index, yẹrẹ ẹbe rẹ ukoko na efa re herọ vwẹ ephẹrẹ wẹn vwọ guọnọ iyovwinreta kerẹ arodọnvwẹ, evwoghovwo kugbe ẹguọnọ ro jẹ rhẹriẹ. Ugege wọ vwọ mrẹ iyovwinreta re sa cha wẹ uko nu, gbe si ayen phiyotọ. Reyọ obo wo siri na vwọ tamuẹ asan wọ da sa mrẹ, wo se kpahen iyovwinreta ru wo si phiyotọ na siẹrẹ iroro tiọyena da kọn rhe. Davwẹngba wọ reyọ obo wo seri na vwo ruiruo vwẹ ẹdia ru wọ hepha na.​—Fil. 4:8.

18. Erere vọ yen Inenikristi evo mrẹre ayen vwo yono kpahen iyovwinreta evo?

¹⁸ Eliza ra ta ota kpahen siẹvure se kpahen ikuegbe ri Job ọke ro vwo ru uyono romobọ. Ọ da ta: “Mi vwo ẹruọ obo re phia kẹ Job. Job de nẹ ọdavwini ọvo nu, ọfa me rhe. Ọke ofu vwọ tobọ dje hwe dede, ọ je vwẹroso Jihova​—dede nẹ ọ riẹn obo re ghwa ebẹnbẹn na rhee.” (Job 42:1-6) Diane ra ta ota kpahen siẹvure da je ta: “Ọke me vẹ ọshare mẹ vwọ reyọ ọbe ri Draw Close to Jehovah vwo ru uyono, avwanre de rhi noso nẹ kirobo rẹ ọmochẹ reyọ ọphiẹn vwọ ma ochẹ ye, ọtiọyen Jihova ji yono avwanre. Ọtiọyena, ukperẹ avwanre vwọ tẹnrovi asan re de ru chọ, kẹ avwanre roro kpahen oborẹ Jihova yono avwanre rere avwanre sa vwọ dia omamọ rẹ ihwo.” Ọnana nẹrhẹ avwanre se sikẹrẹ phiyọ.​—Aiz. 64:8.

NI KIỌKIỌKIỌ KPO OBARO NA VẸ IMUẸRO

19. Imuẹro vọ yen avwanre se vwo?

¹⁹ Ọ da tobọ dianẹ e ru uyono vwo nene ọdavwẹ rẹ avwanre ji vwobọ vwẹ irueru rẹ ukoko na, ọ dia ọyen erharhe iroro che vwo jẹ ẹwẹn avwanre e kọn rua yẹrẹ a cha vwọ kpairoro vrẹ ayen kakaree. O ji vwo ọkievo e se vwo no nẹ avwanre dia ihwo rẹ emuọvoo! Ẹkẹvuọvo, e se si erharhe iroro kpotọ womarẹ ukẹcha ri Jihova siẹrẹ e da kọn rhe. E se vwo ẹwẹn obrorhiẹn rọ fonro kọke kọke vẹ imuẹro nẹ avwanre reyọ akpeyeren avwanre vwọ ga Jihova vẹ omavwerhovwẹn.

20. Die yen wo vwo vwẹ ẹwẹn wo vwo ru?

²⁰ Ọtiọyena, e ja vwẹ uphẹn kẹ ebẹnbẹn, jẹgba vẹ obo re ru vwẹ obuko re nẹ i kpokpo avwanre ẹwẹẹn. Womarẹ ukẹcha ri Jihova, e se sun iroro avwanre. (Une 143:10) E se ni kiọkiọkiọ kpo ọke re rhe che nene erharhe iroro muabọọ, iroro rẹ avwanre kọ cha dia abavo. Ọke yena, ke che vrẹn kurhiọke kurhiọke ababọ rẹ ẹnwan, je vwẹ ẹga kẹ Jihova Ọghẹnẹ avwanre vẹ omavwerhovwẹn!