Ẹguọnọ rẹ Ọghẹnẹ Herọ Rhirin Bẹdẹ

1-2. Egbabọse vọ yen Inenikristi buebun hirharokuẹ?

VWẸ ẹwẹn roro okọ rọhẹ odjigbo rẹ odju ọgangan. Ọgbogho mu okọ na cha muẹ kpo. Kasan kasan rẹ ọgbogho na mu okọ na ra yen ọ ra, jokpanẹ kẹ ohwo ọvo reyọ ọtan vwọ sa vi. Ọtan na che mu okọ na vi rere o vwo je bo ghwrẹ odju na vwo djuẹ na.

² Wo de hirharokuẹ ọdavwini ọgangan, wo se no nẹ wọ pha kerẹ okọ yena. Iroro wẹn sa kọn rhe kọn kpo. Wo se vwo imuẹro nonẹ nẹ Jihova vwo ẹguọnọ wẹn nẹ o biẹcha wẹ; ọke ọfa wo se no nẹ ọ tobọ mrẹ obo re phia kẹ wẹẹ. (Une 10:1; 13:1) Ọ sa dianẹ ugbeyan wẹn ta ota rẹ ọbọngan kẹ wẹ, ẹwẹn wẹn de totọ vwẹ ọmọke evo. (Isẹ 17:17; 25:11) Ẹkẹvuọvo ẹwẹn ivivẹ na da rhoma kọn rhe. Wo se roro nẹ Jihova tobọ kpairoro vrẹ wẹ re. Mavọ yen wọ sa vwọ yọnregan kerẹ okọ rẹ ọtan mu vi siẹrẹ wo de hirharokuẹ ọdavwini? Yẹrẹ, mavọ yen o se vwo muwẹro—ji vwo imuẹro kpahen ẹguọnọ vẹ ukẹcha ri Jihova ọkieje?

3. Vwo nene obo rehẹ Une rẹ Ejiro 31:7 kugbe 136:1, die yen otọ rẹ “ẹguọnọ ro jẹ rhẹriẹ,” kẹ diesorọ a sa vwọ tanẹ Jihova yen udje rẹ ohwo ro vwo ẹguọnọ ro jẹ rhẹriẹ rọ ma rho kparobọ? (Ni uhoho na.)

³ Idjerhe ọvo avwanre sa vwọ yọnregan siẹrẹ e de hirharoku ọdavwini yen a vwọ karophiyọ ẹguọnọ ri Jihova ro jẹ rhẹriẹ na. (Se Une rẹ Ejiro 31:7; 136:1.) Ota na “ẹguọnọ ro jẹ rhẹriẹ” churobọ si uvi rẹ oyerinkugbe okokodo rẹ ohwo vwo kpahen ohwo ọfa. Jihova yen ohwo ro me phi udje rẹ ẹguọnọ ro jẹ rhẹriẹ rọ rho kparobọ phiyotọ. Vwọrẹ uyota, Baibol na djisẹ rọyen nẹ ọ “vọnre vẹ ẹguọnọ ro jẹ rhẹriẹ.” (Eyan. 34:6, 7) Baibol na da je ta kpahen Jihova nẹ: Ọ “vọnre vẹ ẹguọnọ ro jẹ rhẹriẹ kẹ ihwo ejobi ri se” re. (Une 86:5) Roro kpahen oborẹ ọyena mudiaphiyọ: O vwo ọke vuọvo Jihova cha vwọ kpairoro vrẹ idibo rọyen re fuevuun! Wọ da karophiyọ nẹ Jihova ọyen Ọghẹnẹ rọ fuevun, ọnana sa nẹrhẹ wọ yọnregan wo de hirharoku ọdavwini ọgangan.—Une 23:4.

KAROPHIYỌ NẸ ẸGUỌNỌ RI JIHOVA ỌYEN UYONO KIRIGUO VWẸ BAIBOL NA

4. Djudje iyono ri Baibol evo kiriguo, wo ji djisẹ rẹ oboresorọ ọ vwọ bẹn a vwọ phiẹn avwanre.

⁴ Idjerhe ọfa avwanre sa vwọ yọnregan e de hirharokuẹ ọdavwini yen e vwo roro kpahen ẹguọnọ ri Jihova rọ dia uyono kiriguo vwẹ Baibol na. Mavọ yen wo vwo ẹruọ ota na “uyono kiriguo rọhẹ Baibol na?” Ọ sa dianẹ wo roro kpahen iyota sansan rẹ wo yono nẹ Ọta rẹ Ọghẹnẹ rhe. Kerẹ udje, wo yonori nẹ Jihova yen odẹ rẹ Ọghẹnẹ, Jesu yen Ọmọ rọyen ọvuọvo, ihwo ri ghwuru riẹn emu vuọvoo, akpọ na che hirhephiyọ iparadaisi rẹ ihworakpọ cha dia bẹdẹ. (Une 83:18; Aghwo. 9:5; Jọn 3:16; Ẹvwọ. 21:3, 4) Ugege wọ vwọ mrẹ nẹ iyono nana ghini uyota nu, wọ rha vwẹ uphẹn kẹ ohwo vuọvo nẹ ọ phiẹn wẹẹn. Diesorọ? Kidie wọ rhe mrẹvughe re nẹ uyota yen e ghene hepha. E jẹ a mrẹ oborẹ ẹguọnọ ri Jihova rọ dia uyono kiriguo vwẹ Baibol na sa vwọ cha avwanre uko e vwo jẹ ẹwẹn ivivẹ evwo sẹ Jihova vwo ọdavwẹ yẹrẹ oniso rẹ oborẹ avwanre hirharokuẹ.

5. Djisẹ rẹ oborẹ e se vwo ghwie iyono rẹ efian.

⁵ Wo ke vwo yono kpahen Baibol na, die yen cha wẹ uko vwọ sen iyono rẹ efian? Ọ sa dianẹ, a vwẹ ukẹcha kẹ wẹ vwọ reyọ obo re yono uwe vwẹ ẹga wẹn vwọ vwanvwẹn obo ri Baibol na yonori. Roro kpahen udje ọvo: E gbe dje nẹ wo segbuyota jovwo nẹ Jesu yen Ọghẹnẹ ro me kpenu. Jẹ wo vwo yono Baibol na, wo se roro sẹ, ‘Uyono yena ghini uyota?’ Wọ vwọ nabọ fuẹrẹn oborẹ Baibol na tare nu, wọ da rhe mrẹvughe nẹ ọyena dia uyotaa. Wọ da rhe vwẹ uyota ri Baibol na nẹ Jesu yen “ọmọkpako rẹ emama na eje” kugbe “Ọmọ rẹ Ọghẹnẹ ọvuọvo” na vwo wene uyono rẹ efian yena. (Kọl. 1:15; Jọn 3:18) Vwọrẹ uyota, iyono rẹ efian sa “tan awọ muotọ” je bẹn e ghwie. (2 Kọr. 10:4, 5) Wọ vwọ mrẹ uyota na nu na, wo gbi rhivwin kpo iyono rẹ efian ru wo chukoku jovwo re naa.—Fil. 3:13.

6. Diesorọ wo se vwo vwo imuẹro nẹ ‘ẹguọnọ ri Jihova ro jẹ rhẹriẹ na herọ rhiri bẹdẹ’?

⁶ Wọ je sa vwẹ ona nana vwo ruiruo siẹrẹ wo de yono oborẹ Baibol ta kpahen ẹguọnọ ri Jihova. Wo de vwo ẹwẹn ivivẹ kpahen ẹguọnọ ri Jihova siẹrẹ wo de hirharokuẹ ọdavwini, nọ oma wẹn, ‘Iroro mẹ na gbare?’ Reyọ Une rẹ Ejiro 136:1—rọ dia ẹkpo ri Baibol re mu uyono nana kpahen vwọ vwanvwen ẹwẹn ivivẹ ru wo vwo kpahen ẹguọnọ ri Jihova. Diesorọ Jihova vwo djisẹ ẹguọnọ rọyen nẹ ọ ‘rhẹriẹẹ’? Diesorọ a vwọ vwanriẹn “ẹguọnọ rọye ro jẹ rhẹriẹ na dia rhiri bẹdẹ” abọ 26 vwẹ une yena? Kirobo rẹ a ta ota kpahen re na, ẹguọnọ ri Jihova ro jẹ rhẹriẹ ro vwo kpahen ihwo rọyen, ọyen uvi rẹ uyono ri Baibol, rọ pha kerẹ iyono efa wo ji rhiabọreyọ vwo nẹ Ota rẹ Ọghẹnẹ. Iroro rẹ Jihova ni we fiemuu yẹrẹ o vwo ẹguọnọ wẹẹn eyen ofian. Sen uyono yena, kirobo wọ je cha nabọ fiudugberi sen iyono rẹ efian efa!

7. Djudje ri Baibol evo re nẹrhẹ e vwo imuẹro kpahen ẹguọnọ ri Jihova.

⁷ Imuẹro efa buebun kpahen ẹguọnọ ri Jihova je herọ vwẹ Baibol na. Kerẹ udje, Jesu vuẹ idibo rọyen nẹ: “Ovwan ghanre vrẹ igue buebun.” (Mat. 10:31) Jihova komobọ vuẹ ihwo rọyen nẹ: “Me ke wẹ ogangan, Me cha wẹ uko, Me vwẹ obọrhe mẹ re ephio kparobọ na vwọ yọnrọn owẹ.” (Aiz. 41:10) Jokaphiyọ imuẹro rehẹ eta nana. Ọ dia Jesu tarẹ nẹ ‘Ovwan sa ghanre vrẹ ọtiọyeen,’ yẹrẹ Jihova je tanẹ ‘Me sa cha wẹ ukoo.’ Ukperẹ ọtiọyen, ayen tare nẹ: “Ovwan ghanre vrẹ” yẹrẹ “Me cha wẹ uko.” Wo de vwo ẹwẹn ivivẹ kpahen ẹguọnọ ri Jihova siẹrẹ wo de hirharokuẹ ọdavwini, ọ dia ẹkpo ri Baibol tiọyena cha nẹrhẹ ẹwẹn wẹn totọ ọvoo; e je sa nẹrhẹ wọ riẹn phiyọ. Uyota yen e mu ayen kpahen. Siẹrẹ wo de roro kpahen ayen vwẹ ẹrhovwo wẹn o che mu we vwọ vwẹrokere eta rehẹ 1 Jọn 4:16 nẹ: “Avwanre rhe riẹn re, ji vwo imuẹro rẹ ẹguọnọ rẹ Ọghẹnẹ vwo kpahen avwanre.”a

8. Die yen wo se ru ọ da dianẹ wo vwo ẹwẹn ivivẹ sẹ Jihova vwo ẹguọnọ wẹn?

⁸ Kẹ, ọ da dianẹ ọkiọvo wo vwo ẹwẹn ivivẹ kpahen ẹguọnọ ri Jihova vwo? Reyọ oborẹ oma ru we kpahen ẹguọnọ ri Jihova vwọ vwanvwe obo ru wọ riẹnre. A cha sa vwẹroso obo oma ru ohwo kerẹ uyotaa, jẹ ẹguọno ri Jihova kpahen avwanre kirobo rẹ Baibol na yonori uyota. E rhe vwo ẹwẹn nẹ Jihova vwo ẹguọnọ rẹ avwanree, jẹ e gbobọnyẹ uvi uruemu ri Jihova—rọ dia ẹguọnọ rọyen.—1 Jọn 4:8.

RORO KPAHEN ‘ẸGUỌNỌ RI JIHOVA KẸ OVWAN’

9-10. Die yen otọ rẹ eta ri Jesu ra niyẹnrẹn rọyen vwẹ Jọn 16:26, 27 rọ tare nẹ “Ọsẹ na komobọ vwo ẹguọnọ rẹ ovwan”? (Ni uhoho na.)

⁹ E ji se yono kpahen ẹguọnọ ri Jihova kpobarophiyọ siẹrẹ a da fuẹrẹn eta ri Jesu ta kẹ idibo rọyen nẹ: “Ọsẹ na komobọ vwo ẹguọnọ rẹ ovwan.” (Se Jọn 16:26, 27.) Ọ dia Jesu de ta eta yena oma vwọ vwerhen idibo rọyeen. Vwọrẹ uyota, eta re riariẹ ẹkpo ri Baibol yena djere nẹ ọ dia oborẹ oma ru ayen ọke yena yen ọ ta ota kpahaan. Ẹkẹvuọvo, ota ọfa yen ọ ta ota kpahan—ẹrhovwo.

¹⁰ Jesu vuẹ idibo rọyen nẹ ayen nẹrhovwo rhe ọyeen, ẹkẹvuọvo ayen reyọ odẹ rọyen nẹrhovwo. (Jọn 16:23, 24) Ọyen obo re ghanre ro fori nẹ ayen riẹn. Idibo rọyen se vwo ẹwẹn rẹ ayen vwọ nẹrhovwo rhe Jesu ra vwọ kparọ nushi nu. Kidie ayen rhe riẹn kerẹ ugbeyan re. Ayen se no nẹ ẹguọnọ rọyen kpahen ayen se muo vwo nyo orẹ rayen je vuẹ Ọsẹ na nẹ ọ kpahenphiyọ ayen. Ẹkẹvuọvo, Jesu da vuẹ ayen nẹ ayen vwo iroro tiọyeen. Diesorọ? Kidie ọ ka vuẹ ayen jovwore nẹ: “Ọsẹ na komobọ vwo ẹguọnọ rẹ ovwan.” Uyota yena, ọyen usun iyono kiriguo vwẹ Baibol na ro shekpahen ẹrhovwo. Roro kpahen oborẹ ọyena mudiaphiyọ vwọ kẹ wẹ: Womarẹ uyono ri Baibol na, wọ rhe riẹn ji vwo ẹguọnọ ri Jesu re. (Jọn 14:21) Kerẹ Inenikristi ẹgbukpe ujorin rẹsosuọ, wọ sa nẹrhovwo rhe Ọghẹnẹ vẹ imuẹro je riẹn nẹ ọyen “komobọ vwo ẹguọnọ” wẹ. Kọke kọke wọ da nẹrhovwo rhe Jihova, jẹ wo djephia nẹ wo vwo imuẹro kpahen eta yena.—1 Jọn 5:14.

VWO ẸRUỌ RẸ ASAN RẸ ẸWẸN IVIVẸ NẸCHA

11. Diesorọ oma cha vwọ vwerhen Eshu e de vwo ẹwẹn ivivẹ kpahen ẹguọnọ ri Jihova?

¹¹ Tivọ yen ẹwẹn ivivẹ re vwo kpahen ẹguọnọ ri Jihova nẹcha? Wọ sa tanẹ obọ rẹ Eshu, aphro herọọ nẹ ọyena uyota. Idẹbono davwẹngba ro vwo ‘mu avwanre rọ,’ ọtiọyena oma cha vwerhọn e de vwo ẹwẹn ivivẹ kpahen ẹguọnọ ri Jihova. (1 Pita 5:8) Ẹguọnọ yen mu Jihova vwo ru ọrhuẹrẹphiyotọ rẹ ọtanhirhe na—ọrọnvwọn ọvo rẹ Eshu guọnọre nẹ avwanre ni nẹ e muwan rọyeen. (Hib. 2:9) Jẹ, ono yen mrẹ erere siẹrẹ e de vwo ẹwẹn ivivẹ kpahen ẹguọnọ ri Jihova? Eshu. Ọhọre ono yen avwanre ruẹ a da dobọ rẹ ẹga ri Jihova ji fikirẹ ọdavwini? Jehẹ Eshu. Ọ guọnọ phiẹn avwanre vwo roro nẹ Jihova vwo ẹguọnọ avwanree. Jẹ, Eshu yen Jihova jẹ ẹguọnọ rọyen evwo. Ọnana kọyen sorọ ọ vwọ reyọ “ena rẹ ophiẹnvwe” vwo ruiruo e vwo roro nẹ avwanre yen Jihova brorhiẹn hwe, ro vwo ẹguọnọ rayeen. (Ẹfe. 6:11) E de vwo ọmrẹvughe oborẹ Idẹbono guọnọ ruẹ, owenvwe ra vwọ reyọ ‘vwọsuọ’ kọ sa ganphiyọ.—Jems 4:7.

12-13. Idjerhe vọ yen umwemwu ra riuku rọyen sa vwọ nẹrhẹ e vwo ẹwẹn ivivẹ kpahen ẹguọnọ ri Jihova?

¹² O ji vwo orọnvwọn ọfa rọ sa nẹrhẹ e vwo ẹwẹn ivivẹ kpahen ẹguọnọ ri Jihova. Ọyena die? Umwemwu rẹ avwanre riuku rọyen. (Une 51:5; Rom 5:12) Umwemwu nẹrhẹ ohworakpọ sherabọ kẹ Ọmemama rọyen. O ji miovwo ẹwẹn, ubiudu kugbe ugboma rọyen.

¹³ Umwemwu so umiovwo ro forii kẹ avwanre, rọ nẹrhẹ e vwo abe, oshọ, ẹnwan kugbe omavovwẹ. E se hirharoku ẹdia yena siẹrẹ e de ru umwemwu. Ẹkẹvuọvo, e sa vwomaphia kidie ọkieje yen ẹdia rẹ umwemwu rẹ avwanre hepha vwo kpokpo avwanre—ẹdia rọ fẹnẹ obo ra ma avwanre wan kakare. (Rom 8:20, 21) Kirobo imoto rẹ itaya rọyen fi totọ cha sa djẹ gan te obo ro fori yee, ọtiọyen avwanre kerẹ ihwo re gbaree che se ru te ẹgba ra ma phiyọ avwanre oma kirobo ro forii. Ọtiọyena, o rhe gbe avwanre unuu nẹ ọkievo e se vwo ẹwẹn ivivẹ kpahen ẹguọnọ ri Jihova. Emu tiọyen da phia, e jẹ a karophiyọ nẹ Jihova yen ‘ọ rọ rhoro vẹ Ọghẹnẹ ro muoshọ ro . . . dje ẹguọnọ ro jẹrhẹriẹ kẹ otu re guọnerọ re sẹro rẹ irhi rọye.’—Neh. 1:5.

14. E de roro kpahen ọtanhirhe na, mavọ yen a sa vwọ sen iroro na nẹ Jihova che se vwo ẹguọnọ avwanree? (Rom 5:8) (Ni ekpeti na “Kẹnoma kẹ ‘ẹgba rẹ ophiẹnvwe rẹ umwemwu.’”)

¹⁴ Uyota nẹ, ọkievo e se no nẹ e muwan rẹ ẹguọnọ ri Jihovaa. Vwọrẹ uyota, avwanre ghini muwan rọyeen, kọyensorọ ọ vwọ dia ọ rẹ oghẹresan. Ọ diẹ womarẹ ẹgba avwanre yen e vwo muwan ẹguọnọ ri Jihovaa. Dedena, Jihova ji ru ọrhuẹrẹphiyotọ rẹ ọtanhirhe na vwo rhurhu imwemwu rẹ avwanre kidie o vwo ẹguọnọ avwanre. (1 Jọn 4:10) Je karophiyọ nẹ Jesu rhere rhi sivwin irumwemwu, ọ dia ihwo re gbaree. (Se Rom 5:8.) O vwo ohwo vuọvo ro che se ru erọnvwọn gbagbaa, Jihova rhẹro ọtiọyen mie avwanree. E de vwo oniso ẹdia umwemwu rẹ avwanre hepha nẹ ọ sa nẹrhẹ e vwo ẹwẹn ivivẹ kpahen ẹguọnọ ri Jihova, owenvwe ra vwọ họnre vwọso ẹgba iroro tiọyen ro kpokpo avwanre na kọ cha ganphiyọ.—Rom 7:24, 25.

JẸ OJẸ WỌ VWỌ FUEVUN ỌKIEJE

15-16. Die yen e se vwo imuẹro rọyen siẹrẹ a da fuevun kẹ Jihova, kẹ diesorọ? (2 Samuẹl 22:26)

¹⁵ Jihova guọnọre nẹ e bru erhiẹn ri fori womarẹ e vwo “tinkamuo.” (Urhi 30:19, 20) E de ru ọtiọyen, ke se vwo imuẹro nẹ ọ cha fuevun kẹ avwanre ọkieje. (Se 2 Samuẹl 22:26.) Siẹrẹ avwanre da fuevun kẹ Jihova ọkieje, a sa vwẹrosuọ nẹ ọ cha vwẹ ukẹcha kẹ avwanre vwẹ kẹdia kẹdia re hirharoku vwẹ akpeyeren.

¹⁶ Kirobo ra ta ota kpahen re na, o vwo oboresorọ a vwọ yọnregan siẹrẹ e de hirharokuẹ edavwini. Avwanre riẹnre nẹ Jihova vwo ẹguọnọ rẹ avwanre nẹ o ji che bicha avwanre. Ọnana yen oborẹ Baibol na yonori. Ọ da dianẹ e vwo ẹwẹn ivivẹ kpahen ẹguọnọ rọyen, e se roro kpahen oborẹ avwanre riẹn kpahen ẹguọnọ ri Jihova ukperẹ oborẹ oma ru avwanre. E jẹ a vwẹroso uyota rọhẹ Baibol na nẹ ẹguọnọ ri Jihova ro jẹ rhẹriẹ na herọ rhirhi bẹdẹ.