Oborẹ Ẹrhovwo Wẹn sa Vwọ Ghwotọphiyọ

1-2. (a) Die yen sa dobọ rẹ avwanre ji e vwo jẹ ọdavwẹ rẹ avwanre ẹta kẹ Jihova? (b) Mavọ yen e ru riẹn sẹ Jihova nabọ nyo ẹrhovwo rẹ avwanre?

WO NO nẹ ẹrhovwo wẹn rhe muidjẹẹ, nẹ wo ji dje eta ẹvwẹvwanriẹ ọkievo? Ọ dia owẹ ọvo yen oma ruẹ ọtiọyeen. Kidie nẹ avwanre vwo erọnvwọn buebun rẹ avwanre ruẹ vwẹ akpeyeren, ọnana sa nẹrhẹ e brokpakpa nẹrhovwo. Yẹrẹ a sa mrẹ bẹnbẹn ra vwọ ta ọdavwẹ avwanre kẹ Jihova kidie e niro nẹ e muwan re vwo bro raa.

² Baibol vwẹ imuẹro kẹ avwanre nẹ ọ dia oborẹ ẹrhovwo avwanre gron te yen ma ghanre kẹ Jihovaa, ẹkẹvuọvo i ri nẹ ubiudu rhe. O nyo ẹrhovwo “rẹ ohwo dẹndẹn.” (Une 10:17) Ọ nabọ frẹkotọ kerhọ kẹ kota kota rẹ avwanre ta kidie o vwo ọdavwẹ rẹ avwanre.—Une 139:1-3.

3. Enọ vọ yen a cha ta ota kpahen vwẹ uyono nana?

³ A sa nọ nẹ: Diesorọ e se vwo fiudugberi nẹrhovwo rhe Jihova? Die yen e se ru ẹrhovwo avwanre se vwo yovwinphiyọ? Mavọ yen ẹrhovwo rẹ idibo ri Jihova ra niyẹnrẹn rayen phiyọ Baibol sa vwọ nẹrhẹ ẹrhovwo avwanre ghwotọphiyọ? Kẹ, die yen e se ru siẹrẹ ofu de dje avwanre a rha riẹn obo ra cha taa? E jẹ a mrẹ ekpahọnphiyọ rẹ enọ nana.

FIUDUGBERI NẸRHOVWO RHE JIHOVA

4. Die yen sa cha avwanre uko vwo fiudugberi nẹrhovwo rhe Jihova? (Une rẹ Ejiro 119:145)

⁴ Siẹrẹ e de vwo ẹruọ nẹ Jihova ọyen ugbeyan rọ fuevun rọ guọnọ erhuvwu avwanre, ke che fiudugberi nẹ e se bro ra vwẹ ẹrhovwo. Ohwo ro si Une rẹ Ejiro 119 davwẹngba rọ vẹ Jihova vwọ dia ugbeyan. Jẹ, ọ dia ọyen ebẹnbẹn vwọ kanre akpeyeren rọyeen. Ihwo rẹ ophiẹnvwe gbere ku. (Une 119:23, 69, 78) O ji nene jẹgba romobọ rọyen muabọ. (Une 119:5) Dedena, oshọ rọ vwọ ta ọdavwẹ rọhẹ ubiudu rọyen kẹ Jihova muroo.—Se Une rẹ Ejiro 119:145.

5. Diesorọ e vwo jẹ uphẹn ẹ vwọ kẹ iroro echọchọ e vwo jẹ ẹrhovwo ẹnẹ? Djudje rọyen.

⁵ Jihova tobọ guọnọ nẹ ihwo ri ru imwemwu egangan nẹrhovwo rhe ọyen. (Aiz. 55:6, 7) Ọtiọyena, e jẹ a vwẹ uphẹn kẹ iroro echọchọ e vwo jẹ ẹrhovwo ẹnẹẹ. Kerẹ udje, ohwo rọ gua aropleni riẹnre nẹ ọyen se nene ihwo ri suẹn oyan rẹ aropleni ta ota siẹrẹ ọ da guọnọ ukẹcha. Ofori nẹ omavovwẹ djẹ ro vwo jẹ ayen e se kidie nẹ o ghwruru yẹrẹ emuọvo chọrọ obọ? Kakaka! Ọtiọyen ọ je hepha nẹ, e de bo ghwru yẹrẹ ru umwemwu dede, e se fiudugberi nẹrhovwo rhe Jihova.—Une 119:25, 176.

OBORẸ ẸRHOVWO WẸN SE VWO YOVWINPHIYỌ

6-7. Mavọ yen ẹrhovwo avwanre se vwo yovwinphiyọ siẹrẹ e de roro kpahen iruemu ri Jihova? Djudje ọvo. (Ni eta rehẹ obotọ.)

⁶ E de rhievun ta ota kẹ Jihova je vuẹ iroro vẹ oborẹ oma ruẹ avwanre, ẹrhovwo avwanre kọ nabọ muidjẹ. Ọtiọyena, die yen e se ru ẹrhovwo avwanre vwọ ghwotọphiyọ?

⁷ Roro kpahen iruemu ri Jihova.a E vwo roro kpahen iruemu rọyen phiyọ ye, ka cha nabọ ta ọdavwẹ rẹ avwanre kẹ odedede. (Une 145:8, 9, 18) Roro kpahen udje ri Kristine, oniọvo aye rẹ ọsẹ rọyen djoma. Ọ da ta: “Ọ lọhọ kẹ vwẹ me vwọ ta ota kẹ Jihova kerẹ Ọsẹẹ. Mi roro nẹ jẹgba mẹ sa nẹrhẹ ọ kpairoro vrẹ vwẹ.” Uruemu ri Jihova vọ yen vwẹ ukẹcha kẹ? Ọ tare nẹ: “Ẹguọnọ ri Jihova ro jẹ rhẹriẹ na nẹrhẹ ẹwẹn mẹ totọ. Me riẹnre nẹ o che siobọ rọyen nu vwee. Me da tobọ she dede, ọ cha kpare ovwẹ vrẹn vwọrẹ ẹguọnọ. Ọnana vwẹ ukẹcha kẹ vwẹ vwọ ta ọdavwẹ mẹ eje kẹ siẹrẹ oma da vwerhen ovwẹ kugbe ọke mi de muomaphiyọ.”

8-9. Erere vọ yen no cha e de roro kpahen obo ra cha ta tavwen a ke nẹrhovwo? Djudje rọyen.

⁸ Roro kpahen obo wọ cha ta. Tavwen wọ ke nẹrhovwo, wọ sa nọ oma wẹn enọ sansan. Kerẹ udje: ‘Obẹnbẹn vọ kiriguo mi nene muabọ enẹna? O vwo ohwo ọvo ro fori nẹ mi vwo ghovwo? O vwo obẹnbẹn ọvo ri mi hirharokuẹ re me guọnọ ukẹcha ri Jihova mi se vwo yerin ghene?’ (2 Ivie 19:15-19) E ji se nene udje rẹ Jesu phi phiyotọ womarẹ e vwo roro kpahen oborẹ avwanre sa vuẹ Jihova vwẹ ẹrhovwo kpahen odẹ Rọyen, Uvie Rọyen kugbe ọhọre Rọyen.—Mat. 6:9, 10.

⁹ Ọke rẹ oniọvo aye re se Aliska vwọ riẹn nẹ ọshare rọyen vwo ọga rẹ ikansa vwẹ afọnrhe ro se hwe, ọ bẹn vwọ kẹ rọ vwọ nẹrhovwo. Ọ da ta: “Ofu dje vwe te ẹdia rẹ me da nẹrhovwo, me rha riẹn obo re me cha taa.” Die yen vwẹ ukẹcha kẹ? Ọ tare nẹ: “Ke me ghwọrọ ọmọke vwo roro kpahen obo me cha ta tavwen me ke nẹrhovwo, ọnana cha vwẹ uko vwọ mrẹvughe nẹ ọ dia oma mẹ ọvo yen o fori nẹ me tẹnrovi vwẹ ẹrhovwo mẹẹ. Ona nana nẹrhẹ mi ku ẹwẹn totọ je nabọ riẹn erọnvwọn sansan re me cha ta ota kpahen vwẹ ẹrhovwo mẹ.”

10. Diesorọ o vwo fo a vwọ ghwọrọ ọke vwẹ ẹrhovwo? (Ni ihoho na.)

¹⁰ Ghwọrọ ọke vwọ nẹrhovwo. Dede nẹ ẹrhovwo re pha krẹn sa nẹrhẹ e siẹkẹrẹ Jihova, jẹ a sa ta iroro rọhẹ ubiudu avwanre eje a da ghwọrọ ọke vwọ nẹrhovwo.b Ọshare rẹ Aliska re se Elijah da ta: “Me davwẹngba vwọ nẹrhovwo abọ buebun ẹdọke, ọnana nẹrhẹ mi sikẹrẹ Jihova phiyọ kidie me ghwọrọ ọke vwọ nẹrhovwo. Ọ dia Jihova brokpakpa hẹrhẹ ovwẹ mi vwo ku ẹrhovwo mẹ phiyọọ, ọtiọyena ke me ghwọrọ ọke vwọ nẹrhovwo.” Davwen ona nana: Guọnọ ọke vẹ asan ro fori wọ da sa nẹrhovwo, rẹ emu vuọvo che gbowọphiyọọ ru wọ da sa ta ota phia, ji vwo ru ẹkuruemu wọ vwọ ghwọrọ ọke vwẹ ẹrhovwo wẹn.

RORO KPAHEN ẸRHOVWO RE SI PHIYỌ BAIBOL

11. Erere vọ yen te avwanre obọ e de roro kpahen ẹrhovwo ra niyẹnren rayen vwẹ Baibol? (Ni ekpeti na “Ẹdia Wẹ Họhọ Ọrayen?”)

¹¹ Wọ sa mrẹ erere wo de roro kpahen ẹrhovwo kugbe ine ra so vwo jiri Jihova vwẹ Baibol na. Wo vwo roro kpahan oborẹ idibo rẹ Ọghẹnẹ ta ọdavwẹ rayen ye, ọnana che mu we vwọ ta obo rehẹ ubiudu wẹn kẹ Jihova. Wọ je sa mrẹ eta ujiri kpokpọ ru wọ sa vwọba ẹrhovwo wẹn. Ọkiọvo wọ sa mrẹ ẹrhovwo ri shekpahen ẹdia ru wọ hepha na.

12. Erhọ yen enọ evo ra sa nọ oma avwanre e de roro kpahen eta rẹ ẹrhovwo?

¹² Wo de roro kpahen eta ẹrhovwo evo re si phiyọ Baibol na, nọ oma wẹn: ‘Ono yen ta eta nana, kẹ ẹdia vọ yen ọ hepha ọke rọ vwọ ta ayen? Ẹdia rẹ ohwo rọ nẹ ẹrhovwo nana hepha họhọ ọmẹ? Erhọ yen erọnvwọn evo mi se yono norhe?’ Ọkiọvo, o fori nẹ wo ru ehiahiẹ wọ sa vwọ mrẹ ẹkpahọnphiyọ enọ nana, jẹ erere ro che norhe vrẹ ọke wọ ghwọre. Roro kpahen idje evo.

13. Ọrhọ yen emuọvo re se yono mie Hana kpahen ẹrhovwo? (1 Samuẹl 1:10, 11) (Ni uhoho na.)

¹³ Se 1 Samuẹl 1:10, 11. Hana vwo ebẹnbẹn ivẹ kiriguo ọke rọ vwọ nẹrhovwo nana. Ẹga ọyen o ruẹ, ọshare rọyen ji vwo aye ọfa ro kpokpo rọ nẹrhẹ akpọ no ọhọ. (1 Sam. 1:4-7) Die yen wo se yono vwo nẹ ẹrhovwo rẹ Hana ọ da dianẹ wo hirharokuẹ obẹnbẹn ọvo ro krotọ re? Ẹwẹn rọyen totọ rọ vwọ ghwọrọ ọke vwọ nẹrhovwo ji mu oghwa ro kpokpo ẹwẹn rọyen eje vwọ kẹ Ọghẹnẹ. (1 Sam. 1:12, 18) E se vwo ẹwẹn re dọe e de “mu oghwa [avwanre] nyẹ Ọrovwohwo” je vuẹ oborẹ oma ruẹ avwanre fikirẹ ebẹnbẹn re hirharokuẹ.—Une 55:22.

14. (a) Die ọfa yen e yono nẹ udje rẹ Hana rhe? (b) Idjerhe vọ yen ẹrhovwo avwanre sa vwọ nabọ muidjẹ siẹrẹ e de roro kpahen Ota rẹ Ọghẹnẹ? (Ni eta rehẹ obotọ.)

¹⁴ Ikpe evo rẹ Hana vwo vwiẹ ọmọ rọyen re se Samuẹl nu, o de muo bru Orherẹn Rode Ilai ra. (1 Sam. 1:24-28) Vwẹ ẹrhovwo rọ nẹ nẹ otọ rẹ ubiudu rhe, Hana tare vẹ imuẹro nẹ Jihova chochọn je vwẹrote idibo rọyen re fuevun.c (1 Sam. 2:1, 8, 9) Ọ sa dianẹ ebẹnbẹn rehẹ uwevwin rẹ Hana ji rhi noo, dedena ọ tẹnrovi oborẹ Jihova bruba kẹ wan. Die yen e se yono norhe? Siẹrẹ a da tẹnrovi oborẹ Jihova biẹcha avwanre rhi te ọke nana, ke se yerin ghene ebẹnbẹn re hirharokuẹ asaọkiephana.

15. E de hirharokuẹ oshenyẹ, die yen e se yono vwo nẹ ẹrhovwo rẹ ọmraro Jerimaya? (Jerimaya 12:1)

¹⁵ Se Jerimaya 12:1. Vwẹ ọke ọvo vwẹ akpeyeren rẹ ọmraro Jerimaya, ofu djere ọ vwọ mrẹ irumwemwu rẹ ihwo rẹ akpọ yovwin kẹ. Oborẹ ihwo rẹ Izrẹl efa ruro je nẹrhẹ ofu dje. (Jer. 20:7, 8) Oma ji se ru avwanre kirobo ro ruro siẹrẹ ihwo da vwẹ avwanre jehwẹ yẹrẹ a da mrẹ ihwo ọghware rẹ akpọ yovwẹn kẹ. Dede nẹ ofu dje Jerimaya hwe, jẹ ọ dia ọyen o vwo vwo ẹwẹn ivivẹ kpahen orhiẹn ọsoso rẹ Ọghẹnẹẹ. Rọ vwọ mrẹ oborẹ Jihova gboja kẹ ihwo rọyen ri gbe vwọsuọ, ẹroẹvwọsuọ rọyen kpahen orhiẹn ọsoso rẹ Ọghẹnẹ da rhe ganphiyọ. (Jer. 32:19) Avwanre ji se djunute obo ri miovwo avwanre ivun vwẹ ẹrhovwo, vẹ imuẹro nẹ Jihova che si koshenyẹ koshenyẹ rẹ avwanre hirharokuẹ enẹna no vwẹ ọke ro fori.

16. Die yen e se yono mie ohwo ri Livae re mu kpo ighuvwu siẹrẹ e rhe se ruẹ te obo ra guọnọ ru fikirẹ ẹdia ra hephaa? (Une rẹ Ejiro 42:1-4) (Ni ihoho na.)

¹⁶ Se Une rẹ Ejiro 42:1-4. Ohwo ri Livae re mu kpo ighuvwu yen si une nana ọke rọ rha sa vwomaba ihwo rẹ Izrẹl ri chekọọ. Une rọyen na dje oborẹ oma ruro. Oma ji se ru avwanre ọtiọyen e rhe se vrẹ nẹ uwevwiin yẹrẹ e de mu avwanre phiyọ uwodi fikirẹ esegbuyota rẹ avwanre. Ọkiọvo oma sa vwerhen avwanre ọke ọfa e mi rhe muomaphiyọ, jẹ ofori nẹ a vuẹ Jihova kpahọn vwẹ ẹrhovwo. Ọnana sa cha avwanre uko vwọ fuẹrẹn iroro avwanre je vwẹ ẹro abavo vwo ni ẹdia rẹ avwanre hepha na. Kerẹ udje, ohwo ri Livae na riẹnre nẹ ọyen che vwo uphẹn efa ọyen vwo jiri Jihova. (Une 42:5) Vwọba, ẹwẹn rọyen je djẹ kpo oborẹ Jihova vwẹrote wan. (Une 42:8) Ẹrhovwo ra nẹ nẹ otọ rẹ ubuidu rhe sa cha avwanre uko vwọ riẹn oboresorọ oma vwo ruẹ avwanre ọtiọyen, nẹrhẹ e vwo ẹwẹn re dọe je mrẹ ẹgba vwo chirakon.

17. (a) Die yen e se yono nẹ ẹrhovwo ọmraro Jona rhe? (Jona 2:1, 2) (b) Idjerhe vọ yen ẹkpo ri Baibol evo vwẹ Une rẹ Ejiro sa vwọ vwẹ ukẹcha kẹ avwanre a dahẹ ebẹnbẹn? (Ni eta rehẹ obotọ.)

¹⁷ Se Jona 2:1, 2. Obevun rẹ erin rode yen Jona hepha ọke rọ vwọ nẹrhovwo nana. Dede nẹ o nyupho ri Jihovaa, jẹ Jona vwo imuẹro nẹ Ọghẹnẹ che nyo ẹrhovwo rọyen. Vwẹ ẹrhovwo ri Jona, o djunute eta buebun rehẹ Une rẹ Ejiro.d Ọ sa dianẹ ọ riẹn ẹkpo ri Baibol nana. O vwo imuẹro nẹ Jihova cha vwẹ ukẹcha kẹ ọyen ọke ro vwo roro kpahen ẹkpo ri Baibol nana. Ọtiọyen ọ je hepha nẹ a da riẹn ẹkpo ri Baibol sansan kuyovwin, e sa djẹ ro avwanre ẹwẹn je vwẹ ọbọngan kẹ avwanre a da nẹrhovwo rhe Jihova vwẹ ọke ebẹnbẹn.

SIKẸRẸ JIHOVA VWẸ ẸRHOVWO ỌKIEJE

18-19. Imuẹro vọ yen Rom 8:26, 27 vwọ kẹ avwanre a rha riẹn obo ra cha ta vwẹ ẹrhovwoo? Djudje ọvo.

¹⁸ Se Rom 8:26, 27. Ọkievo ebẹnbẹn akpeyeren se mu avwanre rọ te ẹdia rẹ a rha riẹn obo ra cha ta vwẹ ẹrhovwoo. Ẹkẹvuọvo ukẹcha herọ. Vwẹ ọke tiọyena, ẹwẹn ọfuanfon Ọghẹnẹ “rẹ” kẹ avwanre. Idjerhe vọ? Womarẹ ẹwẹn ọfuanfon rọyen, Jihova de mu ihwo vwo si ẹrhovwo buebun phiyotọ vwẹ Baibol na. Ọtiọyena, ọ da dianẹ avwanre rha sa ta iroro rehẹ ubiudu rẹ avwanree, Jihova se rhiabọreyọ eta evo kiriguo rehẹ ẹrhovwo tiọyena kerẹ ẹrhovwo rẹ avwanre guọnọ nẹ, ọ je sa kpahenphiyọ ayen.

¹⁹ Iroro nana vwẹ ukẹcha kẹ oniọvo aye ọvo vwẹ Russia re se Yelena. E muro phiyọ uwodi kidie nẹ ọ nẹrhovwo ji se Baibol na. Oma bru Yelena ku te ẹdia rọ da mrẹ bẹnbẹn rọ vwọ nẹrhovwo. Ọ da ta: “Me da karophiyọ ẹrhovwo tiọyena ọke rẹ ebẹnbẹn mẹ de mu vwe rọ me rha riẹn obo re me cha nẹrhovwo kpaheen, ke me reyọ phiyọ nẹ Jihova che rhiabọreyọ ẹrhovwo rẹ idibo rọyen rẹ ọke awanre . . . kerẹ ẹrhovwo re me guọnọ nẹ. . . . Ọnana bọn vwẹ gan ọke me dahẹ ẹdia rọ pha gangan mamọ.”

20. Mavọ yen e se vwo muegbe ẹwẹn avwanre vwọ kẹ ẹrhovwo a dahẹ okeke?

²⁰ A dahẹ okeke, a sa mrẹ bẹnbẹn re vwo hwomamu a da nẹrhovwo. E se vwo muegbe rẹ ẹwẹn avwanre, a sa kerhọ kẹ isese ọbe rẹ Une rẹ Ejiro re ru phiyọ uhworo. E ji se si oborẹ oma ruẹ avwanre phiyotọ kirobo rẹ Ovie Devid ruru. (Une 18, 34, 142; ovuẹ rọhẹ obenu.) Vwọrẹ uyota, e si urhi vẹ ufi rẹ obo re muegbe rẹ oma avwanre kẹ ẹrhovwoo. (Une 141:2) Ru obo wo niri nẹ ọ cha wian kẹ wẹ.

21. Diesorọ a vwọ vwẹ ubiudu avwanre eje nẹrhovwo?

²¹ Ọ vwerhoma ra vwọ riẹn nẹ Jihova vwọ ẹruọ rẹ oborẹ oma ruẹ avwanre tavwen a ke tobọ ta ota. (Une 139:4) Dedena, ọ guọnọ nyo oborẹ avwanre ta vwo djephia nẹ a vwẹrosuọ. Ọtiọyena wo siomauko wọ vwọ nẹrhovwo rhe Ọsẹ wẹn rọhẹ odjuvwuu. Reyọ eta rẹ ẹrhovwo re si phiyọ Baibol na vwo ruiruo. Vwẹ ubiudu wẹn eje vwọ nẹrhovwo. Vuẹ obo re nẹrhẹ oma vwerhen owẹ vẹ obo re nẹrhẹ wo muomaphiyọ. Ọkieje yen Jihova che vwo bicha wẹ kerẹ uvi rẹ Ugbeyan!