Jihova Yen ‘Aghọghọ Avwanre Rode’

1-2. (a) Ẹdia vọ yen ihwo buebun hirharokuẹ nonẹna? (b) Die yen a cha ta ota kpahen vwẹ uyono nana?

IHWO buebun vwẹ akpọ na vwọtua erọnvwọn re sa nẹrhẹ ayen vwo omavwerhovwẹn. Dedena, uvi aghọghọ je kanre ayen. Buebun no nẹ o vwo ọke vuọvo akpeyeren che vwo yovwin kẹ ayeen, ọnana kọ nẹrhẹ ayen muomaphiyọ. Ọtiọyen oma ji ruẹ idibo ri Jihova evo. Kidie nẹ avwanre yerẹn vwẹ “ẹdẹ re koba na,” e se hirharoku ẹdia re “bẹn eyeren” re sa ghwa ẹnwan rhe.—2 Tim. 3:1.

² Vwẹ uyono nana, a cha ta ota kpahen erọnvwọn re sa nẹrhẹ aghọghọ rẹ avwanre va avwanre abọ kugbe obo ra sa vwọ rhoma vwo aghọghọ siẹrẹ ọ da va avwanre abọ. Jẹ ẹsosuọ, ofori nẹ a riẹn Ohwo rọ sa kẹ avwanre uvi omavwerhovwẹn kugbe aghọghọ.

OHWO RỌ SA KẸ AVWANRE UVI OMAVWERHOVWẸN KUGBE AGHỌGHỌ

3. Die yen emama yono avwanre kpahen Jihova? (Ni ihoho na.)

³ Ọkieje yen oma vwọ vwerhen Jihova. Ọ je guọnọ nẹ oma vwerhen avwanre. Ọtiọyena o rhe gbe avwanre unu siẹrẹ a da mrẹ aghọghọ rọyen vwẹ obo rọ maree—otọrakpọ rọ pha yoyovwin, ikọlọ sansan re riariẹ avwanre phiyọ, eranvwe re heha, kugbe emuọre buebun avwanre ria re vwerhan. Ọghẹnẹ ghini vwo ẹguọnọ rẹ avwanre, ọ je guọnọ nẹ avwanre riavwerhen rẹ akpeyeren!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Dede nẹ Jihova mrẹ ojaẹriọ rọhẹ akpọ na, diesorọ oma je vwọ vwerhọn? (b) Okẹ vọ yen Jihova vwọ kẹ avwanre? (Une rẹ Ejiro 16:11)

⁴ Dede nẹ Jihova ọyen “Ọghẹnẹ rẹ oma vwerhan,” ọ mrẹ ọdjarhe kugbe ojaẹriọ rọhẹ evunrẹ akpọ na. (1 Tim. 1:11) Jẹ, ọnana nẹrhẹ aghọghọ rọyen shekpotọọ. Ọ riẹnre nẹ ojaẹriọ eje ọ rẹ ọmọke—o ji bru ẹdẹ ro che vwo phioba phiyọ. Ọ vwẹ erhiorin hẹrhẹ ọke ro che vwo si ojaẹriọ kugbe omaemuophiyọ eje no bẹdi bẹdẹ. Enẹna, Jihova riẹn oborẹ avwanre hirharokuẹ, ọ je guọnọ vwẹ ukẹcha phia. Idjerhe vọ yen o vwo ru ọtiọyen? Ẹsosuọ, ọ kẹ avwanre okẹ rẹ aghọghọ. (Se Une rẹ Ejiro 16:11.) Jokaphiyọ obo rọ reyọ okẹ yena vwọ kẹ Jesu, rọ dia Ọmọ rọyen.

5-6. Diesorọ oma vwọ vwerhen Jesu?

⁵ Vwẹ usun rẹ emama ri Jihova eje, Jesu yen ohwo rẹ oma vwerhen kparobọ. Diesorọ? E jẹ a ta ota kpahen iroro ivẹ re sorọ. (1) “Ọyen yen uhoho rẹ Ọghẹnẹ re jẹmrẹ na,” o ji dje iruemu Ọsẹ rọyen phia gbagba vwẹ kidjerhe kidjerhe. (Kọl. 1:15; ni “happy” rọhẹ study note rẹ 1 Timoti 6:15.) (2) Jesu yen ohwo ro me nene Ọsẹ rọyen rọ dia Esiri rẹ omavwerhovwẹn ghwọrọ ọke grongron kugbe.

⁶ Ọkieje Jesu de ru kemu kemu rẹ Ọsẹ rọyen vuẹrẹ nẹ o ru yen ọ vwọ mrẹ aghọghọ. (Isẹ 8:30, 31; Jọn 8:29) Fikirẹ evun-ẹfuọn rọyen, ọ da mrẹ aroesiri ri Jihova, o de ji rhiabọreyọ.—Mat. 3:17.

7. Mavọ yen e se vwo vwo uvi aghọghọ?

⁷ Avwanre se vwo uvi rẹ aghọghọ siẹrẹ e de sikẹrẹ Jihova, rọ dia Esiri rẹ omavwerhovwẹn. Avwanre da ghwọrọ ọke ọkieje vwo yono kpahen Jihova je vwẹrokere, oma kọ cha rha vwerhan avwanre phiyọ. Avwanre je cha mrẹ aghọghọ siẹrẹ e de ru ọhọre rẹ Ọghẹnẹ je riẹn nẹ e vwo aroesiri rọyen.a (Une 33:12) Jẹ, ọ da rha dianẹ aghoghọ kanre avwanre vwẹ ọmọke yẹrẹ ọkieje vwo? Kẹ ọnana mudiaphiyọ nẹ e rhe vwo aroesiri rẹ Ọghẹnẹẹ? Ẹjo! Avwanre ihwo re gbaree, ọtiọyena a sa rioja rẹ ọmiaovwẹ, omaemuophiyọ kugbe ofudjevwe. Jihova vwo ẹruọ rẹ ọnana. (Une 103:14) E jẹ a ta ota kpahen erọnvwọn re sa nẹrhẹ aghọghọ rẹ avwanre va avwanre abọ, kugbe obo ra sa vwọ rhoma vwo.

WỌ VWẸ UPHẸN KẸ EMU VUỌVO NẸ O MIE WE AGHỌGHỌ WẸẸN

8. Die yen ebẹnbẹn rẹ akpeyeren sa so kẹ avwanre?

⁸ Ọrẹsosuọ: Ebẹnbẹn rẹ akpeyeren. Wọ rioja rẹ omukpahen, oghwọrọ ri kpregede, ọbẹnvwẹ, ọga yẹrẹ ọghwo? O krẹ aghọghọ rẹ avwanre ke va avwanre abọ siẹrẹ e de hirharokuẹ ebẹnbẹn tiọyenaa, ma rho ọ da dianẹ o vwo emu vuọvo re che se ru kpahen ẹdia naa. Baibol na tarọ phephẹn nẹ, “udu rọ vọnre vẹ uvweri guọghọ erhi rẹ ohwo.” (Isẹ 15:13) Ọkpako ọvo re se Babis rẹ oniọvo rọyen kugbe ọsẹ vẹ oni rọyen ghwuru vwẹ uvwre ẹgbukpe ẹne da ta: “Me rhe dia ẹdia ọruvwohwo, ji no nẹ mi vwo ọchukoo. Ọkievo, ẹwẹn mẹ hra totọ kidie o vwo erọnvwọn buebun mi hirharokuẹ, me vẹ ọsẹ kugbe oni mẹ vẹ oniọvo mẹ sa nabọ ghwọrọ ọke kugbe tavwen ayen ki ghwuu.” Ebẹnbẹn akpeyeren se mu avwanre rọ je so ofudjevwe kẹ avwanre.

9. Die yen sa vwẹ ukẹcha kẹ avwanre vwọ rhoma vwo aghọghọ? (Jerimaya 29:4-7, 10)

⁹ Die yen sa vwẹ ukẹcha kẹ avwanre vwọ rhoma vwo aghọghọ? A sa rhoma vwo aghọghọ siẹrẹ e de rhiabọreyọ ẹdia rẹ avwanre ji dje ọdavwaro phia. Iroro ọvo rẹ akpọ na titẹ yen, erọnvwọn eje che shephiyọ tavwen e ki se vwo omavwerhovwẹn. Ẹkẹvuọvo, ọnana dia uyotaa. Kerẹ udje, Jihova vuẹ ihwo ri Ju re mu kpo ighuvwu vwẹ Babilọn nẹ ayen rhiabọreyọ ẹdia rẹ ayen hepha kerẹ eviẹn vwẹ otọ ọrhorha na ji ru asan rẹ ẹgba rayen muru vwẹ ọke ọgangan yena. (Se Jerimaya 29:4-7, 10.) Die yen e yono norhe? Rhiabọreyọ ẹdia ru wọ hepha ji dje ọdavwaro phia kpahen erọnvwọn iyoyovwin ru wọ riavwerhen rayen vwẹ akpeyeren. Karophiyọ nẹ Jihova cha vwẹ ukẹcha kẹ wẹ. (Une 63:7; 146:5) Effie, rọ rha sa yaan fikirẹ asidẹnti ro vwori, da ta: “Me mrẹ ukẹcha mamọ vwo nẹ obọ ri Jihova, ihwo orua mẹ kugbe ukoko na rhe. Ki mi no nẹ mi de si ẹwẹn nu kọyen mi dje omavwerhovwẹn kpahen oborẹ ayen ru kẹ vwẹẹ. Me guọnọ dje ọdavwaro phia kẹ Jihova kugbe igbeyan re vwẹ ukẹcha kẹ vwẹ.”

10. Diesorọ oma sa vwọ vwerhen avwanre ọ da tobọ dianẹ avwanre hirharokuẹ ebẹnbẹn?

¹⁰ Ọ da tobọ dianẹ akpeyeren avwanre ghwe yovwin te obo re rhẹro rọyeen yẹrẹ erọnvwọn ebrabra te avwanre yẹrẹ ihwo orua avwanre oma, e ji se vwo aghọghọ.b (Une 126:5) Diesorọ? Kidie ọ dia ẹdia avwanre hepha yen nẹrhẹ e vwo aghọghọọ. Ọkobaro ọvo re se Maria, da ta: “Wo de hirharokuẹ ebẹnbẹn jẹ oma vwerhen owẹ, ọ dia ọyen o vwo mudiaphiyọ nẹ wo din ayen phiyọ omaa. Ẹkẹvuọvo, o mudiaphiyọ nẹ ive ri Jihova je rhe chọrọ owẹ ẹroo. Ọsẹ avwanre cha cha avwanre uko vwọ sẹro aghọghọ avwanre.” O toro oborẹ erọnvwọn gan te enẹnaa, karophiyọ nẹ ebẹnbẹn avwanre e rẹ ọmọke—kerẹ ichiyin rẹ awọ rehẹ orhoma rẹ urhie. O che kri ame ke ghworiẹ ayen yanraan, wọ rha cha mrẹ usi rayen vuọvoo.

11. Idjerhe vọ yen udje rẹ ọyinkọn Pọl vwọ vwẹ ọbọngan kẹ wẹ?

¹¹ Kẹ ọ da rha dianẹ ebẹnben avwanre nẹrhẹ e roro nẹ e rhe vwo aroesiri ri Jihovaa vwo? O yovwin siẹrẹ e de roro kpahen idibo ri Jihova re fuevun ri hirharoku ẹdia egangan. Roro kpahen udje ọyinkọn Pọl. Jesu komobọ yen sanerọ nẹ o re ghwoghwo uyota na kẹ “ẹgborho na, ọtiọyen ji te ivie kugbe ihwo rẹ Izrẹl.” (Iruo 9:15) Ọyena okpuphẹn rode! Dedena, Pọl hirharoku ebẹnbẹn sansan vwẹ akpeyeren. (2 Kọr. 11:23-27) Ebẹnbẹn eje ri Pọl hirharoku na ko mudiaphiyọ nẹ o rhe vwo aroesiri ri Jihovaa? Ẹjo kakaka! Vwọ fẹnẹ ọyena, akoechiro rọyen djerephia nẹ o vwo ebruphiyọ ri Jihova. (Rom 5:3-5) Asaọkiephana, gbe roro kpahen ẹdia wẹn. Wọ fuevun chirakon dede nẹ wo hirharokuẹ ebẹnbẹn. Ọtiọyena, wo se vwo imuẹro nẹ wo vwo aroesiri ri Jihova.

12. Idjerhe vọ yen aghọghọ sa vwọ va avwanre abọ siẹrẹ obo re rhẹro rọyen rhe te ohwo obọọ?

¹² Ọrivẹ: Obo re rhẹro rọyen ro te ohwo obọọ. (Isẹ 13:12) Ọdavwaro kugbe ẹguọnọ rẹ avwanre vwo kpahen Jihova mu avwanre vwo bru ẹkẹn kẹ oma vwẹ ẹga rọyen. Ẹkẹvuọvo, ọ da dianẹ a rha sa yanmu ẹkẹn re bru kẹ oma fikirẹ ẹdia rẹ avwanre hephaa, e se she ọkuọrọn. (Isẹ 17:22) Ọkobaro ọvo re se Holly da ta: “Me guọnọ kpo Isikuru rẹ Ihwo ri Ghwoghwo Uvie na, ga vwẹ ẹkuotọ ọfa, yẹrẹ vwobọ vwẹ iruo ebanbọn ri Ramapo na. Ẹkẹvuọvo ẹdia mẹ de wene, me rha sa yanmu ẹkẹn ri mi bru kẹ omaa. Ofu de dje vwe hwe. Ọ da ohwo siẹrẹ wo de vwo erọnvwọn ru wọ guọnọ ru, jẹ wo se ru ayeen.” Ọtiọyen oma ruẹ idibo ri Jihova buebun.

13. Erhọ yen ẹkẹn evo re se bru kẹ oma ọ da dianẹ ẹdia avwanre hepha nẹrhẹ e rhe se ruẹ te obo ra guọnọree?

¹³ Die yen sa vwẹ ukẹcha kẹ avwanre vwọ rhoma vwo aghọghọ? Karophiyọ nẹ Jihova dia ohwo rẹ ọhọre rọyen bẹn eruoo. Ọ guọnọre ne ru vrẹ oborẹ ẹgba avwanre muruu; yẹrẹ kẹ oborẹ avwanre ruẹ vwẹ ẹga rọyen yen nẹrhẹ o nẹ avwanre ghanghanree. Jihova guọnọre nẹ avwanre fuevun je riẹn asan ẹgba avwanre muru. (Maika 6:8; 1 Kọr. 4:2) Oka rẹ ohwo rẹ avwanre hepha vwẹ obevun yen ma ghanre vwọ kẹ vrẹ obo re ruẹ. Ọtiọyena, ọhọ herọ siẹrẹ e de ru vrẹ obo ri Jihova rhẹro rọyeen?c Ẹjo kakaka! Ọ da dianẹ ẹdia ru wọ hepha rhe jẹ wo se ruẹ te obo ru wọ guọnọ ru vwẹ ẹga ri Jihovaa, davwẹngba tẹnrovi obo wo se ru. Wo se yono ighene je vwẹ ukẹcha kẹ ihwo re kpakore? Wo se bru ẹkẹn kẹ oma wo vwo bru oniọvo ọvo ra, se yẹrẹ vwẹ ovuẹ rhe vwẹ ifonu vwo phiuduphiyọ awọ? Jihova cha kẹ wẹ aghọghọ wọ vwọ wian wọ vwọ yanmu ẹkẹn ru wo bru kẹ oma na! Karophiyọ nẹ o rhe che krii, vwẹ akpọ kpokpọ rẹ Jihova na avwanre che vwo uphẹn buebun ra vwọ ga vwẹ idjerhe sansan ra cha sa vwẹ ẹwẹn roroo! Holly ra ta ota kpahen siẹvure na vwo kuẹ eta rọyen phiyọ, ọ da ta: “Ofu de dje vwe, ki mi bru evun kpiroro je vuẹ oma mẹ nẹ, ‘arhọ ri bẹdẹ herọ vwẹ obaro na.’ Womarẹ ukẹcha ri Jihova, me sa yanmu ẹkẹn evo ri mi bru kẹ oma vwẹ akpọ kpokpọ na.”

14. Ọrhọ yen orọnvwọn ọfa ro se mie avwanre aghọghọ avwanre?

¹⁴ Ọrerha: Ojevwe romobọ. O vwo iroro ọvo ihwo evo titẹ vwẹ intanẹti nẹ e de nenesi rẹ ọdavwẹ romobọ, a cha mrẹ evunvọnvwẹ vẹ uvi omavwerhovwẹn. Ọtiọyena, kẹ ayen jiro kẹ ihwo nẹ ayen tẹnrovi erọnvwọn re kẹ ayen omavwerhovwẹn, dẹ ekuakua ri je ayen ji kpo asan sansan. Ọ chọre a vwọ riavwerhen rẹ erọnvwọn nanaa. O vwo oborẹ Jihova ma avwanre wan ra da mrẹ erọnvwọn iyoyovwin ki je avwanre. Ẹkẹvuọvo, ihwo buebun rhe mrẹvughe nẹ oborẹ ayen niri nẹ ọ cha kẹ ayen aghọghọ kọyen mie ayen aghọghọ. Ọkobaro ọvo re se Eva, da ta, “Ọ da dianẹ obo ru wo se vwo ru ọdavwẹ romobọ wẹn ọvo yen wo roro kpahan, wo che se vwo evunvọnvwẹẹ.” Ojevwe romobọ sa nẹrhẹ e no nẹ akpeyeren vwo otọọ, nẹ emuọvo kanre avwanre.

15. Die yen e se yono mie Ovie Solomọn?

¹⁵ E se yono vwo nẹ oborẹ Ovie Solomọn rhiẹromrẹ kpahen ọmiaovwẹ ro nẹ obuko rẹ ojevwe romobọ cha. O ru nene urhurusivwe romobọ rọyen rere o se vwo vwo omavwerhovwẹn, kerẹ udje, ọ re omamọ emu, kerhọ ihwehworo re vwerhoma kugbe kemu kemu ri yovwirin ra sa vwẹ igho dẹ vwẹ ọke yena. Ẹkẹvuọvo evun je vọọn. Ọ da ta: “Ẹro na sian ughe-e, eyẹrẹ emienyo vọn erhọn chekọ-ọ.” (Aghwo. 1:8; 2:1-11) Iroro rẹ akpọ na titẹ nẹ ọyen ghwa uvi rẹ aghọghọ cha, pha kerẹ igho rẹ ijebu. E sa họhọ omamọ rẹ igho; ẹkẹvuọvo e che se vwo ru emuọvoo.

16. Mavọ yen a sa vwọ rhoma vwo aghọghọ a da vwẹ ukẹcha kẹ ihwo efa? (Ni ihoho na.)

¹⁶ Die yen sa vwẹ ukẹcha kẹ avwanre vwọ rhoma vwo aghọghọ? Jesu yono avwanre nẹ “omavwerhovwẹn herọ ra vwọ kẹ okẹ vrẹ ra vwọ reyọ.” (Iruo 20:35) Ọkpako ọvo re se Alekos tare nẹ: “Me tẹnroviẹ obo mi se vwo ru erọnvwọn re ni fiemuu vwọ kẹ ihwo efa. Kọke kọke me da kokẹ, ki mi si ẹro nẹ oma mẹ, ọnana kẹ vwẹ aghọghọ.” Die yen wo se ru kẹ ihwo efa? Wọ da mrẹ ohwo ro muomaphiyọ, davwẹngba vwo phiuduphiyọ awọ. Ọkiọvo wo che se si ebẹnbẹn rọyen noo, jẹ wo se bro uche ru wọ vwọ nabọ kerhọ kẹ vẹ erorokẹ, ria ehrọre rọyen je karophiyọ nẹ o mu oghwa rọyen kẹ Jihova. (Une 55:22; 68:19) Wọ je sa vwẹ imuẹro kẹ nẹ Jihova kpairoro vrẹẹ. (Une 37:28; Aiz. 59:1) Wọ sa tobọ vwẹ ukẹcha ro fori vwọ kẹ, kerẹ wo vwo chere emu kẹ yẹrẹ ovwan ihwo ivẹ na vwọ yan omoyan kuẹgbe. Vuẹ nẹ ọ vwomaba wẹ vwẹ iruo aghwoghwo na, ọnana sa sasa ẹwẹn rọyen. Vwẹ uphẹn kẹ Jihova nẹ ọ reyọ owẹ vwo ruiruo. A da tẹnrovi ihwo efa ukperẹ oma avwanre ke che vwo uvi rẹ aghọghọ!—Isẹ 11:25.

17. Idjerhe vọ yen aghọghọ avwanre vwo churobọ si Jihova? (Une rẹ Ejiro 43:4)

¹⁷ E se vwo uvi aghọghọ siẹrẹ e de sikẹrẹ Ọsẹ avwanre rọhẹ odjuvwu ọkieje. Baibol vwẹ imuẹro kẹ avwanre nẹ Jihova yen ‘aghọghọ avwanre rode.’ (Se Une rẹ Ejiro 43:4.) Ọtiọyena, o toro ebẹnbẹn rẹ avwanre hirharokuẹ vwẹ akpeyereen, e jẹ udu bru avwanree. E jẹ a vwẹ ọkieje tẹnrovi Jihova, rọ dia Esiri rẹ aghọghọ avwanre!—Une 144:15.