Ona rẹ Iruo ri Fierere kẹ Iniọvo Avwanre vẹ Otọrakpọ Na

Avwanre Iseri ri Jihova riẹnre nẹ o rhe che krii, Jihova cha rhuẹrẹ akpọ rẹ ihworakpọ guọghọ totọ re na. (Ẹvwọphia 11:18) Dedena, avwanre je davwẹngba rẹ avwanre eje vwọ vwẹrote akpọ na. Kerẹ udje, avwanre bọn iwevwin rẹ ukoko avwanre vwẹ idjerhe re de jẹ omaẹwan ẹsua vwọ kẹ ihwo.

Ena rẹ iruo rẹ ebanbọn nana, e ruẹ ayen vwẹ idjerhe ri vwo fierere kẹ ihwo kugbe ekogho na. Idjerhe vọ yen avwanre vwọ reyọ ena nana vwo ruiruo re? Kẹ, mavọ yen ena nana vwọ vwẹ ukẹcha kẹ avwanre vwọ reyọ igho re torori vwo ruiruo vwẹ idjerhe rẹ aghwanre?

Obo re Vwo Si Oheri Kpotọ Vwẹ Ọguan rẹ Omẹvwa Ọvo

Jovwo, ikpamako yen a vwọ kanre Ọguan rẹ Omẹvwa ri Matola vwẹ Mozambique, jẹ asan eje rhiephiyọ. Ikpamako na sua oheri ọgangan vwevunrẹ Ọguan rẹ Omẹvwa na. Oniọvo ọshare ọvo da ta: “Oheri na nẹrhẹ ọdja dja avwanre! Vwẹ oba rẹ ọrhuẹrẹphiyotọ na, iniọvo na me họrhọ ru otafe da ra reyọ odju.” Die yen e se ru rere iniọvoavwanre sa vwọ riavwerhen rẹ omẹvwa na?

Avwanre phi ifani re reyọ odju vwọ wian phiyọ Ọguan rẹ Omẹvwa na ọtiọyen ji te obo ri nẹrhẹ oheri kpotọ. Ona nana nẹrhẹ oheri ro nẹ uvo cha kpotọ mamọ, je nẹrhẹ ifani na mu omamọ odju ro evunrẹ Ọguan rẹ Omẹvwa na. Ifani na guọnọ ẹgba rẹ ẹlẹtriki ọ ke wiaan, ẹkẹvuọvo odju yen ọ vwọ wian. Ọvuọvo ri ifani na te omarẹ idọla 50.a

Obo re ruru na nẹrhẹ omamọ rẹ odju ro evunrẹ Ọguan rẹ Omẹvwa na. Rọ vwọ dianẹ odju nabọ djuẹ na, igbẹhẹ vẹ otọ rẹ Ọguan rẹ Omẹvwa na ra kpọrhọ yẹrẹ vwo eyẹbuẹẹ. Vwọba, odju ra wẹn reyọ da je rhe vọn evunrẹ Ọguan rẹ Omẹvwa na. Ọnana da nẹrhẹ iniọvo na nabọ kerhọ, ẹwẹn rayen da je nabọ totọ. Oniọvo ọshare ra ta ota kpahen siẹvure na da ta: “Enẹna, avwanre rha họrhọ ro otafe vwẹ oba rẹ ọrhuẹrẹphiyotọ naa. Ukperẹ ọtiọyen, avwanre vẹ igbeyan avwanre dia evunrẹ omẹvwa na vwẹ ọke rẹ omaerovwon, rẹ avwanre vwọ ria emu je ta ota kuẹgbe. Kọ ghwa họhọ nẹ otọ rẹ urhe rode yen avwanre chidia!”

Ra Vwọ Reyọ Ẹgba rẹ Ọnre na Vwọ Ruiruo

Avwanre vwo sola vwẹ iwevwin buebun rẹ avwanre reyọ vwọ ga ẹga vwẹ akpọ na eje. Sola na wene ẹgba ọnre na vwo kpo ẹlẹtriki. Ọtiọyena, avwanre rhe mu ẹwẹn kpahen ipẹtro vẹ erọnvwọn efa tiọyena mamọ e ki se vwo urhukpẹ rẹ ẹlẹtrikii. Sola na nẹrhẹ avwanre sẹro rẹ igho re torori, o ji ghwe vwo imuoshọ ọtiọyeen.

Vwẹ ukpe ri 2022, e de phi sola phiyọ Oghọn Ukoko ri Slovenia. Sola na vwo ẹgba ro vwo mu ẹkẹn 30 rẹ ujorin rẹ ekuakua re vwẹ ẹlẹtriki vwọ wian vwẹ Oghọn rẹ Ukoko na. Ọ da rha dianẹ ẹlẹtriki ro nẹ sola na cha bun vrẹ obo ra guọnọre, ka vwẹ ẹgba ẹlẹtriki re vwo ruiruo chekọ na vwọ kẹ ihwo re dia ekogho na. Uche igho ra ghwọrọ phiyọ sola na yen $360,000. Ẹkẹvuọvo, ọ vwọ dianẹ igho rẹ Oghọn Ukoko na hwa phiyọ urhukpẹ kpotọ asaọkiephana, kọyen vwẹ ẹgbukpe ẹne, sola na cha hwosa rẹ oma rọyen.

Vwẹ 2024, avwanre de phi sola panẹl vẹ ibatri rode phiyọ Oghọn Ukoko ri Sri Lanka. Omarẹ $3 million yen a ghwọrọ phiyọ owian na, sola na vwo ẹgba ro vwo mu ẹkẹn 70 rẹ ujorin rẹ ekuakua re vwẹ ẹlẹtriki vwọ wian vwẹ Oghọn rẹ Ukoko na. O muẹro nẹ vwẹ uvwre rẹ ẹgbukpe erha, jẹ a sẹro igho buebun vrẹ igho ra ghwọrọ phiyọ sola na re. Avwanre ji phi sola phiyọ Oghọn Ukoko ri Netherlands vwẹ ukpe vuọvọ yena. Uche igho ra ghwọrọ phiyọ sola na yen $1.1 million, sola na vwo ẹgba ro vwo mu ẹkẹn 35 rẹ ujorin rẹ ekuakua re vwẹ ẹlẹtriki vwọ wian vwẹ Oghọn rẹ Ukoko na. Vwẹ ẹgbukpe irhirin, sola na cha hwosa rẹ oma rọyen.

Avwanre phi sola phiyọ ọfisi sansan re de ruiruo rẹ efanfan (RTO) vwẹ Mexico. Kerẹ udje, vwẹ ọke rẹ ekpahen vwẹ RTO ri Tarahumara (Central) vwẹ Chihuahua, asan eje djiro te 0 degrees Celsius (32°F), jẹ vwẹ ọke rẹ uvo, asan eje sa rhora te 40 degrees Celsius (104°F)! Kidie nẹ osa rẹ urhukpẹ ghanre mamọ, iniọvo na rha reyọ erọnvwọn re nẹrhẹ asan djiro yẹrẹ rhora vwo ruiruoo. Oniọvo ọshare re se Jonathan rọ wian vwẹ RTO na da ta: “Avwanre reyọ iblankẹti vẹ iwun ri vwo ọkpan vwo rhurhẹ vwẹ ọke rẹ ekpahen, avwanre mi rhe rhie evakpo rẹ avwanre phiyọ vwẹ ọke rẹ uvo.”

Vwẹ 2024, e de phi sola phiyọ RTO na. Uche igho ra ghwọrọ phiyọ sola na yen $21,480, o muẹro nẹ vwẹ uvwre rẹ ẹgbukpe iyorin, jẹ a sẹro igho buebun vrẹ igho ra ghwọrọ phiyọ sola na re. Enẹna, iniọvo rẹ avwanre reyọ erọnvwọn re nẹrhẹ asan eje djiro yẹrẹ rhora vwo ruiruo mamọ re. Jonathan da ta: “Iruo na vwerhen avwanre phiyọ, avwanre ji ruẹ buẹnphiyọ. Vwẹ ọke vuọvo na, oma vwerhen avwanre kidie a nabọ reyọ igho rẹ ukoko na vwo ruiruo vwẹ idjerhe rẹ aghwanre vẹ idjerhe ro se vwo fierere kẹ ekogho na.”

Ra Vwọ Reyọ Ame rẹ Osio Vwo Ruiruo

Vwẹ Africa, Eguan Ruvie evo vwo omamọ rẹ amee. Ọtiọyena, iniọvo na ke yan iroko buebun rẹ ayen vwo mu ame kpo Ọguan Ruvie rayen. Vwẹ Eguan Ruvie efa, iniọvo na vwẹ igho dẹ ame ra vwẹ imoto mu rhe, jẹ igho ra vwọ dẹ ghanre mamọ, o ji che fierere kẹ ekogho naa.

Rere iniọvo rẹ avwanre se vwo vwo ame, avwanre de phi itanki ride phiyọ Eguan Ruvie sansan vwẹ Africa ji phi ipaipi re cha nẹrhẹ ame osio rẹ ekpamako na djẹ ro itanki na. Tavwen e ki phi erọnvwọn nana phiyọ Eguan Ruvie na, iniọvo na ka fuẹrẹn aruọke rẹ ekogho na rere ayen vwọ riẹn idjerhe ro me yovwin rẹ ayen vwo mu ame ro Ọguan Ruvie na. E ki se phi erọnvwọn nana phiyọ Ọguan Ruvie ọvo, omarẹ $600 vẹ $3,000 yen ọ cha reyọ. Kidie nẹ iniọvo na rha vwẹ igho vwọ dẹ amẹẹ, ọnana da nẹrhẹ igho rẹ ayen ghwọrọ phiyọ Eguan Ruvie na kpotọ.

Ọrhuẹrẹphiyotọ rẹ ame rẹ osio nana fierere kẹ iniọvo rẹ avwanre re. Oniọvo aye ọvo re se Noemia, ro nẹ Mozambique rhe da ta: “Jovwo, avwanre yan ugbo oshesheri rhe vo ame. Bẹsiẹ avwanre ki te Ọguan Ruvie, jẹ oma na ejobi bruku re. Kidie nẹ ame bẹn ẹmrẹ, kọ nẹrhẹ ọ bẹn ra vwọ fon oma. Enẹna, ihwo eje sa mrẹ ame vwọ hworhẹ abọ. Oma rẹ avwanre rhe brẹkuẹẹ, avwanre nabọ riavwerhen rẹ omẹvwa rẹ avwanre. Ovwan kobiruo mamọ!”

Mavọ yen ukoko rẹ avwanre sa vwọ hwosa rẹ erọnvwọn nana eje rẹ ruru na? Womarẹ itetoro re ruẹ vwẹ akpọ na eje, ena sansan rehẹ donate.jw.org na yen e vwo ruẹ itetoro na. Ovwan kobiruo vwọ kẹ itetoro ri ghwologhwolo rẹ ovwan!