Ona rẹ Ẹbe-Ẹteyọn re Ru Lọhọ A sa Vwọ Vwẹ Ukẹcha kẹ “Koka Koka rẹ Ihwo Ejobi”

Jihova Ọghẹnẹ guọnọre nẹ “koka koka rẹ ihwo ejobi vwo erianriẹn ọgbagba rẹ uyota na.” (1 Timoti 2:​3, 4) Ẹkẹvuọvo, iniọvo rẹ avwanre vẹ ihwo efa rẹ avwanre ghwoghwo ota kẹ jẹ ejajẹ ujorin buebun. Kukpe kukpe, avwanre teyen ẹbe ri joma bun tẹ oduima ivẹ vwẹ ejajẹ yena. Die yen avwanre ru re a sa vwọ vwẹ igho re torori vwo ruiruo vwẹ idjerhe rẹ aghwanre, ra vwọ teyen ẹbe nana ri si ihwo kẹrẹ Ọghẹnẹ vwẹ ejajẹ buebun na?

E Si Uchunu rẹ Asan Ra Da Teyen Ẹbe Kpotọ, A Da Rha Dẹ Ijini Iyoyovwin Ra Vwọ Teyen Ẹbe

Omarẹ ẹgbukpe 40 re wanre na, avwanre vwo ekuakua ra vwọ teyan imagazini vwẹ ẹkuotọ re vrẹ 40. Rhanvwẹ ọke yena rhe yen avwanre vwọ rhuẹrẹ oborẹ avwanre teyen ẹbe wan, enẹna ẹkuotọ irhirin ọvo yen avwanre da teyen ẹbe. Uvwre rẹ ọke vuọvo yena, ejajẹ rẹ avwanre fan ẹbe na ra okpokpahọn da rhe vwẹ ẹkẹn esan vwo bun vrẹ ẹbe rẹ avwanre teyan jovwo! Mavọ yen avwanre sa vwọ teyen ẹbe vwẹ ejajẹ ri bun vrẹ e rẹ avwanre teyan jovwo jẹ asan rẹ avwanre da teyen ẹbe na ghwe buun? Emu ọvo rọ nẹrhẹ ọ dia ọtiọyen yen avwanre vwo ijini ri yovwin vrẹ e rẹ avwanre vwo ruiruo jovwo.

Ijini kpokpọ na nẹrhẹ avwanre sa teyen ẹbe buebun vwẹ uvwre rẹ ọmọke. Ijini rẹ awanre ra vwọ teyan ẹbe nẹrhẹ a ghwọrọ ọke buebun vwo wene ọsete ọvo vwo kpo ọfa ọke ra da cha teyen oka rẹ ẹbe sansan. Enẹna, fikirẹ omamọ rẹ ijini re vwori, owian re vwo wene isete ra vwọ teyan ẹbe rhe kpata asakuẹne vrẹ obo ri jovwo. Avwanre sa teyen ẹbe buebun uvwre rẹ ọmọke tobọ vwẹ ejajẹ rẹ ihwo re jẹ, ghwe buun. Vwọrẹ uyota, a guọnọ isete kpokpọ rere a sa vwọ teyan ẹbe sansan na. O krinọ naa, idọla re joma bun tẹ oduduru ivẹ yen avwanre ghwọrọ vwọ dẹ isete evo vwẹ uvwrẹ rẹ emeranvwe 12.a Ọtiọyena avwanre da guọnọ wiowian itete ijini kpokpọ yen avwanre vwo ruo, jẹ ijini nana vwẹ isete vwo ruiruoo. Womarẹ ijini nana vẹ efa re se laser re vwẹ urhukpẹ phia, ka sa vwẹ imigho vwọ teyan ẹbe ri ghwe buun, ọtiọyena a rha ghwọrọ ekuakua buebun vwo ru ayeen.

Vwẹ ikpe erha re wanre, vwẹ akpọ na eje, avwanre ghwọrọ idọla ri bun vrẹ oduduru ihwe vwo dẹ ijini kpokpọ ra vwọ teyan ẹbe je gba ẹbe koko rere owian rẹ ẹbe-ẹteyọn rẹ avwanre se vwo yovwinphiyọ vrẹ obo ri jovwo. E jẹ a fuẹrẹn oborẹ avwanre vwẹ ijini nana evo vwọ teyan Baibol wan. Jovwo, owian re vrẹ 40 yen a wian siẹrẹ a da teyen ẹbẹre ọvuọvo ri Baibol na nu kerẹ ebro, eko, ẹbiẹn, eriorio vẹ a vwọ reyọ ọda rẹ oro vwo ghworo orhọ rọyen. Vwọba ọyena, obọ yen e vwo muẹ ekrun rẹ ẹbe na phiyọ ẹdia ọvuọvo re de che ruiruo na. Enẹna, ewian ihwe ọvo kọyen iniọvo na ruẹ kidie ijini kpokpọ ra vwọ teyan ẹbe na sa wiowian na buebun kuẹgbe ẹsiẹvo, ijini na yen ji muẹ ẹbe na nẹ asan ọvo kpo asan ọfa. Ọtiọyena, owian buebun ra reyọ obọ vwọ wian a ke sa teyan Baibol na, rhi kpotọ mamọ re. Vwẹ oghọn ukoko ri Japan, ijini rẹ awanre na sa gba Baibol ri bun te 2,000 koko vwẹ inọke ẹrenren. Jẹ enẹna, ijini na sa gba Baibol ri bun te 35,000 koko vwẹ uvwre rẹ ọke vuọvo na!

Ekuakua Kpokpọ na Nẹrhẹ A Sa Sẹro rẹ Igho

Ekuakua kpokpọ re djunute na nẹrhẹ a sa sẹro rẹ igho re torori. Kerẹ udje, enẹna rẹ avwanre vwọ wiowian itete re na, jẹ avwanre rha vwẹ obọ wene ọsetee na, avwanre rha teyan ẹbe buebun di muẹ koko vwẹ asan ra da teyen ẹbe naa. Gary rọ ga vwẹ oghọn ukoko ri United States da ta: “Ẹsosuọ ọ bẹnre rẹ avwanre vwo rhiabọreyọ iroroẹjẹ na nẹ, ra vwọ teyen umuche ẹbe ra guọnọre ọvo yen me yovwin.” Gary da je ta: “Ọtiọyena avwanre ka vwọ tọn owian itete na phiyọ vwẹ ukpe rẹsosuọ, avwanre de noso nẹ igho rẹ avwanre ghwọrọre vwọ dẹ isete kugbe ẹbe re ghwọrọ kufia, bun te idọla 60,000. Ẹkẹvuọvo, vwẹ ukpe yena vuọvo na avwanre da sẹro rẹ idọla ri bun vrẹ oduduru 1.5 rọ dia igho ro fori nẹ a ghwọrọ vwọ dẹ ukori rẹ ẹbe fefe kugbe igho ra ghwọrọ vwọ teyen ẹbe koko jovwo!” A sa vwẹ igho tiọyen ra sẹro rọyen na vwo ru erọnvwọn eghanghanre efa kerẹ ẹbọn rẹ Eguan Ruvie vẹ a vwọ vwẹ ukẹcha vwọ kẹ ihwo rẹ emu phia kẹ.

Kidie nẹ avwanre rha guọnọ asan buebun ra cha sẹro rẹ ẹbe phiyọ naa, ọnana da nẹrhẹ ọfisi buebun vwẹ eghọn ukoko evo rhi rhiephiyọ. Eghọn ukoko nana ke sa vwẹ ọfisi rayen ri rhiephiyọ na vwo ru erọnvwọn efa. Vwọba, ọ vwọ dianẹ amasan evo kọyen a da teyan ẹbe na, avwanre rha bọn eghọn ukoko evo rhuarhoo. Kerẹ udje vwẹ 2018, oghọn ukoko ri Central Europe vẹ asan efa ra da teyan ẹbe keyen ruiruo rẹ ẹbe-ẹteyọn re ruẹ vwẹ oghọn ukoko ri Britain jovwo. Ọnana nẹrhẹ a sa sẹro rẹ idọla oduduru buebun vwẹ iruo rẹ ebanbọn re ruẹ vwẹ oghọn ukoko kpokpọ vwẹ Chelmsford, England.

“Wọ Karophiyọ Ovwẹ Re!”

Ma rho, ọrhuẹrẹphiyotọ ọlọlọhọ nana vwẹ ukẹcha kẹ ihwo buebun vwo siẹkẹrẹ Jihova. Ọnana kọ nẹrhẹ avwanre sa teyan ẹbe vwẹ ejajẹ buebun, ọ da tobọ dianẹ ẹbe ra guọnọre vwẹ ejajẹ na ghwe buun. Kerẹ udje, omarẹ ihwo 35,000 ọvo re je ejajẹ ri Wallisian yen dia New Caledonia, Wallis vẹ Futuna. Ẹkẹvuọvo vwẹ August 2024, avwanre de siobọnu New World Translation of the Holy Scriptures vwẹ ejajẹ ri Wallisian. Oghwoghwota ọvo rọ jẹ ejajẹ ri Wallisian ọvo re se Selafina da ta: “Mi se Baibol na vwẹ ejajẹ ri French jovwo re, jẹ mi vwo ẹruọ rẹ eta evo vwọọ. Ọtiọyena e vwo siobọnu Baibol na vwẹ ejajẹ ri Wallisian, ame ovie da djẹ nẹ ẹro mẹ rhe. Me da nẹrhovwo rhe Jihova nẹ, ‘E Jihova, wọ karophiyọ ovwẹ re! Wẹwẹ dia Ọghẹnẹ rọ ghwomaphiyọ ẹbẹre ọvo jẹ ọvo vwoo.’”

Dede nẹ ihwo re hanvwe vrẹ 500,000 re jẹ Sanga yen dia Democratic Republic of the Congo, jẹ ayen vwo ẹbe ri Vwo Omavwerhovwẹn Bẹdẹ! vwẹ ejaje rayen. Josué ro kpo ukoko ri Sanga tare nẹ, “Tavwen e ki siobọnu ọbe na, ọ dia ọmọrhiẹ owian yen ọ reyọ e ki se dje eta rọyen fiotọ vwọ kẹ ihwo re yonoo. Ọ je bẹn vwọ kẹ ihwo ra vwẹ Baibol yono na ayen vwo vwẹ ẹruọ re ọbe na. Oma vwerhen avwanre mamọ re vwo siobọnu ọbe nana vwẹ ejajẹ ri Sanga! Asaọkiephana, ihwo ri mi vwẹ ọbe na yono nabọ vwo ẹruọ rọyen, me rha ta eta buebuun.”

Avwanre teyan ẹbe ra fan nẹ Baibol na rhe je gharọ vwọ kẹ ihwo buebun enẹna vrẹ obo ri jovwo. Utoro wẹn ọtiọyen ji te i re ruru vwẹ donate.jw.org yen e se vwo ruiruo nana eje. Wẹ kobiruo rẹ utoro ri ghwologhwolo wẹn.