A Vwẹ Ọ ro Bunrun Vwọ Vọn Ọ rọ Hanvwere

Iseri ri Jihova ghwoghwo ota je vwẹ ukẹcha kẹ ihwo rẹ emu phia kẹ vwẹ ẹkuotọ re vrẹ 200. Ẹkẹvuọvo ẹkuotọ 35 ọvo yen sa mrẹ itetoro ro te vwọ vwẹrote ọdavwẹ rayen. Mavọ yen a sa vwọ vwẹrote ọdavwẹ rẹ ẹkuotọ ri vwo igho-o?

Ẹko Rọvwẹrote Iruo rẹ Iseri ri Jihova nabọ fuẹrẹn ọdavwẹ rẹ ẹga vẹ irueru rẹ Iseri ri Jihova vwẹ akpọneje. Ayen nabọ vwẹ aghwanre ghwọrọ igho vwo nene ọrhuẹrẹphiyotọ. Oghọn Ukoko ọvo da mrẹ itetoro rẹ igho ro te vwọ vwẹrote ọdavwẹ rayen chekọ, ka sa vwẹ igho ri chekọ na vwọ kẹ ẹkuotọ efa ri vwo bu-un. Ọrhuẹrẹphiyotọ nana họhọ ọ rẹ Inenikristi rẹ ẹgbukpe ujorin rẹsosuọ ruru rẹ ayen vwọ chọn ohwohwo uko “rere emu na ejobi vwọ dia abavo.” (2 Kọrẹnt 8:14) Ayen vwẹ obuebun rayen vwọ chọn Inenikristi ri vwori-i uko.

Mavọ yen oma ru iniọvo ra vwẹ itetoro rẹ oghọn ukoko efa vwọ kẹ? Kerẹ udje, vwẹ Tanzania, a vwẹ itetoro tiọyena vwọ rhuẹrẹ Ọguan Ruvie rẹ Ukoko ri Mafinga, kidie a da ghare ihwo rẹhẹ ẹkuotọ na kpo ẹkẹn ivẹ, ẹbẹre ro me bun vwọ sa mrẹ tẹ idọla ivẹ ẹdọke vwọ ghẹrẹ oma raye-en. Ukoko na de si: “Rhavwẹn ọke ra vwọ rhuẹrẹ Ọguan Ruvie rẹ avwanre na, ihwo re cha uyono de rhi bunphiyọ! Avwanre kpẹvwẹ Jihova vẹ iniọvo rẹ avwanre rẹhẹ akpọeje fikirẹ okẹ ri ghwologhwolo rayen rọ nẹrhẹ avwanre rhi vwo uwevwin ẹga oyoyovwin nana.”

Iniọvo avwanre evo vwẹ Sri Lanka rioja rẹ ọkanrovwẹ rẹ emu fikirẹ ọga ri COVID-19 na. Imara Fernando vẹ ọmọshare rọyen Enosh, hẹ usun rẹ ihwo na. Akpẹvwẹ Ọghẹnẹ vwọ kẹ itetoro ro nẹ ẹkuotọ efa rhe, ka sa vwẹ ukẹcha kẹ ayen. Vwẹ ikadi rẹ ayen ruru, ayen de si: “Avwanre kpẹvwẹ iniọvo ri djẹ ẹguọnọ kẹ avwanre vwẹ ọke ọgangan nana. Oma vwerhẹn avwanre nẹ avwanre ẹbẹre ọvo rẹ orua nana, avwanre nẹrhovwo nẹ Jihova chọn iniọvo avwanre eje uko vwẹ ẹdẹ re koba nana.”

Otoro asan rẹ iniọvo avwanre dia-a, ayen muegbe ayen vwọ kokẹ. Kerẹ udje, Enosh ruẹ emekpeti ro phi igho phiyọ rere o ji se vwo toro igho kẹ erua ri vwori-i. Guadalupe Álvarez ji vwo ẹwẹn rẹ ẹse eruo tiọyena. Ọ dia ubrotọ ọvo vwẹ Mexico ra da hwa imigho kẹ ihwo re wian. Dedena, o ji toro obo ro se toro. Ọ da ta: “Me kpẹvwẹ Jihova vwọ kẹ uyoyovwin vẹ ẹguọnọ rọyen ro jẹ rhẹriẹ na. Me riẹnre nẹ a cha vwẹ utoro mẹ vwọ ba ọ rẹ ihwo efa ra cha vwọ vwẹ ukẹcha kẹ iniọvo mẹ re guọnọ ukẹcha.”

Oma vwerhẹn Eghọn Ukoko rẹ ayen vwo toro igho vwo rhe ẹkuotọ ri vwori-i. Anthony Carvalho ro dia ọvo usun rẹ Umẹ Rọvwẹrote Oghọn Ukoko rọhẹ Brazil da ta: “Vwẹ ikpe buebun, ewian buebun vwẹ ẹkuotọ avwanre guọnọ ukẹcha rẹ igho vwo mie ẹkuotọ efa, fikirẹ ukecha nana ra vwọphia na, avwanre da ghene yan obaro. Enẹna, ẹdia rẹ avwanre wene re, avwanre ke tobọ toro igho vwo rhe ihwo efa rẹ guọnọ ukecha. Iniọvo avwanre ni iruo rẹ odibo egbe na kerẹ iruo rẹ iniọvo rẹ akpọeje ruẹ, ọtiọyena kẹ ayen dje uruemu rẹ omaevwoze phia kerẹ idibo ri Jesu.”

Mavọ yen Iseri ri Jihova sa vwọ chọn iniọvọ rayen uko? Ọ diẹ womarẹ a vwọ vwẹ igho rhe oghọn ukoko rẹhẹ ẹkuotọ efa-a, ẹkẹvuọvo womarẹ e vwo ruẹ itetoro vwọ kẹ iruo rẹ akpọeje. E se ru ọnana womarẹ e vwo phi igho phiyọ ekpeti utoro re si “Iruo rẹ Akpọeje” phiyọ rọhẹ Ọguan Ruvie yẹrẹ vwẹ intanẹti womarẹ donate.jw.org. Avwanre vwo ọdavwaro kpahen itetoro tiọyena.