Isikuru rẹ Giliẹd​—Ọ Vwẹ Ukẹcha kẹ Iniọvo rẹ Akpọeje

Kukpe kukpe, e durhie iniọvo evo rehẹ ẹga rẹ ọkieje roghẹresan vwo kpo Isikuru ri Giliẹd, re ruẹ vwẹ Watchtower Educational Center rọhẹ Patterson vwẹ New York.a Vwẹ isikuru nana, e yono emo rẹ isikuru na oborẹ ayen se vwo ru yovwinphiyọ vwẹ iruo ra vwọ kẹ ayen vwẹ ẹga ri Jihova. Uyono nana chọn ayen uko vwọ bọn ukoko na gan, ọtiọyen ji te eghọn rẹ ukoko rehẹ akpọneje.

Isikuru ri Giliẹd ghini isikuru rẹ akpọeje. Kerẹ udje, ihwo 56 ri nẹ ekuotọ 29 rhe yen kpo iklasi 147 ri Giliẹd re ruru vwẹ 2019. Iniọvo re durhie kpo Giliẹd ga vwẹ Bẹtẹl yẹrẹ ga kerẹ iniruo rẹ okinriariẹ, imishọnare yẹrẹ ekobaro oghẹresan vwẹ ẹga rẹ ọkieje roghẹresan jovwo re.

A tuẹn egbemuo rẹ isikuru na phiyotọ ọke grongron tavwen isikuru na ke tuanphiyọ. Kerẹ udje, Akon Iruo Rọvwẹrote Oyan Vwẹ Esiri Ukoko (WHQ Travel) dẹ itikẹti ra vwọ rua aropleni vwọ kẹ iniọvo re durhie kpo isikuru na. Vwọ kẹ iklasi 147 ri Giliẹd na, uchunu rẹ igho ra vwọ fa iniọvo nẹ ẹkuotọ efa rhe Patterson ji muẹ ayen rhivwin te $1,075 (U.S.). Iniọvo ri nẹ Solomon Island rhe na ro aropleni abọ ẹne ayen ki te Patterson, ayen da rha ro aropleni abo erha ayen ki se rhivwin kpo​—⁠ugbo na sheri vrẹ iroko 35,400! Uchunu rẹ igho re vwo mu ohwo ọvo yen $2,300 (U.S.). A sa vwọ sẹro rẹ igho, WHQ Travel ke vwẹ ikọmputa vwọ hiẹ guọnọ itikẹti rẹ igho rayen kpotọ. Ayen da tobọ mrẹ itikẹti na nu dede, ikọmputa na je cha ra hiẹ yanran vwẹ idughwrẹn evo yẹrẹ emeranvwe evo sẹ igho rẹ itikẹti na shekpotọ re. WHQ Travel je reyọ igho ra mrẹ vwo nẹ airline credits vẹ airline mileage vwọ dẹ itikẹti.

Buebun rẹ iniọvo na guọnọ visa ayen ke sa ro evunrẹ United States. Ọtiọyena, Akon rẹ Iruo rọ Vwẹrote Eta ri Shekpahen Urhi vwẹ Esiri Ukoko da vwẹ ukẹcha kẹ ayen vwẹ ẹdia nana. Visa rẹ ohwo ọvuọvo vẹ obo ra hwa vwo ruo, reyọ $510 (U.S.).

Idjerhe vọ yen oborẹ iniọvo na yono nẹ isikuru na rhe vwo fierere kẹ avwanre? Hendra Gunawan ga kerẹ ọkpako vwẹ Southeast Asia. Ukoko rẹ aye gbe ọshare ọvo ri wontọ nẹ Isikuru ri Giliẹd hepha, yen ọ hepha. Ọ da ta: “Jovwo, avwanre vwo ekobaro ọkieje vuọvo vwẹ ukoko rẹ avwanre-e. Ẹkẹvuọvo iniọvo ri wontọ nẹ Isikuru ri Giliẹd na vwọ rhe, oruru vẹ ẹwẹn rẹ omaevwoze rayen de mu iniọvo na vwọ jowọ rẹ ayen vwọ ga kerẹ ekobaro. Ọke vwọ yanran, oniọvo aye ọvo rọhẹ ukoko avwanre de kpo Isikuru rẹ Ihwo ri Ghwoghwo Uvie Na!”

Sergio Panjaitan vẹ iniọvo evo ri wontọ nẹ Isikuru ri Giliẹd wiankuẹgbe vwẹ Bẹtẹl ọvo rọhẹ Southeast Asia. Ọ da ta: “Obo re yono ayen na fierere kẹ avwanre, ọ dia ayen ọvo-o. Ayen yono emu buebun! Ẹkẹvuọvo ukperẹ ayen vwọ vwẹ ẹro ri gegerege vwo ni oma rayen, kẹ ayen yono ihwo efa obo re yono ayen. Iyono rayen na vwọ bọn avwanre gan na, ko ji mu avwanre vwo phiuduphiyọ ihwo efa awọ.”

Mavọ yen e ruẹ hwosa rẹ isikuru nana? Womarẹ itetoro re ruẹ vwọ kẹ Iruo rẹ Akpọeje, e ruẹ buebun rẹ itetoro na womarẹ donate.jw.org. Ovwan kobiruo vwọ kẹ ẹwẹn esiri rẹ ovwan vwo ruẹ itetoro re vwo biẹcha isikuru rẹ akpọeje nana.