Baibol na sa Chọn Ohwo Uko Vwo Yerin Ghene Okpọga?

Ẹkpahọnphiyọ ri Baibol Na

E. Ọghẹnẹ vwo ọdavwẹ rẹ idibo rọyen re muọga. Vwọ kpahen odibo rọyen ọvo rọ fuevun, Baibol na da ta: “Ọrovwohwo vwẹ obọ cha vwẹ ehwa rẹ emiavwe rọye.” (Une Rẹ Ejiro 41:3) Ọ da dianẹ wọ họvwọn okpọga, Owọẹjẹ erha nana sa chọn wẹ uko:

1. Nẹrhovwo vwọ kẹ ẹgba wo se vwo chirakon. Wo se vwo “ufuoma rẹ Ọghẹnẹ rọ nọ ẹruọ ejobi,” ọnana cha chọn wẹn uko vwo yerin ghene ebẹnbẹn na.—Filipae 4:6, 7.

2. Vwo uruemu abavo. Baibol na da ta: “Udu sasasa yẹ omamọ rẹ uhuvwu, ẹkẹvuọvo erhi ro muomaphihọ nẹrhẹ ibeku rẹ oma ya muẹ.” (Isẹ 17:22) Jẹ oma vwerhen owẹ ọkieje, kidie ọnana cha chọn wẹn uko vwẹ ọke ebẹnbẹn ji nẹrhẹ vwo vwo omakpokpọ.

3. Jẹ iphiẹrophiyọ wẹn kpahen obaro na ganphiyọ. Omamọ rẹ iphiẹrophiyọ sa nẹrhẹ oma vwerhen owẹ dede nẹ wo muọga vwẹ ọke grongron re. (Rom 12:12) Baibol na tarọ phiyotọ nẹ ọke cha, “o gbi vwo ohwo rẹ orere na ọvuọvo rọ sa tanẹ, Me mwọga-a.” (Aizaya 33:24) Vwẹ ọke yena, Ọghẹnẹ che si ega re bẹn esivwon no. Kerẹ udje, Baibol na tare nẹ emare cha rhoma dia ighene ji vwo omakpokpọ: “Jẹn oma rọye rhe dia wọnwọn kerẹ oma rẹ emeghele; jẹn ogangan rẹ emeghele rhivwi bro rhe.”—Job 33:25.

Noso: Dede nẹ Iseri ri Jihova reyọ uchebro rẹ Ọghẹnẹ vwọphia vwo ruiruo, ayen je rhiabọreyọ omaesivwo ọke ayen de muọga. (Mak 2:17) Avwanre vuẹ ihwo oka rẹ omaesivwo ro fo vwọ kẹ aye-en, kidie ohwo ọvuọvo yen che brorhiẹn rẹ oborẹ ro che sivwin oma rọyen wan.