Wo De Nene Ọga Ọgangan Muabọ

“Ọke rẹ idọktọ vwọ vuẹ vwẹ nẹ mi vwo ikansa rẹ upho vẹ ibievun, mi vwo imuẹro kokoroko nẹ mi che ghwu. Mi vwo te uwevwin, me da ta, ‘Oyoma, mi rhẹro rẹ ikansa-a, ẹkẹvuọvo me cha guọnọ idjerhe mi se vwo chirakon rẹ ebẹnbẹn na.”—Linda, ẹgbukpe 71.

“Ọga ọvo mu vwe, ro djobọte ẹbẹre ọvo rẹ opharo mẹ. Vwẹ ọkievo, emiavwe ọgangan na so ofudjevwe kẹ vwẹ. Ọke buebun, mi roro nẹ mẹvwẹ ọvo yen herọ, me tobọ guọnọ hwe oma mẹ.”—Elise, ẹgbukpe 49.

Ọshare ọvo rẹ oma rọyen ganre-e chidia agbara rẹ ukpono, ihwo ri vwo ẹguọnọ rọyen mudia riariẹ phiyọ

Ọ DA dianẹ a vuẹ wẹ yẹrẹ ohwo wo vwo ẹguọnọ kpahen re, nẹ o vwo ọga ọvo, nẹ ọga na se hwe, wo se vwo ẹruọ ofudjevwe rẹ ovuẹ ọtiọyena sa so. Vwọ vrẹ ọga na, wo che nene iroro ọgangan muabọ. Oshọ vẹ ẹwan sa tobọ ganphiyọ fikirẹ iroro rẹ ọke wọ cha ghwọrọ vwo kpo họsipito, egbabọse ra vwọ mrẹ idọktọ yẹrẹ igho re vwo sivwin ọga na, kugbe oborẹ ihuvwun wọ cha rọ na sa so kẹ ugboma wẹn. Iroro ro nene ọga ọgangan ghene sa so ofudjevwe.

Tivọ yen avwanre da sa mrẹ ukẹcha? Ihwo buebun mrẹvughe nẹ a vwọ vwẹroso Ọghẹnẹ womarẹ a vwọ nẹrhovwo rhe, ji se ẹkpo rẹ Baibol sansan vwẹ ukẹcha kẹ ayen mamọ. A je sa mrẹ ukẹcha ọfa vwo nẹ ẹguọnọ vẹ obicha rẹ ihwo rẹ orua vẹ igbeyan djephia.

OBO RE VWẸ UKẸCHA KẸ IHWO EVO

“Robert rọhẹ ẹgbukpe 58 vwẹ uchebro nana phia: “Vwo esegbuyota kpahen Ọghẹnẹ ọke wo de she ro ọga, ọ cha vwẹ ukẹcha kẹ wẹ vwo chiro. Nẹrhovwo rhe Jihova. Vuẹ ọdavwẹ wẹn. Yare ukẹcha ẹwẹn ọfuanfon mie. Rẹ nẹ ọ chọn wẹ uko wo se vwo dje uruemu abavo phia, ji phiuduphiyọ orua wẹn awọ, rere wo ji se chirakon rẹ ọga na.

“Ọyen ukẹcha rode siẹrẹ ihwo rẹ orua wẹn de bicha wẹ. Ihwo se vwe kẹdẹ kẹdẹ, ayen me nọ vwẹ, ‘Mavọ oma na hepha?’ Igbeyan re dia asan sansan phiuduphiyọ ovwẹ awọ. Vwọrẹ uyota, use rayen na nẹrhẹ oma mẹ sasa, ọyena chọn vwẹ uko mamọ.”

Wọ da dia ugbeyan rọ kọn bru ohwo rẹ oma rọyen ganre-e ra, vwo oniso rẹ oborẹ Linda tare: “Ohwo rẹ oma rọyen ganre-e na, guọnọ ru kirobo ro ruẹ ọke oma rọyen vwọ gan, ọkievo, ọ dia ọkieje yen ọ vwọ guọnọ ta ota kpahen ọga na-a. Ọtiọyena, gba ta ota kpahen erọnvwọn rẹ ovwan ta eta kpahen jovwo ọke rẹ oma rọyen vwọ gan.”

Womarẹ ukẹcha ro nẹ obọ rẹ Ọghẹnẹ rhe, kugbe uchebro rẹ Baibol na, eriyin ji te obicha rẹ orua vẹ igbeyan, avwanre se fiudugberi nẹ akpọ fo eyeren, ọ da tobọ dianẹ avwanre she ro ọga ọgangan.

Ẹkpo rẹ Baibol re Sa Vwẹ Ukẹcha Kẹ Wẹ

Vwẹroso Ọghẹnẹ.

“Me guọnọ Ọrovwohwo, o de nyo kẹ vwẹ, o de sivwi uvwe nẹ oshọ mẹ ejobi. Ovwiogbere nana kperi se, Ọrovwohwo de nyo kẹ.”—Une Rẹ Ejiro 34:4, 6.

Linda re si eta rọyen phiyọ obenu na da ta: “Me je vwẹ ọke vuọvo rẹ nẹ ‘Jẹ oma mẹ na kpo-o.’ Ọkieje yen me vwọ nẹrhovwo nẹ, ‘Kẹ vwẹ ogangan, chọn vwẹ uko mi se vwo chirakon rẹ ebẹnbẹn na.’”

Se Ota rẹ Ọghẹnẹ vwọ kẹ ọbọgan.

“O gbi vwo ohwo rẹ orere na ọvuọvo rọ sa tanẹ, Me mwọga-a.”—Aizaya 33:24.

Roro kpahen ive rẹ Ọghẹnẹ kpahen obaro na. Ọnana cha nẹrhẹ wo vwo iphiẹrophiyọ rọ cha chọn wẹ uko vwo chirakon.

Nokpẹn rẹ ukẹcha mie ihwo rẹ orua vẹ igbeyan.

“Igbeyan vwo ẹguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.”—Isẹ 17:17.

“Elise re si eta rọyen phiyọ obenu na da ta: “Wo broma nẹ ihwo-o, vwẹ uphẹn kẹ igbeyan wẹn rere ayen chọn wẹ uko. Ọkievo, wo se roro nẹ wẹ ọvo yen herọ, nẹ Ọghẹnẹ tobọ kerhọ kẹ wẹ-ẹ, dedena, wo broma nẹ ihwo-o.”