ENỌ RẸ IGHENE NỌ
Oyan rẹ Ọmọtẹ vẹ Ọmọshare—Ẹbẹre 3: Ofori nẹ e Phioba Phiyọ Oyerinkugbe Na?
Ọmọke evo rhire na yen ovwan vwọ kọnphiyọ ohwohwo, jẹ enẹna, wo vwo ẹwẹn ivivẹ kpahen oyerinkugbe na re. Wọ je cha dia gbanẹ wọ che phioba phiyọ? A rhuẹrẹ uyovwinrota nana rere ọ sa vwọ vwẹ ukẹcha kẹ wẹ vwo brorhiẹn oborẹ wo che ru.
Vwẹ uyovwinrota nana
E vwo nene ẹwẹn ivivẹ muabọ
Eghene ọshare vẹ aye da kọnphiyọ ohwohwo te ọke evo re, ayen sa rhe mrẹvughe nẹ ayen fẹnẹ ohwohwo vrẹ oborẹ ayen rorori jovwo. Kerẹ udje:
Ọvo guọnọ kpo orhoma rẹ abadi; ọrivẹ guọnọ yan oyan ogrongron.
Ọvo kuomaba ihwo; ọ rẹ ocheko sioma nẹ otu.
Ọvo gun efian mamọ; ọ rẹ ochekọ ta uyota ọkieje.
Noso nẹ ọvuọvo rẹ ẹdia nana fẹnẹ ohwohwo. Ọrẹsosuọ shekpahen ojevwe re fẹnẹre; ọrivẹ shekpahen iruemu re fẹnẹre; ọrerha de rhe shekpahen ẹro re vwo nẹ obo ri yoma vẹ obo re chọre.
Obo re roro kpahen: Ọvọ usun rẹ ẹdia erha nana yen cha ma bẹn kẹ wẹ ọ da dianẹ ovwan cha rọvwọn? Ẹdia vọ usun rẹ erha nana yen ovwan sa vwọ nuẹ kẹ ohwohwo?
Ọkievo, obo ri je ọshare vẹ aye dia ọvoo, ọtiọyen ji te iruemu rayen, dedena omavwerhovwẹn je sa dia orọnvwe rayen. Ọtiọyena a vwọ ro ohwohwo, o dia o mudiaphiyọ nẹ ihwo ivẹ na cha họhọọ. Vwẹ ẹdia evo, aye gbe ọshare vwo ọdavwẹ rẹ ayen vwo yono kpahen oborẹ ọrivẹ rayen vwo ẹguọnọ kpahen yẹrẹ mrẹ erere vwo nẹ iruemu rẹ ọrivẹ rẹ orọnvwe rayen.a
Vwọ fẹnẹ ọyena, ọyen obo re ghanre wọ vwọ rọvwọn ohwo rẹ wẹ vẹ ọyen gbe vwọ esegbuyota vuọvo kpahen ẹga kugbẹ ohwo ro vwo oka ẹro wo vwo nẹ obo ri yoma vẹ obo re chọre. O rhe se ru ọtiọyeen, gba mrẹvughe nẹ ọyen oka rọ sa nẹrhẹ wo phioba phiyọ oyerinkugbe na.
Kerẹ udje, roro kpahen ihwo ri kpo ẹga re fẹnẹ ohwohwo. Ọbe na Fighting for Your Marriage da ta: “Ehiahiẹ djerephia nẹ aye vẹ ọshare re rọvwọnre, ri vwo esegbuyota re fẹnẹ ohwohwo sa fan orọnvwe rayen.”
Odjekẹ ri Baibol: “Wọ davwẹngba wẹ vẹ ihwo re dia Inenikristii vwo yerin kugbe kerẹ ọvoo, kidie ọ cha sa phiaa.”—2 Kọrẹnt 6:14, Good News Translation.
E vwo brorhiẹn na
Baibol na tare nẹ itu re rọvwọnre “che rhiẹromrẹ emiavwẹ vẹ omaemuophiyọ.” (1 Kọrẹnt 7:28, The New English Bible) Ọtiọyena, wo jẹ o gbewunu siẹrẹ wo de rhiẹromrẹ evo rayen enẹna rẹ ovwan vwọ kọnphiyọ ohwohwo naa.
Ọ dia ọkieje yen ẹmẹghwọ re vwomaphia vwo djephia nẹ oyerinkugbe na cha sa wiaan. Onọ ofori nẹ wọ nọ oma wẹn yen, avwanre sa rhuẹrẹ ẹghwọ na phiyọ vwọrẹ ufuoma? Aphro hẹroo nẹ ọnana oborẹ ovwan che ru siẹrẹ ovwan da rọvwọn nu.
Odjekẹ ri Baibol: “Ẹkẹvuọvo we dje uruemu esiri kẹ ohwohwo, we gbe arodọnvwẹ kẹ ohwohwo, we vwo ghovwo ohwohwo ọphẹ.”—Ẹfesọs 4:32.
Vwọ fẹnẹ ọyena, ẹghwọ ọgangan yẹrẹ ẹghwọ rẹ ọkieje se djephia nẹ ovwan ihwo ivẹ na fo vwọ kẹ ohwohwoo. Ọ da dia ọtiọyen, o yovwin siẹrẹ ovwan da riẹn kpahen ọnana bẹsiẹ ovwan ke rọvwọn!
Ẹghwọ ọgangan yẹrẹ ẹghwọ rẹ ọkieje se djephia nẹ ovwan fo vwọ kẹ ohwohwoo
Obo ra ta na kọna: Wo de vwo ẹwẹn ivivẹ ọgangan kpahen ohwo rẹ wọ kọnphiyọ na yẹrẹ sẹ wo muegbe wọ vwọ rọvwọn re, wo chukokuẹ ẹwẹn ivivẹ tiọyenaa!
Odjekẹ ri Baibol: “Ọvwiroro da mrẹ ukpokpogho rọ cha ko sioma rọye reyọ; ẹkẹvuọvo ẹkpa da họrhọ ruọ, kọ re oja.”—Isẹ 22:3.
Wo de brorhiẹn wo vwọ phioba phiyọ oyerinkugbe na
E vwo phioba phiyọ oyerinkugbe miavwa ohwo mamọ. Ẹkẹvuọvo, ọ da dianẹ ohwo ọvo yẹrẹ ovwan ihwo ivẹ na vwo ẹwẹn ivivẹ ọkieje vwọ kpahen oyerinkugbe na, o yovwin ovwan de phioba phiyọ.
Mavọ yen wo che ru ọyena wan? O ghwe shephiyọ re vwo phioba phiyọ oyerinkugbe womarẹ ifonu yẹrẹ imelii, jokpanẹ o vwo omamọ iroro rọ sorọ. Ukperẹ ọtiọyen, guọnọ ọke ro fori vẹ omamọ asan rẹ ovwan da sa ta ota kugbe.
Odjekẹ ri Baibol: “Wa ta uyota kẹ ohwohwo.”—Zekaraya 8:16.
Re vwo phioba phiyọ oyerinkugbe mudiaphiyọ nẹ owẹ dia ohwo rẹ emuọvoo? Ẹjo kakaka. Karophiyọ nẹ a vwọ kọnphiyọ ohwo cha ohwo uko vwọ riẹn sẹ ọ cha rọvwọn ohwo na yẹrẹ ọ cha rọvwọọn. Ọ da tobọ dianẹ oyerinkugbe na vwoba, wo ji se yono iyono eghanghanre vwo nẹ obo re phiare na rhe.
Nọ oma wẹn: ‘Die yen mi yono kpahen oma mẹ vwo nẹ oyerinkugbe na rhe? Obo re phiare na nẹrhẹ me mrẹ ẹdia evo vwẹ oma mẹ ro fori nẹ me wian kpahen? Die yen mi che ru vwọ fẹnẹ ọnana siẹrẹ mi de brorhiẹn me vwọ kọnphiyọ ohwo ọfa?’
a Wọ sa vwọ nabọ vwo ẹruọ oborẹ egbabọse nana se vwo djobọte aye gbe ọshare, ni iyovwinreta na, “Help for the Family—Dealing With Differences” kugbe “Ukẹcha Vwọ kẹ Orua—A Vwọ Vwẹ Ẹro Abavo Vwo nẹ Iruemu ri Miovwo Uwe Ivun.”