Oyan rẹ Ọmọtẹ vẹ Ọmọshare​—Ẹbẹre 1: Mi Muegbe rẹ Oyan rẹ Ọmọtẹ vẹ Ọmọshare Re?

Vwẹ uyovwinrota nana

• Die yen oyan rẹ ọmọtẹ vẹ ọmọshare?

• Wo muegbe rẹ oyan rẹ ọmọtẹ vẹ ọmọshare re?

Die yen oyan rẹ ọmọtẹ vẹ ọmọshare?

Ihwo evo nẹ oyan rẹ ọmọtẹ vẹ ọmọshare phiyọ emu rẹ eha. Ẹkẹvuọvo, vwẹ uyovwinrota nana, “oyan rẹ ọmọtẹ vẹ ọmọshare” mudiaphiyọ ọke rẹ ihwo ivẹ ghwọrọ kuẹgbe vwọ fuẹrẹn omoma rayen sẹ ayen fo vwọ kẹ orọnvwe. Kọyen o vwo obo ri muẹ ohwo vwọ jowọ nana. Ọ ghwa dia ọke rẹ ọmọtẹ vẹ ọmọshare de rhiavwerhen rọye-en.

Oyan rẹ ọmọtẹ vẹ ọmọshare vwẹ ukẹcha kẹ ohwo vwọ riẹn sẹ a rọvwọn yẹrẹ e phioba phiyọ oyerinkugbe ọkpẹkpẹkpẹ na ọke vwọ yanran na. Wọ da ton ọyan rẹ ọmọtẹ vẹ ọmọshare phiyọ, gbe ji muegbe rẹ ẹwẹn wẹn hẹrhẹ obo ri se nẹ obuko rọyen rhe.

Obo ra ta na kọna: O de muwẹro nẹ wo muegbe rẹ oyan rẹ ọmọtẹ vẹ ọmọshare re, gbe jẹ o ji muwẹro nẹ wo muegbe rẹ orọnvwe re.

Wo muegbe rẹ oyan rẹ ọmọtẹ vẹ ọmọshare re?

Oyan rẹ ọmọtẹ vẹ ọmọshare se sun kpo orọnvwe, ọtiọyena, roro kpahen iruemu ru wo vwori, re sa vwẹ ukẹcha phia yẹrẹ so imuoshọ kẹ oyerinkugbe na. Kerẹ udje, roro kpahen ẹkpo nana:

• Oyerinkugbe rẹ orua. Oborẹ wo nene ihwo rẹ orua wẹn yerẹn wan​—marho vwẹ ọke rẹ ofu de dje we, dje oborẹ wo che nene ọrivẹ rẹ orọnvwe wẹn yerin wan.

  Odjekẹ ri Baibol: “We siobọnu koka koka rẹ ivun emiovwo ọgangan, ophu, ophu ọgangan, ovan kugbe ekan ẹhanrhọn, ọtiọyen ji te kemu kemu rọ sua omaẹwan.”​—Ẹfesọs 4:31.

  Nọ oma wẹn: ‘Ihwo rẹ orua mẹ cha rhọnvwe nẹ mi nene ayen yerẹn vwẹ idjerhe rẹ ọghọ? Ọke me vẹ ọvo usun rayen de vwo ẹghwọ, me vwẹ ẹwẹn kpotọ rhuẹrẹ ẹghwọ na phiyọ, gbanẹ ivun miovwo uvwe je phraphro?’

  

• Omaevwoze. Wọ da rọvwọn re, ofori nẹ wo roro kpahen ọdavwẹ rẹ ọrivẹ orọnvwe wẹn, wọ je nuẹ nene ọdavwẹ rọyen.

  Odjekẹ ri Baibol: “E jẹ ohwo ọvuọvo rha guọnọ erhuvwu rẹ ohwo ọfa, ọ dia ọromobọ rọye-en.”​—1 Kọrẹnt 10:24.

  Nọ oma wẹn: ‘Ọkieje yen me vwọ guọnọ nẹ e ru erọnvwọn vwo nene obo ri je vwe? Ihwo efa ni vwe kerẹ ohwo rọ sa nuẹ? Idjerhe vọ yẹn mi vwo djephia nẹ mi phi ọdavwẹ rẹ ihwo efa vwọ kobaro kẹ ọmẹ?’

• Omaevwokpotọ. Omamọ rẹ ọrivẹ orọnvwe fobọ rhọnvwaphiyọ echobọ rọyen ji yovwunu nẹ otọ rẹ evun cha.

  Odjekẹ ri Baibol: “Avwanre eje ruẹ chọ ọke buebun.”​—Jems 3:2.

  Nọ oma wẹn: ‘Mi fobọ rhiabọreyọ echobọ mẹ, gbanẹ mi guomariase? Ivun miovwo uvwe ọke rẹ ihwo da vwẹ uchebro kẹ vwẹ kpahẹn ẹdia mi de ru yovwinphiyọ?’

• Igho. Ohwo ro mu igho ghwọrọ-ọ kẹnoma kẹ obo re ma so ebẹnbẹn vwẹ orọnvwe.

  Odjekẹ ri Baibol: “Ono vwẹ usun rẹ ovwan na rọ guọnọ bọn uwevwin ro kpenu, ro che je chidia totọ tavwen rere o roro uchunu rọ cha ghwọrọ ọ sa vwọ riẹn sẹ o vwo igho ro che te vwọ bọn re?”​—Luk 14:28.

  Nọ oma wẹn: ‘Mi se suẹn oborẹ me ghwọrọ igho wan, gbanẹ ọkieje me vwọ riosa? Mavọ yen mi vwo djephia nẹ mẹvwẹ ohwo rọ riẹn igho ghwọrọ?’

• Oyerinkugbe wẹn vẹ Jihova. Wọ da dia ọvo usun rẹ Iseri ri Jihova, ofori nẹ wọ vwẹ ọkieje vwo yono Baibol na ji kpo emẹvwa rẹ Inenikristi.

  Odjekẹ ri Baibol: “Omavwerhovwẹn dia vwọ kẹ ihwo re riẹnre nẹ ayen guọnọ odjekẹ rẹ Ọghẹnẹ.”​—Matiu 5:3.

  Nọ oma wẹn: ‘Me davwẹngba vwọ sẹro rẹ oyerinkugbe mẹ vẹ Jihova? Oyerinkugbe mẹ vẹ Jihova yẹn ma ghanre kẹ vwẹ, gbanẹ me vwẹ uphẹn kẹ erọnvwọn efa nẹ i gbowọphiyọ?’

Obo ra ta na kọna: Omamọ rẹ ọrivẹ yẹn ohwo ru wọ cha rọvwọn ghene guọnọ dẹn. Wọ da davwẹngba ru oborẹ wo se ru eje vwọ dia omamọ ohwo, ku wọ sa yan kanre ohwo kerẹ owẹ na.