Die Yen Baibol na Ta Kpahen Orukeri?
Ẹkpahọnphiyọ ri Baibol na
Ohwo da tobọ no nẹ ọyen vwo uturhi ro vwo ru orukeri, ọnana vwọso uchebro ri Baibol rọ tare nẹ, “Wọ ta nẹ, Mi che ruo ọtiobo ro ru vwe na-a; me cha hwa osa ro bo ro ru vwe hirhe kẹ.” (Isẹ 24:29) Baibol na vọnre vẹ uchebro rọ vwẹ ukẹcha kẹ ihwo buebun vwo phi uruemu rẹ orukeri kparobọ re.
Vwẹ uyovwinrota nana
Die yen chọre e vwo ru orukeri?
Siẹrẹ ohwo de ru we chọ yẹrẹ so omaẹwan kẹ wẹ, ophu se mu we, wo ji se vwo ẹwẹn wo vwo gboja kẹ ohwo ro ru we chọ na. Ẹkẹvuọvo, e vwo ru orukeri vwọso obo ri Baibol na tare. Diesorọ?
Ihwo de ruẹ orukeri, ọ vwerhan Ọghẹnẹ oma-a. Vwẹ Baibol na, Jihovaa Ọghẹnẹ da ta: “Orukeri ọmẹ, mẹvwẹ yen cha hwosa.” (Rom 12:19) Baibol na vwẹ uchebro vwọ kẹ ihwo re gbeku, rere ayen vwọ guọnọ idjerhe vwọ rhuẹrẹ kugbe siẹrẹ udu rayen da gba, ukperẹ ayen vwo ru orukeri. (Rom 12:18) Kẹ, die yen ohwo se ru ọ da dianẹ o vwo obo ra sa vwọ rhuẹrẹ ota na phiyọ vwẹ idjerhe rẹ ufuoma-a, yẹrẹ ọ davwẹngba rọyen eje vwọ rhuẹre ota na phiyọ jẹ ọ wianre-e? Baibol na jiriro nẹ a vwẹroso Jihova kidie o che ru erọnvwọn eje shephiyọ.—Une rẹ Ejiro 42:10, 11.
Mavọ yen Ọghẹnẹ gboja kẹ ihwo wan?
Asaọkiephana, Ọghẹnẹ vwẹ uphẹn kẹ igọmẹti nẹ ayen gboja kẹ ihwo ri ruẹ obo re chọre. (Rom 13:1-4) O rhe che kri-i, ko che brorhiẹn hwe ihwo umwemwu na ji si ojaẹriọ no karekare.—Aizaya 11:4.
Mavọ yen mi se vwo phi ẹwẹn rẹ orukeri kparobọ?
Kẹnoma kẹ e vwo brokpakpa brorhiẹn siẹrẹ ophu de mu we. (Isẹ 17:27) Ọke buebun na yen ihwo re fobọ muophu vwo ruẹ erọnvwọn rẹ ayen viẹ idiekpọvwẹ kpahan vwẹ obaro obọ. Ẹkẹvuọvo, ihwo re reyọ ọke vwo roro kpahen oborẹ ayen che ru bẹsiẹ ayen ki ruo, bro omamọ rẹ orhiẹn.—Isẹ 29:11.
Guọnọ uyota na. (Isẹ 18:13) Ohwo re gbeku jovwore sa nọ oma rọyen, ‘O vwo erọnvwọn evo re me riẹnre-e, ro se mu ọ ro gbe vwe ku na vwo ru obo ro ruru na? Ọ hẹ ẹdia rẹ ukeke? Gbanẹ o ru obo ro ruru na vwọrẹ jẹriẹn?’ Ọke evo, avwanre se roro nẹ arogba yen ohwo vwo gbe avwanre ku, jẹ vwọrẹ uyota, ọ chọrọ obọ.
Ororochọ vwọ kpahen orukeri
Ororochọ: Baibol na rhọnvwephiyọ orukeri rọ vwọ tanẹ “ẹro vwọ kẹ ẹro.”—Livitikọs 24:20, Contemporary English Version.
Uyota: Urhi rẹ Izrẹl awanre rọ tare nẹ “ẹro vwọ kẹ ẹro” vwọso orukeri romobọ. Urhi nana vwẹ ukẹcha vwọ kẹ iguẹdjọ na vwo gboja kẹ ihwo ri ruchọ na vwẹ idjerhe ro fo ayen.b—Urhi Rivẹ 19:15-21.
Ororochọ: Kidie nẹ Baibol na rhọnvwephiyọ orukeri romobọ-ọ, kọyen a cha sa chochọn rẹ oma rẹ avwanre siẹrẹ a dahẹ ẹdia rẹ imuoshọ-ọ.
Uyota: A dahẹ ẹdia rẹ imuoshọ, ohwo vwo uturhi rọ vwọ chochọn rẹ oma rọyen yẹrẹ guọnọ ukẹcha rẹ igọmẹti. Ẹkẹvuọvo, Baibol na tare nẹ a kẹnoma kẹ ozighi egbe.—Isẹ 17:14.
a Jihova yen odẹ rẹ Ọghẹnẹ kirobo ra mrẹrẹ vwẹ Baibol na.
b Wọ sa vwọ riẹn urhi nana kpobarophiyọ, ni uyovwinrota na “Die Yen o Mudiaphiyọ ra Vwọ “Vwẹ Ẹro hwa Osa rẹ Ẹro”?”