Tivọ Yen Me da sa Mrẹ Iphiẹrophiyọ?

Ẹkpahọnphiyọ ri Baibol na

Baibol na tare nẹ Ọghẹnẹ guọnọ kẹ avwanre omamọ rẹ akpọ “vẹ iphiẹrohọ”a vwẹ obaro na. (Jerimaya 29:11) Vwọrẹ uyota, Ọghẹnẹ kẹ avwanre Baibol na rere womarẹ “uchebro ro nẹ Isiesi Ọfuanfon na rhe, kẹ avwanre se vwo iphiẹrophiyọ.” (Rom 15:4) Kirobo rẹ a cha mrẹ, uchebro rẹ aghwanre rọhẹ Baibol na sa kẹ avwanre iphiẹrophiyọ, womarẹ ọ cha vwọ chọn avwanre uko vwo hirharoku ebẹnbẹn ri kẹdi kẹdẹ, jẹ ive rọyen kẹ avwanre uvi rẹ iphiẹrophiyọ kpahen obaro na.

Vwẹ aruọbe nana

Mavọ yen Baibol na sa vwọ chọn avwanre uko vwo vwo iphiẹrophiyọ?

Baibol na sa chọn avwanre uko vwo vwo iphiẹrophiyọ, kidie ọ vuẹ avwanre erọnvwọn kiriguo rẹ avwanre se ru vwo ru akpeyeren avwanre yovwinphiyọ. E jẹ a fuẹrẹn idje evo ri djerephia.

Vwẹroso odjekẹ ri Baibol na. Une rẹ Ejiro 119:105 da ta: “Ota wẹn ọye urhukpẹ kẹ awọ mẹ kugbe orẹmrẹ kẹ idjerhe mẹ.” Urhukpẹ ọ riẹn la se ru erọnvwọn ivẹ. Ọ sa nẹrhẹ a mrẹ erọnvwọn rehẹ evun rẹ otọ re kerẹ avwanre vẹ i ri sherabọ. Ọtiọyen odjekẹ ri Baibol je chọn avwanre vwo phi ebẹnbẹn avwanre hirharokuẹ kparobọ, rọ nẹrhẹ avwanre vwo iphiẹrophiyọ nẹdẹ aruẹdẹ. Iyono ri Baibol sa kẹ avwanre ẹgba je vwẹ “omavwerhe vwọ kẹ udu” rẹ avwanre. (Une rẹ Ejiro 19:7, 8) Vwẹ idjerhe vuọvo na, Baibol na je ta ota kpahen ọhọre Ọghẹnẹ vwọ kẹ ihworakpọ vẹ otọrakpọ na vwẹ obaro na. Iphiẹrophiyọ tiọyena sa kẹ avwanre uvi rẹ aghọghọ vẹ otekẹvwẹ.
Vwẹ uphẹn kẹ ihwo efa nẹ ayen chọn wẹ uko. Ọke rẹ ofu rẹ akpọ de dje avwanre, ọ sa nẹrhẹ a kẹnoma kẹ orua vẹ igbeyan rẹ avwanre. Ẹkẹvuọvo, Baibol na vuẹ avwanre nẹ e ru ọtiọye-en, kidie ọnana sa nẹrhẹ e brorhiẹn rẹ ẹkpa ji ru obo re chọre. (Isẹ 18:1) Igbeyan vẹ ihwo rẹ orua sa dia esiri rẹ ọbọngan vwọ kẹ avwanre. Ayen je sa vwẹ iroroẹjẹ evo vwọphia re sa chọn avwanre uko vwọ riẹn obo re se vwo yerin ghene ẹdia evo re pha gangan. (Isẹ 11:14) Ọ da tobọ dianẹ ayen ke se ru te ọtiọye-en, ayen ji se bicha avwanre je nẹrhẹ oma vwerhen avwanre, ọtiọyena ke se vwo ẹgba re vwo vwo erhiorin bẹsiẹ erọnvwọn ki yovwin.—Isẹ 12:25.
Nẹrhovwo rhe Ọghẹnẹ. Baibol na da ta: “Mu oghwa wẹn nyẹ Ọrovwohwo [“Jihova,” NW ], kọ sẹro wẹ; ọ cha sa rhọvwe nẹ e ghwie ọvwata-a.”b (Une rẹ Ejiro 55:22) Ọ gbare e vwo se Jihova, “Ọghẹnẹ rọ kẹ ohwo iphiẹrophiyọ.” (Rom 15:13) Wọ sa vuẹ ‘ebẹnbẹn wẹn ejobi,’ vẹ imuẹro nẹ ọ cha vwẹrote we. (1 Pita 5:7, eta rehẹ obotọ na) Vwọrẹ uyota, Baibol na tare nẹ, “Ọ cha kẹ ovwan ogangan, ọ cha vwẹ awọ rẹ ovwan vwo muotọ kokoroko.”—1 Pita 5:10.
Vwẹ uphẹn kẹ ebẹnbẹn rere ayen ru iphiẹrophiyọ wẹn gan. Baibol na veri nẹ “ohwo rọ kerhọn mẹ [Ọghẹnẹ] oma ko fuo, . . . ọ gbe djẹ oshọ rẹ umiọvwo-o.” (Isẹ 1:33) Ọke ogiribo ọgangan vwọ guọghọ uwevwin rẹ aye ọvo vwẹ Australia re se Margaret, ekuakua rẹ akpeyeren rọyen buebun de ghwru vabọ. Ukperẹ ofu vwo dje, o de yono uyono ọghanghanre ọvo nẹ ekuakua rẹ akpeyeren sa dia e rẹ ọmọke. Ọtiọyena, owenvwe rọ vwọ tẹnrovi obo re ma ghanre kerẹ ihwo rẹ orua, igbeyan, oyerinkugbe rọyen vẹ Jihova kugbe iphiẹrophiyọ ri Baibol na da rhe ganphiyọ.—Une rẹ Ejiro 37:34; Jems 4:8.

Iphiẹrophiyọ vọ yen Baibol na vwọ kẹ ihwoeje?

Baibol na veri nẹ ihworakpọ che yeren omamọ rẹ akpọ vwẹ otọrakpọ na. Ọnana cha phia kẹrẹkpẹ. Vwọrẹ uyota, ebẹnbẹn rẹ ihworakpọ hirharokuẹ enẹna djerephia nẹ avwanre yerẹn vwẹ “ẹdẹ re koba na.” (2 Timoti 3:1-5) O rhe che kri-i, Ọghẹnẹ kọ cha dia osun rẹ akpọ na ji si ojaẹriọ vẹ oshenyẹ vwo no. O che ru ọtiọyen womarẹ usuon rọyen re se Uvie rẹ Ọghẹnẹ. (Daniẹl 2:44; Ẹvwọphia 11:15) Usuon nana yen Jesu vwo vwẹ ẹwẹn ọke rọ vwọ ta vwẹ ẹrhovwo rẹ udje rọyen: “Jẹ Uvie wẹn rhe. Jẹ e ru ọhọre wẹn vwẹ otọrakpọ na.”—Matiu 6:9, 10.

E dje ọhọre rẹ Ọghẹnẹ vwọ kẹ ihworakpọ phephẹn vwẹ Baibol na. Vwo oniso ebẹnbẹn evo rẹ Uvie rẹ Ọghẹnẹ che si no:

Owenvwe gba cha dia ọfa-a. “Akpọ na yovwi emu buebu.”—Une rẹ Ejiro 67:6.
Ọga gbe cha dia ọfa-a. “O gbi vwo ohwo rẹ orere na ọvuọvo rọ sa tanẹ, Me mwọga-a.”—Aizaya 33:24.
Ughwu gbe cha dia ọfa-a. Ọghẹnẹ “che rien ameoviẹ eje vwo nẹ ẹro [rẹ ihworakpọ], ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a. Erọnvwọn awanre na wanvrẹ re.”—Ẹvwọphia 21:3, 4.

a Avwanre da guọnọ orọnvwọn ji vwo imuẹro nẹ avwanre che vwo orọnvwọn na, ọnana kẹ avwanre iphiẹrophiyọ. Iphiẹrophiyọ sa dia obo re rhẹro rọyen yẹrẹ emu re phiẹrophiyọ.

b Jihova yen odẹ rẹ Ọghẹnẹ kiribo ra mrẹrẹ vwẹ Baibol na.—Une rẹ Ejiro 83:18.

Ẹkpo ri Baibol kpahen iphiẹrophiyọ

Job 5:16: “Ogbere ko vwo iphiẹrohọ.”

Otọ rọyen: Ihwo ri roro nẹ e ni ayen fi emuọvo-o nonẹna, sa vwẹroso Ọghẹnẹ nẹ ọ cha vwẹrote ayen ọke rẹ ayen de bro rhe vwọ kẹ ukẹcha.

Une rẹ Ejiro 27:14: “Hẹrhẹ Ọrovwohwo na; gan oma, re wo jẹn udu wẹn yivwaro, uyota, hẹrhẹ Ọrovwohwo na.”

Otọ rọyen: A da vwẹroso Jihova Ọghẹnẹ, ke che vwo ogangan vẹ uduefiogbere. O che chukoku ihwo re vwẹrosuọ-ọ.

Une rẹ Ejiro 62:5: “Ọghẹnẹ ọvo ọye ẹnwe mẹ fọre gbiei hẹrhẹ, kidie iphiẹrohọ mẹ obọ rọye o nẹ cha.”

Otọ rọyen: Ihwo re vwẹroso Ọghẹnẹ ji vwo odirin chirakon rẹ ebẹnbẹn se vwo imuẹro nẹ o che phioba phiyọ ebẹnbẹn na vwẹ ọke ro fori.

Isẹ 20:22: “Wọ vwẹ evun tanẹ, Me cha choja rẹ umwemwu yena-a; hẹrhẹ Ọrovwohwo na, ọye ọvo cha chọ wẹ uko.”

Otọ rọyen: Siẹrẹ ohwo da kpare ophu rẹ avwanre yẹrẹ ru obo re da avwanre, avwanre sa kẹnoma kẹ orukeri siẹrẹ a da vwẹroso Jihova. Ọyen vwo ẹgba vẹ owenvwe rọ vwọ chọn avwanre uko ji si kemu kemu avwanre rioja rọyen no.

Hibru 6:19: “Avwanre vwo iphiẹrophiyọ [rẹ Inenikristi] nana kerẹ ọtan vwọ kẹ erhi na, o muẹro je ghwotọ.”

Otọ rọyen: Kirobo rẹ ọtan yọnrọn okuna vwẹ ọke rẹ ogiribo ye, ọtiọyen uvi rẹ iphiẹrophiyọ ro nẹ obọ rẹ Ọghẹnẹ rhe se si ẹnwan rẹ avwanre kpotọ, kọ cha nẹrhẹ e vwo ẹwẹn ri doẹ vẹ iroro abavo je bọn esegbuyota rẹ avwanre gan. Iphiẹrophiyọ je sa bọn avwanre gan vwo chirakon rẹ ebẹnbẹn.