OBO RE SE VWO PHI UTUOMA KPAROBỌ

2 | Wo Ruẹ Orukeri-i

Baibol na da ta:

“Wọ vwẹ umwemwu hwa osa re umwemwu-u. . . . Udu wẹn da gba, wọ vẹ ohwo ọvuọvo ghwọ-ọ. Imoni mẹ, wa reihri-i, . . . kidie e siro nẹ, ihriẹriọ ọ mẹ, mẹvwẹ re hwa osa, eriyin Ọrovwohwo tare.”—ROM 12:17-19.

Obo ro Mudiaphiyọ:

Dede nẹ ivun miovwo avwanre siẹrẹ e de ru avwanre chọ, Ọghẹnẹ rhọnvwere nẹ avwanre ru orukeri-i. Ukperẹ ọtiọyen, Ọghẹnẹ guọnọre nẹ e chirakon kidie kẹrẹkpẹ o che si oshenyẹ no.— Une Rẹ Ejiro 37:7, 10.

Obo Wo Se Ru:

Ọke rẹ ihworakpọ ri jẹgba de ru orukeri ọ nẹrhẹ utuoma rhoma ganphiyọ. Ọtiọyena, ohwo de gbe avwanre ku yẹrẹ wan avwanre oma, ofori nẹ e ruo keri-i. Davwẹngba wo vwo sun ophu wẹn vwẹ idjerhe rẹ ufuoma. Vwẹ ẹdia evo, obo ri me yovwin yen a vwọ kpairoro vrẹ obo re phiare na. (Isẹ 19:11) Ẹkẹvuọvo, ọ da dia oborẹ shephiyọ wọ sa niyẹnrẹn rẹ obo re phiare na. Kerẹ udje, ọ da dianẹ wẹ yen e ru chọ wọ sa niyẹnrẹn obo re phiare na kẹ enọkpa yẹrẹ ihwo rẹ ẹdia usuon efa.

Uruemu rẹ orukeri rhoma sua ebẹnbẹn ọfa ukperẹ ọ vwọ rhuẹrẹ ẹdia na phiyọ

Kọ da dianẹ o vwo idjerhe wọ sa vwọ rhuẹrẹ ebẹnbẹn na phiyọ vwọrẹ ufuoma-a vwo? Yẹrẹ ọ da dianẹ wo ru obo ro fori nẹ wo ru vwọ rhuẹrẹ ebẹnbẹn na phiyọ vwẹ idjerhe rẹ ufuoma re vwo? Wo ru orukeri-i. Ọyena cha nẹrhẹ ẹdia na bra phiyọ. Ukperẹ ọtiọyen, phi utuoma kparobọ. Wọ sa vwẹroso Ọghẹnẹ kpahen obo rọ cha vwọ rhuẹrẹ ebẹnbẹn na phiyọ. “Vwẹ ẹro vwọ suọ, ko ruo kẹ wẹ.”—Une Rẹ Ejiro 37:3-5.

Oborerhiẹromrẹ Vwẹ Akpeyeren—ADRIÁN

Phi Uruemu rẹ Orukeri Kparobọ

Ọke rẹ Adrián vwọ hẹ eghene o gbe ozighi mamọ fikirẹ obo re ruro wanre. Ọ da ta: “Ọkieje yen mi vwo muẹ ọhwunu vwọ họnra, jẹ ọke buebun e hwe vwe joma ghwẹ, ọbara me vọn opharo mẹ, ayen me je yan juvwevwo vwẹ urhuvwu.”

Adrián tuẹn uyono ri Baibol phiyọ ọke rọ vwọ hẹ ẹgbukpe 16. Ọ da je ta: “Uyono ri Baibol mẹ vwọ yan phiyọ obaro ye, mi de rhi noso nẹ ofori nẹ mi ru ewene vwẹ akpeyeren mẹ.” Ofori nẹ me kẹnoma kẹ uruemu rẹ utuoma kugbe ozighi. Obo ri me te ẹwẹn rọyen yen obo ro yonori vwẹ Rom 12:17-19 rọ ta ota kpahen e vwo jẹ orukeri eruo. Ọ da ta: “O de rhi muvwẹro nẹ Jihova che phioba phiyọ oshenyẹ vwẹ ọke ro fori. Ememerha na mi de rhi siobọnu orharhe rẹ uruemu rẹ ozighi ri mi vwori na.”

Ovwọnvwọn rẹ ẹdẹ ọvo, ẹko rẹ ighene evo ri nene uvwe họnra jovwo da rhoma re họnre ovwẹ. Ọ ro suẹn ẹko na de bunu: “Jẹ a họnre!” Adrián da ta: “Mi de ghwe vwo ẹwẹn me vwọ họnre.” Ukperẹ ọ vwọ họnre, ọ da nẹrhovwo rhe Jihova ji vrẹn nẹ etiyin.

Adrián da je ta: “Ẹdẹ rọ vwọ kpahọn me da mrẹ ọ ro suẹn ẹko na, udje nana ọyen ọvo yen herọ. Me vwọ mrẹ, ivun de mio uvwe ke me guọnọ ruo keri, me da rhoma rẹ Jihova nẹ ọ chọn vwẹ uko rere mi se vwo sun oma mẹ. O gbevwunu rẹ eghene na vwo bru vwe rhe je vuẹ vwẹ nẹ mi vwo ghovwo ọyen fikirẹ obo re phiare vwẹ ason rẹ odẹ ye. Vwọrẹ uyota, me ghene guọnọ dia kerẹ owẹ. Me guọnọ yono Baibol na. Oma vwerhen ovwẹ mamọ nẹ mi se sun ophu mẹ! Me kpẹvwẹ Ọghẹnẹ nẹ mi ruro keri-i, me vẹ ọyen da rhe ton uyono ri Baibol phiyọ.”