Ono Yen Meri Magdalini?
Ẹkpahọnphiyọ ri Baibol Na
Meri Magdalini ọyen odibo ri Jesu ro fuevun. Ọ sa dianẹ odẹ rọyen Magdalini ọyen e vwo se orere ọvo re se Magdala (yẹrẹ Magadan), rọ kẹrẹ Abadi ri Galili. Ọ je sa dianẹ etiyin yen Meri diare.
Meri Magdalini ọyen ọvo usun rẹ eya ri nene Jesu vẹ idibo rọyen vwẹ iruo aghwoghwo na. Ọ je vwo ukẹcha vwọ kẹ Jesu vẹ idibo rọyen. (Luk 8:1-3) Meri etiyin ọke re vwo hwe Jesu, ọ je hẹ ọvo usun rẹ ihwo re ka mrẹ Jesu ra vwọ rhọvwọn nẹ ushi rhe.—Mak 15:40; Jọn 20:11-18.
Meri Magdalini igberadja?
Baibol na vuẹ avwanre nẹ Meri Magdalini igberadjaa. Oborẹ Baibol na ta kpahọn yen Jesu djẹ ẹwẹn rẹ Idẹbono ighwrẹn nẹ oma rọyen.—Luk 8:2.
Kẹ, diesorọ ihwo buebun vwo roro nẹ Meri Magdalini igberadja? Kidie ikpe ujorin buebun vwọ wan ri Meri vwo ghwu nu, ihwo evo tare nẹ ọyen yen igberadja rẹ Baibol na se odẹ rọyeen, rọ vwẹ ameoviẹ rọyen vwọ kpọrhọ awọ ri Jesu, ji vwẹ ẹton rẹ uyovwin rọyen vwo rien no. (Luk 7:36-38) Ẹkẹvuọvo, o vwo asan vuọvo rẹ Baibol na vwọ rhọvwenphiyọ oborẹ ayen tare naa.
Meri Magdalini ọyen “ọyinkọn vwọ kẹ iyinkọn na”?
Ẹjo. Ẹga ri Fada se Meri “St. Mary Magdalene” vẹ “ọyinkọn vwọ kẹ iyinkọn na” kidie Meri ọyen ọvo usun rẹ ihwo re ka ghwa iyẹnrẹn rhe Iyinkọn na nẹ Jesu vrẹ nẹ ushi re. (Jọn 20:18) Ẹkẹvuọvo, ọ dia ọnana ko mudiaphiyọ nẹ Meri ọyinkọọn. Jẹ o vwo asan vuọvo vwẹ Baibol na re de se ọyinkọọn.—Luk 6:12-16.
E si Baibol na re vwẹ oba rẹ ẹgbukpe ujorin rẹsosuọ. Jẹ, o ri vwo te ikpe ujorin esan ilori ri ishọshi de ri titi Meri Magdalini kerẹ ohwo rode. Vwẹ ẹbe re siri vwẹ ikpe ujorin rivẹ rhi te ọ rẹ erha rọ dia ẹbẹre ọvo ri Baibol naa, ọ tare nẹ evo vwẹ usun ri idibo ri Jesu rioma kpahen Meri. Enana ikuegbe ghevweghe re dia ẹbẹre ọvo rẹ ẹbe ọfuafon naa.
Meri Magdalini aye ri Jesu Kristi?
Ẹjo. Vwọrẹ uyota, Baibol na djerhe phephẹn nẹ Jesu rọvwọnree.a
a Ni uyovwinrota na “Was Jesus Married? Did Jesus Have Siblings?”