Die Yen Urhi Oro Na?

Ẹkpahọnphiyọ ri Baibol na

Ota na “Urhi Oro,” vwomaphia vwẹ Baibol na-a. Ẹkẹvuọvo, ihwo buebun reyọ urhi nana phiyọ uruemu rẹ urhi ri Jesu yonori. Vwẹ Ota Rọyen vwẹ enu rẹ Ugbenu na, Jesu da ta: “Erọnvwọn eje rẹ ovwan guọnọre nẹ ihwo ru kẹ ovwan, ovwan ji ru ọtiọyen kẹ ayen.” (Matiu 7:12; Luk 6:31) E ji dje Urhi Oro na vwẹ idjerhe ọtiọna: “Ru vwọ kẹ ihwo efa kirobo rẹ wọ guọnọre nẹ ayen ru kẹ wẹ.”​—⁠Encyclopedia of Philosophy.

• Die yen Urhi Oro na mudiaphiyọ?

• Idjerhe vọ yen Urhi Oro na se vwo fierere kẹ avwanre?

• E mu Urhi Oro na kpahen oborẹ avwanre sa mrẹ reyọ mie ihwo efa?

• Mavọ yen wọ sa vwọ reyọ Urhi Oro na vwo ruiruo?

Die yen Urhi Oro na mudiaphiyọ?

Urhi Oro na jiriro kẹ avwanre nẹ e ru vwọ kẹ ihwo efa kirobo rẹ avwanre guọnọre nẹ e ru kẹ avwanre. Kerẹ udje, o je ihwo siẹrẹ ihwo efa de muọghọ, dje ẹguọnọ vẹ ẹroesiri kẹ ayen. Ọtiọyena, o che yovwin siẹrẹ avwanre de ji “ru ọtiọyen” vwọ kẹ ihwo efa.​—⁠Luk 6:⁠31.

Idjerhe vọ yen Urhi Oro na se vwo fierere kẹ avwanre?

A sa reyọ Urhi Oro na vwo ruiruo vwẹ ẹdia sansan vwẹ akpeyeren rẹ avwanre. Kerẹ udje, ọ sa . . .

• Bọn orọnvwe gan.​—⁠Ẹfesọs 5:​28, 33.

• Vwẹ ukẹcha kẹ esẹ vẹ ini vwọ yọnrọn emọ ghwanre.​—⁠Ẹfesọs 6:⁠4.

• Nẹrhẹ igbeyan, irivẹ, vẹ ihwo a vẹ ayen gba wian vwẹ asan ọvo vwo uvi rẹ oyerinkugbe.​—⁠Isẹ 3:​27, 28; Kọlose 3:⁠13.

A je mrẹ odjekẹ vuọvo ro shekpahen Urhi Oro na vwẹ ẹbẹre sansan ra vwẹ Hibru si vwẹ Baibol na, rẹ ihwo buebun riẹn phiyọ Old Testament. Urhi nana yen “Urhi na [ẹbe iyorin rẹsosuọ ri Baibol na] kugbe Emraro na [ẹbe rẹ emraro na] mudiaphiyo.” (Matiu 7:12) Vwẹ idjerhe ọfa, Urhi Oro na shekpahen uyota ọghanghanre ọvo vwẹ Ẹbẹre ra Vwẹ Hibru si Vwẹ Baibol na, rọ dia ẹguọnọ rẹ irivẹ.​—⁠Rom 13:​8-10.

E mu Urhi Oro na kpahen oborẹ avwanre sa mrẹ reyọ mie ihwo efa?

Ẹjo. E muro kpahen a vwọ kẹ ihwo efa. Jesu vwọ ta ota kpahen Urhi Oro na, ọ dia ọ ta ota kpahen oborẹ avwanre se ru kẹ ihwo efa ọvo-o, ẹkẹvuọvo tobọ te ivwighrẹn rẹ avwanre. (Luk 6:​27-31, 35) Ọtiọyena, Urhi Oro na jiriro kẹ ihwo nẹ ayen ru emuesiri kẹ ihwo eje.

Mavọ yen wọ sa vwọ reyọ Urhi Oro na vwo ruiruo?

1. 1. Vwo oniso. Vwo oniso rẹ ihwo re riariẹ owẹ phiyọ. Kerẹ udje, wọ sa mrẹ ohwo ro nẹ eki cha ro mu eghwa rẹ emu, wo se nyo kpahen ohwo rọhẹ họspito, yẹrẹ wo se noso nẹ ofu dje ohwo ru wẹ vẹ ọyen gba wian vwẹ asan ọvo. Wọ da “guọnọ erhuvwu rẹ ihwo efa,” o muẹro nẹ uphẹn che rhiephiyọ wọ vwọ ta yẹrẹ ru orọnvwọn rọ cha cha ihwo efa uko.​—⁠Filipae 2:⁠4.

2. 2. Vwo erorokẹ. Phi oma wẹn phiyọ ẹdia rẹ ohwo na hepha. Mavọ yen oma che ru we wọ dahẹ ẹdia rẹ ohwo na hepha? (Rom 12:15) Wọ da davwẹngba vwo vwo ẹruọ rẹ ihwo efa, ọnana che mu we vwọ vwẹ ukẹcha kẹ ayen.

3. 3. Dia ohwo rọ nuẹ. Karophiyọ nẹ ihwo eje fẹnẹre. Oborẹ ihwo efa guọnọre nẹ e ru kẹ ayen sa fẹnẹ oborẹ wọ guọnọre nẹ e ru kẹ wẹ. Ọtiọyena, vwẹ usun rẹ erọnvwọn buebun wo se ru vwọ kẹ ayen, davwẹngba vwọ sane ọ ro me je ayen.​—⁠1 Kọrẹnt 10:⁠24.