ENỌ RẸ IHWO RI SE ẸBE AVWANRE NỌRE

Ephọ ivẹ vọ yen ọyinkọn Pọl ta ota kpahan vwẹ Galesha 4:24?

Ọyinkọn Pọl vwọ ta ota kpahen oyerinkugbe rẹ Ebraham vẹ Sera kugbe Hagar vwori nu, ọ da ta: “O vwo oborẹ erọnvwọn nana mudiaphiyọ; eya nana mudiaphiyọ ọphọ ivẹ.” (Gal. 4:22-24) Vwẹ obuko re, Iseri ri Jihova vwo ẹruọ rọyen nẹ ephọ ivẹ nana yen ọphọ kpokpọ vẹ ọphọ rẹ Urhi na. Ẹkẹvuọvo, a vwọ rhoma fuẹrẹn, o muẹ avwanre ẹro nẹ ofori e ru ewene phiyọ. Ọhọhọre nẹ ọ dia ọphọ kpokpọ na yen ọyinkọn Pọl ta ota kpahaan, ẹkẹvuọvo ọphọ rẹ Ebraham. E jẹ a mrẹ iroro evo re sorọ.

Pọl rionbọ kpo Ugbenu ri Sinae ọ vwo ta ota kpahen odibo aye na Hagar. (Gal. 4:25) Ọphọ rẹ Urhi rẹ Jihova vẹ ihwo rẹ Izrẹl re re vwẹ Ugbenu ri Sinae vwẹ 1513 B.C.E mudiaphiyọ Hagar. (Ẹyan. 19:5, 6) Urhi na karophiyọ ihwo ri Ju nẹ ayen eviẹn vwọ kẹ umwemwu, kidie o vwo ohworakpọ vuọvo rọ sa yọnrọn Urhi na gbagbaa. Ọphọ nana sa vwẹ ukẹcha kẹ ẹgborho rẹ Izrẹl vwọ vughe Mesaya na, ohworakpọ vuọvo rọ sa yọnrọn Urhi na gbagba. Ọke rẹ Mesaya na vwọ vwẹ arhọ rọyen vwo ze izobo nu, o de rhie uphẹn phiyọ kẹ ihworakpọ re gbaree ri vwo nẹ abọ rẹ umwemwu vẹ ughwu. (Gal. 3:19, 24, 25) Jesu vwo ru ọhọre rẹ Ọghẹnẹ gba nu, Urhi na de rhi vwoba.​—Rom 10:4.

Pọl dje ofẹnẹ rọhẹ uvwre rẹ Hagar kugbe Sera, “aye rọ dia ọmuvwiẹ” ro vwiẹre “womarẹ ive.” (Gal. 4:23) Ive yena yen ọphọ rẹ Ebraham na. (Gal. 3:29; 4:28, 30) Vwẹ Jẹnẹsis 22:18, Jihova de djisẹ rẹ ọphọ na rọ vwọ ta: ‘Womarẹ ọmọ wẹn [Ebraham] kọyen ẹgborho rehẹ akpọ na eje che vwo vwo ebruphiyọ kẹ oma rayen, kidie wọ kerhọ rẹ urhuru mẹ.’

Ọphọ yena rẹ Jihova vẹ Ebraham re re na vwẹ evuẹ efa phia kpahen ive rẹ Jihova veri vwẹ Idẹn. (Jẹn. 3:15) Ive na djerephia nẹ ọmọ ra mraro rọyen phiyotọ na, uvwiẹ rẹ Ebraham yen o che nurhe. Pọl djere fiotọ nẹ siẹrẹ a da ta ota kpahen “ọmọ” na, Jesu Kristi yen ohwo rẹsosuọ rọ rionbọ ra. Ẹkẹvuọvo vwọ kẹ ihwo re “dia i ri Kristi,” kọyen ihwo 144,000 ri che nene Jesu sun vwẹ Uvie rọyen na, ayen jẹ usun ọmọ rudje na. (Gal. 3:16, 29; Ẹvwọ. 14:1-3) Orugba rẹ ive rẹ Ọghẹnẹ kẹ Ebraham na cha ghwa ebruphiyọ buebun vwo rhe ihwo ri rhiabọreyọ Jesu ji nyupho rọyen.

Die yen udje rẹ eya nana ivẹ rẹ Pọl ta ota kpahen mudiaphiyọ? Ọ tare nẹ ọ da dianẹ ihwo ri Ju rẹ ọke rọyen tikpẹrikpẹ phiyotọ nẹ Urhi na kọyen ayen nene, ayen cha dia eviẹn kerẹ Hagar rhirin rhirin. Ẹkẹvuọvo, ayen de rhiabọreyọ Jesu Kristi rọ dia “ọmọ” rẹ Ebraham, ayen ke cha dia ọmuvwiẹ kerẹ Sera. Ayen ki vwo uvi ọmuvwiẹ vwo nẹ abọ rẹ umwemwu vẹ ughwu. (Jọn 8:32-34) Ayen rhe rhiabọreyọ Jesuu, Urhi na rhe che se sun ayen bru Kristi raa, rọ dia oboresorọ ra vwọ reyọ vwo mua.

Ihwo ri Galesha buebun rẹ Pọl si ileta rhe dia ihwo ri Juu, ọtiọyena ayen nama hẹ otọ rẹ Urhi naa. Ihwo ri Ju evo herọ ri si isiesi nẹ Igiye re dia Inenikristi ji nene Urhi na, nẹ o ji fo rẹ ayen vwọ yanvwe. Pọl nabọ dje fiotọ kẹ ayen nẹ ọyen emu rẹ ẹkpa rẹ ayen vwọ dia “ọviẹn” vwọ kẹ Urhi na kidie ayen vwo “ugbomọphẹ” ro nẹ obọ ri Kristi rhe nure.​—Gal. 5:1, 10-14.